Prokasovnni Pustok—Amchea Fuddara Vixim Kitem Sangta?

 1. Aiz soglea lokamnim khoincho mhotvacho nirnnoi gheunk zai?

AIZ soglea lokamnim, razvottki cholounk favo aslolea Jehova Devak tim tenko ditolim vo tachea dusmanak, Soitanak tenko ditolim, ho mhotvacho nirnnoi gheunk zai. Tannim dogaim-kui sangata tenko diunk zaina. Ani tankam fuddarak sasnachem jivit mellttolem kai na, tem tim ghetat tea nirnnoiacher adarit asa. (Mt. 25:31-33, 46) Tor ‘nixttur dhumallo vo vhodd sontapa’ vellar, tim salvar zatolim vo tancho nas zatolo, hacho tharav zatolo.—Prok. 7:14; 14:9-11; Ez. 9:4, 6.

 2. (a) Hebrevank 10:35-39 amkam kitem korunk urba dita? (b) Prokasovnni pustok amkam koxem modot korunk xokta?

² Hebrevank 10:35-39 vachat. Jehovache razvottkek tenko diunk tumi vinchun kaddlam zalear, tumi ek ekdom boro nirnnoi kela. Ani dusreamnim pasun toxench korunk, tumi tankam modot korunk sodhtat astolim. Tor oxem korunk, Prokasovnni pustokant diloli mahiti tumkam modot korunk xokta. Karonn hea pustokant Jehovacho virodh kortat tanchem kitem zatolem, ani Jehovache razvottkek visvaxiponnan tenko ditat tankam koslim besanvam mellttolim tea vixim sanglam. Hea mhotvachea sotam vixim zannam zavop khub gorjechem. Karonn oxem kelolean Jehovachi seva korit ravonk tumcho nichov ghott zatolo. Toxench, dusreamnim pasun Jehovachi seva korcho nirnnoi gheunk, ani Jehovachi seva korit ravonk tumi tankam modot korunk pavtolim.

 3. Hea lekhant ami kitem polloitolim?

³ Tor hea lekhant, ami don prosnanche zobab polloitolim: Devache razvottkek tenko ditat tanchem kitem zatolem? Ani Prokasovnni pustokant sanglolea tambddea savzak tenko ditat tanchem kitem zatolem?

 4. Apostl Juanv dorxonant, Jezu sangata sorgar khoinchea zomeak polloita?

⁴ Apostl Juanv eka dorxonant, Devache razvottkek tenko ditat toslea don zomeank polloita. Tankam sasnachea jivitachem besanv melltta. Poilea zomeant 1,44,000 zannam asat. (Prok. 7:4) Tankam Jezu sangata Raj cholounk hea sonvsarantlean vinchun kaddleant. Ani tim tachea sangata sorgar thaun hea prithumer raj choloitat. (Prok. 5:9, 10; 14:3, 4) Hea dorxonant, Juanv tankam Jezu sangata Sion dongrar ubim asat tem polloita.—Prok. 14:1.

 5. 1,44,000 zannanchea zomeantlea urlolea zannank beginuch kitem zaunchem asa?

⁵ Apostlanchea kallar thaun aiz porian hozaramnim lokank, 1,44,000 zannanchea zomeacho bhag zaunk vinchun kaddleant. Ani Juanvan sanglem ki nimannea disamnim hea zomeantlim fokot thoddinch zannam prithumer jivont astolim. (Lukas 12:32; Rom. 8:17) Hea ‘urlolea zannank’ vhodd sontap suru zaunche poilim, Jehovache maniotaiecho nimanno “xikʼko” mellttolo. (Prok. 7:2, 3; 12:17) Uprant, vhodd sontapa vellar tankam sorgar ubarun vhortole. Ani tim 1,44,000 zannantlea heram borabor Jezu sangata mellon razvottki choloitolim.—Mt. 24:31; Prok. 5:9, 10.

6-7. (a) Juanv anik khoincho zomo polloita, ani tanche vixim amkam kitem kollon ieta? (b) Amkam sorgar vo prithumer jieuncho bhorvonso asum, Prokasovnni odheai 7-ant sanglam tem ami kiteak zannam zaunk sodhtat?

