Be a yiwanna Jehovah Jiwheyẹwhe, yèdọ mẹlọ he na we nudagbe lẹpo, etlẹ yin ogbẹ̀ lọsu ya? Be a jlo na do owanyi towe hia ẹ ya? Aliho dagbe hugan lọ nado wàmọ wẹ nado klan dewe do wiwe hlan ẹn, podọ nado do klandowiwe towe hia gbọn baptẹm yíyí to osin mẹ dali. Afọdide ehelẹ na zọ́n bọ a na biọ whẹndo Jehovah tọn mẹ. Taidi kọdetọn de, Otọ́ towe podọ Họntọn towe na nọ deanana we bo na nọ penukundo gowe, na a ko lẹzun etọn wutu. (Salm. 73:24; Isa. 43:1, 2) Klandowiwe po baptẹm po nasọ na we todido lọ nado duvivi ogbẹ̀ tọn kakadoi. (1 Pita 3:21) Be nude to aliglọnna we nado yí baptẹm wẹ ya? Eyin mọ wẹ, e ma yin hiẹ ji wẹ e bẹsọn. Jẹnukọnna hiẹ, gbẹtọ livi susu lẹ ko diọ walọyizan yetọn lẹ gọna aliho nulẹnpọn tọn yetọn nado sọgan pegan na baptẹm. To alọnu din, yé yí ayajẹ po zohunhun po do to Jehovah sẹ̀n. w25.03 2 huk. 1-2

To Biblu mẹ, ylando lẹ nọ saba yin yiyijlẹdo agbàn pinpẹn lẹ go. Ahọlu Davidi basi zẹẹmẹ ylando etọn lẹ tọn to aliho ehe mẹ: “Nuṣiwa ṣie lẹ ko ṣinyọ́n ota na mi pete; yé hú agbọ́ mi taidi agbàn pinpẹn tlala de.” (Salm. 38:4) Amọ́ Jehovah nọ jona ylando ylanwatọ he lẹnvọjọ lẹ tọn lẹ. (Salm. 25:18; 32:5) Hogbe Heblugbe tọn lọ he yin lilẹ́ do “jona” zẹẹmẹdo nado ‘ze daga’ kavi nado ‘ze.’ Mí gán pọ́n Jehovah hlan taidi dawe huhlọnnọ de he ze agbàn ylando mítọn lẹ tọn sọn abọ́ ji na mí bosọ ze yé yì olá. Nuyijlẹdonugo devo do lehe Jehovah nọ ze ylando mítọn lẹ dẹn do mí do sọ hia. Salmu lẹ 103:12 dọna mí dọ: “Dile whèzẹtẹn dẹn do whèyihọ do, mọ wẹ ewọ hẹn sẹ́nhẹngba mítọn lẹ dẹn do mí do.” Whèzẹtẹn wẹ dẹn do whèyihọ hugan. Ofi awe ehelẹ ma gán dukosọ na yede pọ́n gbede. To hogbe devo mẹ, Jehovah nọ ze ylando mítọn lẹ dẹn do mí hugan nuhe mí gán lẹn. Aliho he vọ́ jidenamẹ nankọ die nado basi zẹẹmẹ jonamẹ etọn tọn! w25.02 9 huk. 5-6

To whenue Jesu ko lẹkọyi olọn mẹ godo, apọsteli Pita wà azọ́njiawu de bo hẹnazọ̀ngbọna dawe de he yin sẹkunọ sọn jiji whenu. (Owalọ 1:8, 9; 3:2, 6-8) Dile e nọ saba yin do, nujiawu ehe dọ̀n gbẹtọ susu lẹ wá e dè. (Owalọ 3:11) Be Pita na kẹalọyi gigo he mẹlọ lẹ jlo na na ẹn, bo dohia dọ to aṣa he mẹ emi wá sọn yindidi po otẹn nukundeji po wẹ yin nujọnu hugan ya? Lala, Pita gbọn whiwhẹ dali deanana pipà lọ sọn ede ji yì mẹhe jẹna pipà na taun tọn lọ lẹ ji, enẹ wẹ Jehovah po Jesu po bo dọmọ: “To oyín [Jesu tọn] mẹ, podọ gbọn yise mítọn to oyín etọn mẹ dali, dawe he mì mọ bo yọnẹn ehe ko yin hinhẹn zun huhlọnnọ.” (Owalọ 3:12-16) Mí gán hodo apajlẹ apọsteli Pita tọn, na nuhe dù awuwiwlena whiwhẹ. Mí nọ wà dagbe na mẹdevo lẹ, na mí yiwanna Jehovah, podọ na mí yiwanna mẹlẹ wutu, e ma yin na mí jlo na dọ̀n ayidonugo wá míde ji wutu. Eyin mí nọ yí ayajẹ do sẹ̀n Jehovah bosọ nọ yilizọn na mẹmẹsunnu mítọn lẹ to aliho depope he mẹ mí gán wàmọ te, vlavo eyin mẹlẹ na tlẹ doayi vivẹnudido mítọn lẹ go kavi lala, mí nọ dohia nugbonugbo dọ mí yin whiwhẹnọ.—Mat. 6:1-4. w25.03 10-11 huk. 11-12