Mog Amkam Bhirant Pois Korunk Modot Korta

 1. Amkam kosli bhirant asonk xokta?

AMKAM kosli bhirant asonk xokta? Jehovachea thoddea sevokank kosli bhirant asli tem zannam zaunk thoddea onubhovancher ami dhean dium-ia. Bhav Nestor ani tachi bail María, porgottnnaranchi chodd goroz asa thoim vochon seva korunk sodhtalim.b Ani oxem korunk, tannim aplem jivit sadem korunk zai aslem. Punn tanche lagim chodd poixe nant zalear tim ghoddie khorench khuxal aschim nant hi bhirant tankam asli. Toxench, Biniam Jehovacho Sakxi zalo tednam to ravtalo tea desant Jehovachea Sakxeanchea kamak virodh aslo. Tor atam apnnakui virodh sosunk poddttolo mhunn taka bhirant asli. Punn apunn ek Sakxi zala mhunn aplea familik kollʼllea uprant, tim kitem kortolim hachi taka chodd bhirant asli. Tea bhair, Valérie nanvache eke bhoinnik ek osle torecho cancer zalʼlo zo tichea kuddint rokddoch posortalo. Ani rogot nastana ilaz korunk tika ek dotor mellonaslo. Tor apunn ghoddie mortoli mhunn ti bhieli.

 2. Ami amchi bhirant pois korop kiteak gorjechem?

² Amchea modlea zaitea zannank oslich bhirant dislea zait. Ani ami hi bhirant pois korinant zalear ami vaitt nirnnoi gheunk pavtolim, ani tacho porinnam amche ani Jehovache ixttagoticher zaunk pavtolo. Ani oxench zalolem Soitanak zai. Soitan amchi bhirant uzar korun, ami porgottnni bond korunk ani Jehovache kaide moddunk proitn korta. (Prok. 12:17) Soitan ekdom noxtto, krur ani taka khub xokti asa. Tor tache thaun rakhonn mellonk ami kitem korunk zata?

 3. Ami amchi bhirant kednam pois korunk pavtolim?

³ Jehova amcho khub mog korta ani to amkam modot korunk sodanch toiar asa mhunn amkam khatri asa zalear Soitan amkam bhieunk xokchona. (St. 118:6) Oxich khatri, Stotr 118 boroilʼlea stotrkarak asli. Taka khub trasancho fuddo korunk poddlo. Udharonnak, tache khub dusman asle ani tantuntlea thoddea zannank vhodd podvi asli (vers 9, 10). Toxench, thodde pavtti to khub dobhava khala aslo (vers 13). Tea bhair, taka Jehova koddlean pasun khor xist mellʼlli (vers 18). Tori astana, tea stotrkaran oxem mhunnttlem: “Sorvespor mhojea bhagak asa: tor kosli bhirant?” Tor apunn surokxit asa oxem tea stotrkarak kiteak dislem? Jehova koddlean taka xist mellʼlli tem khorem. Tori punn, aplo sorgincho Bap aplo khub mog korta ani apunn kosle-i poristhitint aslear pasun, apleak modot korunk to sodanch toiar asa mhunn tea stotrkarak khatri asli.—St. 118:29.

 4. Jehova amcho mog korta mhunn amkam khatri asa zalear ami kosleo bhirant pois korunk pavtolim?

⁴ Ami poilea peregrafant polloilʼlea bhav-bhoinnank pasun Jehova tancho mog korta mhunn khatri asli. Hea vorvim, tim tanchi bhirant pois korunk pavlim. Tor Jehova amcho mog korta mhunn amkam khatri asonk zai. Hi khatri aslear ami tin torecheo bhirant pois korunk pavtolim. (1) amcheo familicheo gorzo purnn korunk xokchimnant mhunn asloli bhirant, (2) munxachi bhirant, ani (3) mornnachi bhirant.

