Prokasovnni Pustok —Amkam Aiz Koxem Faideak Poddtta?

1-2. Prokasovnni pustokant kitem boroilʼlem asa tem ami kiteak zannam zaunk zai?

TUMI vollkhotat tancho ek fottu album polloitat mhunn chintat. Tantuntle fottu polloitana, tumkam zaitim onvollkhi munxam distat. Punn okosmat tumchi nodor eka fottvacher poddtta ani tumi bariksannen to fottu pollounk lagtat. Kiteak? Karonn tumi tea fottvant asat! Tor to fottu khoim ani kednam kaddlolo, ani tea fottvant aslolea her munxank tumi vollkhotat kai mhunn tumi chintunk lagtat. Atam tumkam to fottu khub valoracho zata.

² Prokasovnni pustok heach fottva bhaxen zaun asa. Oxem mhunnonk amkam don karonnam asat. Poilem mhunnttlear, hem pustok her lokam pasot nhoi, punn Devachea lokam pasot boroilʼlem asa. Karonn hea pustokachea poilea versant oxem sanglam: “Hi Jezu Kristachi prokasnni: Rokddea-rokddem kitem-kitem ghoddchem asa, tem apleam sevokank dakhouncheak Devan taka ti kelea.” (Prok. 1:1, Povitr Pustok - Novo Korar.) Hantuntlean, Prokasovnni pustokant asloleo bhasaunneo ami vachtat tednam teo amkam lagu zatat mhunn kollon ieta. Tor eka orthan, ami hea “fottvant” asat.

3-4. Prokasovnni pustokant sangloleo bhasaunneo kednam ghoddttat, ani hea pasot ami kitem korunk zai?

³ Prokasovnni pustokant kitem asa tem zannam zaunk dusrem karonn mhunnttlear, tantunt asloleo bhasaunneo kednam ghoddttat tem mhotvachem. Hea vixim apostl Juanvan boroilem: “To Somiacho Dis aslo. Tea disa Povitr Atmeacho bhar mhojer ailo.” (Prok. 1:10) Tor ho Somiacho dis kednam suru zalo? Apostl Juanvan him utram sumar 96 K.X.-ant boroilim. Punn tea vellar, “Somiacho Dis” azunui suru zaunk naslo. (Mt. 25:14, 19; Lukas 19:12) Bible-antlea bhasaunneam pormonnem ho dis, 1914-nt, Jezu sorgar Raza zalo tednam suru zalo. Ani tednam thaun aiz meren Prokasovnni pustokant sangloleo bhasaunneo purnn zatat. Ani ami aiz ‘Somiachea disant’ jietat!

⁴ Tor ami hea kallar jietat dekhun Prokasovnni 1:3-ant dilʼlo solʼlo ami apnnaunk zai. Thoim oxem mhunntta: “Ieuncheo asat tea ghoddnniancho kall lagim pavla. Dekhun jim konn hem bhakit vachtat, ani jim konn tem aikotat ani tantum boroilʼlem asa tem palltat, tim subhagi!” Tor ami hem ‘bhakit vo bhasaunnentlim utram aikonk’ zai, ‘vachunk’ zai ani tim ‘pallunk’ zai.

 5. Amchi bhokti Jehovak manvota tosli asop gorjechem mhunn Prokasovnni pustok amkam koxem dakhoun dita?

⁵ Prokasovnni pustokachea poilea odheai-antlean, soglea sobhamnim kitem cholta tem Jezu bore bhaxen zannam mhunn amkam kollon ieta. (Prok. 1:12-16, 20; 2:1) Kiteak? Asia Minor-ant aslolea sat sobhank Jezun dhaddlolea sondexantlean ami hem zannam zatat. Jezun poilea xekddeantlea Kristanvank, tanchi bhokti Jehovak manvota tosli zaunk tannim kitem korunk zai hea vixim margdorxon dilem. Ani Jezun tankam sanglolim utram aiz amkam sogleank lagu zatat. Tor hantuntlean Jehova sangata amchi ixttagot ghott asa kai na, ani taka manvota tea ritin tachi bhokti korunk ami kitem korunk zai, tem Jezu bore bhaxen zannam mhunn amkam kollon ieta. Karonn amcho Fuddari zalolean, to amkam vatt dakhoita ani amchi rakhonn korta. Toxench, tache nodre thaun kainch lipon urona. Tor, Jezun tea sobhank koslem margdorxon dilem jem aiz ami pallop gorjechem zaun asa tem atam polloum-ia.

 6. (a) Prokasovnni 2:3, 4-ant, Jezuchea utrantlean Efezantle sobhek kitem zalʼlem mhunn amkam kollon ieta? (b) Hantuntlean ami kitem xiktat?

