Novembr

Jonasachea poristhiti vixim amkam sogleank khobor na dekhun, to ek bhorvonso dovrunk zaina toslo, vo ovisvaxi munis mhunn amkam disonk puro. Ninevek vochun zhoddttecho sondex diunk Jehovan Jonasak sanglolem. Punn Jehovachem aikonchea bodlek, Jonas eka tarvacher dusrea vatten ‘Deva thaun pollun’ gelo. (Jonas 1:1-3) Tumi Jehovachea zagear aslim zalear, Jonasak anik ek sondhi diupachim? Ghoddie na. Punn, taka anik ek sondhi diunk zai mhunn Jehovak dislem. (Jonas 3:1, 2) Jonas khoreaninch koslo munis aslo tem amkam tannem kelolea magnnea udexim kollon ieta. (Jonas 2:1, 2, 9) Tannem Jehovak zaitea pavtti magnnem kelem mhunn amkam kainch dubhav na. Punn tachea eka magnneam vorvim to fokot Devan dilolea kamam thaun pollun gelʼlo munis nhoi mhunn dison ieta. To ek khalto, upkari, ani Jehovachi adnea pallunk sodhta toslo munis aslo mhunn tachea utrantlean kollon ieta. Tor Jonasan kelʼlea chukicher Jehovan dhean diunk na. Tachea bodlek, tannem tachea magnneak zobab dilo, ani provadeachea kamant taka uzar korit ravlo! Tor eka vhoddilan solʼlo diunchea poilim kan diun aikop kitlem gorjechem! w20.04 15 ¶4-6

Poilea xekddeantlea Kristanvamnim Kristacheo xikounneo manun ghetleo ani teo somzonk povitr xoktechea adaracher patieun ravlim. Heo xikounneo Devachea Utracher adarit asat mhunn tannim sodh korun khatri korun ghetli. (Itihas 17:11, 12; Heb. 5:14) Tancho bhavarth, tankam koxem dista tacher, vo tanchea bhavnancher adarit naslo. Vo bhav-bhoinnam sangata mellon ieunk borem dista dekhun tannim Jehovachi seva korunk na. Bodlek tancho bhavarth Deva vixim tankam aslolea ‘purnn somjikaiecher’ adarit aslo. (Kol. 1:9, 10) Bible-ant aslolim sotam kednanch bodolnant. (St. 119:160) Udharonnak, eka bhavan vo bhoinnin amkam dukhoilem zalear vo tannim ek gombir patok adarlem zalear, Bible-antlim sotam bodolnant. Toxench, amkam somosia astat tednam pasun tim bodolnant. Tor Bible-achi xikounn amkam bore toren khobor asonk zai. Ani ti xikounn khori mhunn ami khatri korun gheunk zai. Bible kitem xikoita tacher amkam ghott bhavarth asot zalear, kotthin poristhiti ieta tednam pasun ami Jehovak visvaxi ravtolim. w20.07 9 ¶6-7

Aplea obhixikt bhavam pasot ami jem kortat tem Jezu apleak kelʼlea sarkem oxem to polloita. (Mt. 25:34-40) Ami Kristachea bhavank tenko diunchi ek mukhel vatt mhunnttlear, Jezun aplea xisank sanglolea xis korpachea kamant purnn toren vantto ghevop. (Mt. 28:19, 20) Jezuche bhav, hem sonvsarbhor cholta tem porgottnnechem kam ‘her menddranchea’ adaranuch korunk xoktat. (Juanv 10:16) Tum her menddrantlo eklo asa zalear, dor ek pavtti tum hea kamant bhag gheta tednam tuka fokot obhixiktanchoch nhoi, punn Jezucho pasun mog asa mhunn tum dakhoun dita. Jehova ani Jezu margdorxon ditat tea kamant ami dan ditat tednam pasun ami tanchea sangata ixttagot zoddttat. (Lukas 16:9) Udharonnak, sonvsarbhorchea kamak lagon ami dan korunk xoktat, zoxem odruxttank sampoddlolea bhav-bhoinnank modot korunk lagon poixe diunk zatat, amchea sobhent lagta to khorch bhagounk pasun ami poixe diunk zatat ani zankam poixeanchi goroz asa mhunn ami zannant, tankam pasun ami modot korunk zata.​—Mho. 19:17. w20.04 24 ¶12-13

Tea bhasaunnent sanglolea pormonnem, utʼtorechea razan “aplea purvozanchea [“Devachi,” NW] porva” korunk na. Hem koxem? Soviet Union-ak, soglea dhormak kabar korun uddounk zai aslem. Taka lagon, tannem tancho odhikar kaddun uddounk proitn kelo. Khorem mhunnttlear, 1918-antuch Soviet sorkaran ‘dev na,’ hi xikounn diuncho hukum bhair kaddlo, jea udexim hi xikounn uprant te iskolamnim xikounk lagle. Utʼtorechea razan “kilʼleanchea devachi puza” koxi keli? Soviet Union-an zaite poixe khorch korun apnnak ek soin toiar kelem ani hozaramnim nuclear hotʼtearam toiar korun apli razvottki ghott keli. Vell gelo toso utʼtorechea raza lagim ani dokxinnechea raza lagim, koroddamnim lokank jivexim marunk zata titli hotʼtearam aslim! Utʼtorechea razan ani dokxinnechea razan ek mhotvachea toren sangata mellon kam kelam. Tem mhunnttlear, tannim ‘sotʼtianasacho kanttallo bosoila,’ jem United Nations zaun asa.​—Dan. 11:31. w20.05 6-7 ¶16-17

