Lomunu lẹ

7 Mẹmẹsunnu lẹ emi, be vlavo mìwlẹ ma yọnẹn wẹ, (na mẹhe yọ́n osẹ́n lẹ wẹ yẹn to hodọna) dọ Osẹ́n lọ yin ogán do gbẹtọ ji dile mẹlọ to ogbẹ̀ dẹnsọ ya? 2 Di apajlẹ, yọnnu he wlealọ de yin sìnsìn do asu etọn go gbọn osẹ́n dali to whenue asu etọn to ogbẹ̀; ṣigba eyin asu etọn kú, ewọ yin tuntundote sọn osẹ́n asu etọn tọn glọ.+ 3 Enẹwutu, to whelọnu lo, to whenue asu etọn pò to ogbẹ̀, ewọ na yin yiylọdọ ayọdetọ eyin e lẹzun sunnu devo tọn.+ Ṣigba, eyin asu etọn kú, e vò sọn osẹ́n etọn glọ, bọ ewọ ma na yin ayọdetọ de eyin e lẹzun sunnu devo tọn.+

4 Enẹwutu, mẹmẹsunnu ṣie lẹ emi, mìlọsu lẹ ga ko yin hinhẹn nado kú na Osẹ́n lọ gbọn agbasa Klisti tọn gblamẹ, na mì nido sọgan lẹzun mẹdevo tọn,+ yèdọ mẹlọ he yin finfọn sọn oṣiọ lẹ mẹ,+ na mí nido de sinsẹ́n tọ́n na Jiwheyẹwhe.+ 5 Na to whenue mí to gbẹnọ sọgbe hẹ agbasalan, ojlo zogbe ylando tọn lẹ he nọ yin hinhẹn sọawuhia gbọn Osẹ́n lọ dali to azọ́nwa to agbasa* mítọn lẹ mẹ nado de sinsẹ́n he nọ dekọtọn do okú mẹ tọ́n.+ 6 Ṣigba, todin, míwlẹ ko yin tuntundote sọn Osẹ́n lọ glọ,+ na mí ko kú na nuhe dù nuhe glọnalina mí, na mí nido sọgan yin afanumẹ lẹ to aliho yọyọ de mẹ gbọn gbigbọ dali,+ bọ e ma na yin to aliho hoho lọ mẹ gbọn kandai osẹ́n tọn lọ dali.+

7 To whenẹnu, etẹwẹ mí na dọ lo? Be ylando wẹ Osẹ́n lọ yin ya? Gbede pọ́n! Na taun tọn, yẹn ma na ko yọ́n ylando eyin e ma yin na Osẹ́n lọ tọn wutu.+ Di apajlẹ, yẹn ma na ko yọ́n nukunkẹn, eyin Osẹ́n lọ ma ko dọ dọ: “Hiẹ ma dona donukunkẹn.”+ 8 Ṣigba, na gbedide lọ wutu, dotẹnmẹ wá hundote na ylando nado wleawuna nukunkẹn wunmẹ lẹpo to yẹn mẹ, na matin osẹ́n, ylando kú.+ 9 Na nugbo tọn, yẹn ko nọgbẹ̀ to ojlẹ de mẹ wayi matin osẹ́n. Ṣigba to whenue gbedide lọ wá, ylando gọwá ogbẹ̀, amọ́ yẹn kú.+ 10 Podọ gbedide lọ he na ko dekọtọn do ogbẹ̀ mẹ,+ yẹn mọdọ okú mẹ wẹ e dekọtọn do. 11 Na gbedide lọ wutu, dotẹnmẹ wá hundote na ylando nado doyẹklọ mi bo hù mi. 12 To whelọnu lo, Osẹ́n lọ lọsu to ede mẹ yin wiwe, podọ gbedide lọ yin wiwe, dodo po dagbe po.+

13 Enẹwutu, be nuhe yin dagbe ko dekọtọn do okú mẹ na mi wẹ? Gbede pọ́n! Ṣigba, ylando wàmọ, na e nido sọgan yin didohia dọ ylando wẹ dekọtọn do okú mẹ na mi gbọn nuhe yin dagbe gblamẹ,+ na ylando nido sọgan ylan dogọ gbọn gbedide lọ gblamẹ.+ 14 Na mí yọnẹn dọ Osẹ́n lọ yin gbigbọ tọn, ṣigba yẹn yin agbasalan tọn bo yin sisà do ylando glọ.+ 15 Na yẹn ma yọ́n nuhe wà n’te. Na nuhe yẹn jlo, yẹn ma nọ wà ẹ, ṣigba nuhe yẹn gbẹwanna wẹ yẹn nọ wà. 16 Etomọṣo, eyin nuhe yẹn ma jlo wẹ yẹn nọ wà, yẹn yigbe dọ Osẹ́n lọ yọ́n. 17 Ṣigba, todin, e ma yin yẹn wẹ to wiwà ẹ ba gba, ṣigba ylando he nọ nọ̀ yẹn mẹ wẹ.+ 18 Na yẹn yọnẹn dọ nudagbe depope ma nọ nọ̀ yẹn mẹ, enẹ wẹ to agbasalan ṣie mẹ; na yẹn nọ jlo nado wà nuhe yin dagbe, ṣigba n’ma nọ tindo nugopipe nado wà ẹ.+ 19 Na dagbe he yẹn jlo, yẹn ma nọ wà, ṣigba oylan he yẹn ma jlo wẹ yẹn nọ wà. 20 Todin, eyin nuhe yẹn ma jlo wẹ yẹn nọ wà, be e ma yin yẹn wẹ to wiwà ẹ ba, ṣigba ylando he nọ nọ̀ yẹn mẹ lọ wẹ.

21 To whenẹnu, yẹn mọ osẹ́n ehe to ninọmẹ ṣie mẹ: Whenue yẹn jlo nado wà nuhe sọgbe, nuhe ylan wẹ nọ tin to dè e.+ 22 Na taun tọn, yẹn nọ mọ awuvivi to osẹ́n Jiwheyẹwhe tọn mẹ sọgbe hẹ mẹhe n’yin to homẹ,+ 23 ṣigba n’mọ osẹ́n devo to agbasa ṣie* mẹ he to awhànfun sọta osẹ́n ayiha ṣie mẹ tọn+ bo to hinhẹn mi zun kanlinmọ na osẹ́n ylando tọn+ he tin to agbasa ṣie* mẹ. 24 Gbẹtọ tapònọ he yẹn yin! Mẹnu wẹ na whlẹn mi sọn agbasa he to okú ehe hẹnwa to yẹn mẹ lọ si? 25 Opẹ́ wẹ na Jiwheyẹwhe gbọn Jesu Klisti Oklunọ mítọn gblamẹ! Enẹwutu, to whelọnu lo, yẹnlọsu yin afanumẹ de na osẹ́n Jiwheyẹwhe tọn to ayiha ṣie mẹ, ṣigba agbasalan ṣie yin na osẹ́n ylando tọn.+