⁶ Prokasovnni 2:3, 4 vachat. Jehova pasot tumcho mog unno zaunk dium nakat. Efezantlea sobhent aslolea Kristanvank zaiteo oddchonneo asleo. Tori astana, tim sosnikaien Jehovachi seva korit ravlim. Punn uprant, Jehova pasot tancho mog unno zalo mhunn Jezuchea sondexantlean amkam kollon ieta. Tor tannim ho mog portun vaddounchi goroz asli. Karonn tannim oxem korunk naslem zalear, Jehova tanchi bhokti manun gheuncho naslo. Tor Efezantlea Kristanvam bhaxen, aiz ami pasun sosnikai dakhoitat astolim. Punn ami kitem kortat tench nhoi, punn kiteak lagon kortat tem Jehovak chodd mhotvachem. Karonn ami tacho mog kortat ani tache upkari asat dekhun ami tachi bhokti keloli Jehovak zai.—Mho. 16:2; Marku 12:29, 30.

 7. (a) Prokasovnni 3:1-3-a pormonnem, Sardisache sobhentlea bhav-bhoinnam vixim Jezun kitem sanglem? (b) Ami kitem korchi goroz asa?

⁷ Prokasovnni 3:1-3 vachat. Sodanch zagrut ravat. Sardis sobhent aslolim bhav-bhoinnam poilim Jehovache sevent khub vavr kortalim. Punn uprant tanchi seva unni zali. Tea pasot, Jezun tankam ‘zagim zaiat’ mhunn sanglem. Tor hantuntlean amkam kitem xittkaunni melltta? Ami Jehovache sevent kortat to vavr, Jehova visorchona tem khorem. (Heb. 6:10) Punn, Jehovache sevent ami poilim zaitem kelam ani atam titlem korchi goroz na oxem ami chintchem nhoi. Amkam poilim poros atam chodd oddchonneo asat zalear pasun, ‘Somiache sevent’ amchean zata tem soglem korunk ami vavr korit ravonk zai, ani xevott porian zagrut ravonk zai.—1 Kor. 15:58; Mt. 24:13; Marku 13:33.

 8. Prokasovnni 3:15-17-nt Laodiseichea sobhek Jezun sanglolea utrantlean ami kitem xiktat?

⁸ Prokasovnni 3:15-17 vachat. Urben ani purnn kallzan Jehovachi bhokti korat. Laodisei sobhent aslolim bhav-bhoinnam oxem korinaslim. Jehovache bhoktent tim ‘xellmoddim’ zalʼlim. Hea pasot, Jezun tankam ‘dolldirim ani konixtt’ mhunnttlim. Ani tannim Jehovachi bhokti urben korchi goroz asli mhunn tankam sanglem. (Prok. 3:19) Tor ami kitem xiktat? Jehovache sevent amchi urba unni zalea zalear, Jehovan ani tachea songottnnen amchea pasot kelʼlea soglea borea vostunk lagon amchem upkariponn ami vaddounk zai. (Prok. 3:18) Toxench, amkam ek susegad jivit melloun gheunk ami itlem vavrunk zaina, ki Jehovache sevek poilo zago diunk ami pavchimnant.

 9. Jezun, Pergamache ani Thiatirachea sobhank dilolea sondexantlean ami kitem nakarunk zai mhunn amkam kollon ieta?

⁹ Dhorm-broxtt korpeancheo xikounneo nakarat. Pergamache sobhent aslolim thoddim zannam munxancheo xikounneo apnnaun sobhent futt ghaltalim dekhun Jezun tankam khor solʼlo dilo. (Prok. 2:14-16) Punn Thiatira sobhent aslolea thoddeamnim “Soitanache khol gutt” pois kelʼle dekhun Jezun tankam xabaski dili. Ani tancho bhavarth ‘thir samballunk’ tankam urba dili. (Prok. 2:24-26) Tor, khotteo xikounneo apnnaun aplo bhavarth unno zaunk dilʼlea hea donui sobhentlea Kristanvamnim poschatap korchi goroz asli. Ami pasun Jehovachea chintpa add asloleo xikounneo nakarunk zai. Karonn dhorm-broxtt korpi, te Bible-antleo xikounneo pallttat mhunn dakhounk puro. Punn tanchea kornneamnim te toxe korinant mhunn amkam kollon ieta. (2 Tim. 3:5) Tor ami bariksannen Devachea Utracho obheas kortat zalear, osleo khotteo xikounneo ami vollkhonk ani nakarunk pavtolim.—2 Tim. 3:14-17; Judas 3, 4.