 5. Eka familichea vhoddilak koslea karonnank lagon khub usko zaunk puro? (Masikachem fuddlem chitr polloiat.)

⁵ Jehovan familichea vhoddilak aplea familicheo gorzo purnn korpachi zobabdari dilea. Ani hi zobabdari khub gombhir zaun asa mhunn ek familicho vhoddil vollkhon gheta. (1 Tim. 5:8) Tor tum ek familicho vhoddil zalear, halinchea hea pidde vellar tuka khub usko zalo astolo. Zoxem, ‘Faliam mhojem kam astolem kai na? Hanvem mhojem kam hogddailem zalear mhaka dusrem ek kam mellttolem kai? Mhojea familicheo gorzo hanv purnn korunk pavtolo kai? Ghorachem bhaddem hanv farik korunk pavtolo kai?’ Vo bhav Nestor ani bhoinn María bhaxen, thoddea poixeamnim tujea familicheo gorzo tum purnn korunk xokchona oxem tuka dislem astolem. Amkam oxe toren bhirant dista tednam Soitan te sondhecho faido gheta. Ani hea karonnak lagon, aiz zaitea bhav-bhoinnamnim Jehovachi seva korop bond kelea.

 6. Soitan amchea monant koslo dubhav ghalta?

⁶ Jehova amcho mog korina ani amchea familichi kallji gheunk to amkam modot korchona mhunn Soitan amchea monant dubhav ghalta. Tor hea pasot, amchem kam sogleam-von mhotvachem ani tem hogddaina zaunk amchean zata tem soglem ami korunk zai, ani oxem korunk Bible-achim totvam pasun moddop chukichem nhoi mhunn ami chintunk puro.

 7. Jezu amkam kosli khatri dita?

⁷ Punn Jezu, zo Jehovak soglem poros boro vollkhota, to amkam oxi khatri dita: “Tumkam kitem goroz tem tumi Tache lagim magche adinch tumcho Bap zanno.” (Mt. 6:8) Itlench noi, Jehova amcheo gorzo purnn korunk toiar asa mhunn Jezuk khobor asli. Kristanv zalolean ami Jehovachea familichim bhag zaun asat. Tor Jehova Dev hea familicho Vhoddil zalʼlean, 1 Timotak 5:8-ant tannem familichea vhoddilank dilʼlem totv, to svota pallttolo mhunn ami khatri dovrunk zata.

 8. (a) Amkam kosli khatri aslear amcheo familicheo gorzo ami purnn korunk xokchimnant hi bhirant ami pois korunk pavtolim? (Matev 6:31-33) (b) Chitrant dakhoilʼlea zoddpea thaun ami kitem xiktat?

⁸ Tor Jehova amcho ani amche familicho mog korta mhunn amkam khatri asa zalear, amcheo gorzo ami purnn korunk xokchimnant hi bhirant ami pois korunk pavtolim. (Matev 6:31-33 vachat.) Jehova amcho mog korta dekhun tannem udarponnan, fokot amkam jivim uronk goroz asat teoch vostu nhoi, punn amkam khuxal ravonk anik zaiteo vostu rochleat. (Ut. 2:9) Punn thodde pavtti, amchea gorzam bhair amche lagim chodd kaim na zalear pasun, amche lagim jem kitem asa tem Jehovanuch amkam dilam mhunn ami ugddas dovrunk zata. (Mt. 6:11) Tor atam amkam teag korunk poddlear pasun, Jehova amkam atam zaitim besanvam ditolo, ani fuddarak sasnachem jivit ditolo jem ami kiteakuch sor korunk zaina. Ani hench bhav Nestor ani bhoinn María-k kollon ailem.—Iz. 65:21, 22.

