“Ohó Jiwheyẹwhe Tọn . . . Tindo Huhlọn”

 1. Naegbọn e do họnwun na mí dọ ohó Jiwheyẹwhe tọn dohuhlọn? (Pọ́n yẹdide he tin to bẹjẹeji hosọ ehe tọn.)

TAIDI omẹ Jehovah tọn lẹ, e họnwun na mí dọ ohó Jiwheyẹwhe tọn, yèdọ owẹ̀n etọn hlan gbẹtọvi lẹ, “tin to ogbẹ̀ bo tindo huhlọn.” (Heb. 4:12) Mí ko mọ huhlọn Ohó Jiwheyẹwhe tọn to gbẹzan mítọn titi po mẹdevo lẹ po tọn mẹ. Mẹmẹsunnu po mẹmẹyọnnu mítọn delẹ po ko yin ajotọ, peve to amasin adinọ ṣiṣizan mẹ, kavi nọ doalọ to fẹnnuwiwa zanhẹmẹ tọn mẹ to ojlẹ de mẹ wayi. Mẹdevo lẹ ko geze jẹ obá de mẹ dai to aihọn ehe mẹ, ṣigba bo wá mọdọ nude gbẹ́ whèdo emi to gbẹzan emitọn mẹ. (Yẹwh. 2:3-11) E ko jọ whlasusu bọ mẹdelẹ he ko hẹn todido bu pete wá mọ aliho ogbẹ̀ tọn lọ na huhlọn he Biblu tindo nado diọ gbẹzan mẹtọn wutu. A sọgan ko hia bosọ duvivi numimọ mọnkọtọn lẹ tọn he nọ sọawuhia to Atọ̀họ̀-Nuhihọ́ lọ Tọn mẹ to hosọ debọdo-dego lọ “Biblu Nọ Diọ Gbẹzan Mẹtọn” mẹ. Humọ, a sọgan ko doayi e go dọ eyin Klistiani de tlẹ ko kẹalọyi nugbo lọ, Owe-wiwe lẹ gbẹ́ nọ to alọgọna ẹn nado to whinwhẹ́n zọnmii to gbigbọ-liho.

 2. Nawẹ huhlọn Ohó Jiwheyẹwhe tọn yinuwado gbẹtọ lẹ ji to owhe kanweko tintan whenu gbọn?

² To egbehe, be e dona nọ paṣa mí dọ mẹsusu basi diọdo ayidego tọn lẹ na yé plọn Ohó Jiwheyẹwhe tọn wutu ya? Paali! Numimọ mọnkọtọn lẹ nọ flin mí mẹmẹsunnu po mẹmẹyọnnu owhe kanweko tintan whenu tọn lẹ po he tindo todido olọn mẹ tọn. (Hia 1 Kọlintinu lẹ 6:9-11.) To whenue apọsteli Paulu ko slẹ gbẹtọ voovo he ma sọgan dugu Ahọluduta Jiwheyẹwhe tọn lẹ godo, e yidogọ dọmọ: “Nuhe delẹ to mì mẹ yin dai niyẹn.” Ṣigba, Owe-wiwe lẹ po gbigbọ wiwe Jiwheyẹwhe tọn po ko gọalọna yé nado diọ. Etlẹ yin to whenue delẹ to yé mẹ ko kẹalọyi nugbo lọ godo, yé gbẹ́ dona diahi hẹ awugbopo sinsinyẹn lẹ to gbigbọ-liho. Biblu donù Klistiani yiamisisadode owhe kanweko tintan whenu tọn de go he yin didesẹ sọn agun mẹ bo wá yin gigọyí to godo mẹ. (1 Kọl. 5:1-5; 2 Kọl. 2:5-8) Be e ma yin tulinamẹnu de wẹ e yin nado nọ lẹnnupọndo nuhahun voovo he yisenọ hatọ mítọn lẹ ko pehẹ bọ Ohó Jiwheyẹwhe tọn gọalọna yé nado dudeji lẹ ji ya?