⁶ Uprant, Juanvan “ek bhov vhodd lokachi urponz” polloili. (Prok. 7:9, 10) Punn hea zomeant mezunk zaina titlo lok aslo. Hea zomea vixim Juanv oxem sangta: “Nixttur dhumalleantlo solamoti pavlo to lok ho. Tannim aplim vostram Menddreachea rogtan dhuleant ani dhovim keleant.” (Prok. 7:14) Tor ‘nixttur dhumalleantlean vo vhodd sontapantlean’ salvar zalea uprant, hi ‘vhodd urponz’ hea prithumer jietoli ani tankam zaitim besanvam mellttolim.—St. 37:9-11, 27-29; Mho. 2:21, 22; Prok. 7:16, 17.

⁷ Amkam sorgar vo prithumer jieuncho bhorvonso asum, Prokasovnni odheai 7-ant sanglolea bhasaunnent ami amkanch pollounk xoktat kai? Hoi, khorench! Devachea sevokanchea hea donui zomeank ho ek khuxalkaiecho vell astolo. Karonn tannim Jehovache razvottkek tenko diunk vinchun kaddlem. Tor atam, vhodd sontapa vixim Prokasovnnichem pustok amkam anik kitem sangta tem polloum-ia.—Mt. 24:21.

 8. Vhodd sontapachi survat koxi zatoli, ani choddso lok kitem kortolo?

⁸ Ami fattlea lekhant polloilem toxem, beginuch hea sonvsarache sogle sorkar, Vorixtt Babilonacho, tem mhunnttlear, sonvsarantlea soglea khottea dhormancho nas kortole. (Prok. 17:16, 17) Ani hi vhodd sontapachi survat zaun astoli. Tor tea vellar anikui zaito lok Jehovachi seva korunk lagtolo oxem kai? Na. Prokasovnni odheai 6-ant sanglam toxem Jehovachi seva korinant te lok, dongrachea khoddpamnim lipon ravtole. Tem mhunnttlear, te sonvsarantle rajki fuddari ani veapar-dhondo kortoleam lagim modot magtole. Tor te Jehovachea Rajeak tenko diunche nant dekhun Jehova tankam aple virodhi mhunn lekhtolo.—Lukas 11:23; Prok. 6:15-17.

 9. Vhodd sontapa vellar Jehovache lok veglle koxe astole, ani hacho porinnam kitem zatolo?

⁹ Punn vhodd sontapachea kotthin vellar, fokot Jehovachech sevok soglea lokam poros veglle astole. (Prok. 13:14-17) Karonn fokot tech Jehovachi bhokti kortole ani ‘savzak’ tenko diunche nant. Hea pasot, Jehovacho virodh kortat tea sogleank tancho rag ietolo. Tor raxttrancho ek zomo Devachea lokancher akromonn kortole. Ani hea akromonnak Bible-ant, Magogachea Gogachem akromonn oxem mhunnttlam.—Ez. 38:14-16.

10. Prokasovnni 19:19-21-ant sanglolea pormonnem, aplea lokancher akromonn zata tednam Jehova kitem kortolo?

¹⁰ Tor hea akromonna vellar Jehova kitem kortolo? Jehova sangta: “Mhozo zollto krodh perun choddtolo.” (Ez. 38:18, 21-23) Ani Prokasovnni odheai 19-ant, fuddem kitem zatolem tea vixim sanglolem asa. Jehova aplea lokank salvar korunk ani aplea dusmanancho nas korunk, aplea Putak, Jezuk dhaddttolo. Jezu ani ‘sorginchim loskoram,’ tem mhunnttlear, visvaxi ainz ani 1,44,000 zannam sangata mellon hem zhuz zhuztole. (Prok. 17:14; 19:11-15) Hacho porinnam kitem zatolo? Jehovacho virodh kortat tea soglea lokancho ani songottnnecho sasna khatir nas zatolo!—Prokasovnni 19:19-21 vachat.

