Mẹnu Wẹ Jiwheyẹwhe?

Jiwheyẹwhe nugbo lọ wẹ Mẹhe dá nulẹpo. E ma tindo bibẹ bo ma nasọ tindo opodo gbede. (Salmu lẹ 90:2) Ewọ dè wẹ wẹndagbe he tin to Biblu mẹ wá sọn. (1 Timoti 1:11) Na Jiwheyẹwhe wẹ dá mí wutu, ewọ kẹdẹ wẹ mí dona sẹ̀n.—Hia Osọhia 4:11.

Gbẹtọ depope ma ko mọ Jiwheyẹwhe pọ́n na Gbigbọ wẹ ewọ. Ogbẹ̀ wunmẹ he e tindo yiaga taun hugan gbẹtọvi lẹ tọn. (Johanu 1:18; 4:24) Etomọṣo, mí sọgan yọ́n jẹhẹnu Jiwheyẹwhe tọn lẹ gbọn nulinlẹnpọn do nuhe e basi lẹ ji dali. Di apajlẹ, atin-sinsẹ́n po vounvoun wunmẹ voovo lẹ po nọ do owanyi po nuyọnẹn etọn po hia mí. Lehe wẹkẹ lọ klo do nọ do huhlọn etọn hia mí.—Hia Lomunu lẹ 1:20.

Mí tlẹ sọgan plọn nususu dogọ gando jẹhẹnu Jiwheyẹwhe tọn lẹ go gbọn Biblu hihia dali. Di apajlẹ, e dọ nuhe Jiwheyẹwhe yiwanna po nuhe e gbẹwanna lẹ po, lehe e nọ yinuwa hẹ gbẹtọ lẹ do gọna lehe e nọ yinuwa to ninọmẹ voovo lẹ mẹ do na mí.—Hia Salmu lẹ 103:7-10.

Jesu dọmọ: “Otọ́ mítọn he tin to olọn mẹ, na oyín towe ni yin kinklandowiwe.” (Matiu 6:9) Dile etlẹ yindọ Jiwheyẹwhe tindo tẹnmẹ-yinkọ susu, oyín dopo gee wẹ e tindo. Aliho voovo mẹ wẹ oyín enẹ nọ yin yiylọ te to ogbè dopodopo mẹ. To Gungbe mẹ, e nọ saba yin yiylọdọ “Jehovah.”—Hia Salmu lẹ 83:18.

Yinkọ Jiwheyẹwhe tọn ko yin didesẹ sọn Biblu susu mẹ bo yin didiọ po tẹnmẹ-yinkọ lẹ po taidi Oklunọ kavi Jiwheyẹwhe. Ṣigba to whenue Biblu yin kinkan, yinkọ Jiwheyẹwhe tọn sọawuhia to e mẹ nudi whla 7 000. Jesu hẹn yinkọ Jiwheyẹwhe tọn zun yinyọnẹn to whenue e to nuplọn gbẹtọ lẹ gando Jiwheyẹwhe go.—Hia Johanu 17:26.

Pọ́n video lọ Be Jiwheyẹwhe Tindo Yinkọ de Ya?

Be yajiji he gbayipe dohia dọ Jehovah yin Jiwheyẹwhe de he ma nọ hò mítọn pọ́n wẹ ya? Mẹdelẹ dọ dọ e nọ sayana mí nado whlé mí pọ́n, ṣigba lalo wẹ enẹ.—Hia Jakọbu 1:13.

Jiwheyẹwhe doyẹyigona gbẹtọvi lẹ gbọn mẹdekannujẹ nudide bibasi tọn nina yé dali. Be mí ma nọ gọ́ na pinpẹn-nutọn-yinyọnẹn dọ mí tindo mẹdekannujẹ nado basi nudide nado sẹ̀n Jiwheyẹwhe ya? (Jọṣua 24:15) Ṣigba, nuhewutu yajiji do gbayipe wẹ yindọ mẹsusu nọ de nado wadanu do mẹdevo lẹ go. Mawadodo mọnkọtọn lẹ nọ doadi na Jehovah.—Hia Jenẹsisi 6:5, 6.

Jiwheyẹwhe he nọ hò mítọn pọ́n de wẹ Jehovah yin. E jlo dọ mí ni duvivi ogbẹ̀ tọn. To madẹnmẹ, e na de yajiji po mẹhe nọ hẹn ẹn wá lẹ po sẹ̀. Ṣigba todin whẹ́, e tindo whẹwhinwhẹ́n dagbe nado jotẹnna yajiji na ojlẹ de. To nupinplọn 8tọ mẹ, mí na yọ́n whẹwhinwhẹ́n enẹ.—Hia 2 Pita 2:9; 3:7, 13.

Jehovah basi oylọna mí nado dọnsẹpọ ewọ gbọn hodidọ na ẹn to odẹ̀ mẹ dali. E nọ tindo ojlo to dopodopo mítọn mẹ. (Salmu lẹ 65:2; 145:18) E wleawufo nado jona mí. E nọ doayi vivẹnudido mítọn lẹ nado wà ojlo etọn go, eyin mí tlẹ nọ gboawupo to whedelẹnu. Enẹwutu, mahopọnna dọ mí yin mapenọ, ayihaawe ma tin dọ mí sọgan duvivi haṣinṣan pẹkipẹki de tọn hẹ Jiwheyẹwhe.—Hia Salmu lẹ 103:12-14; Jakọbu 4:8.

Na Jehovah wẹ dá mí wutu, mí dona yiwanna ẹn hugan mẹdevo depope. (Malku 12:30) Dile hiẹ to owanyi towe na Jiwheyẹwhe dohia gbọn nupinplọn dogọ gando ewọ go podọ ojlo etọn wiwà dali, hiẹ na dọnsẹpọ ẹ dogọ.—Hia 1 Timoti 2:4; 1 Johanu 5:3.