 3. Etẹwẹ mí na gbadopọnna to hosọ ehe mẹ?

³ Na Ohó Jiwheyẹwhe tọn yin azọ́nwanu de he tindo huhlọn sọmọ wutu, ayihaawe ma tin dọ mí na jlo nado nọ yí i zan to gigọ́ mẹ. (2 Tim. 2:15) Enẹwutu, to hosọ ehe mẹ, mí na gbadopọnna lehe mí sọgan na dotẹnmẹ huhlọn Ohó Jiwheyẹwhe tọn nado yinuwa to gigọ́ mẹ do (1) to gbẹzan mẹdetiti tọn mítọn mẹ, (2) to lizọnyizọn lọ mẹ, podọ (3) to whenue mí to mẹplọn sọn oplò ji. Nuflinmẹ ehelẹ na gọalọna mí nado nọ do owanyi po pinpẹn-nutọn-yinyọnẹn mítọn po hia Otọ́ owanyinọ olọn mẹ tọn mítọn he nọ plọn mí na ale mítọn.—Isa. 48:17.

 4. (a) Etẹwẹ mí dona wà na Ohó Jiwheyẹwhe tọn nido nọ yinuwado mí ji? (b) Nawẹ a sọgan de whenu dovo na Biblu hihia gbọn?

⁴ Eyin Ohó Jiwheyẹwhe tọn na yinuwado mí ji, mí dona nọ hia ẹ to gbesisọ mẹ​—yèdọ egbesọegbesọ eyin e yọnbasi. (Jọṣ. 1:8) Nugbo wẹ dọ suhugan mítọn sin alọnu wẹ nọ ján taun. Etomọṣo, mí ma dona dike na nudepope—etlẹ yin whẹho dandan tọn lẹ—ni glọnalina tito Biblu hihia egbesọegbesọ tọn mítọn. (Hia Efesunu lẹ 5:15, 16.) Susu to omẹ Jehovah tọn lẹ mẹ wẹ ko kàn ayiha voovo lẹ nado nọ mọ whenu na Biblu hihia egbesọ tọn, vlavo to bẹjẹeji kavi vivọnu azán lọ tọn kavi to ojlẹ devo depope mẹ to azán lọ ji. Yé nọ tindo numọtolanmẹ salmu-kantọ lọ tọn nkọ, mẹhe wlan dọmọ: “Lehe n’yiwanna osẹ́n towe do sọ! Azán lọ pete wẹ n’nọ yí do to ayihamẹlẹnpọn do e ji.”—Salm. 119:97.

5, 6. (a) Naegbọn ayihamẹlinlẹnpọn do yin nujọnu? (b) Nawẹ mí sọgan nọ lẹnayihamẹpọn po kọdetọn dagbe po gbọn? (c) Nawẹ Biblu hihia po ayihamẹlinlẹnpọn deji po ko hẹn ale wá na we gbọn?

⁵ Gbọnvona Biblu hihia, nujọnu wẹ e sọ yin dọ mí ni nọ lẹnayihamẹpọn do nuhe mí hia ji. (Salm. 1:1-3) To whenẹnu, mí na penugo nado yí oyọnẹn Biblu tọn he ma nọ dohó gbede lọ do yizan mẹ to aliho he yọ́n hugan mẹ. Vlavo mí to Ohó Jiwheyẹwhe tọn hia sọn vọkan de mẹ kavi sọn nuyizan lẹtliki tọn de ji, yanwle mítọn wẹ nado dike nuhe mí hia ni jẹ ahun mítọn mẹ.

⁶ Nawẹ mí sọgan nọ lẹnayihamẹpọn po kọdetọn dagbe po gbọn? Mẹsusu ko mọdọ alenu wẹ e yin nado nọ yiagbọji to adà Owe-wiwe lẹ tọn de hihia godo bo lẹnnupọndo kanbiọ taidi ehelẹ ji: ‘Etẹwẹ ehe plọn mi gando Jehovah go? Aliho tẹlẹ mẹ wẹ n’ko to nunọwhinnusẹ́n he tin to adà Ohó Jiwheyẹwhe tọn ehe mẹ yizan te to gbẹzan ṣie mẹ? Adà tẹlẹ mẹ wẹ n’sọgan basi vọjlado te?’ Eyin mí nọ hodẹ̀ bosọ nọ lẹnayihamẹpọn do Ohó Jiwheyẹwhe tọn ji, mí na yin whinwhàn dogọ nado nọ yí ayinamẹ etọn do yizan mẹ to gigọ́ mẹ. Gbọnmọ dali, mí na na dotẹnmẹ huhlọn Ohó Jiwheyẹwhe tọn nado yinuwado gbẹzan mítọn ji sisosiso.—2 Kọl. 10:4, 5.