10. Jezun Pergama ani Thiatirachea sobhank dilolea sondexantlean ami anik kitem xiktat?

¹⁰ Sogle torechim onoitik kamam samkinch nakarat. Pergama ani Thiatira sobhentlim thoddim bhav-bhoinnam pozoddponn kortalim. Ani tim kortalim tem ekdom vaitt mhunn Jezun tankam sanglem. (Prok. 2:14, 20) Tor ami kitem xiktat? Ami ghoddie zaitim vorsam thaun Jehovachi seva kortat astolim. Ani Jehovache sevent amkam zaite sueog vo zobabdareo asat astoleo. Tor hea pasot, ami onoitik kamam kelear pasun Jehova kainch korchona oxem ami chintunk zaina. (1 Sam. 15:22; 1 Ped. 2:16) Karonn hea sonvsarache dorje kitle-i khala poddom, ami Jehovachea unch noitik dorjeam pormonnem jielolim Jehovak zai.—Ef. 6:11-13.

11. Ami atam meren kitem xiklim? (“Ami Aiz Xikonk Zatat Tim Lisanvam” hem boks pasun polloiat.)

¹¹ Tor atam meren ami kitem xiklim? Amchi bhokti Jehovak manvota tosli asa kai na mhunn ami khatri korun gheunk zai. Ani ami Jehovak manvona toslem kitem-i kortat zalear, Jehovachi maniotai melloun gheunk ami rokddech bodlav korunk pavl gheunk zai. (Prok. 2:5, 16; 3:3, 16) Punn Jezun hea sobhank anikui kitea vixim sanglem. Tem kitem tem ami fuddem polloum-ia.

12. Jezun, Smirna ani Filadelfiachea sobhank dilʼlea sondexantlean ami kitem xiktat? (Prokasovnni 2:10)

¹² Smirna ani Filadelfiachea sobhank Jezun dilʼlea sondexantlean ami kitem xikonk zata tem atam polloum-ia. Dhumallo ieta tednam tannim bhieunchem nhoi, karonn tim visvaxi ravlim zalear Jehova tankam inam ditolo mhunn Jezun tankam sanglem. (Prokasovnni 2:10 vachat; 3:10) Tor ami kitem xiktat? Amkam pasun dhumallo ietolo mhunn ami ugddas dovrunk zai. Ani tacho fuddo korunk ami toiar asonk zai. (Mt. 24:9, 13; 2 Kor. 12:10) Tor Jezun sanglolem tem aiz amkam kiteak mhotvachem zaun asa?

13-14. Prokasovnni odheai 12-nt sanglolea ghoddnneank lagon Devachea lokancher koslo porinnam zala?

¹³ ‘Somiachea disant,’ mhunnttlear amchea disamnim, Devachea lokank dhumallo sosunk poddttolo mhunn Prokasovnni pustokant sanglolem asa. Hea pustokachea odheai 12-nt, Devachem Raj sorgar stapon zaun rokddench thoim ek zhuz zalem mhunn sanglam. Jezu Krist, zaka sorgar Mikael mhunnttat, to ani tache ainz, Soitan ani tachea vaitt dutam sangata zhuzle. (Prok. 12:7, 8) Hea zhuzant Soitan ani tache vaitt dut harovle ani tankam sonvsaracher xevttile. Hea karonnak lagon, te aiz sonvsarant aslolea soglea lokank khub tras kortat. (Prok. 12:9, 12) Tor Devachea lokancher hacho koslo porinnam zala?

¹⁴ Soitan porot sorgar vochonk xokona mhunn to zannam. Tea pasot, Devachea Rajeache protinidhi ani “Jezuchi govaiki ditat” te sonvsarant aslolea urlolea obhixiktancher to akromonn korta mhunn Prokasovnni pustok sangta. (Prok. 12:17, Povitr Pustok – Novo Korar; 2 Kor. 5:20; Ef. 6:19, 20) Tor hi bhasaunni koxi purnn zalea?

15. Prokasovnni odheai 11-nt sanglole ‘don sakxidar’ konnank suchit kortat, ani tankam kitem ghoddlem?

¹⁵ Prokasovnni odheai 11-nt ‘don sakxidarank’ jivexim marle mhunn sanglam. He don sakxidar, porgottnnechea kamant fuddakar ghetolea obhixikt bhavank suchit kortat.b (Prok. 11:3, 7-11) Tor hi bhasaunni koxi purnn zali? 1918-nt songottnnechea kamant fuddakar gheupi att bhavancher khotto arop ghatlo. Te bondkhonnint zaitim vorsam sartole mhunn formonn marlem ani tankam bondkhonnint ghatle. Tea vellar, tanchem kam atam bond zalem oxem zaitea lokank dislem. Tor eka orthan, tankam ‘jivexim marle.’ Hea toren dusmanank uzar korun, Soitanan porgottnnechea kamant fuddakar ghetolea bhavancher akromonn kelem.