 9. Nestor ani María-chea onubhovantlean ami kitem xikonk zata?

⁹ Nestor ani María, Colombia-nt ek susegad jivit jietalim. Tim mhunnttat: “Ami amchem jivit sadem dovrun Jehovachi seva vaddounk sodhtalim. Punn unnea poixeamnim ami khorench khuxal ravonk xoktolim kai, mhunn amkam bhirant asli.” Hea bhiranticho fuddo korunk tannim kitem kelem? Jehova Devan adim tankam koxi modot kelea, tanchi koxi kallji ghetlea hea vixim tannim niall kelo. Ani atam to tanchi kallji gheta toso fuddarakui ghetolo mhunn tankam khatri asli. Tannim thodde teag kele. Zoxem, tannim apli vhodd pagarachi sirvis soddun dili, tanchem ek borem ghor aslem tem tannim viklem ani porgottnnaranchi chodd goroz asa thoim vochon seva korunk tim dusrea eka desant gelim. Tor atam tankam koxem dista? Nestor mhunntta: “Matev 6:33-ant boroilʼlim utram amchea jivitant khorim zalim. Jehovan amkam kednanch kainch unnem korunk na. Ani ami aiz chodd khuxal asat.”

10. Aiz munis munxak kiteak bhieta?

¹⁰ Adanv ani Eve Jehovachea add gelim tednam thaun munis munxak tras korta. (Up. 8:9) Udharonnak, odhikar aslole thodde munis dusrea munxank tras kortat, kirmi kortat te khub vaitt kamam kortat. Toxench, iskolantlim thoddim bhurgim dusrea bhurgeank loz kortat vo tankam dhomkaitat. Itlench nhoi, punn thoddim zannam apleach familichea sodoxiam sangata khub krur toren vagtat. Hea karonnank lagon aiz munis munxak bhieta. Tor hea bhiranticho Soitan koso faido gheta?

11-12. Soitan munxachi bhirant uzar korun amkam koso fosoita?

¹¹ Soitan munxachi bhirant uzar korun amchem porgottnnechem kam, toxench Jehovak lagon ami kortat tim her kamam bond korunk sodhta. Soitan sorkari odhikariank amchea kamacher bondi haddunk ani amkam dhumallo diunk uzar korta. (Lukas 21:12; Prok. 2:10) Soitanachea sonvsarant zaito lok Jehovachea Sakxeam vixim fotti sangtat. Ani je lok heo fotti sot mhunn mantat, te amchim fokanam kortat vo amcher akromonn pasun kortat. (Mt. 10:36) Tor hem soglem polloun ami ojap zatat kai? Na. Karonn poilea xekddeant pasun Soitanan oxench kelʼlem.—Itihas 5:27, 28, 40.

¹² Punn amchea bhitor bhirant ghalunk Soitan fokot sorkari odhikariankuch uzar korina. Thoddea zannank, tim sot xiklea uprant tankam dhumallo sosunk poddttolo, hache poros tanchi famil tanchea sangata koxi vagtoli, hachi chodd bhirant asta. Ani tanchi famil Jehova ani tachea lokam vixim vaitt uloitat tednam tankam khub dukh zata. Karonn tim aplea familicho khub mog kortat ani tannim Jehovachi vollokh gheun tacho mog kelolo tankam zai. Thodde pavtti, familiche sodoxio jim poilim virodh kortalim ti uprant sotant ailim. Punn amchi famil amchea sangata koslench natem dovrina ani amkam samkich pois korta zalear, ami kitem kortolim?

13. Amche familin amkam soddun dilear, Jehova amcho mog korta mhunn amkam koxi khatri melltta? (Stotr 27:10)

¹³ Stotr 27:10-nt sanglolea utrantlean amkam bhuzvonn melltta. (Vachat.) Amche familin amkam soddun dilear pasun, Jehova amkam kednanch soddchona. To amcho khub mog korta, ani ami pasiens dakhoitat mhunn to amkam zaitim besanvam ditolo. Itlench nhoi, to amkam goroz tem soglem ditolo, amkam xant ani khuxal ravonk modot kortolo, ani tachea sangata ghott ixttagot korunk adar kortolo. Hench Biniam, zache vixim ami poilim uloilʼlim tannem onubhovlem.

