Video Yọyọ de Na Plọnmẹ Biblu lẹ Bibẹjẹeji

Mẹsusu wẹ ko pọ́n video kleun de he hosọ etọn yin Naegbọn Mí Dona Plọn Biblu? to jw.org ji. Video lọ yin awuwlena nado whàn jlodotọ lẹ na yé nido kẹalọyi plọnmẹ Biblu vọnu de. Nado biọ plọnmẹ Biblu de, zín alọdlẹndonu lọ “Plọn Biblu” he tin to odò pete to bẹjẹeji nọtẹn Intẹnẹt tọn mítọn tọn ji kavi yí alokan apòmẹ tọn (smartphone) kavi nuyizan mọnkọtọn devo de zan he sọgan wle nudọnamẹ (code QR) he yin whiwhla do apotin wlanwlan he nọ yin awuwlena do odò pete to adusiwhé wepa godo tọn alọnuwe pẹvi yọyọ mítọn lẹ tọn. Aliho he mẹ mí sọgan yí video lọ zan po kọdetọn dagbe po te delẹ die.

• To whenue mí to gọyìpọn de basi, mí sọgan dọna whétọ lọ dọ: “Be n’sọgan do video kleun de hia mì he basi zẹẹmẹ do lehe mì sọgan mọ gblọndo na kanbiọ Biblu tọn lẹ do ji ya?” Eyin e yigbe, do video lọ hia ẹ to alokan apòmẹ tọn towe kavi nuyizan mọnkọtọn devo de ji, kavi to ọdinatẹẹ etọn titi ji.

• To whenue mí ze dopo to alọnuwe pẹvi yọyọ lọ lẹ mẹ donukọnna mẹde to kunnudide mayin aṣa tọn kavi gbangba tọn whenu, mí sọgan do apotin wlanwlan he bẹ nudọnamẹ whiwhla hẹn lọ hia mẹlọ bo na ẹn tuli nado yí alokan apòmẹ tọn etọn zan nado mọ nudọnamẹ lọ yí. Na nudọnamẹ (code QR) lọ nọ hùn nọtẹn Intẹnẹt tọn mítọn do fie video lọ te tlọlọ podọ do ogbè voovo lẹ mẹ wutu, e yọnbasi dọ a ni hò video lọ to afọdopolọji na whétọ lọ sọn alokan apòmẹ tọn etọn kavi nuyizan mọnkọtọn devo ji.

• Nọ dọho gando video lọ go na azọ́nwatọgbẹ́, wehọmẹvigbẹ́, hẹnnumẹ, po mẹyọnmẹ towe devo lẹ po, bo biọ to yé si nado do video lọ hia yé. Kavi a sọgan do video lọ hlan yé gbọn Intẹnẹt ji na yé nido pọ́n ẹn na yede.

Eyin mí nọ yí azọ́nwanu yọyọ ehe zan, mí sọgan penugo nado bẹ plọnmẹ Biblu susu dogọ jẹeji, bo gbọnmọ dali gọalọna mẹhe tindo “ninọmẹ ahun mẹ tọn he jẹna ogbẹ̀ madopodo” lẹ.—Owalọ 13:48.