11. Prokasovnni pustokachea xevottak kosli mhotvachi ghoddnni ghoddtta?

¹¹ Devachea soglea dusmanancho nas zatolo. Punn tache visvaxi sevok salvar zatole. Tednam te kitle khuxal astole tea vixim chintat! Tednam sorgar kitem zatolem? Vorixtt Babilonacho nas zata tednam sorgar khub khuxalkai astoli. Punn atam, anik eka karonnak lagon thoim anikui chodd khuxalkai astoli. (Prok. 19:1-3) Tem karonn kitem zaun asa? Prokasovnni pustokachea xevottak sanglolem ‘Menddreachem logn!’—Prok. 19:6-9.

12. Prokasovnni 21:1, 2-ant sanglolea pormonnem, Menddreachem logn kednam zatolem?

¹² Armageddonachem zhuz zaunchea thoddeach vella poilim, soglim 1,44,000 zannam Jezu sangata sorgar astolim. Punn to Menddreachea lognacho vell aschona. (Prokasovnni 21:1, 2 vachat.) Tor ‘Menddreachem logn’ kednam zatolem? Armageddonachem zhuz ani Devachea soglea dusmanancho nas zalea uprant Menddreachem logn zatolem.—St. 45:3, 4, 13-17.

13. Menddreachea lognak kitem zatolem?

¹³ Menddreachem lognak kitem zatolem? Eka lognak ek dadlo ani bail ek zatat toxinch, hea lognant, amcho Raza Jezu Krist ani tachi ‘vhokol,’ tem mhunnttlear 1,44,000 zannam, eka orthan ek zatolim. Hea vorvim ek novo sorkar stapon zatolo, zo 1,000 vorsam pasot hea prithumer raj choloitolo.—Prok. 20:6.

14-15. Prokasovnni odheai 21-ant, 1,44,000 zannank konnak sor keleant? (Masikachem fuddlem chitr polloiat.)

¹⁴ Prokasovnni odheai 21-ant, 1,44,000 zannank “Novem Jeruzalem” nanvachea eka ekdom sobit xarak sor keleant. (Prok. 21:2, 9) Hea xarak bara buniadiche fator asat. Ani tea fatrancher, “menddreachea bara Dhormdutanchim nanvam” boroilʼlim asat. Apostl Juanvan hem dorxon polloilem tednam to sarko thottaklo. Karonn tantuntlea eka fatracher, tachem nanv boroilʼlem aslem tem tannem polloilem. Ho taka kitlo vhoddlo man aslo nhoi?—Prok. 21:10-14; Ef. 2:20.

¹⁵ Juanvan dorxonant polloilʼlea xara sarkem anik khoinchench xar naslem. Karonn hea xaracho mukhel rosto osol bhangaracho aslo. Taka motianche bara darvontte asle. Tacheo vontteo ani buniadi soglea jinsachea mannkam-motiamnim nettoilʼleo. Ani tem xar chovkott aslem, ekech lambaiechem ani rundaiechem. (Prok. 21:15-21) Punn tea xarant kitem tori naslem mhunn Juanv sangta. To mhunntta: “Xarant hanvem Gabharo [“mondir,” NW] polleunk na, kiteak tacho Gabharo khud Sorvpodvedar Sorvespor Dev ani Menddro. Xarak suriachea vo chondrachea uzvaddachi goroz na, kiteak Devachi mhoima tacher aplo porzoll ghalta ani Menddro tacho Divo.” (Prok. 21:22, 23) Novea Jerusalemache bhag zaun asat te, Jehova ani Jezu sangatach astole. (Heb. 7:27; Prok. 22:3, 4) Tea pasot Prokasovnni pustokant, Jehova ani Jezu tea xaracho gabharo vo mondir zaun asat mhunn sanglam.

