De Jakob und de Esau mached Fride

Jehova verspricht em Jakob, dass er ihn beschützt, eso wie er au scho de Abraham und de Isaak beschützt het. De Jakob gaht an en Ort go wohne, wo Haran heisst. Dört tuet er hürate. Sini Familie wird immer grösser und er wird sehr riich.

Nacheme Ziitli seit Jehova zum Jakob: «Gang zrugg i dini Heimat.» De Jakob nimmt sini Familie und macht sich uf di langi Reis. E chli später chömmed d Diener vom Jakob zu ihm und säged: «De Esau, din Brüeder, chunnt und er het 400 Männer debii!» De Jakob chunnt Angscht über, dass de Esau ihm und sinere Familie öppis macht. Er betet zu Jehova: «Bitte beschütz mich vor mim Brüeder.» Am nöchschte Tag schickt de Jakob em Esau ganz vil Gschenk: Schaf, Geisse, Chüeh, Kamel und Esel.

Wo de Jakob i de Nacht allei isch, gseht er en Engel. De Engel fangt a mit ihm z kämpfe, bis es hell wird. De Jakob wird debii verletzt, aber er git nid uf. De Engel seit: «Laa mich los!» Zum sicher sii, dass Jehova ihn wiiterhin beschützt, seit de Jakob: «Zerscht muesch mich segne!»

Am Schluss segnet de Engel de Jakob. Jetzt isch de Jakob sicher: Jehova wird nid zuelaa, dass de Esau ihm öppis macht.

Später a dem Morge gseht de Jakob vo Wiitem de Esau und di 400 Männer uf ihn zuecho. De Jakob lauft sinere Familie vorus und verbügt sich sibe Mal vor sim Brüeder. De Esau springt ihm entgege und umarmt ihn ganz fescht. De beide Brüedere laufed d Träne nume eso abe und si mached Fride. Was meinsch: Wie findet das Jehova, dass de Jakob eso vil gmacht het, zum mit sim Brüeder Fride z mache?

De Esau gaht später wider hei und de Jakob reist wiiter. De Jakob het 12 Söhn. Si heissed Ruben, Simeon, Levi, Juda, Dan, Naphtali, Gad, Ascher, Issachar, Sebulon, Joseph und Benjamin. Eine vo dene Söhn, de Joseph, wird vo Jehova später brucht zum sis Volk z rette. Weisch du, wie er das macht? Chumm, das finded mir use.