Seva bond kelolea porgottnnarank sodhunk konn modot korunk xokta? Soglim. Vhoddil, pioneer, familiche sodosio ani sobhentle porgottnnar pasun tankam sodhunk modot korunk xoktat. Tumcho ek ixtt vo ek soiro seva bond kelolo porgottnnar zaun asa kai? Tumi ghor-ghoramnim vo jahir zagear porgottʼttana oslea eka bhavak vo bhoinnik mellʼlleant kai? Tor, tankam vhoddilamnim bhett diloli zai zalear tancho fon number vo potʼto sobhechea vhoddilank diunk tumi khuxal zatolim mhunn tankam sangat. Thomas nanvacho ek vhoddil mhunntta: “Seva bond kelolim porgottnnaram atam khoim ravtat tem zannant kai mhunn hanv veg-vegllea bhav-bhoinnank vochon poilim vicharta. Vo mittingek ievop bond kelʼlea khoinchea-i eka porgottnnarak vollkhotat kai mhunn hanv tankam vicharta. Uprant, hanv seva bond kelolea porgottnnarank melltta tednam tanchea bhurgeanchi ani soireanchi khobor ghetam. Thodde seva bond kelole porgottnnar aplea bhurgeank mittingek gheun ietale ani tanchim bhurgim pasun bautizm gheunk naslolim porgottnnaram aslim. Tankam-i Jehova-xim portun ieunk modot korunk zai.” w20.06 24 ¶1; 25 ¶6-7

Prithumer aslolea soglea rochnne modem fokot munxank aplea jivitant adim kitem ghoddlolem tem ugddas dovrun tacher niall korunk zata dekhun tankam noitik dorje xikchi tank asa. Haka lagon ami bore dorje xikon amchea chintpant ani jivitant bodlav korunk zata. (1 Kor. 6:9-11; Kol. 3:9, 10) Khorem mhunnttlear, sarkem kitem ani chukichem kitem hanche modem aslolo ontor vollkhonk amchea ontoskornnak ami proxikxonn diunk zata. (Heb. 5:14) Ami mog, doia-maia ani kakllutt dakhounk xikonk zata. Ani Jehova zoso neai-nitin vagta, tachi ami dekh gheunk zata. Ugddas dovorchea denneacho ami valor kortat mhunn dakhounk ek vatt mhunnttlear, Jehovan amkam adim dor ek pavtt koxi modot kelea ani buzvonn dilea tea vixim amchea ugddasant dovrunk proitn korop. Oxem kelolean, fuddarak pasun to amkam modot kortolo mhunn amchi khatri ghott zata. (Stotr 77:12; 78:4, 7) Anik ek vatt mhunnttlear, dusrim amchea pasot jem kitem borem kortat tem ugddas dovrop ani tanchea pasot upkari asop. Dusreank upkari astat te lok chodd korun jivitant khuxal astat mhunn sodh korpi sangtat. w20.05 23 ¶12-13

Moizes khoddpachea khanchint astana, Jehovachi mhoima ieun voita toslem ek dorxonn polloun taka koxem bhoglem tea vixim chintat. Jezu hea prithumer ieunchea poilim eka munxan onnbhovlolea onnbhovam modem sogleam-von hem ek ojapachem dorxonn aslem astolem. Chodd korun, eka ainzan mhunnttlolim him utram Moizeasan aikolim: “Sorvespor, Sorvespor, doiall-movall Kallzacho Dev! To rokddoch ragar zaina, punn bhov dulob ani visvaxi; hozarank To Aplem bholeponn dakhoita; chuki, oprad ani patok bhogxita.” (Sutt. 33:17-23; 34:5-7) Moizesan aichea disachea versant Devachem nanv uzar kelem tednam taka hi ghoddnni ghoddie ugddasak aili astoli. Jehova, hea nanva vixim ami chintat tednam, to koslo Dev zaun asa tea vixim pasun ami niall korunk zai. Ami Jehovachi xokti, zannvai, neai ani mog hea gunnam vixim niall korunk zai. Ami hem ani her gunnam vixim niall kortat tednam tachea pasot amcho resped anik vaddounk xokta.​—St. 77:11-15. w20.06 8-9 ¶3-4

Jezuchea xisam modem aslolea mogak lagon te tache xis mhunn kollon ietolem, oxem Jezun poilinch sanglolem. (Juanv 13:34, 35) Punn Devachea lokam modem aslolea moga bhair, amkam ghott bhavarth zai zalear ami kitem tori korunk zai. Devachea lokam modem fokot mog aslear amcho bhavarth ghott zauncho na. Kiteak? Chintat, ek bhav vo bhoinn, vo ek vhoddil vo pioneer, ek gombhir patok adarta. Vo ek bhav vo bhoinn eke ritin tuka dukhoita, vo konnui sot soddun ami manta tem chukichem mhunn sangon dhorm broxtt korpi zata. Oxem ghoddtta tednam, tumi niraxi zaun Jehovachi seva korchi soddun ditolim kai? Tor ami mhunnonk sodhtat tem hem: Amkam Devacher ghott bhavarth asonk zai zalear, amcho bhavarth Jehova sangata amkam aslolea vhodd ixttagoticher adarit asonk zai. Dusrim koxim vagtat tacheruch tumcho bhavarth adarit asa zalear, tumcho bhavarth ghott urcho na. Jehova vixim ani tachea lokam vixim tuka koxem bhogta tacheruch tumcho bhavarth adarlolo asa zalear, tumcho bhavarth ghott zauncho na. Bodlek, tumcho bhavarth ghott korunk zai zalear, tumi Bible obheas korunk zai, tumi xiktat tachi somzonni gheunk zai, ani sodh korun Jehova vixim xiktat tem khorem zaun asa mhunn tumi khatri korun gheunk zai.​—Rom. 12:2. w20.07 8 ¶2-3