16. Devachea Rajeachea Ek Hozar Vorsanche Razvottke vellar soglea munxakullak koslim besanvam mellttolim?

¹⁶ Tor hea xara vixim chintʼtana, obhixikt Kristanv khub khuxal zatat. Punn teach borabor, hea prithumer jieunk bhorvonso asa tannim pasun hea xara vixim zannam zaunk zai. Karonn Devachea Rajeachea Ek Hozar Vorsanche Razvottke vellar, hea xara udexim soglea munxakullak zaitim besanvam mellttolim. Juanvan him besanvam ‘jivitachea udkachi ek nodi’ koxi vhanvta toxim polloilim. Tea nodichea donui vattamnim ‘jivitachim zhaddam’ aslim, ani “raxttrancheo pidda kaddunk” tanchea panank gunn asle. (Prok. 22:1, 2) Tor tea vellar prithumer jietolea soglea munxank hea borea vostum thaun faido zatolo. Sovkas-sovkas, Jehovachem utor pallttat tim soglim poripurnn zatolim. Ani tednam duens, dukh ani roddnnem aschem na.—Prok. 21:3-5.

17. Prokasovnni 20:11-13 pormonnem, Ek Hozar Vorsanche Razvottke vorvim konnank besanvam mellttolim?

¹⁷ Tor hea besanvantlean konna-konnank faido zatolo? Sogleam-von poilim mhunnttlear, Armageddon zhuzantlean salvar zatat tankam him besanvam mellttolim. Ani novea sonvsarant zolmolʼlea bhurgeank pasun him besanvam mellttolim. (Prokasovnni 20:11-13 vachat.) Toxench, Prokasovnni odheai 20-ant melʼlim porot jivont zatolim mhunn sanglam. Hantunt ‘borim’ toxench “vaitt” munxam mellon asat. (Itihas 24:15; Juanv 5:28, 29) Tor hacho orth, soglinch munxam porot jivont zatolim kai? Na. Karonn borim munxam mhunnttlear tim munxam, jim Jehovak visvaxi ravon melim. Ani vaitt munxam mhunnttlear tim munxam, jim jivont aslim tednam tankam Jehova vixim xikonk sondhi mellonk na. Tor jea munxamnim, tim jivont aslim tednam Jehova vixim xikonk tankam mellʼlloli sondhi nakarli, tim porot jivont zaunchim nant. Karonn tim Sobit Bagent jieunk purtim naslim mhunn tannim dakhoun dilem.—Mt. 25:46; 2 Tes. 1:9; Prok. 17:8; 20:15.

18. 1,000 vorsanchea xevott meren kitem zatolem?

¹⁸ Fuddarak, Adanvachea patkak lagon amkam anik tras bhogunk poddche nant. (Rom. 5:12) Karonn 1,000 vorsanchea xevott meren prithumer jietolim soglim, eka orthan ‘porot jivont’ zatolim. Tem mhunnttlear, tim poripurnn zatolim.—Prok. 20:5.

19. Nimanne porikxe vellar dor eka munxak kosli sondhi mellttoli?

¹⁹ Soitanan Jezuchi porikxa keli tea vellar pasun, Jezu Jehovak visvaxi ravlo mhunn ami zannant. Tor 1,000 vorsanchea xevottak, Soitanak patallantlean bhair kaddttole tednam to soglea poripurnn munxanchi porikxa kortolo. (Prok. 20:7) Ani hea porikxe vorvim dor eka poripurnn munxak, tim Jehovak visvaxi ravtolim kai na, tem dakhoun diunk sondhi mellttoli. Tor jim konn hea nimanne porikxe vellar Jehovak visvaxi ravtat, tankam sasnachem jivit ani khori svotontrtai mellttoli. (Rom. 8:21) Punn jim konn Jehovachea add voitat, tankam Jehova Dev, Soitan ani tachea vaitt dutam sangata sasnak nas kortolo.—Prok. 20:8-10.

20. Prokasovnni pustokant sanglolea bhasaunneam vixim tumkam koxem dista?

²⁰ Prokasovnni pustoka vixim zannam zalolean tumkam koxem bhogta? Heo bhasaunneo purnn zatat tea vellar, tumchem jivit koxem astolem tea vixim atam chintʼtat tednam tumi umedin bhoronant kai? Jehovachi khori bhokti korunk dusreank ieukar diunk tumchi urba vaddona kai? (Prok. 22:17) Tor fuddarak kitem zatolem tem zannam zalolean, ami ekdom khuxal zaun apostl Juanva bhaxen mhunnonk sodhtat: “Amen! Ie, Somia Jezu!”—Prok. 22:20.