14. Biniam-achea onubhovantlean ami kitem xikonk zata?

¹⁴ Biniam-ak Jehova aplo mog korta mhunn khatri zalolean munxachi bhirant pois korunk modot zali. To ravtalo tes desant, Jehovachea Sakxeank sorkar khub dhumallo ditalo. Tori astana, Biniam Jehovacho Sakxi zalo. Biniam sangta: “Mhaka itlo dhumallo sosunk poddttolo mhunn hanvem kednanch chintunk naslem. Punn sorkarachea dhumallea poros, mhoji famil mhozo virodh kortoli hachi mhaka chodd bhirant asli. Hanv Jehovacho Sakxi zalam hem aikon mhozo bapui zo sotant na to nirax zatolo, ani mhoji famil hanv kainch faideacho na oxem chintʼtoli mhunn hanv bhietalom.” Punn Jehova zancho mog korta tancho to sodanch kallji gheta, mhunn Biniam-ak khatri asli. To fuddem sangta: “Poixeanchem unnemponn, bhedbhav ani lokanchea zomea thaun virodh soscho poddlo tea bhav-bhoinnank Jehovan koxi modot keli tacher hanvem niall kelo. Hanv Jehovak visvaxi ravlear to mhojer besanvam ghaltolo mhunn hanv zannam aslo. Ani mhaka zaite pavtti bondkhonnint ghatlo ani mhaka khub tras kele tednam aplea visvaxi sevokank Jehova koso modot korta tem hanvem polloilem.” Tor Biniam-ak, Jehova Dev ek khoro Bapui, ani tache lok ek khori famil zaunk pavlim.

15. Ami soglim mornnak kiteak bhietat?

¹⁵ Jehova Devan amchea sogleanchea kallzant sasnak jieunchi itsa ghatlea. (Up. 3:11) Hea pasot, ami mornnak bhietat. Bible-ant pasun mornnak amcho dusman mhunnttla. (1 Kor. 15:25, 26) Tor ami vo amchim mogachim khub duent zatat tednam ‘kitem-i zait kai’ mhunn ami bhietat. Punn eke vatten, hi bhirant aslear amchea jivachi rakhonn zaunk pavta. Udharonnak, ami moronk bhietat dekhun ami bholaikek boreak poddtta toslem jevonn jevtat ani exercise kortat. Toxench, goroz asta tednam dotoranchi modot gheun ami vokhdam ghetat. Tea bhair, ami mudʼdhom zaun amcho jiv dhokeant ghalinant.

16. Amkam aslole mornnache bhiranticho Soitan koso faido gheunk xokta?

¹⁶ Ami amchea jivacho khub mog kortat mhunn Soitan zannam. Ani amcho jiv samballunk ami kitem-i korunk toiar astolim, tem mhunnttlear, ami Jehovachi seva korop pasun soddun ditolim mhunn to amcher arop ghalta. (Job 2:5) Punn hem sarkem nhoi mhunn ami zannant. Tori astana, Soitan ‘mornnacher podvi choloita’ dekhun to mornnachi bhirant uzar korun, Jehova koddlean amkam pois vhoronk proitn korta. (Heb. 2:14, 15) Zoxem thodde pavtti, Soitanachea tabeant aslole sorkar vo lok, ami amcho bhavarth soddun dinant zalear tim amkam jivexim martolim mhunn amkam dhomkaunk puro. Toxench, thodde pavtti amcho jiv dhokeant asa zalear Soitan te poristhiticho faido gheunk xokta. Udharonnak, ami Devachea kaidea add vochon rogot gheunk vo Bible-achea totvam add voita toslo ilaz korunk, to dotorank, sotant naslolea amchea familichea sodoxiank vo her konnankui amcher dobhav ghalunk uzar korunk xokta.

