¿Kaseerü waaʼinraka aire wapüla na wawalayuukana? Wamüliajeerü naaʼin süpüla weeʼiyatüin naalin wapüla (1 Tes. 4:18). ¿Kasa waaʼinrajatka süpüla ayatüin aijiraain maʼin waya? Wachajaainjatü sukuwaʼipa süpüla walatirüin sooʼopünaa waaʼin naainjala na waneinnua. ¿Jamüshii aijiraainjanaka maʼin waya maaʼulu? Müshi Pedro: «Alüʼütsü maʼin tü kaʼi sajaʼttajatkalü oʼu kasa süpüshuaʼa [...]. Shia alanaʼaleeinjatka maʼin jümüin aijiraain jia» (1 Ped. 4:7, 8). Sümaʼainruʼu sülüʼülüin maʼin tü kaʼi sajaʼttajatkalü oʼu kasa süpüshuaʼa, ¿jameerü sukuwaʼipa wayuu wamüin? Anuu tü nümatüjütkalia Jesús namüin na nikirajüinkana: «Süʼürüleena jia wayuu maʼleekalia saaʼujee tekirajanain jia» (Mat. 24:9). Süpüla wachecherüin waaʼin soʼunnaa saainjünüin tia wamüin, paaʼinwainjana waya. Aijiraale maʼin waya namaa na wawalayuukana, nnojoleena mojujiraain waya nutuma Satanás (Filip. 2:1, 2). w23.11 13 püt. 18, 19

Eeʼiratüsü sukuwaʼipa wayuu sutuma tü Nünüikikat Maleiwa. Anasü maʼin tü eekat sünainjee wekirajüin wayuu nüchiki Jehová jee süchiki tü nukuwaʼipakat. Nnojotpa müin süsürünnakai aaʼin nekii nutuma chi Yolujaakai, nayaawata aaʼu anain maʼin nukuwaʼipa chi Washikai Maleiwa maʼaka wayaawatüin saaʼu tia. Ponusü maʼin naaʼin süka pülashaatain nia (Is. 40:26). Anasü naaʼin süka lotuin nukuwaʼipa (Deut. 32:4). Ponusü naaʼin sutuma kekiin maʼin nia (Is. 55:9; Roma 11:33). Sümülialüin naaʼin süka natüjaain saaʼu aipüralin nia (1 Juan 4:8). Sümaʼainruʼu aleewain naya nümaa Jehová, nayaawata aaʼu eein süpüla katüin noʼu süpüla kaʼikat süpüshuaʼa jee nüchooinjanain naya mapa. Nnojotsü eein wanee aʼyatawaa eekai anain maʼin suulia akaalinjaa wayuu sünain arütkawaa nünainmüin chi Washi iipünaajachikai. Aʼyanaajiiraashii waya nümaa Jehová waaʼinrüle tia (1 Cor. 3:5). w24.02 12 püt. 15

Pikirajaale sünain tü Bibliakat maaʼulu yaa jee pikirajaatüjüire jintüliiwaʼaya pia süka nanoujain na kachooinkana pia, eesüjaʼa jülüjairüle paaʼin woutiisain pia. Anasü tia, jülüjainjatpejeʼe paaʼin paapüinjatüin paaʼin nümüin Jehová süpülapünaa woutiisain pia. Süpüla naapüin naaʼin wanee wayuu nümüin Jehová nüküjainjatü nümüin niainjachin nuʼwaajüin nümüiwaʼa otta naaʼinreerüin waneepia tü nüchekakat nüpüleerua. Nüküjain nümüin Jehová alinjachin nia nüpüla süka süpüshuaʼa naaʼin, süka süpüshuaʼa nukuwaʼipa, süka süpüshuaʼa nütchin otta jülüjainjachi nia naaʼin waneepia (Mar. 12:30). Paapapa paaʼin nümüin Jehová, nnojoishi jaralüin eʼrüin pia. Aluʼujasaʼa woutiisapa pia neʼraja akuat tia na waneinnua. Sükajee tia, natüjaa aaʼu paapüitpain paaʼin nümüin Jehová. Kojutuinjatü pümüin paapüin paaʼin nümüin Jehová, keeʼireesü naaʼin pikeraajüin pünüiki (Ecl. 5:4). w24.03 2 püt. 2; 3 püt. 5