Ñande ñaime segúro oikotaha pe rresurreksión

1, 2. ¿Mbaʼe esperánsa iporãitévapa oreko Jehová siervokuéra?

IÑIMPORTANTETEREI ningo jareko esperánsa. Heta persóna oreko esperánsa ovyʼataha imatrimóniope, omongakuaa porãtaha ifamília ha hesãitaha, térã okuerataha algún mbaʼasýgui. Ñande kristianokuéra ikatu avei jaipota hína koʼã mbaʼe. Péro ndahaʼéi upévante la ñane esperánsa, ñande ñahaʼarõ voi jaiko pára siémpre ha oikove jey umi jahayhúva omano vaʼekue.

² Apóstol Pablo heʼi vaʼekue: “Che areko esperánsa Ñandejárare, [...] oñemoingove jeytaha umi ihústova ha iñinhústovape” (Hech. 24:15). Pablo ndahaʼéi vaʼekue pe primeroite oñeʼẽva pe rresurreksión rehe. Job oñeʼẽ vaʼekue avei upévare. Haʼe oĩ vaʼekue segúro Ñandejára imanduʼataha hese ha omoingove jeytaha chupe (Job 14:7-10, 12-15).

 3. ¿Mbaʼéichapa ikatu ñanepytyvõ 1 Corintios kapítulo 15?

³ Peteĩva “umi enseñánsa primeroite ñaaprende vaʼekue” ha jagueroviáva haʼe hína ‘oñemoingove jeytaha umi omanóvape’ (Heb. 6:1, 2). Pablo oñeʼẽ pe rresurreksión rehe 1 Corintios kapítulo 15-pe. Umi mbaʼe oskrivi vaʼekue oiméne omokyreʼỹ rakaʼe umi kristianokuéra itiempopeguápe. Ha ñande jagueroviámaramo jepe heta tiémpore pe rresurreksión, upe kapítulo ñanemokyreʼỹ ha omombaretéta ñane esperánsa oikotaha katuete upéva.

 4. ¿Mbaʼérepa ikatu ñaime segúro oñemoingove jeytaha umi jahayhúva omano vaʼekuépe?

⁴ Jesúspe ningo oñemoingove jey vaʼekue, ha upéva oasegura ha omeʼẽ ñandéve esperánsa umi jahayhúva omano vaʼekue orresusitataha. Peteĩva “umi notísia porã” Pablo omombeʼu vaʼekue umi Corintoguápe haʼe hína Jesúspe oñemoingove jey hague (1 Cor. 15:1, 2). Haʼe heʼi vaʼekue peteĩ kristiáno ndogueroviáiramo pe rresurreksión, ijerovia ndovaleiha mbaʼeverã (1 Cor. 15:17). Jesucrístope oñemoingove jey rupi, ñande jaguerovia oĩtaha pe rresurreksión.

5, 6. ¿Mbaʼe signifikádopa oreko ñandéve g̃uarã umi mbaʼe heʼíva 1 Corintios 15:3, 4?

⁵ Pablo oñepyrũrõ guare oñeʼẽ pe rresurreksiónre, omyesakã porã vaʼekue mbohapy mbaʼe: 1) “Cristo omano hague ñandepeʼa hag̃ua pekádo poguýgui”, 2) ‘Crístope oñeñotỹ hague’, ha 3) ‘oñemopuʼã jey hague chupe 3 día haguépe, heʼiháicha Ñandejára Ñeʼẽme’ (elee 1 Corintios 15:3, 4).

⁶ ¿Mbaʼe signifikádopa oreko ñandéve g̃uarã Jesús omano, oñeñotỹ ha oñemoingove jey hague? Isaías oprofetisa vaʼekue pe Mesíaspe ‘ojepeʼataha ko yvy ape árigui’, ha ‘oñemoĩtaha chupe peteĩ sepultúra umi iñañáva ndive’. Péro oiko vaʼerã kuri hetave mbaʼe. Isaías heʼi vaʼekue avei pe Mesías ‘oguerahataha ijapére umi hénte pekádo’. Jesús ojapo vaʼekue upéva omeʼẽrõ guare hekove ñanderehehápe (Is. 53:8, 9, 12; Mat. 20:28; Rom. 5:8). Jesús omano, oñeñotỹ ha oñemoingove jey haguére, ikatu jareko peteĩ esperánsa isegúrova jajeitaha pe pekádo ha ñemano poguýgui, ha jahecha jeytaha umi jahayhúva omano vaʼekuépe.