 7. Nawẹ mí sọgan nọ yí Ohó Jiwheyẹwhe tọn zan to aliho dagbe mẹ to lizọnyizọn mítọn mẹ gbọn?

⁷ Etẹwẹ sọgan gọalọna mí nado nọ yí Ohó Jiwheyẹwhe tọn zan to aliho dagbe mẹ to lizọnyizọn mítọn mẹ? Afọdide tintan wẹ nado nọ yí i zan whẹwhẹ to whenue mí to yẹwhehodọ bo to mẹplọn. Mẹmẹsunnu de dọmọ, “Eyin hiẹ po Jehovah po to yẹwhehodọ sọn whédegbè jẹ whédegbè, be hiẹ kẹdẹ wẹ na to hodọ mapote ya kavi a na dike ewọ lọsu ni dọho ga?” Nuhe dọ e te wẹ yindọ: Eyin mí nọ hia Ohó Jiwheyẹwhe tọn tlọlọ to lizọnyizọn lọ mẹ, be dotẹnmẹna Jehovah wẹ mí te nado dọhona whétọ lẹ. E yọnbasi dọ wefọ de he yin dide po sọwhiwhe po na yinuwado yé ji taun hú nudepope he mí sọgan dọ. (1 Tẹs. 2:13) Kanse dewe dọ, ‘Be n’nọ dín dotẹnmẹ hundote lẹpo nado hia adà Ohó Jiwheyẹwhe tọn de na mẹhe n’to wẹndagbe lá na lẹ ya?’

 8. Naegbọn e ma ko pé nado nọ hia wefọ lẹ poun to whenue mí to yẹwhehodọ?

⁸ Na nugbo tọn, e ma ko pé nado nọ hia wefọ Biblu tọn lẹ na mẹhe mí nọ dọhodopọ hẹ lẹ poun. Etẹwutu? Na mẹsusu ma nọ mọnukunnujẹ Biblu mẹ sọmọ, kavi ma nọ mọnukunnujẹemẹ paali. Enẹ yin nugbo to owhe kanweko tintan whenu bosọ yinmọ to egbehe ga. (Lom. 10:2) Enẹwutu, mí ma dona nọ lẹndọ mẹlọ na yọ́n nuagokun wefọ de tọn na mí hia ẹ poun wutu gba. Mí dona nọ yí whenu nado de adà voovo wefọ de tọn lẹ tọ́n​—vlavo gbọn hogbe tangan delẹ vivọ́ hia dali​—bo basi zẹẹmẹ yetọn. Gbọnmọ dali, owẹ̀n he tin to Ohó Jiwheyẹwhe tọn mẹ na jẹ ayiha po ahun hosetọ mítọn lẹ tọn po mẹ sisosiso.—Hia Luku 24:32.

 9. Etẹwẹ mí sọgan dọ jẹnukọnna wefọ de hihia he na whàn whétọ de nado tindo sisi na Biblu? Na apajlẹ de.

⁹ Nuhe mí dọ whẹpo do hia wefọ de sọgan sọ whàn whétọ de nado tindo sisi na Biblu. Di apajlẹ mí sọgan dọ, “Gbọ mí ni pọ́n nuhe Mẹdatọ mítọn dọ gando whẹho ehe go.” Whenue mí to hodọ hẹ mẹhe ma yin Klistiani lẹ, mí sọgan dọmọ, “Mì doayi nuhe Kandai Wiwe lẹ dọna mí go.” Kavi eyin mí to yẹwhehodọ na wesetọ de, mí sọgan kanse dọ, “Be mì ko sè nuhe howhinwhẹn hohowhenu tọn ehe dọ pọ́n ya?” Mọwẹ, mí nọ yinuwa hẹ mẹdopodopo sọgbe hẹ ninọmẹ etọn bo nọ diọadana nuzedonukọnnamẹ mítọn sọgbe hẹ mẹlọ.​—1 Kọl. 9:22, 23.

