‘Tumchea Monachi Novsornni Korat’

1-2. Bautizma uprant pasun ami kitem korit ravonk zai? Somzaiat.

TUMI kitle pavtti tumchem ghor nitoll kortat? Tumi poilech pavtti tea ghorant ravonk gelʼlim tednam tumi tem ekdom bore toren nitoll kelʼlem astolem nhoi? Punn tea uprant, tumi oxem korunk na zalear kitem zatolem? Zoxem tumi zannant, tumchea ghorant rokddoch dhulʼl bhortolo ani tem mhellem zatolem. Tor tumchem ghor nitoll dovrunk, tumi tem sodanch saf korop gorjechem.

² Heach toren, bautizm gheunchea poilim ‘kuddin ani otmean soglea khotantlim nitoll zaunk,’ ami amchea chintpant ani sobhavant goroz te bodlav korunk khub vavr kelo. (2 Kor. 7:1) Punn oxem ekuch pavtti kelear puro kai? Na. Apostl Paulun sanglolea bhaxen, ami amchea monachi ‘novsornni korit ravonk zai.’ (Ef. 4:23) Ami oxem korit ravop kiteak gorjechem? Karonn amchea ghorant rokddoch dhulʼl bhorta tea bhaxen, amchea chintnancher ani sobhavacher rokddoch hea sonvsaracho probhav poddonk xokta. Oxem zaina zaunk ani Jehova mukhar nitoll asonk, ami sodanch amchem chintop, sobhav, ani amchea itsanchi topasnni korunk zai.

 3. Ami amchea ‘monachi novsornni korop’ mhunnttlear kitem? (Romkarank 12:2)

³ Ami amchea monachi novsornni korunk kitem korunk zai? (Romkarank 12:2 vachat.) ‘Monachi novsornni korop,’ hea Grik bhaxen bhaxantor kelʼlea utracho orth mhunnttlear, “amchem chintop sarkem novem korop.” Punn hacho orth, ami fokot thoddeo boreo kornneo kelearuch puro, oxem nhoi. Tachea bodlek, ami bhitorlean koslim munxam asat tachi ami topasnni korunk zai. Ani Jehovachea dorjeam pormonnem ami goroz te bodlav korunk zai. Ani hem ami fokot ekuch pavtti nhoi, punn korit ravonk zai.

 4. Sonvsarachem chintop apnnaina zaunk ami kitem korunk zai?

⁴ Ami poripurnn astolim tednam ami sodanch soglea vattamnim Jehovak manvota tem korunk pavtolim. Punn tea mhunnosor, oxem korunk ami khub proitn korit ravonk zai. Romkarank 12:2-ant Paulun mhunnttlem ki ami kitem kelʼlem Devak zai tem zannam zaunk, ami amchea monachi novsornni korunk zai. Ami sompeponnim hea sonvsarachem chintop apnnaunk xoktat. Oxem zaina zaunk, ami dovorleat te dhei ani amche nirnnoi, hea sonvsarachea chintpa pormonnem asat, kai Jehovachea chintpa pormonnem asat, tem ami topasunk zai.

 5. Jehovachea disa vixim amchem chintop koxem asa tem ami koxim zannam zaunk xoktat? (Chitr polloiat.)

⁵ Ami amchem chintop koxem topasunk zata tem zannam zaunk ek udharonn polloum-ia. ‘Jehovacho dis begin ieum mhunn ami axeun ravlolim’ taka zai. (2 Ped. 3:12) Tor ami amkanch vicharunk zata: ‘Hanv jea toren mhojem jivit jietam, tea vorvim hea noxttea sonvsaracho xevott ekdom lagim pavla hem hanv somzotam mhunn dison ieta kai? Xikxonn ani kama vixim hanv ghetam tea nirnnoi-antlean Jehovachi seva korop mhaka sogleam-von chodd mhotvachem mhunn dison ieta kai? Jehova mhojeo ani mhojea familicheo gorzo purnn kortolo mhunn mhaka bhavarth asa kai, vo hanv soglo vell heach vixim usko korit ravtam?’ Ami amchem jivit Jehovache khuxe pormonnem bodlunk toiar asat tem polloun, Jehova kitlo khuxal zata tem chintat!—Mt. 6:25-27, 33; Filp. 4:12, 13.

 6. Ami kitem korit ravonk zai?

⁶ Tor ami sodanch amchem chintop topasunk zai, ani tem Jehovachea chintpa pormonnem na zalear, tantunt goroz te bodlav korunk zai. Hea vixim Paulun Korintkarank oxem sanglolem: “Tumi tumchea bhavartha pormannem jietat zalear polleunk tumchich tumi chovkoxi korat. Tumchich tumi porikxa korun gheiat.” (2 Kor. 13:5) Punn ami “bhavartha pormannem jietat” mhunn dakhounk, ami fokot mittingenk hajir zalear ani porgottnni kelearuch puro nhoi. Hantunt amchem chintop, amcheo itsa ani amche hetu pasun mellon asat. Tor Devachem Utor vachun, Jehova chintʼta tea toren chintun, ani Jehovachea chintpa pormonnem amchea jivitant bodlav korun, ami amchea monachi novsornni korit ravonk zai.—1 Kor. 2:14-16.

