કઈ ખુશખબર છે?

ઈશ્વર ચાહે છે કે મનુષ્યો પૃથ્વી પર જીવનનો આનંદ માણે. મનુષ્યને તે ખૂબ ચાહે છે, એટલે તેમણે સુંદર પૃથ્વી અને એમાંની બધી ચીજવસ્તુઓ બનાવી છે. બહુ જલદી જ તે સર્વ લોકોનું જીવન સુખ-શાંતિથી ભરી દેશે. મનુષ્યોને દરેક પ્રકારની તકલીફોથી તે આઝાદ કરશે!​—યિર્મેયા ૨૯:૧૧ વાંચો.

કોઈ સરકાર કદીયે હિંસા, અન્યાય, બીમારી કે મરણને દૂર કરી શકી નથી. પણ આપણા માટે એક ખુશખબર છે! બહુ જલદી જ ઈશ્વર બધી માનવ સરકારોને મિટાવી દેશે અને પોતાનું રાજ લાવશે. તેમના રાજમાં લોકો સારી તંદુરસ્તી અને સુખ-શાંતિમાં જીવશે.​—યશાયા ૨૫:૮; ૩૩:૨૪; દાનીયેલ ૨:૪૪ વાંચો.

ઈશ્વર જ્યારે ખરાબ લોકોનો નાશ કરશે, ત્યારે જ બધી દુ:ખ-તકલીફોનો અંત આવશે. (સફાન્યા ૨:૩) એવું ક્યારે થશે? આજની દુનિયાની ખરાબ હાલત વિષે બાઇબલમાં પહેલેથી જણાવવામાં આવ્યું છે. એ બતાવે છે કે બહુ જલદી જ ઈશ્વર પગલાં ભરશે.​—૨ તીમોથી ૩:૧-૫ વાંચો.

આપણે બાઇબલમાંથી ઈશ્વર વિષે શીખવું જોઈએ. બાઇબલ જાણે પ્રેમાળ પિતા પાસેથી મળેલો પત્ર છે. એ શીખવે છે કે આપણે કઈ રીતે આજે સુખી બની શકીએ અને ભવિષ્યમાં કાયમ માટે સુખચેનથી જીવી શકીએ. ખરું કે તમે બાઇબલમાંથી શીખી રહ્યા છો, એ અમુક લોકોને નહિ ગમે. પણ હિંમત ન હારો! સુંદર ભાવિની તક ચૂકશો નહિ!​—નીતિવચનો ૨૯:૨૫; પ્રકટીકરણ ૧૪:૬, ૭ વાંચો.