10. (a) Dọ numimọ he mẹmẹsunnu de tindo. (b) Nawẹ a ko mọ nuyiwa huhlọn Ohó Jiwheyẹwhe tọn tọn to lizọnyizọn towe mẹ gbọn?

¹⁰ Mẹsusu ko mọdọ Ohó Jiwheyẹwhe tọn yiyizan to lizọnyizọn lọ mẹ sọgan tindo nuyiwadomẹji sinsinyẹn do mẹhe yé to yẹwhehodọ na lẹ ji. Lẹnnupọndo apajlẹ de ji. Mẹmẹsunnu de yì basi gọyìpọn na dawe mẹhomẹ de he ko nọ hia linlinnamẹwe mítọn lẹ na owhe susu. Kakati nado ze Atọ̀họ̀-Nuhihọ́ lọ Tọn agọe tọn lọ donukọnna ẹn poun, mẹmẹsunnu lọ de nado hia wefọ de na ẹn sọn zinjẹgbonu lọ mẹ. E hia 2 Kọlintinu lẹ 1:3, 4, he dọmọ: “Otọ́ lẹblanu sisosiso lẹ tọn podọ Jiwheyẹwhe homẹmimiọn lẹpo tọn . . . nọ miọnhomẹna mí to whlepọn mítọn lẹpo mẹ.” Hogbe enẹlẹ whàn whétọ lọ sọmọ bọ e biọ to mẹmẹsunnu mítọn si nado vọ́ wefọ lọ hia. Dawe lọ dọ dọ emilẹ po asi emitọn po tindo nuhudo homẹmiọnnamẹ tọn taun podọ todin e do ojlo hia to owẹ̀n Biblu tọn mẹ. Be hiẹ lọsu ma kọngbedopọ dọ huhlọn Ohó Jiwheyẹwhe tọn nọ yinuwa to lizọnyizọn mítọn mẹ ya?—Owalọ 19:20.

11. Azọngban tẹwẹ mẹhe nọ plọnnumẹ sọn oplò ji lẹ tindo?

¹¹ Mímẹpo wẹ nọ duvivi opli Klistiani tọn lẹ po plidopọ mítọn lẹ po tọn. Whẹwhinwhẹ́n titengbe he wutu mí nọ pli wẹ nado basi sinsẹ̀n hlan Jehovah. Mí sọ nọ mọ ale susu yí sọn nuplọnmẹ gbigbọmẹ tọn he mí nọ mọyi lẹ mẹ. Lẹblanulọkẹyi daho de wẹ mẹmẹsunnu lẹ tindo nado nọ dọho sọn oplò ji to nujijọ ehelẹ whenu. To ojlẹ dopolọ mẹ, yé dona mọnukunnujẹemẹ dọ azọngban sinsinyẹn de wẹ enẹ yin ga. (Jak. 3:1) Yé dona nọ hẹn ẹn diun dọ nuhe plọnmẹ yé te lẹ sinai do Ohó Jiwheyẹwhe tọn ji gligli. Eyin a yin azọ́ndena nado plọnmẹ sọn oplò ji, nawẹ a sọgan nọ na dotẹnmẹ huhlọn Biblu tọn nado yinuwadomẹji to nuzedonukọnnamẹ towe whenu gbọn?