Jehova lagim porot ieunk sodhtolea zaitea seva bond kelolea porgottnnarank modot korunk, ainz amkam adar kortat mhunn dakhounk zaitim udharonnam asat. (Prok. 14:6) Udharonnak, Ecuador-antlo seva bond kelolo porgottnnar, Silvio-n konnank tori apnnak modot korunk dhadd mhunn Jehova lagim magnnem kelem. To magnnem kortalo tednanch don vhoddil tachea ghora pavle. Ani tea bhette udexim taka goroz ti modot diunk te khuxal zale. Jehova sangata titli ghott ixttagot nasloleank, tachea lagim porot ieunk ami modot kortat tednam amkam khub khuxalkai melltta. Salvador nanvacho ek pioneer, khas korun seva bond kelolea porgottnnarank modot korunk proitn korta. To oso mhunntta: “Thodde pavtti mhojea dolleant khuxiechim dukam ietat tim hanv thambounk xokona. Soitanachea sonvsara thaun eka mogall xelliek Jehovan vachoila mhunn chinta tednam hanv khub khuxal zata. Ani tachea hea kamant taka adar diunk tannem mhaka uzar kela tea sueoga pasot hanv khub khuxal.” Tumi Jehovachea lokam sangata mellon ieunk bond kelam zalearui to aiz pasun tumcho mog korta mhunn tumi khatri dovrunk zata. Tumi porot ietolim mhunn vatt Jehova polloita ani to khuxalkaien tumkam aplea ghorant ieukar ditolo. w20.06 29 ¶16-18

Jehova amcho Vhodd “Guruji” zalʼlean tannem amkam xikonk zaitim udharonnam dovorleant. (Iz. 30:21) Bible-ant Devak manvota tosle gunn aslolea lokanchim udharonnam asat. Tanchea udharonnancher ami niall kortat tednam, khaltikai ani her gunnam vixim ami xiktat. Toxench, osle bore gunn dakhounk na tankam kitem zalem, tantuntlean pasun ami xikonk xoktat. (St. 37:37; 1 Kor. 10:11) Saulu Razak kitem ghoddlem, tachea vixim chintat. Tornnatto aslo tednam to khalto aslo. Apleak unneponnam asat mhunn tannem manun ghetlem. Ani chodd zobabdareo gheunk pasun to fatti sorlo. (1 Sam. 9:21; 10:20-22) Punn thoddeach tempa uprant, to raza zalo tednam to gorvixtt zalo. Ani jeo vostu korunk taka hokʼk naslo, teo vostu to korunk laglo. Eka vellar, to Samuelachi vatt polloitalo tednam tannem pasiens dakhounk na, bodlek tannem iodn bhettoilo, zo bhettounk taka odhikar naslo. Hacho porinnam kitem zalo? Saulun Jehovachi maniotai hogddaili ani Jehovan taka raza mhunn nakarlo. (1 Sam. 13:8-14) Sauluchem udharonn amkam ek xittkaunni zaun asa. Jem korunk amkam hokʼk na, tem ami korchem nhoi. w20.08 10 ¶10-11

Jehovan Krista udexim aplea sobhent fuddakar ghetat tankam “dadleanchea rupant dennim” mhunn dileant hem khorem. (Ef. 4:8, NW) He ‘dadle’ mhunnttlear, Sonchalon Monddolache Vangddi, Sonchalon Monddolak modot korunk nemlole bhav, Xakha Somitiche bhav, sorkittachi dekh-rekh korpi, songottnnent aslolea veg-vegllea korsant xikoupi bhav, sobhentle vhoddil ani sobheche sevok. Povitr xokte udexim, hea soglea bhavank nemleat. Te Jehovachea moladik xellianchi kallji ghetat ani bhav-bhoinnank ghottai ditat. (1 Ped. 5:2, 3) Veg-veglleo zobabdareo samballunk lagon hea bhavank povitr xokte udexim nemleat. Munxachea kuddint aslole veg-veglle sandhe ap-aplem kam kortat tednam akʼkhea kuddik faido zata. Teach toren, hea bhavanchea mhenotik lagon sobhek khub faido zata. Te apnnank vakhannʼnni melloun gheuncho proitn korinant. Bodlek te aplea bhav-bhoinnank dhir ditat ani tim sotant ghott ravchim mhunn te khub vavurtat. (1 Tes. 2:6-8) Aplea gorzam poros dusreancheo gorzo poileo dovrun vavurpi purte asolea hea bhavam pasot ami Jehovache khub upkari! w20.08 21 ¶5-6