 7. Efezkarank 4:31, 32-a pormonnem ami anik kitem korunk zai, ani oxem korop kotthin kiteak zaunk xokta?

⁷ Efezkarank 4:31, 32 vachat. Ami amchem chintopuch bodolʼlear puro nhoi. Ami ‘novim munxam zaunk zai vo novo sobhav apnnaunk zai.’ (Ef. 4:24) Oxem korunk amkam khub vavr korcho poddttolo. Karonn thoddea lokancho sobhavuch vaitt asta. Zoxem thoddim ragixtt sobhavachim astat, vo tankam rokddich tiddok ieta vo dusreanchi nattkai zata. Bible-ant pasun, thoddo lok ‘gorom tokleche astat’ ani ‘ragachea vellar sogle torechim patkam adartat’ mhunn sanglam. (Mho. 29:22) Osle gunn tanche bhitor riglole astat. Tea pasot bautizma uprant pasun, tankam he gunn soddun diunk khub vavr korit ravonk poddtta. Hem kitlem khorem tem amkam fuddem sanglolea onubhovantlean kollon ietolem.

8-9. Ami amcho porno sobhav soddun diunk vavr korit ravonk zai, mhunn Stephen-achea onubhovantlean amkam koxem kolltta?

⁸ Stephen nanvachea eka bhavak aplea ragacher tabo dovrunk ekdom kotthin zatalem. To sangta: “Bautizm zalea uprant pasun, mhojea ragacher tabo dovrunk mhaka khub vavr korcho poddlo. Udharonnak, ek pavtt ghor-ghoramnim porgottnni kortana, eka choran mhojea gaddientlo radio chorun vhelo. Hanv taka dhorunk dhanvlo. Ani hanv tachea lagim pavlo tednam, radio thoinch uddoun to pollon gelo. Uprant hea ghoddnne vixim hanvem bhav-bhoinnank sanglem tednam mhojea grupantlea eka vhoddilan mhaka oxem vicharlem: ‘Stephen, tunvem tea chorak dhorlolo zalear tum kitem kortolo aslo?’ Tea bhavan vicharlolea prosnak lagon hanv chintunk poddlo. Ani hanvem mhojea ragacher tabo dovrunk zai ani xanti korpi munis zaunk zai mhunn mhaka kollon ailem.”b

⁹ Stephen-achea onubhovantlean amkam kollon ieta ki amche bhitor aslole vaitt gunn ami soddun dileat oxem amkam disonk puro. Punn te okosmat porot ieunk xoktat. Tumkam oxem ghoddtta zalear, niraxi zainakat ani tumi Jehovak manvonant oxem chintinakat. Karonn apostl Paulun pasun oxem mhunnttlolem: “Borem korunk sodtam tednam, vaitt tench hanv vinchun kaddtam.” (Rom. 7:21-23) Amchea ghorant dhulʼl ieit ravta tea bhaxen, opurnn aslolean, amche bhitor vaitt gunn porot ieit ravonk xoktat. Tor ami ghor nitoll korit ravtat teach bhaxen, amcho vaitt sobhav pois korunk ami vavr korit ravonk zai. Ami hem koxem korunk xoktat?

10. Vaitt gunn pois korunk ami kitem korunk zai? (1 Juanv 5:14, 15)

¹⁰ Amkam soddun diunk kotthin zata tea vaitt gunnam vixim ami Jehova lagim magnnem korunk zai. Ani to amchem magnnem aiktolo ani amkam modot kortolo mhunn ami khatri dovrunk zai. (1 Juanv 5:14, 15 vachat.) Jehova vizmit korun to vaitt gunn kaddun uddouncho na tem khorem. Punn to vaitt gunn pois korunk amchi itsa to thir-ghott kortolo. (1 Ped. 5:10) Teach borabor, ami amchea magnneam pormonnem kam korunk zai. Tem mhunnttlear, amcho porno sobhav porot ieunk xokta toslim kamam ami korchim nhoi. Udharonnak, thoddea pichʼcheramnim, t.v. program-amnim vo kanneamnim, ami pois korunk sodhtat to vaitt gunn ekdom boro vo tantunt kainch vaitt na, oxem dakhoitat. Oslea dhokeantlean ami pois ravonk zai. Tea bhair, ami vaitt anvddeam vixim chintit ravchem nhoi.—Filp. 4:8; Kol. 3:2.