12. Nawẹ hodọtọ de sọgan hẹn ẹn diun dọ hodidọ etọn yin zize sinai do Owe-wiwe lẹ ji gbọn?

¹² Nọ hẹn ẹn diun dọ Owe-wiwe lẹ ji wẹ hodidọ towe lẹ yin zize sinai do. (Joh. 7:16) Etẹwẹ enẹ nọ biọ? Onú dopo wẹ nado nọ to aṣeji na nudepope​—vlavo numimọ lẹ, apajlẹ lẹ, kavi etlẹ yin aliho hodidọ tọn towe​—ni ma hẹn wefọ Biblu tọn he a yizan lẹ dózin kavi fẹayihasẹnamẹ sọn yé ji blo. Sọ flindọ, Biblu yiyizan nado plọnnumẹ ma zẹẹmẹdo wefọ susu hihia poun gba. Na nugbo tọn, wefọ susu yiyizan tlẹ sọgan zọ́n bọ hosetọ towe lẹ ma na hẹn wefọ enẹlẹ depope do ayiha mẹ. Enẹwutu, nọ yí sọwhiwhe do de wefọ tangan delẹ bo nọ yiagbọji nado hia yé, basi zẹẹmẹ yetọn, yí apajlẹ do nọgodona yé bosọ basi yọ́n-yizan yetọn ganji. (Nẹh. 8:8) Eyin hodidọ de sinai do todohukanji he titobasinanu lọ wleawuna de ji, gbadopọnna todohukanji lọ po wefọ he e bẹhẹn lẹ po. Tẹnpọn nado mọnukunnujẹ kanṣiṣa he tin to nudọnamẹ he todohukanji lọ bẹhẹn lẹ po wefọ he yin sislẹ do e mẹ lẹ po ṣẹnṣẹn mẹ. Enẹgodo, yí wefọ he yin dide lẹ zan nado plọnmẹ nuagokun he todohukanji lọ bẹhẹn lẹ. (A sọgan mọ anademẹ yọ́n-na-yizan lẹ to oplọn 21 jẹ 23tọ owe Mọaleyi sọn Wehọmẹ Lizọnyizọn Yẹwhehọluduta Tọn Mẹ.) Hú popolẹpo, nọ biọ alọgọ Jehovah tọn to odẹ̀ mẹ nado de linlẹn họakuẹ he tin to Ohó etọn mẹ lẹ tọ́n.—Hia Ẹzla 7:10; Howhinwhẹn lẹ 3:13, 14.

13. (a) Nawẹ wefọ he yin yiyizan to opli Klistiani tọn de ji lẹ yinuwado mẹmẹyọnnu de ji gbọn? (b) Ale tẹwẹ a ko mọyi sọn nuplọnmẹ sinai do Owe-wiwe lẹ ji he nọ yin zizedonukọnnamẹ to opli mítọn lẹ ji lẹ mẹ?

¹³ To Australie, wefọ he yin hihia to opli Klistiani tọn de ji lẹ yinuwado mẹmẹyọnnu de ji sisosiso. Mahopọnna dọ e yin pinplọn whẹ́n to ninọmẹ he ylan taun de mẹ, e kẹalọyi owẹ̀n Biblu tọn bo klan gbẹzan etọn do wiwe na Jehovah. Etomọṣo, e gbẹ́ nọ vẹawuna ẹn nado kẹalọyi dọ Jehovah yiwanna emi. Ṣigba to nukọn mẹ, e wá kudeji dọ Jiwheyẹwhe yiwanna emi. Etẹwẹ gọalọna ẹn nado wá tadona enẹ kọ̀n? Pọndohlan etọn diọ to whenue e lẹnayihamẹpọn do wefọ he yin yiyizan to opli ji de ji, ehe e wá yijlẹdo wefọ Biblu tọn devo lẹ go.a Be wefọ Biblu tọn he yin yiyizan to opli lẹ po plidopọ lẹ po ji ko yinuwado ji we to aliho mọnkọtọn mẹ pọ́n ya?—Nẹh. 8:12.

14. Nawẹ mí sọgan dohia dọ mí yọ́n pinpẹn Ohó Jehovah tọn gbọn?

¹⁴ Be mí ma nọ dopẹna Jehovah na Ohó kandai etọn Biblu he mí tindo ya? Gbọnvona dọ ewọ gbọn owanyi dali wleawu etọn na gbẹtọvi lẹ, e sọ hẹn opagbe etọn dọ Ohó etọn na gbọṣi aimẹ di ga. (1 Pita 1:24, 25) Na nugbo tọn, mí na wà dagbe nado nọ hia Ohó Jiwheyẹwhe tọn to gbesisọ mẹ, nọ yí i zan to gbẹzan mítọn mẹ bosọ nọ yí i do gọalọna mẹdevo lẹ. Gbọnmọ dali, mí na do owanyi po pinpẹn-nutọn-yinyọnẹn mítọn po hia na nunina họakuẹ he wá sọn Jiwheyẹwhe dè enẹ, podọ hú popolẹpo na Dowatọ etọn Jehovah Jiwheyẹwhe.