Ami porgott korunk ek karonn mhunttlear, ‘lok dogdovlole ani niradari asat.’ (Mt. 9:36) Tor, Rajea vixim sot xikop chodd gorjechem asa dekhun ami porgottʼttat. Soglea munxank sotachem khorem ginean mellon, tim salvar zalolim Jehovak zai. (1 Tim. 2:4) Amchem porgottnnechem kam lokancho jiv koso salvar korta, tea vixim ami chintat tednam porgott korchi amchi itsa vaddttoli. (Rom. 10:13-15; 1 Tim. 4:16) Amchea porgottnnent pasun amchea lagim sarkim sadhonam asonk zai ani tim bore toren koxim uzar korop, hem amkam khobor asonk zai. Bori khobor koxi porgottunk zai, tea vixim Jezun aplea xisank xikoilem. Porgottnnek voitana kitem vhoronk zai, khoim porgottnni korunk zai, ani kitem sangonk zai, hem tannem tankam sanglem. (Mt. 10:5-7; Lukas 10:1-11) Teach toren, aiz Jehovachea songottnnen amkam Seve Pasot Mukhel Prokaxonam dileant. Tantunt porgottnnek faideak poddttat toslim sadhonam asat. Ani tim sadhonam ami koxim uzar korunk zai, tem pasun amkam xikoilam. Hem proxikxonn mellʼllolean ami khatren porgottnni korunk ani borim xikoupi zaunk pavtat.​—2 Tim. 2:15. w20.09 4 ¶6-7, 10

Apostl Juanvan zankam sot xikoilolem, tim Jehovachi seva visvaxiponnan korit asat tem aikon to kitlo khuxal zalo astolo tem chintat. Tankam zaitea somosiancho fuddo korcho poddlo. Punn tancho bhavarth ghott korunk Juanv khub vavurlo. Ani hea visvaxi Kristanvank to aplim bhurgim koxim lekhtalo. Teach bhaxen, amchim bhurgim ani ami sot xikoilam tim, Jehovak apli jivit somorponn kortat tednam ani tachi seva korit ravtat tednam ami khuxal zatat. (3 Juanv 3, 4) Jehovachea povitr xokten sumar 98 K.X.-ant Juanvak tin chitti borounk prerit kelʼlo. Heo chitti visvaxi Kristanvank Jezucher sodanch bhavarth ghott dovrunk ani sota pormonnem cholot ravonk urba diunk boroilʼleo. Juanvak sobhent khotte xikoupeanchea probhava vixim taka husko aslo. (1 Juanv 2:18, 19, 26) He dhorm-broxtt Devak vollkhotat mhunn sangtale. Punn Jehovacheo adnea pallinasle. w20.07 20 ¶1-3

Ami porgottʼttat tea sondexacher amkam bhavarth asa dekhun ami zata titlea lokank porgottunk proitn kortat. Devachea Utrant aslolea bhasaunneancher amkam bhavarth asa. (St. 119:42; Iz. 40:8) Amchea disamnim Bible-ant asloleo bhasaunneo purnn zatat teo ami polloileat. Bible-antle solʼle lok aplea jivitant apnnaitat tednam tanchem jivit koxem sudhorlam tem ami polloilam. Hachea udexim soglea lokamnim Devachea Rajeachi bori khobor aikop gorjechem mhunn amkam khatri melltta. Ami porgottʼttat tea sondexachi zor Jehova zaun asa. Tor Jehovacher ani tannem vinchun kaddlolea Rajeacho Raza Jezucher pasun amkam bhavarth asa. Amchi poristhiti koxi-i asum Jehova sodanch amcho asro ani boll zaun asa. (St. 46:1-3) Tea bhair, Jezu sorgar thaun Jehovan taka dilʼli xokti ani odhikar uzar korun porgottnnechea kamak margdorxon dita mhunn amkam khatri asa. (Mt. 28:18-20) Amkam bhavarth asa zalear, amchea vavracher Jehova besanv ghaltolo mhunn amkam khatri asta. w20.09 12 ¶15-17

Apunn fuddo korta tea eka oddchonnea vixim aplea pasot ulounk thodde pavtti bhoinnank konnachi tori goroz poddtta. (Iz. 1:17) Udharonnak, eke bhoinnicho ghov bhair poddla zalear vo tannem tika divors dila zalear aplo ghov kortalo tim kamam korunk tika konnachi tori modot zai poddot. Eke zantte bhoinnik aplea dotora lagim ulounk modot zai astoli. Vo ek pioneer bhoinn songottnnek sombondit asloleo her zobabdareo samballtta dekhun dusrim pioneer kortat titlem korunk pavona mhunn thoddim tichi khodd kaddunk puro. Oslea vellar tichea pasot ulounk tea bhoinnik konnachi tori goroz poddot. Jezuchea udharonnacher dhean diat. Devacho mog kortolea bhoinnim vixim lokank chukichem chintop aslem tednam Jezu rokddoch tanchea pasot uloilo. Udharonnak, Martan Mariechi khodd kaddli tednam Jezu Mariechea vatten uloilo. (Lukas 10:38-42) Teach toren, dusre eke pavtti Marien kelolem tem chukichem mhunn dusreank dislem. Tea vellar tannim tichi khodd kaddli. Punn Jezu tichea vatten uloilo. (Marku 14:3-9) Jezu Mariecho hetu somzolo ani tika xabaski dili. Tichi hi bori kornni ‘Xubhvortoman porgott zait titleam-i svater’ ugddas dovortolim mhunn Jezun bhakit pasun kelolem. w20.09 24 ¶15-16

