Lehe Mí Gán Nọ Yí Video Biblu Pinplọn Tọn lẹ Zan Do

Mí do video ẹnẹ delẹ he mí nọ yizan to lizọnyizọn lọ mẹ nado whàn mẹlẹ na yé nido plọn Biblu. Naegbọn video ehelẹ dopodopo do yin awuwlena?

• 

  Video lọ Naegbọn Mí Dona Plọn Biblu?—Adà Gigọ́ yin awuwlena nado whàn mẹlẹ nado tindo ojlo to Biblu mẹ, mahopọnna sinsẹ̀n he mẹlọ nọ yì. E nọ whàn mẹhe to video lọ pọ́n nado dín gblọndo na kanbiọ titengbe gbẹ̀mẹ tọn lẹ. Video lọ sọ do gblọndo he sọgbe he Biblu na na kanbiọ delẹ hia to kleun mẹ. E sọ dọ lehe mẹde gán biọ nado plọn Biblu do.

• 

  Diblayin nudopolọ wẹ video lọ Naegbọn Mí Dona Plọn Biblu? (adà kleun) yin po adà gigọ́ etọn lọ po, amọ́ mado-atọ̀n tedidi adà gigọ́ lọ tọn wẹ. Yè gán yí adà kleun ehe zan to aigba-denamẹ he ji alọnu mẹlẹ tọn nọ saba ján te.

• 

  Video lọ Nawẹ Mí Nọ Plọn Biblu hẹ Mẹ Gbọn? yin awuwlena nado whàn mẹlẹ na yé nido do ojlo to tito Biblu pinplọn tọn vọnu mítọn mẹ. Video lọ sọ na gblọndo na kanbiọ delẹ he mẹlẹ nọ saba kanse gando nupinplọn lọ go, bosọ do lehe mẹde gán biọ dọ yè ni plọn Biblu hẹ emi do hia.

• 

  Video lọ Kuavọ Wá Oplọn Towe yin awuwlena na mí nido nọ do e hia Biblu plọntọ lẹ. Nugbo wẹ dọ weda awetọ owe lọ Duvivi Ogbẹ̀ Tọn Kakadoi! tọn wẹ dlẹnalọdo video lọ, amọ́ mí gán do e hia to whenue mí to alọnuwe lọ Duvivi Ogbẹ̀ Tọn Kakadoi! plọn hẹ mẹde. Video lọ dọhodo nuhe to owe lọ mẹ lẹ ji, gọna nuhe nuplọntọ lọ gán donukun to oplọn lọ lẹ whenu.

Video lọ lẹ dopodopo wẹ yin awuwlena na whẹwhinwhẹ́n de wutu, amọ́ depope to yé mẹ wẹ mí gán hò na mẹde kavi dohlan ẹn eyin ninọmẹ lọ biọ domọ. E na yọ́n dọ wẹnlatọ lẹ ni jẹakọ hẹ video lọ lẹ ganji bosọ nọ yí yé zan dile e jẹ do to lizọnyizọn lọ mẹ.