Whenuena E Yin Nuyọnẹnnu Nado Họ̀n

AIHỌN egbehe tọn nọ saba yin hiadogona gbọn gbigbọ adọgbigbo didohia po avùntọ́nmẹ tọn po kavi mẹwhlepọn tọn dali. Mẹhe họ̀n sọn ninọmẹ de mẹ nọ saba yin pinpọnhlan taidi madogánnọ kavi butọnọ. E tlẹ sọgan yin ṣinṣanko.

Ṣigba, Biblu hẹn ẹn họnwun dọ ojlẹ delẹ tin he e na yin nuyọnẹnnu po nuyiwa adọgbigbo tọn po nado họ̀n. Kunnudenu ehe tọn yin didohia to whenuena Jesu Klisti dọna devi etọn lẹ whẹpo e dó yé hlan lizọnyizọn lọ mẹ dọmọ: “Whenuena yé to homẹkẹndo mì to otò he mẹ, mì họ̀n yì awetọ mẹ.” (Matiu 10:23) Mọwẹ, devi Jesu tọn lẹ dona tẹnpọn bo họ̀n na homẹkẹndomẹtọ yetọn lẹ. Yé ma dona tindo mahẹ to nuhe taidi awhàn sinsẹ̀n tọn de mẹ, bo tẹnpọn nado diọ mẹdevo lẹ gánnu-gánnu gba. Owẹ̀n jijọho tọn dó wẹ yé te. (Matiu 10:11-14; Owalọ lẹ 10:34-37) Enẹwutu, kakati nado dike adi ni jizò, Klistiani lẹ dona họ̀n, bo nọla na nuhe sọgan fọ́n adi yetọn dote. Gbọnmọ dali, yé na hẹn ayihadawhẹnamẹnu dagbe yetọn po haṣinṣan họakuẹ yetọn hẹ Jehovah po go.—2 Kọlintinu lẹ 4:1, 2.

Apajlẹ he gbọnvo devo yin mimọ to owe Howhinwhẹn lẹ tọn mẹ. E dọho gando dẹpẹ de go, mẹhe kakati nado họ̀n to whlepọn nukọn, hodo ayọdetọ de “di oyìn he jei hùhù tẹnmẹ.” Nugbajẹmẹji wẹ yin kọdetọn lọ, na e joawuna whlepọn he gando ogbẹ̀ etọn lọsu go wutu.—Howhinwhẹn lẹ 7:5-8, 21-23.

Eyin hiẹ pannukọn whlepọn de nado doalọ to fẹnnuwiwa zanhẹmẹ tọn mẹ kavi pannukọn owù devo lo? Sọgbe hẹ Ohó Jiwheyẹwhe tọn, afọdide he sọgbe nado ze lọ wẹ nado họ̀n sọn nujijọ lọ tẹnmẹ to afọdopolọji.—Howhinwhẹn lẹ 4:14, 15; 1 Kọlintinu lẹ 6:18; 2 Timoti 2:22.