Xelli sanddunk xokta mhunn eka borea gonvlleak khobor asta. Tor ek xelli hindda thaun pois voita tednam, ek gonvlli tika marina. Aple thodde sevok aplea thaun pois gele tednam tankam modot korunk Jehovan kitem kelem tem polloum-ia. Provadi Jonasan apleak dilolem kam korunk na. Punn Jehovan taka rokddoch soddun diunk na. Eka borea gonvllea sarko, Jehovan taka vanchoilo ani aplem kam korunk goroz ti xokti melloun gheunk modot keli. (Jonas 2:8; 3:1, 2) Uprant, ek dudiachi val uzar korun munxacho jiv kitlo valoracho tem Jonasak somzonk modot keli. (Jonas 4:10, 11) Hantunt kitem lisanv asa? Seva bond kortat toslea porgottnnarank, vhoddilamnim rokddench soddun diunk nozo. Tachea bodlek, khoinchea karonnak lagon ti xelli hindda thaun pois sorun geli tem zannam zaunk vhoddilamnim proitn korunk zai. Ani ti xelli Jehova lagim porot ieta tednam tannim tika mog ani kallji dakhoit ravonk zai. w20.06 20-21 ¶10-12

1991 vorsa, Soviet Union poddlea uprant tachea khala aslolea Devachea lokank ‘bhov thoddi’ modot mellʼlli mhunnche, tankam thoddo vell svotontrtai mellʼlli. Taka lagon, tim zaitea zannank porgott korunk pavlim ani rokddench Soviet Union-achea khala aslolea desanim hozaramnim porgottnnar vaddle. Thoddea vorsa uprant, Russia ani tachim vangddi raxttram utʼtorecho raza zalo. Eka sorkarak utʼtorecho raza vo dokxinnecho raza mhunnttolim zalear, tannem tin vixoi korunk zai: (1) tannem Devachea lokancher razvottki cholounk zai vo tankam dhumallo diunk zai, (2) tannem aplea korneamnim Jehovacho ani tachea lokancho dusman mhunn dakhoun diunk zai, ani (3) tannem dusrea raza poros chodd odhikar melloun gheunk proitn korunk zai. Russia ani tachea vangddeamnim Devachea lokancher razvottki choloilea vo tankam dhumallo dila. Hacho orth, tannim tanchea porgottnnechea kamacher bondi haddlea ani tanchea vattarant ravtolea hozaramnim bhav-bhoinnank dhumallo dila. Devachea lokam sangata te jea toren vagtat tantuntlean te Jehovacho ani tachea lokancho dves kortat mhunn dakhoitat. Ani Dokxinnecho raza zaun aslolea Anglo-America poros chodd bollixtt zaunk te proitn kortat. w20.05 12-13 ¶3-4

Ami lokank xikoun tankam xis korunk sodhtat dekhun amchem xikovop ekdom borem asonk zai. Amkam Devachem Utor avoddtta dekhun dusreank xikoitana ami khub ulounk xoktat. Punn ami Pahrogopur Obheas, Sobhecho Bible Obheas vo amchea videarthea sangata Bible obheas ghetana ami chodd ulounk nozo. Ami xikounk Bible borea toren uzar korunk sodhtat dekhun, eka xikoupean chodd uloinastana ravonk chotrai dovrunk zai. Ami eka Bible versacher vo vixoi-acher zannam asloli sogli mahiti sangonk nozo. (Juanv 16:12) Tumi bautizm ghetlo tednam Bible-a vixim kitlim zannam aslim ani atam kitlem zannant tachea modem sor korun polloiat. Tea vellar ghoddie tumi fokot Bible-antlim mullavim sotam zannam aslim. (Heb. 6:1) Punn atam tumkam Bible-a vixim jem khobor asa tem zannam zaunk tumkam zaitim vorsam laglim. Tor tumchea Bible videartheak soglench ekuch pavtti xikounk vochonakat. w20.10 14-15 ¶2-4

Jehovan Jezu pasot ekdom borim avoi-bapui vinchun kaddlim. (Mt. 1:18-23; Lukas 1:26-38) Marien kallzantlean mhunnttlolim utram amkam Bible-ant vachunk mellttat. Tantuntlean tika Jehova ani tachea Utra pasot aslolo kholaiecho mog dison ieta. (Lukas 1:46-55) Ani Juzen Jehovachem aikolem tantuntlean to Jehovacho kitlo mog kortalo ani taka manvota tem korunk sodhtalo mhunn kollon ieta. (Mt. 1:24) Dhean diat, Jehovan Jezu pasot girest avoi-bapaink vinchun kaddunk nant. Jezu zolmolea uprant Juzen ani Marien bhettoilolea iodna udexim, tim gorib aslim mhunn kollon ieta. (Lukas 2:24) Nazaretant aplea ghora laginch Juzechem thovoi-achem kam korchem ek lhan dukhan aslem astolem. Tankam ghoddie uprant sat vo tachea poros chodd bhurgim posunk aslim dekhun tanchea lagim ghoddie chodd poixe vo vostu nasleo astoleo. (Mt. 13:55, 56) Jehovan Jezuk thoddea dhokeam thaun vattailo. Punn tannem aplea putak soglea oddchonneam thaun rakhunk na. (Mt. 2:13-15) Udharonnak, Jezuchim thoddim soirim tacher patienaslim. Jezuchea familiche sodoxio to Mesias mhunn manun ghenasle. Haka lagon Jezu kitlo nirax zalo astolo tem chintat. (Marku 3:21; Juanv 7:5) Jezu tornnatto astanach, Juze ghoddie melo astolo. Tor taka khub kotthin zalem astolem. w20.10 26-27 ¶4-6