11. Novo sobhav apnnait ravonk ami kitem korunk zata?

¹¹ Ami amcho porno sobhav soddun dila zalear pasun, ami novo sobhav apnnavop gorjechem. Hem ami koxem korunk zata? Ami Jehovachea gunnam vixim xiktat tednam te amchea jivitant apnnaunk ami dhei dovrunk zata. (Ef. 5:1, 2) Udharonnak, Jehovan eka munxak udar kallzan bhogxilo mhunn ami vachtat tednam ami amkanch vicharunk zata: ‘Hanv dusreank bhogxitam kai?’ Toxench, Jehovan goribank doia-maia dakhoili mhunn ami vachtat tednam ami amkanch vicharunk zata: ‘Oxech toren gorjek sampoddlolea mhojea bhav-bhoinnank hanv doia-maia dakhoitam kai, ani tem mhojea kamamnim dison ieta kai?’ Tor novo sobhav apnnaun tumchea monachi novsornni korit ravat. Punn oxem korunk vell lagta mhunn ugddas dovrat.

12. Bible-ak munxachem jivit bodlunk xokti asa mhunn Stephen-ak koxi khatri zali?

¹² Ami poilim uloilʼlim to bhav Stephen, sovkas-sovkas korun novo sobhav apnnaunk pavlo. To mhunntta: “Hanvem bautizm ghetlo tednam thaun, mhaka rag haddunk xoktat toslea zaitea poristhitincho hanvem fuddo kela. Punn tea vellar, ek tor, mhaka rag haddttat tea munxam thaun hanv pois voitalom vo ti poristhiti anik bigoddna zaunk hanv proitn kortalom. Hanv toslea poristhitimnim xant ravlom mhunn mhojea bailen ani her zaitea zannamnim mhaka xabaski dili. Ani thodde pavtti, hanv tea vellar koxe toren xant ravonk pavlo mhunn chintun hanvuch ojap zatalo! Punn hem soglem hanv mhojea bollan korunk pavonk na. Tachea bodlek, Bible-ak munxachem jivit bodlunk xokti asa mhunn mhaka khatri zalea.”

13. Vaitt vondovnneo pois korun sarkem tem korunk amkam koxi modot zatoli? (Galasiekarank 5:16)

¹³ Galasiekarank 5:16 vachat. Vaitt vondovnneo pois korun sarkem tem korunk, Jehova udarponnan amkam apli povitr xokti dita. Ami Devachea Utracho obheas kortat tednam ami Devache povitr xoktek amcher kam korunk ditat. Toxench, ami mittingek hajir zatat tednam pasun amkam Devachi povitr xokti melltta. Thoim amcheach bhaxen, sarkem tem korunk khub vavr kortat tea bhav-bhoinnam sangata ami vell sarunk zata. Ani oxem kelolean amkam urba mellttoli. (Heb. 10:24, 25; 13:7) Tea bhair, ami Jehova lagim kallzantlean magnnem kortat, ani amchi oskotai pois korunk modot kor mhunn vinoti kortat tednam to aplea povitr xokte udexim amche vaitt vondovnne add zhuzot ravonk amkam ghott kortolo. Ami heo sogleo vostu kortat tednam vaitt vondovnneo apxinch nanch zauncheo nant tem khorem, punn tancher tabo dovrunk amkam modot zatoli. Ani Galasiekarank 5:16-nt sanglam toxem, povitr xoktechem margdorxon apnnailolean, ami ‘patki soimbacheo khuxio pallunk pavchimnant.’

14. Sarkem tem korunk amchi itsa vaddoit ravop kiteak gorjechem?

¹⁴ Jehova sangata amchi ixttagot ghott korunk modot kortat tim kamam korunk suru kelea uprant, ami tim korit ravonk zai. Teach borabor, sarkem tem korunk amchi itsa ami vaddoit ravonk zai. Karonn amcheo vaitt vondovnneo ek oslea dusmana bhaxen asat zo kednanch nhidona. Mhunnche, amkam tallnnent ghalunk to vatt polloit ravta. Bautizm ghetlea uprant pasun, jugar khellop, chodd soro pievop, vo burxim chitram pollovop oslim vaitt kamam korpachi itsa amkam porot ieunk xokta. (Ef. 5:3, 4) Ek tornnatto bhav sangta: “Mhaka chedde avoddttale. Ani hi tallnni pois korop mhaka khub kotthin aslem. Vell voita toso, him bhavnam pois zatolim oxem mhaka distalem. Punn him bhavnam azun meren mhojea monant ietat.” Tumchea monant porot-porot vaitt kamam korpachi itsa ieta zalear, ti pois korunk tumkam koxi modot zaunk xokta?