7, 8. ¿Mbaʼépa oipytyvõ vaʼekue umi kristianokuérape oguerovia hag̃ua Jesús orresusita hague?

⁷ Ikatu hag̃uáicha jaguerovia oikotaha pe rresurreksión, primero jaguerovia vaʼerã Jesúspe oñemoingove jey hague. ¿Mbaʼérepa ikatu ñaime segúro Jehová omoingove jey hague Jesúspe?

⁸ Heta persóna ohecha vaʼekue Jesúspe oñemoingove jey rire, ha omombeʼu ótrope upe ohecha vaʼekue (1 Cor. 15:5-7). Pablo omombeʼu umi primeroite ohecha vaʼekue apytépe oĩ hague apóstol Pedro (Cefas). Unos kuánto disípulo okonfirma vaʼekue avei Pedro ohecha hague Jesúspe oñemoingove jey rire (Luc. 24:33, 34). Avei umi 12 apóstol ohecha vaʼekue Jesúspe orresusita rire. Upéi “peteĩ díape Cristo ojechauka mas de 500 ermánope”, upérõ oiméne pe rreunión igustoitéva ojejapo vaʼekue Galiléape, oñemombeʼúva Mateo 28:16-20-pe. Jesús ‘ojechauka vaʼekue avei Santiágope’, haʼe ningo amalisia haʼe vaʼekue imédio ermáno, ha ñepyrũrã ndojeroviái vaʼekue hese haʼeha pe Mesías (Juan 7:5). Péro Santiago ojerovia hese ohecha rire Jesúspe oñemoingove jeýma hague. Pablo oskrivírõ guare ko kárta amo áño 55 rupi, oikove gueteri heta umi ohecha vaʼekue Jesúspe orresusita rire, ha umi odudáva ikatu vaʼekue oporandu chupekuéra.

 9. Heʼiháicha Hechos 9:3-5, ¿mbaʼéichapa Pablo ohechauka porã vaʼekue avei Jesúspe oñemoingove jey hague?

⁹ Upéi Jesús ojechauka vaʼekue avei Pabloitépe voi (1 Cor. 15:8). Pablo (Saulo) oviaha hína kuri Damáscope ohendúrõ guare Jesús orresusitáma vaʼekue oñeʼẽha chupe, ha ohecha chupe peteĩ visiónpe oĩha yvágape (elee Hechos 9:3-5). Upe oiko vaʼekue Páblore ohechauka porãvéntema Jesús oikove jey hague (Hech. 26:12-15).

10. ¿Mbaʼépa Pablo ojapo vaʼekue oguerovia rupi Jesús orresusita hague?

¹⁰ Heta hénte oiméne ohecharamo rakaʼe Pablo heʼi vaʼekue, pórke Jesús ojechauka mboyve chupe, Pablo opersegi vaʼekue umi kristianokuérape. Upéi haʼe oguerovia Jesúspe oñemoingove jey hague, ha heta oñehaʼã vaʼekue okonvense hag̃ua ótrope upéva añetehápe oiko hague. Pablo ningo oaguanta vaʼekue heta mbaʼe omombeʼu haguére Jesús omano ha oñemoingove jey hague. Por ehémplo chupe oñembyepoti, ojegueraha kárselpe ha avei oñehundi pe várko oviaha hague (1 Cor. 15:9-11; 2 Cor. 11:23-27). Pablo oĩ vaʼekue segúro Jesús orresusita hague umi omano vaʼekue apytégui, ha oĩ vaʼekue omano hag̃uáicha jepe opredika haguére upéva. Ajépa koʼã kristiáno ypykue heʼíva ñanepytyvõ jajerovia hag̃ua Jesúspe oñemoingove jey hague. Ha avei upéva tuichaiterei omombarete ñande jerovia oikotaha pe rresurreksión amo gotyove.