Tumi eksurim asat ani tumkam aslolea trasancho fuddo korunk modot korunk konnuch na oxem tumkam kednam-i dislam kai? Zaitea lokank, toxench Jehovachea visvaxi sevokank pasun toxem dislam. (1 Raz. 19:14) Tumkam oxem kednam-i dista zalear Jehovachim him utram ugddas dovrat: “Hanv tuka kednanch soddcho na ani sanddcho-i na.” Tor ami khatren oxem mhunnonk zata: ‘Jehova mhojea pokxak asa zalear kosli bhirant?’ (Heb. 13:5, 6) 61 K.X.-ant apostl Paulun, Judea-nt aslolea Kristanvank him utram boroilʼlim. Him utram ami vachtat tednam Stotr 118:5-7-ant sanglolim utram amchea ugddasak ietat. Stotrkara bhaxen, Pauluk pasun Jehovan zaite pavtti adar dilolo. Tor, Jehova Modot Korpi zaun asa mhunn taka khatri asli. Udharonnak, Paulu Hebrevank apli chitt borounchea poilim, to provas kortalo tem tarum eka vhodd vadollak sampoddlem. (Itihas 27:4, 15, 20) Tea provasachea vellar ani tachea poilim pasun, Jehovan Pauluk veg-vegllea toren modot kelʼli. w20.11 12 ¶1-2

Amchem jivit poilim bhaxen asonk zai mhunn chintit ravop kiteak xanneponnachem nhoi? Karonn ami oxem kortat tednam amchea adlea kallacheo vaitt ghoddnneo nhoi, punn chodd korun boreo ghoddnneoch ugddasak ieunk xoktat. Udharonnak, Israelitkaram vixim chintat. Ejipta thaun bhair sorlea uprant, thoim tanchem jivit kitlem trasachem aslem tem tim rokddinch visorlim. Bodlek, thoim kitlem borem jevonn mellttalem, tem tanchea ugddasak ailem. Tannim mhunnttlem: “Ejiptant astana ami funkott maslli, touxim, chibddam, bhaji-palo, kande ani losunn khataleanv tacho amkam kitlo mhonn ugddas ieta!” (Lok. 11:5) Punn thoim tim “funkott” jevlim kai? Na. Tea vellar tim Ejiptant gulam aslim ani Ejiptkaram khala tankam zaite tras sosche poddle. (Sutt. 1:13, 14; 3:6-9) Thoim tankam sosunk poddlole tras visron, tim thoim soglem borem aslem mhunn chintunk laglim. Jehovan tankam jem kitem dilʼlem tem chintchea bodlek, poilinche dis bore asle mhunn tim chintit ravlim. Jehovak tanchem hem chintop avddonk na.​—Lok. 11:10. w20.11 25 ¶5-6

Amchem jivit thoddeach tempachem ani “koxttamnim bhorlolem” oxem thodde pavtti amkam disonk puro. (Job 14:1) Taka lagon, thodde pavtti ami nirax zaunk xoktat. Adlea kalla voilea zaitea Jehovachea sevokank oxench dislem. Tantuntlim thoddim itlim nirax zalim ki tankam aplo jiv diunk koso dislo. (1 Raz. 19:2-4; Job 3:1-3, 11; 7:15, 16) Punn tannim Jehovacher bhavarth dovorlo dekhun tannem tankam zaite pavtti buzvonn ani ghottai dili. Tanchim udharonnam Bible-ant boroun dovorlolim asat dekhun ami tim vachtat tednam amkam tanchea thaun xikonk melltta ani buzvonn melltta. (Rom. 15:4) Jakobacho put, Juze vixim chintat. Eka vellar to aplea ghorant aslolean, taka aplea bapai thaun khub mog mellttalo. Punn atam Jehovachi seva korina toslea munxachea ghorant taka kam korchem poddlem. (Ut. 37:3, 4, 21-28; 39:1) Uprant, Juze apleacher bolotkar korunk sodhtalo mhunn Potifarachea bailen tacher khotto arop ghatlo. Potifaran fatti-fuddem polloi-nastana Juzek bondkhonnint ghatlo ani tannim taka sankhlleamnim bandlo. (Ut. 39:14-20; St. 105:17, 18) Hem soglem chintun Juze nirax zaunk xoktalo. w20.12 16-17 ¶1-4

