Sinsẹ̀nzọn Yẹwhenọ Daho mítọn Jesu tọn lẹ nọ hẹn mí deji dọ mí “sọgan mọ lẹblanu po nukundagbe majẹhẹ po yí he na gọalọna mí to ojlẹ sisọ mẹ.” (Heb. 4:16) Enẹwutu, nọ do yise hia to avọ́sinsan Jesu tọn mẹ. Tindo yise dọ ofligọ lọ gando gowe tlọlọ. (Gal. 2:20, 21) Tindo yise dọ ofligọ lọ wẹ yin dodonu jona ylando towe lẹ tọn. Tindo yise dọ ofligọ lọ ze todido ogbẹ̀ madopodo tọn donukọnna we. Nunina de wẹ avọ́sinsan Jesu tọn yin bọ Jehovah na we. Podọ eyin Jehovah jo ylando mítọn lẹ na mí, mí ma dona dibu dọ e na to whẹjijọ dín nado gọ̀ whẹho lọ fọndote kavi nado dawhẹna mí na nudopolọ. (Salm. 103:8-12) Na nugbo tọn, mí sọgan deji mlẹnmlẹn do jonamẹ Jehovah tọn go. w17.11 11-12 huk. 14-17

To ozán he mẹ hùnwhẹ Tenu-Núdùdù Oklunọ tọn tintan lọ yin bibasi te, Jesu biọ to odẹ̀ mẹ dọ hodotọ emitọn lẹpo ni tin to pọninọ mẹ, podọ yé ni duvivi pọninọ he ewọ po Otọ́ etọn po tindo tọn nkọ. Na nugbo tọn, Jehovah na gblọndo odẹ̀ he Visunnu vivẹ́ etọn hò enẹ tọn, podọ todin gbẹtọ livi susu lẹ yise dọ Jehovah wẹ do Visunnu etọn hlan. To opli he Kunnudetọ Jehovah tọn lẹ nọ basi lẹpo mẹ, hùnwhẹ Oflin tọn lọ wẹ nọ dohia hugan dọ pọninọ tin to ṣẹnṣẹn mítọn. To lẹdo delẹ mẹ, e nọ paṣa mẹlẹ dọ gbẹtọ he tindo sinmẹ agbasa tọn voovo lẹ nọ pli nado basi sinsẹ̀n, podọ mẹdevo lẹ ma nọ yí nukun nujọnu tọn do pọ́n opli mọnkọtọn. Ṣigba, lehe pọninọ enẹ nọ yọ́n taun to nukun Jehovah po Jesu po tọn mẹ do sọ! Taidi omẹ Jehovah tọn lẹ, pọninọ mítọn ma yin nupaṣamẹ de na mí. Na nugbo tọn, Jehovah ko dọ dọdai etọn.—Ezek. 37:15-17; Zek. 8:23. w18.01 14 huk. 7-9

“Họ̀dotọ lẹ,” yèdọ nukọntọ Ju lẹ gbẹ́ Mẹsia lọ dai. To whẹho yetọn mẹ, Mẹsia lọ gbigbẹdai yinukọn tlala zẹ̀ agọjijẹ do Jesu kavi gbigbẹ́ nado kẹalọyi i taidi Klisti lọ go. Ju susu gbẹ́ Jesu dai sọmọ bo tlẹ yí ogbè lélé do biọ dọ ewọ ni yin hùhù. (Luku 23:18-23) Na nugbo tọn, yé doalọ to okú Jesu tọn mẹ. Eyin Jesu yin gbigbẹdai bo yin hùhù, nawẹ e sọgan lẹzun “zannu gángánsu họ̀gosu tọn” gbọn? Enẹ sọgan yọnbasi kiki eyin ewọ yin finfọn wá ogbẹ̀ whladopo dogọ. Apọsteli Pita dlẹnalọdo “Jesu Klisti Nazalẹti tọn . . . mẹhe mìwlẹ hù do pòtin ji, ṣigba he Jiwheyẹwhe fọ́n sọn oṣiọ lẹ mẹ.” (Owalọ 3:15; 4:5-11; 1 Pita 2:5-7) Gbọnmọ dali, Visunnu he yin finfọnsọnku ehe lẹzun omẹ dopo gee lọ, he oyín etọn “yin nina gbẹtọ gbọn ehe dali mí sọgan yin whinwhlẹngán.”—Owalọ 4:12; Efe. 1:20. w17.12 9-10 huk. 6-9