11. ¿Mbaʼérepa oĩ vaʼekue umi kristiáno Corintopegua ogueroviáva heta mbaʼe noĩporãiva pe rresurreksiónre?

¹¹ Pe siuda griega de Coríntope oĩ vaʼekue umi kristiáno ogueroviáva heta mbaʼe noĩporãiva pe rresurreksiónre, ha oĩ voi umi heʼíva “umi omanóva ndaikatuiha orresusita”. ¿Mbaʼérepa? (1 Cor. 15:12). Pórke umi filósofo oĩva Aténaspe, haʼéva avei peteĩ siuda griega, oñembohory vaʼekue umi ogueroviávare Jesús orresusita hague. Upévare oiméne oĩ avei Coríntope umi kristiáno opensáva upéicha (Hech. 17:18, 31, 32). Ótro katu opensa pe rresurreksión ndoikói hague literálmente, síno haʼekuéra oĩ hague omanoramoguáicha haʼe haguére pekadór, ha upéi oñemoingove jey oikórõ guare chuguikuéra kristiáno oñeperdonávo chupekuéra ipekádo. Tahaʼe haʼeháicha, haʼekuéra heʼívo ndaiporiha pe rresurreksión, añetehápe ijerovia ndovaléi mbaʼeverã. Oiméramo Ñandejára nomopuʼãi raʼe Jesúspe umi omanóva apytégui, upéicharõ ndojepagái kuri pe rreskáte ha haʼekuéra pekadór gueteri. Upéva heʼise umi ndogueroviáiva pe rresurreksión ndorekoiha peteĩ esperánsa añetetéva (1 Cor. 15:13-19; Heb. 9:12, 14).

12. ¿Mbaʼéichapa 1 Pedro 3:18, 22 ohechauka Jesús rresurreksión idiferénte hague umi ymave oiko vaʼekuégui?

¹² Pablo oikuaa porã vaʼekue ‘Crístope oñemopuʼã hague omanóva apytégui’. Upe rresurreksión iñimportanteve umi oiko vaʼekuégui ymave, pórke umi hénte oñemoingove jey vaʼekue ko yvy ape ári omano jey upéi. Pablo ningo heʼi Jesúspe ‘raẽve oñemoingove jey hague’, térã haʼe hague pe “primera kosécha”. ¿Mbaʼérepa ikatu jaʼe Jesús haʼe hague pe primero? Pórke haʼe vaʼekue pe primera persóna oñemoingove jeýva peteĩ espírituicha, ha pe primer yvypóra ohóva yvágape (1 Cor. 15:20, nóta; Hech. 26:23; elee 1 Pedro 3:18, 22).

13. ¿Mbaʼéichapa Pablo omyesakã vaʼekue idiferénte hague ojuehegui Adán ha Jesús?

¹³ ¿Mbaʼéichapa omano haguére peteĩ kuimbaʼe ikatu oñemoingove jey hetaiterei persónape? Pablo omyesakã porãiterei upéva. Haʼe omombeʼu mbaʼépepa idiferénte yvyporakuéra ohupytýva Adán ojapo vaʼekue káusare, ha pe ojehupytýva Cristo sakrifísio rupive. Oñeʼẽvo Adán rehe Pablo oskrivi vaʼekue: “Pe ñemano ningo oñepyrũ peteĩ kuimbaʼe rupive”. Adán omano opeka haguére ha avei enterove umi ifamiliare. Ha koʼag̃aite peve ñande jasufri haʼe naiñeʼẽrendúi haguére. Péro Ñandejára omoingove jey rupi Itaʼýrape, ñande ikatu jareko peteĩ esperánsa iporãitereíva. Pablo heʼi vaʼekue ‘umi omanóvape oñemoingove jeytaha peteĩ kuimbaʼe rupive’, haʼéva Jesús. Haʼe oporomopensa voi heʼívo: “Adán káusare enterove omano, upéicha avei Cristo rupive enterovépe oñemoingove jeýta” (1 Cor. 15:21, 22).