17. Romkarank 8:37-39-a pormonnem, ami mornnak kiteak bhieunchim goroz na?

¹⁷ Ami konnui moronk sodhinant tem khorem. Punn ami melim zalear pasun Jehova amcho mog korop kednanch bond korina. (Romkarank 8:37-39 vachat.) Karonn Jehovachim ixttam mortat tednam tim eka orthan, tachea ugddasant jivim astat. (Lukas 20:37, 38) Toxench, to tankam jivont korunk axeta. (Job 14:15) Ani amkam “Sasnnik Jivit mellche khatir” tannem ek vhoddlem mol farik kelem. (Juanv 3:16) Tor Jehova amcho mog korta ani taka amchi kallji asa hacho dubhavuch na. Hea pasot, ami duent astat vo konnui amkam jivexim martolo mhunn amkam dhomki dita tednam Jehova Devak soddchea bodlek, bhuzvonn, zannvai ani ghottai mellonk ami tacher patieun ravonk zai. Oxench Valérie ani tichea ghovan kelem.—St. 41:3.

18. Valérie-chea onubhovantlean ami kitem xikonk zata?

¹⁸ Bhoinn Valérie 35 vorsanchi asli tednam tika ek osle torecho cancer zalo zo thoddeach lokank zata. Ani hem duens tichea kuddint rokddench posorta toslem aslem. Valérie sangta: “Mhaka cancer zala mhunn mhojea ghovak ani mhaka kollʼllem tednam amkam ek vhodd dhoko boslo. Ani mhozo jiv vachounk rokddench mhojem ek vhodd operation korunk zai aslem. Ami zaitea dotoram lagim uloilim punn rogot nastana konnuch mhojem operation korunk toiar naslo. Hanv khub bhielʼlem. Punn Devachea kaidea add vochon, rogot gheun mhojem operation zalʼlem mhaka naka aslem! Tor Jehovan jivitbhor mhozo mog koso kela tacher hanvem niall kelo. Ani atam taka mhozo mog dakhounk hi ek sondhi asa mhunn hanv chintunk laglem. Tor mhojea duensa vixim dor ek pavtt mhaka vaitt khobor mellttali tednam hanv Jehovak khuxal kortolem ani Soitanak jikhonk diunchem na mhunn hanv anikui ghott nichov kortalem. Uprant, eka dotoran rogot nastana mhojem operation kelem. Atam pasun mhoji bholaiki titli bori asona, punn Jehovan sodanch amkam goroz tem soglem dilam. Udharonnak, mhaka hea duensa vixim kollchea thoddeach disam poilim, ami mittingek, ‘Meeting Today’s Adversities With Courage’c hea lekhacher obheas kelo. Hea lekha udexim amkam khub bhuzvonn mellʼlli. Hanvem to lekh porot-porot vachlo. Osle lekh vachlolean ani porgottnnek ani mittingek hajir zalolean amkam xant ravonk ani bore nirnnoi gheunk modot zali.”

19. Beginuch kitem zaunchem asa?

¹⁹ Aiz sonvsarbhor aslolea zaitea bhav-bhoinnamnim Jehovache modotin tankam ailolea kotthin poristhitincho fuddo kela ani Soitanacho virodh kela. (1 Ped. 5:8, 9) Tumi pasun toxench korunk zata. Beginuch Jehova, Jezuk ani tachea sangata raj choloitoleank “Devcharachea kortubancho bhosm” korunk dhaddttolo. (1 Juanv 3:8) Ani tachea uprant, hea prithumer seva kortolea Devachea lokank ‘mat-ui bhieunchim goroz aschi na, karonn tancher kosloch akant ieuncho na.’ (Iz. 54:14; Mik. 4:4) Punn tea mhunnosor, amchi bhirant pois korunk ami zata titlo vavr korum-ia.

20. Ami amchi bhirant koxi pois korunk pavtolim?

²⁰ Jehova aplea sevokancho mog korta ani tanchi rakhonn korta mhunn amkam asloli khatri ami ghott korit ravonk zai. Oxem korunk, Jehovan adim aplea sevokank koxe rakhle hacher ami niall korun zai ani tea vixim dusreank sangonk zai. Toxench, kotthin poristhitincho fuddo korunk Jehovan amkam svota koxi modot kelea tem ami sodanch ugddas dovrunk zai. Jehovache modotin ami amchi bhirant pois korunk pavtolim!—St. 34:4.