ODHEAI 46
Somorponn Korun Bautizm Kiteak Gheunk Zai?
Somorponn mhunnttlear ami Jehova Devak magnnem korun bhas ditat ki ami fokot tachich bhokti kortolim ani amchea jivitant taka poilo zago ditolim. (Stotr 40:8) Somorponn korop ho nirnnoi amchea jivitant sogleant mhotvacho zaun asa. Uprant, ami bautizm ghetat tednam ami amchem jivit Jehova Devak somorpit kelam mhunn dusreank kollon ietolem. Tor, itlo vhoddlo nirnnoi gheunk ami kiteak fuddem sortat?
1. Ek munis Jehovak aplem jivit kiteak somorpit korta?
Eka munxachea kallzant Jehova pasot mog vaddtta tednam to taka aplem jivit somorpit korta. (1 Juanv 4:10, 19) Bible sangta: “Tuzo Dev Jehovacho tujea soglea kallzan, tujea soglea jivan, tujea soglea monan ani tujea soglea bollan mog korunk zai.” (Marku 12:30) Tor, ami fokot utramnim nhoi, punn korneamnim Jehovacho mog kortat. Zoso ek cheddo ani cheddum eka-mekacho mog kortat tednam tim kazar zatat. Teach bhaxen, ami Jehova Devacho mog kortat dekhun ami taka amchem jivit somorpit korun bautizm ghetat.
2. Ami bautizm ghetlear amkam koslim besanvam mellttat?
Ami bautizm ghetat tednam, Jehova Dev amcho kitlo mog korta tem amkam anik borea ritin kolltta ani ami taka anik lagim sortat. (Malaki 3:16-18 vachat.) Toxench, ami tachea sonvsarbhor aslolea familichim bhag zatat. Ani hea familint aslolim bhav-bhoinnam Jehova Devacho ani amcho mog kortat. (Marku 10:29, 30 vachat.) Punn, ami bautizm gheunk thoddim panvlam gheunk zai. Mhunnchem, ami Jehova vixim xikonk zai, tacho mog korunk zai ani Jezucher bhavarth dovrunk zai. Toxench, ami amchem jivit Jehova Devak somorpit korunk zai. Bible amkam sangta ki ‘bautizm amkam salvar’ korta. (1 Pedru 3:21) Tor, him pavlam gheun ami bautizm ghetat tednam ami sasnachea jivitachea vatten cholonk lagtat.
KHOLAIEN XIKAT
Jehovak amchem jivit somorpit korop ani bautizm ghevop kiteak gorjechem tem zannam zaum-ia.
3. Ami konnachi seva kortolim tem ami tharaunk zai
Adlea tempar, Izrael lokank dislem ki tannim Jehovachi ani teach borabor khotto dev Baalachi seva korunk zata mhunn. Punn, Jehovan aplea provadi Elijak dhaddun tanchem hem chintop nittaier haddlem. 1 Raza 18:21 vachun sokol dilʼlea prosnacho zobab zannam zaum-ia.
Izraelitkaramnim koslo nirnnoi gheunk zai aslo?
Izraelitkaram bhaxen ami pasun konnachi seva kortolim tem tharaunk zai. Lukas 16:13 vachun sokol dilʼlea prosnanche zobab zannam zaum-ia.
Ami Jehovachi ani teach borabor anik konnachi vo anik kiteachi bhokti kiteak korunk zaina?
Ami Jehovachi bhokti kortat mhunn koxem dakhounk zata?
4. Jehovachea mogacher niall korat
Jehovan amkam zaitim moladik dennim dileant. Tor, ami taka kitem diunk zata tem zannam zaunk VIDEO polloum-ia.
Jehovan tumkam koso mog dakhoila? Stotr 104:14, 15 ani 1 Juanv 4:9, 10 vachun sokol dilʼlea prosnanche zobab zannam zaum-ia.
Jehovan dilʼlea khoinchea dennea pasot tumi tache upkari asat?
Jehovan tumkam him dennim dileant mhunn tumkam tachea vixim koxem dista?
Konnui amkam ek dennem dita zalear ami taka upkari asat mhunn dakhounk sodhtat nhoi! Dusri Somurt 16:17 vachun sokol dilʼlea prosnacho zobab zannam zaum-ia.
Jehovan tumkam zaitim dennim dileant, tacher tumi niall kortat tednam tumkam kitem korunk urba melltta?
5. Somorponn kelʼlean zaitim besanvam mellttat
Zaitea lokank dista ki tankam hea sonvsarant ek borem nanv aslear, ek borem kam aslear vo tanchea lagim zaite poixe aslear tim khuxal astolim mhunn. Punn hem khorem kai? VIDEO polloun sokol dilʼlea prosnanche zobab zannam zaum-ia.
Andrey-k football khellonk khub avoddttalem, punn tannem to khell kiteak soddun dilo?
Tannem football soddun Jehovak aplem jivit somorpit kelem. Tannem kelem tem sarkem oxem tumkam dista? Kiteak?
Kristanv zaunchea poilim, Pauluk apleakuch ek vhodd nanv melloun gheunk sondhi asli. To eka famad xikxoka lagim xiklolo. Punn, Devachi seva korunk tannem hem soglem soddun dilem. Apnnem soglem soddlem mhunn Paulu uprant kednam-i niraxi zalo kai? Filipkarank 3:8 vachun sokol dilʼlea prosnanche zobab zannam zaum-ia.
Kristanv zaunchea poilim, Paulun jem soddlem tem soglem “kochro” oxem kiteak mhunnttlem?
Tannem soglem soddlem tachea bodlek taka kitem mellʼllem?
Tumi Jehovachi seva kelear tumchem jivit borem zatolem oxem tumkam dista? Kiteak?
Paulu Kristanv zalo tednam poilim poros taka odik mellʼllem
THODDO LOK MHUNNTTA: “Akʼkhem jivit Devak bhettounk zaina.”
Jehova Devak jivit bhettovop vo somorponn korop borem oxem tumkam kiteak dista?
KITEM XIKLIM
Jehova Deva pasot mog aslear ami amchem jivit taka somorpit kortolim ani bautizm ghetolim.
Porot Ugddas Korum-ia
Ami purnn kallzan Jehovacho mog korun tachich bhokti kiteak korunk zai?
Bautizm ghetlolea aplea sevokank Jehova koslim besanvam dita?
Tumchem jivit Jehovak somorpit korunk tumkam khuxi asa kai?
ANIK SODHAT
Eka songit vazoupean ani khellgoddean Jehovak aplem jivit kiteak somorpit kelem tem zannam zaiat.
Tornnattim Vichartat— Hanvem Mhojea Jivitant Kitem Korchem?—Fattlem Jivit (6:54)
Jehovak tumchem jivit somorpit korunk anik kitem karonnam asat tem polloiat.
“Ami Amchem Jivit Jehovak Kiteak Somorpit Korunk Zai?” (The Watchtower, January 15, 2010)
Hea songit video-nt somorponn kelʼlim Kristanvam koxim khuxal asat tem polloiat.
Eke bailen Jehovachi seva aplea jivitant poili koxi dovorli tem, “Ami Sonvsarant Kiteak Asat Mhunn Hanv Chintalim” hea lekhant polloiat.