14. ¿Orresusita jeýtapa Adán? Emyesakã.

¹⁴ ¿Mbaʼépa Pablo heʼise vaʼekue heʼírõ guare ‘Adán káusare enterove omanoha’? Pablo heʼi vaʼekue Adán káusare enterove yvypóra pekadór ha imperfektomaha onasévo, ha upévare enterove ñamano (Rom. 5:12). Adán noĩri hína umi oñemoingove jeýtava apytépe, chupe novenefisiamoʼãi Cristo sakrifísio, pórke haʼe peteĩ kuimbaʼe perfékto vaʼekue ha odesidi naiñeʼẽrendumoʼãiha Ñandejárape. Upe oiko vaʼekue Adánre ningo oikóta avei umi ojeʼétavare haʼeha kavara, ág̃a “pe Yvypóra Raʼy” oporohusga vove, upéva heʼise ‘oñehunditaha opa ára g̃uarã’ (Mat. 25:31-33, 46; Heb. 5:9).

15. ¿Mávapa oĩ umi ‘enterove oñemoingove jeýtava’ apytépe?

¹⁵ Jahechakuaa Pablo heʼi hague: “Cristo rupive enterovépe oñemoingove jeýta” (1 Cor. 15:22). Pablo oskrivi vaʼekue ikárta umi kristiáno unhído oĩvape Coríntope, oñemoingove jeýtava oikove hag̃ua yvágape. Umi kristiáno ‘omoirũ Cristo Jesúspe ha péicha ojeelehi chupekuéra Ñandejárape g̃uarã. Ñandejára oiporavo chupekuéra ipotĩ hag̃ua henondépe’. Pablo oñeʼẽ vaʼekue avei ‘umi Cristo disípulo omanóma vaʼekuére’ (1 Cor. 1:2; 15:18; 2 Cor. 5:17). Ha ótra kárta Pablo oskrivi vaʼekuépe, haʼe heʼi: ‘Umi omano vaʼekue Cristo omano haguéicha, oikove jey vaʼerã haʼe oikove jey haguéicha’ (Rom. 6:3-5). Jesúspe oñemoingove jey vaʼekue peteĩ espírituicha ha oho jey yvágape. Upéicha avei oikove jeýta ‘umi omoirũva Crístope’, térã enterove umi unhído.

16. ¿Mbaʼépa Pablo ontendeka vaʼekue heʼírõ guare Jesús haʼe hague pe “primera kosécha”?

¹⁶ Pablo heʼi vaʼekue Crístope ‘raẽve oñemoingove jey hague’, térã haʼe hague pe “primera kosécha”. Jaikuaa oĩ hague umi oñemoingove jeýva ko yvy ape ári, umíva apytépe Lázaro. Péro Jesús haʼe vaʼekue pe primeroite oñemoingove jeýva peteĩ espírituicha ha orresivíva pe vída etérna. Chupe ikatu vaʼekue oñekompara pe primera kosécha oofrese vaʼekuére Ñandejárape umi israelita. Ha Pablo heʼívo Jesús haʼeha pe “primera kosécha”, ontendeka oĩtaha avei hetave yvypóra oñemoingove jeýtava oiko hag̃ua yvágape. Umi apóstol ha umi ótro “omoirũva Crístope”, tiémpo rire oñemoingove jeýta avei oiko hag̃ua yvágape, Jesúspe oñemoingove jey haguéicha.

17. ¿Arakaʼépa “umi omoirũva Crístope” orresivi iprémio yvágape?