16. 1919-ant ojapachem kitem ghoddlem, punn tednam thaun Soitan kitem korit asa?

¹⁶ Prokasovnni odheai 11-nt fuddem sangta ki hea ‘don sakxidarank’ thoddea vella uprant porot jivont kele. Tor hem kednam ghoddlem? Hea obhixikt bhavank bondkhonnint ghatlea uprant, ekuch vorsa bhitor kitem tori ojapachem ghoddlem. Mars 1919-ant tankam bondkhonnintlean bhair kaddle ani tancher ghatlole khotte arop fatti ghetle. Tor hea bhavamnim rokddench porgottnnechea kamant fuddakar gheupachem kam porot suru kelem. Punn hacho orth, Soitanan Devachea lokancher akromonn korop bond kelem oxem kai? Na. Tednam thaun Soitan, Devachea soglea lokam add dhumalleachi ‘ek nod’ vhanvo-xi korta. (Prok. 12:15) Tea pasot amchea modem aslolea dor ekleak, ‘thirai ani ghott bhavarth asonk zai.’—Prok. 13:10.

17. Soitan Devachea lokancher akromonn korta zalear pasun, Devachea lokank chintina tea toren modot koxi mellʼllea?

¹⁷ Prokasovnni odheai 12-nt fuddem sanglam ki Devachea lokank tim chintinant tea toren modot mellttoli. Koxi? ‘Dhortori vo prithum’ dhumalleache ‘nodik’ gillttoli mhunn sanglam. (Prok. 12:16) Hem koxem ghoddtta? Thodde pavtti Soitanachea sonvsarache thodde bhag, zoxe neai korpi odhikari, Devachea lokanchea adarak pavleat. Tem mhunnttlear, Jehovache sevok zaite pavtti korttacheo kesi jikleat ani tankam svotontrtai mellʼllea. Ani tannim hi svotontrtai Devan tankam dilʼlem kam zata title bore bhaxen korunk uzar kelea. (1 Kor. 16:9) Tor hea kamant kitem mellon asa?

18. Hea nimannea disamnim amchem mukhel kam kitem zaun asa?

¹⁸ Jezun bhasaunni kelʼli ki xevott ieunchea poilim Jehovache sevok akʼkhea sonvsarant “Sorginchea Rajeachem Xubhvortoman” porgott kortole. (Mt. 24:14) Ani ‘prithumer jietoleank, mhonnge dor-eka desak, dor-eka kullak, dor-eke bhaxechea lokak, ani dor-eke porjek, hi bori khobor porgott korche khatir, sasnachem xubhvortoman aslolea’ eka devduta koddlean vo devdutanchea zomea koddlean modot mellttoli.—Prok. 14:6.

19. Jehovache sevok anik kosli khobor porgott kortat?

¹⁹ Punn Devache lok, fokot Devachea Rajeachea xubhvortomana vixinch porgott korinant punn tim anikui kitem tori porgottʼttat. Prokasovnni odheai 8 te 10-nt, Devachem Raj nakartat tea lokank kitem ghoddttolem tem ainz kolloitat. Tor ainzachea hea kamank pasun Devacho lok tenko ditat. Koxem? Tim ‘korve ani ujeak’ sor keloli zoddttechi khobor porgottʼttat. Tem mhunnttlear, Soitanachea sonvsarachea veg-vegllea bhagank Dev kitem kortolo tem tim sangtat. (Prok. 8:7, 13) Toxench, hea sonvsaracho xevott lagim pavla ani lokamnim aplem jivit bodolʼlem zalear, Devachea ragachea disak tim salvar zatolim, hem-ui tim tankam kolloitat. (Zef. 2:2, 3) Punn lokank hi khobor aikonk naka. Ani vhodd sontapa vellar hi khobor anikui khor zatoli ani lok amcher anikui ragar zatolo. Tea pasot, ho sondex tankam diunk amkam dhirachi goroz asa.—Prok. 16:21.

20. Fuddlea don lekhamnim ami kitem polloitolim?

²⁰ Prokasovnni pustokant sangloleo zaiteo bhasaunneo aiz purnn zatat ani tantunt ami pasun mellon asat. Tea pasot, ami ‘hem bhakit vo bhasaunnentlim utram’ pallunk zai. (Prok. 1:3) Punn amkam dhumallo ieta tednam to visvaxiponnan sosunk ani dhiran porgottnni korit ravonk amkam koxi modot zatoli? Prokasovnni pustokant, Devachea dusmanak kitem ghoddttolem ani ami visvaxi ravlear amkam fuddarak koslim besanvam mellttolim tem sanglolem asa. Heo donui vostu zannam zalolean amkam modot zaunk xokta. Tor hea vixim ami fuddlea lekhant polloum-ia.