Rahabu Nigo Amwegenete Yehova

Tiga twekore ng’a n’omochie o Yeriko tomenyete. Omochie oyo nigo ore ime ya Kanani ase abanto batamwegeneti Yehova. Omokungu okorokwa Rahabu namenyete aroro.

Ekero Rahabu arenge omonyaroka omoke naigwete igoro ya Musa, buna aatananete amache y’Enyancha Embariri naende buna abaraete Abaisraeli korwa ase ense ya Misiri. Naende akaigwa buna Yehova abakonyete kobabua ababisa babo ase chisegi. Na bono oigure ng’a Abaisraeli nigo babegete chiema chiabo ang’e n’omochie o Yeriko!

Emorogoba eyemo, Abaisraeli babere bakagenda koroota omochi o Yeriko. Bagaika ase enyomba ya Rahabu. Akabaarigania gochia mwaye. Ekero yaika botuko, omoruoti o Yeriko akaigwa ng’a abanto chirooti nigo bare ase omochie o Yeriko ase enyomba ya Rahabu. Omoruoti oria agatoma abanto bagende kobabwata na kobareta bosio bwaye. Korende Rahabu ere akababisa abanto baria chirooti ase ekerama ki’enyomba yaye ki’araine, na kobatebia abasomba b’omoruoti iga: ‘Amaene abanto abwo mbacha aa mwane, korende moise kwayerera nabo morabanyore.’ Inee, aye nomanyete ekiagerete Rahabu akarenda abanto abwo chirooti?— Nase engencho amwegenete Yehova, na komanya ng’a Nyasae nabae Abaisraeli ense ya Kanani.

Konyora abanto aba chirooti batarasoka korwa mwa Rahabu, bakamoriera eira ng’a, ere amo n’enyomba ya ise, mbarendwe ekero Yeriko erasarigwe. Aye nomanyete eki bakomotebia akore?— Nigo bagoteba iga: ‘Imokia engori eye embariri oyesibe ase ekebao eke gwatoikeria. Oise gokora igo, abanto bonsi b’enyomba ya iso mbatoreke.’ Rahabu agakora buna abanto aba chirooti bamotebia. Aye nomanyete ninki gekobwatia?—

Nyuma ya amatuko amake, Abaisraeli bakayoetanana omochie oria, bakirete kiri. Ase amatuko atano na rimo, bakayoetanana omochie oyio, ara rimo kera rituko. Korende ase rituko ria gatano na kabere, bagaetanana ara gatano na kabere. Erio bonsi bagaaka eriogi rinene. Yehova akaiyeria chinyasi chiaetananaine omochie oria koongoka gochia inse. Korende enyomba eria yarenge n’engori embariri nigo etigarete eteneine! Aye noyeroche ase ebicha?— Rahabu n’enyomba ya ise batorekire!

Ninki aye okwegera korwa ase Rahabu?— Rahabu nigo amwegenete Yehova ase engencho y’ebinto biogokumia ere aegerete igoro yaye. Aye n’omwegenete Yehova buna Rahabu amwegenete?— Ntomanyete ng’a nomwegenete!