15. Ami pois korunk sodhtat teo vaitt vondovnneo “sogllea monxank ietat tosleoch” mhunn zannam zalolean amkam urba kiteak melltta? (Chitr polloiat.)

¹⁵ Tumchea bhaxen her bhav-bhoinnam pasun, vaitt vondovnneo pois korunk vavr kortat. Tor tumi ekttinch nant mhunn ugddas dovrat. Bible-ant hea vixim oxem sanglam: “Aiz porian tumcher aileat teo tallnnio sogllea monxank ietat tosleoch.” (1 Kor. 10:13a) Him utram Korintant ravpi Kristanvank boroilʼlim. Karonn tanchea modlim thoddim zannam Jehovachim sevokam zaunchea poilim, pordvari, apleach lingachea munxam lagim pozoddponn korpi ani bebdim aslim. (1 Kor. 6:9-11) Punn tannim bautizm ghetlea uprant, vaitt vondovnneo pois korunk tankam anik vavr korunk poddonkuch na, oxem tumkam dista kai? Na, toxem nhoi. Tim makhlolim Kristanvam aslim tem khorem, punn tim azun porian opurnn aslim. Hea pasot, tankam porot-porot vaitt vondovnneo pois korit ravonk poddttaleo. Ani tanchea udharonnantlean amkam urba melltta. Karonn, ami pois korunk sodhtat toslich ek tallnni, anik konn tori aplea tabeant korunk pavla mhunn amkam kollon ieta. Tor ‘sonvsarant ximpoddlolea amchea bhav-bhoinnank toxench bhogchem poddtta mhunn ugddas dovrun ami Devacher thir bhavarth dovrunk xoktat.’—1 Ped. 5:9.

16. Ami koslem chukichem chintop pois korunk zai, ani kiteak?

¹⁶ Toxench, tumchi poristhiti vo oddchonn konnuch somzonk xokona, oslem chukichem chintop pois korat. Karonn tumi oxem chintlem zalear tumi tumcheo vaitt vondovnneo kednanch pois korunk xokchimnant mhunn tumkam disonk puro. Punn Bible-ant oxem sanglam: “Devacher visvas dovrat: tumchean sosunk zata tea-von khor tallnni tumcher ieunk To kednanch nirmicho na; punn kosli-i tallnni aili zalear, ti sosunk To tumkam boll ditolo ani oxem tantlim bhair sorunk To tumkam vatt dakhoitolo.” (1 Kor. 10:13b) Tor tumchea monant porot-porot vaitt vondovnneo ietat zalear pasun, tumi Jehovak visvaxi ravonk xoktat. Ani Jehovache modotin, tumi tea vaitt vondovnnecher tabo dovrunk xoktat.

17. Amchea monant ietat teo vaitt vondovnneo ami addaunk xokonant zalear pasun, ami kitem korunk xoktat?

¹⁷ Sodanch ugddas dovrat: Opurnn aslolean, amchea monant ietat teo vaitt vondovnneo ami addaunk xokonant. Punn vaitt vondovnneo ietat tednam ami teo rokddeoch pois korunk zatat. Oxench Juzen kelem. Potifarachi bail taka tallnnent ghalunk sodhtali tednam to rokddoch thoinchean dhanvon gelo. (Ut. 39:12) Tor vaitt vondovnneank tumcher tabo cholounk dium nakat!

18-19. Ami amchea monachi novsornni korunk proitn kortat tednam ami amkanch kosle prosn vicharunk zatat?

¹⁸ Amchea monachi novsornni korop mhunnttlear, amchem chintop ani kornneo, Jehovak manvotat toxeo asat kai na mhunn khatri korit ravop. Ami amkanch vicharunk zata: ‘Hanv mhojem jivit jea toren jietam tea vorvim xevott lagim pavla, hem hanv somzon ghetam mhunn dison ieta kai? Novo sobhav apnnaunk hanv proitn korit asam kai? Vaitt vondovnneo mhojer tabo korina zaunk, Jehovache povitr xoktek hanv mhojea jivitant kam korunk ditam kai?’

¹⁹ Oxe toren ami amchich topasnni kortat tednam amche lagim ekui chuk zaunk zaina oxem ami chintchem nhoi. Punn ami atam porian kitli sudharnni kelea, tacher ami dhean diunk zai. Ani ami azun meren anikui sudharnni korunk zai zalear, ami niraxi zaunk zaina. Tachea bodlek, Filipkarank 3:16-nt dilʼlo ho solʼlo ami apnnaunk zai. Thoim sanglam: “Kitem-i zaum, ami aiz porian pavleanv thoim thaun teach rostean fuddem vochum-ia.” Ami oxem kortat tednam amchea monachi novsornni korunk ami kortat tea vavracher, Jehova besanv ghaltolo mhunn ami khatri dovrunk zata.