¹⁷ Pablo oskrivírõ guare umi Corintoguápe, “umi omoirũva Crístope” noñepyrũi gueteri oñemoingove jey yvágape. Upéva rangue, Pablo ohechauka upéva oikotaha tenonde gotyove. Haʼe heʼi: ‘Káda uno oikove jeýta otoka vove chupe: Cristo raẽve orresusita, upéi umi omoirũva Crístope oñemoingove jeýta ipresénsia aja’ (1 Cor. 15:23, nóta; 1 Tes. 4:15, 16). Koʼág̃a ñande jaiko hína Cristo presénsia aja, pe tiémpo Pablo oprofetisa vaʼekue. Umi apóstol ha umi ótro unhído omanóma vaʼekue ohaʼarõ vaʼerã kuri Cristo presénsia orresivi hag̃ua iprémio yvágape, ha ‘oikove jey hag̃ua Jesús oikove jey haguéicha’.

18. a) ¿Mbaʼérepa ikatu jaʼe orresusita rire umi ohótava yvágape oĩtaha avei hetave oñemoingove jeýva? b) Heʼiháicha 1 Corintios 15:24-26, ¿mbaʼe mbaʼépa oikóta yvágape?

¹⁸ Péro, ¿mbaʼépa oikóta entéro umi kristiáno ifiélvagui, ndorekóivagui pe esperánsa ohóvo oiko yvágape Cristo ndive? Haʼekuéra oreko avei la esperánsa oikove jeývo. La Biblia heʼi Pablo ha umi ótro orresusitáva yvágape, oĩha “umi primeroite oñemoingove jeýtava apytépe” (Filip. 3:11). Upéva ohechauka upéi oĩtaha hetave oñemoingove jeýva. Upéva oho porãiterei upe Job heʼi vaʼekuére oikotaha hese amo gotyove (Job 14:15). ‘Umi omoirũva Crístope oñemoingove jeýva ipresénsia aja’, oĩtama yvágape Jesús ndive haʼe ohundi vove enterove umi goviérno, autorida ha podér. Ha Jesús ohundíta pe ñemano jepe, haʼéva “ñane enemígo ultimoite”. Enterove umi oñemoingove jeýva yvágape nomanomoʼãvéima arakaʼeve. Péro, ¿mbaʼépa oikóta umi ótrogui? (Elee 1 Corintios 15:24-26).

19. ¿Mbaʼépa ikatu ohaʼarõ umi orekóvape esperánsa oikovévo ko yvy ape ári?

¹⁹ ¿Mbaʼépa ikatu jaʼe umi ohaʼarõvare oiko ko yvy ape ári? Haʼekuéra ikatu oreko esperánsa Pablo heʼi rupi: “Che areko esperánsa [...] oñemoingove jeytaha umi ihústova ha iñinhústovape” (Hech. 24:15). Jaikuaaháicha umi iñinhústova ndaikatumoʼãi oike yvágape, upéicharõ umi mbaʼe Pablo heʼi vaʼekue ohechauka oĩtaha umi oñemoingove jeýva ko yvy ape ári.

20. ¿Mbaʼéichapa ko artíkulo nepytyvõ rejeroviave hag̃ua oikotaha pe rresurreksión?

²⁰ ¡Katuete ningo oikóta pe rresurreksión! Umi oñemoingove jeýva ko yvy ape ári orekóta la esperánsa oikovévo pára siémpre koʼápe. Ñande ikatu jajerovia upe promésa katuete oñekumplitaha. Upe esperánsa ñanekonsola ñapensávo umi jahayhúva omano vaʼekuére. Chupekuéra ikatúta oñemoingove jey ág̃a Cristo ha iñirũnguéra ‘ogoverna vove 1.000 áñore’ (Apoc. 20:6). Ñande avei ikatu ñaime segúro katuete ñañemoingove jeytaha ñamano mbaʼéramo Cristo oñepyrũ mboyve ogoverna umi 1.000 áño aja. ‘Ñane esperánsa ningo núnka nañanemotĩmoʼãi’ (Rom. 5:5). Upéva ikatu ñanemombarete koʼág̃a ha ñanepytyvõ javyʼave hag̃ua jaservívo Ñandejárape. Péro ikatu hína ñaaprende hetave mbaʼe 1 Corintios kapítulo 15-gui, pe artíkulo oúvape jahecháta upéva.