Him utram mhunnon magnneant kitem ekdom gorjechem mhunn Jezun dakhoun dilem. Punn Jezuchea utrancho orth kitem? Kitem tori povitr korop mhunnche ti vost nitoll vo nirmoll korop. Punn thoddim ghoddie chintint, ‘Jehovachem nanv povitr, nitoll ani nirmoll na kai?’ Hacho zobab mellonk eka nanvant kitem mellon asta tem ami pollounk zai. Ek nanv mhunnttlear, kagdar boroilolem vo ucharlolem fokot ek utor nhoi. Hea vixim Bible kitem sangta tacher dhean diat: “Girestkaie poros, borem nanv vinchun kadd.” (Mho. 22:1; Up. 7:1) Ek nanv itlem mhotvachem kiteak? Karonn eka munxa vixim dusrim kitem chintat tem tachea nanvant mellon asa. Tor ek nanv koxem boroitat vo koxem uchartat tem mhotvachem nhoi. Punn tem nanv dusrim eka kagdacher vachtat vo aikotat tednam tea munxa vixim kitem chintat tem mhotvachem. Jehova vixim lok fott sangtat tednam to vaitt korta hem chintop tim dusreanchea monant ghaltat. Ani lok vaitt zatat tem polloitat tednam tachem karonn Dev mhunn sangtat ani tachem nanv piddʼddear kortat. w20.06 3 ¶5-7

Ami amchea somosiam vixim itlim uskeunk xoktat ki teo soddun ami ghoddie anik kainch chintunk voichimnant. Udharonnak, amchea lagim ghoddie, amkam zai teo vostu gheunk poixe aschenant vo ami ghoddie duent zaun kamak vochonk pavchimnant vo ami ghoddie amchem kam hogddaitolim, oxem chintun ami uskeunk xoktat. Tea bhair, amcher tallnni ieta tednam ami ghoddie Devache kaide moddit mhunn ami uskeunk xoktat. Toxench, beginuch Soitanak sangat diupi amcher akromonn kortole tednam ami kitem kortolim kai, mhunn chintun ami uskeunk xoktat. Tor, ‘Hea vostum vixim hanv usketam tem chukichem kai?’ mhunn ami chintunk puro. Jezun aplea pattlavdarank “huskeum nakat” mhunn sanglem, hem ami zannant. (Mt. 6:25) Hacho orth ami uskeunchech nhoi, oxem Jezun sanglem kai? Na, toxem nhoi! Karonn Jehovache adle thodde visvaxi sevok pasun usketale, punn Jehova tancher ragar zaunk na. (1 Raz. 19:4) Ami amchea jivitant goroz tea vostum vixim chodduch usketat zalear, Jehovachea sevek poilo zago diunk pavchimnant mhunn Jezu zannam aslo. Tor ami chodduch uskelolim Jezuk naka aslem dekhun him utram mhunnon to amkam buzvonn diunk sodhtalo. w21.01 3 ¶4-5

Ek ghov jea toren aplea famili sangata vagta, tacho hixob tannem Jehovak ani Jezuk diunk zai. (1 Ped. 3:7) Jehova, sorgar ani prithumer aslolea familicho Mostok zalʼlean, aplea bhurgeam pasot kaide korunk ani te tim pallttat kai na tem khatri korun gheuncho odhikar taka asa. (Iz. 33:22) Kristi sobhecho mostok Jezu Kristak pasun sobhent asloleam pasot kaide korunk ani tim tem kaide pallttat kai na, tem khatri korcho odhikar asa. (Gal. 6:2; Kol. 1:18-20) Jehova ani Jezu bhaxen eka familichea vhoddilak pasun aplea famili pasot nirnnoi gheuncho odhikar asa. (Rom. 7:2; Ef. 6:4) Punn tannem to apnnank zai toso cholounk zaina. Udharonnak, to korta te kaide Devachea Utrantlea totvam pormonnem asonk zai. (Mho. 3:5, 6) Ani aplea famili bhair, dusream pasot kaide korunk taka odhikar na. (Rom. 14:4) Tea bhair, tachim bhurgim vhodd zaun dusrea ghora ravonk voitat tednam tim taka resped ditolim tem khorem, punn tachea odhikara khala aschinant.​—Mt. 19:5. w21.02 2-3 ¶3-5

Ek familicho vhoddil aplea familicho mog korta mhunn dakhounk ek vatt mhunnttlear, to aplea familicheo gorzo purnn korta. Punn Deva sangata aplea familichi ixttagot samballunk modot korop chodd gorjechem asa hem pasun tannem ugddas dovrunk zai. (Mt. 5:3) Jezu khambear umkollttalo tednam, to khub dukʼkhan aslo. Tori astana, tannem aplea avoicho samball korunk apostl Juanvak saglem. (Juanv 19:26, 27) Familichea vhoddilak zaiteo zobabdari astat. Jehovachea nanvacho opman zaina zaunk to apli sirvis mhenotin korta. (Ef. 6:5, 6; Titak 2:9, 10) Taka sobhentlea bhav-bhoinnank urba diunk ani kallji gheunchi zobabdari asta. Tea bhair, taka porgottnnechea kamant fuddakar gheunchi pasun zobabdari asta. Teach borabor tannem aplea bail-bhurgeam sangata sodanch Bible obheas korop gorjechem zaun asa. Oxem kelolean tancheo gorzo purnn zatat, tim khuxal astat ani Jehova sangata tanchi ixttagot ghott urta. To korta tea soglea vavra pasot tim tache upkari astat.​—Ef. 5:28, 29; 6:4. w21.01 12 ¶15, 17

Ek bori bail kitem korta tea vixim Bible amkam sangta: Ti ghorantlem kam samballtta, zomin vikta ani vikti gheta ani veapar dhondo korta. (Mho. 31:15, 16, 18) Eka vixoi-acher apleak koxem dista tem sangcho odhikar naslolea eka chakra sarki ti na. Punn ticho ghov ticher visvas dovorta ani ti kitem sangonk sodhta tem to aikota. (Mho. 31:11, 26) Hea toren, ghov aplea bailek man dita tednam tachea adhin ravonk ti khuxal zatoli. Jezun vhodd-vhodd kamam kelʼlim tori astana, Jehovak odhin ravop opmanachem mhunn taka disonk na. (1 Kor. 15:28; Filp. 2:5, 6) Teach bhaxen, ek zannvaiechi bail Jezuchi dekh gheta zalear aplea ghovak adhin ravop opmanachem mhunn tika dischem na. Aplea ghovacho mog korta dekhun ti taka tenko ditoli. Punn oxem korunk tichem mukhel karonn mhunnttlear, ti Jehovacho mog korta ani taka man dita. Ek Kristi bail sodanch aplea ghovachea adhin ravta. Punn to tika Bible-antle kaide ani totvam moddunk laita zalear, ti toxem korchi na. w21.02 11 ¶14-15; 12 ¶19

Jehovacho mog aslolean tachea sevokank dhumallo sosunk modot zalea. Udharonnak, Judevanchea Mha-dhormsobhen apostlank porgottnnechem kam bond korunk sanglem tednam, tankam Devacho mog aslo mhunn tannim ‘munxanchi adnia nhoi, punn Devachi adnia pallʼlli.’ (Itihas 5:29; 1 Juanv 5:3) Teach bhaxen, aiz pasun amchea bhav-bhoinnank Jehovacho mog asa dekhun, krur ani bollixtt sorkar dhumallo ditat tednam tim visvaxi ravonk pavtat. Tor, sonvsar amcho dves korta tednam nirax zaunchea bodlek, ami khuxal zatat. (Itihas 5:41; Rom. 5:4, 5) Amchea familintlim amkam dhumallo ditat tednam tem sosunk amkam ekdom kotthin zaunk xokta. Ami sot xiktat tednam, amkam konnem tori fottoilam vo ami pixim zaleant mhunn tim chintunk puro. (Marku 3:21 sor korat.) Tim amchea sangata khub vaitt toren pasun vagonk xoktat. Punn ami ojap zainant. Karonn Jezun mhunnttlem: “Monxacho dusman tachoch ghorcho lok.”​—Mt. 10:36. w21.03 21 ¶6-7

Ek Bible xikoupi tachea Bible obheasak tumkam apoita zalear, poilem zaun, xikoupi ani videarthi uloitat tem kan diun aikat. Tednanch tumi kitem ulounk zai tem tumkam kollttolem. Punn oxem kortana tumi chodduch ulounchem nhoi mhunn ugddas dovrunk zai. Tea bhair, xikoupi xikoita tea mudʼdeacheruch tumi ulounk zai. Ani to mudʼdo soddun dusrea ek vixoi-acher tumi ulounchem nhoi. Tor xikoita ti mahiti videartheak anik borea toren somzunk ek udharonn vo prosn uzar korun thoddea utramnim tumchean taka somzaunk zata. Thoddea pavtti xikoita tea vixoi-acher tumchea lagim anik mahiti na mhunn tumkam disonk puro. Punn tea videartheak xabaski diun tachea gorzancher tumi dhean ditat zalear taka vaddavoll korunk modot kortolim. Sondhi melltta tednam tumkam sot koxem mellʼllem, tumi oddchonneancho fuddo koso kelo ani Jehovan tumchea jivitant tumkam koxi modot keli hea vixim tumi videartheak sangonk zata. (St. 78:4, 7) Tumi tumcho onubhov sanglolean videartheacho bhavarth ghott zaunk xokta ani vaddavoll korit ravonk taka modot zaunk xokta. w21.03 10 ¶9-10

Amkam porgottnnent ies melltta tednam, khoro man konnak vochonk zai? Hacho zobab Paulun Korint sobhent boroilʼlea utram thaun melltta: “Hanvem roilem, Apolon ximplem, punn Devan vaddoilem. Tor roitat vo ximptat tim mhotvachim nhoi; vaddoita To ki mhotvacho, ani Ho mhollear Dev.” (1 Kor. 3:6, 7) Tor Paulu bhaxen, porgottnnent amkam kosle-i ies mellom, tacho man ami sodanch Jehovak diunk zai. Jehova, Jezu ani ainzam sangata “sohokari vo sangata kam korpi” aslolea hea sueoga pasot ami upkari asat mhunn koxem dakhounk zata? (2 Cor. 6:1) Ami urben bori khobor herank sangonk amchean zata titlem kortat tednam, ami hem dakhounk pavtat. Ami sotachem bim fokot roinant, punn tacher udok pasun ximptat. Ek munis, ami sangtat to sondex aikonk itsa dakhoita zalear taka porot mellon tachea sangata Bible obheas suru korunk ami zata titlo proitn kortat. Bible obheas fuddem voita toso, tea Bible videartheachea chintpant ani bhavnant bodlav korunk Jehova koso modot korta tem polloitana ami khuxal zatat. w20.05 30 ¶14, 16-18