Mwezi gwa 8

Omenyere empanvu yakarhuma Yehova ayandika omu “chitabu [chage] ch’olwibuko” amazino ma balala ebinwa byabo biyerekene oku bamuyubahire n’oku banakengeera oku zino lyage? Ebinwa byerhu binayerekana ebili oku murhima gwerhu. Yesu aliderhere ntya: “Obunu buderha ebiyunjwire oku murhima.” (Mt. 12:34) Yehova alonzeze balala bamuzigiire nji basiimire akalamo esiku n’amango omu gulu lihyahya. Okuntu rhunaderha kwakayerekana akaba Yehova ayemera oburamye bwerhu. (Yak. 1:26) Baguma mu balala barhasima Mungu, banaderha ebinwa bibi, eby’obukali, n’eby’omwibone. (2 Ti. 3:1-5) Rhurhakasima rhukaba kuguma nabo. Rhulonzeze rhusimise Yehova kugerera ebinwa byerhu. Lero si, ka Yehova akasima amango rhuli rhwakolesa bwinja olulimi lwerhu oku mbuganano z’Echikristu changwa oku mahubiri, aliko nka rhuli rhwenyine rhwanayinja rhwabwira abantu b’omulala gwerhu ebinwa bibi, n’eby’obukali?—1 Pe. 3:7. w22.04 buk. 5 chi. 4-5

Mungu nj’aheba ewazo omu mirhima y’amola mahembi ekumi n’omu chinyalubala yi balimbula Babiloni Mukulu. Kweri, Yehova nj’ashunika amashanja makolese echinyalubala ch’omuduku, k’okuderha Obuguma bw’Amashanja, barhere amadini moshi m’obubeshi m’oku gulu n’okumalimbula loshi-loshi. (Ufu. 18:21-24) Bichi echola chirhuyigirize? Rhukwanene kugenderera kugwarha “obuharamye buchere burhanazingire embere za Mungu werhu.” (Yak. 1:27) Rhurhahira chiro haba n’eliguma rhukayemera rhwashumikwa n’enyigirizo z’obubeshi, esiku zikulu z’echipagani, n’ebijiro by’obukurungu bya Babiloni Mukulu! Rhunajage rhwagenderera kukengusya abantu “barhenge emwage,” yi Mungu arhababona oku bali basangira oku byaha byage.—Ufu. 18:4. w22.05 buk. 11 chi. 17; buk. 14 chi. 18

Muzere, olonze ebisanzi wakayigiririza mw’abana bawe oku bilolere Yehova n’ebintu byoshi binja akujirire. (Kum. 6:6, 7) Okujira ntyo kuli kw’akamaro ahanene omu mulala abantu boshi barhali Bahamirizi ba Yehova, akaba orhazigana kuyiga n’abana bawe ahambuga. Mwali-werhu muguma oyirikirwe Christine aderhere: “Ntaliri nazigana kubona gurhe nabwira abana oku bilolere Yehova ahambuga.” Oku bwindi, oderhe bwinja olubaga lwa Yehova na bene-benyu na bali-benyu. Orhaderhaga abashamuka kubi. Eby’oli waderha oku bibalolere nji byakarhuma abana bawe babayegera amango nji baba bakeneere oburhabale. Ojire omurhula ahambuga. Buli mango, oyinje wayereka balo ok’omuzigiire, ozigiire n’abana bawe. Oganire na balo oku bwirhonzi n’oku bukenge, onayigirize abana bawe gurhe nabo bakajira ntyo. Omu kujira ntyo, walerha omurhula gwakarhuma byabayorohera kuyiga oku bilolere Yehova.—Yak. 3:18. w22.04 buk. 18 chi. 10-11

Oburhumwa Yesu ahaga Abakristu b’omu chibaga che Efeso, bwaliyerekene oku baligenderere kulembera n’oku barhalilekere kukolera Yehova chiro akaba oku baligerere omu bibazo bilengene. Chiro akaba ntyo, babaga bahezeze obuzigire baliherhe burhanzi. Byalihemere bashube bakomeze obuzigire bwabo; buzira okujira ntyo, Yehova arhakayemerere obuharamye bwabo. Konakuguma zene, hali ebindi rhuhemerwe kujira olekere okulembera. Bihemere rhulembere eyi rhunamenyere mpanvu nyinja zihe zirhumire. Mungu werhu arhalaga konyine na bichi rhwajirire s’aliko na bulagurhe rhwabijirire. Ebi rhushunika rhujire ebintu bye by’akamaro emwage bulala alonzeze obuharamye bwerhu buyumangire oku buzigire n’eshukurani rhumugwerheko. (Mez. 16:2; Mk. 12:29, 30) Abakristu b’omu chibaga che Sardise baligwerhe echabo chibazo. Chiro akaba oku baliri bakola n’obushiru mira, bali bayolokere omu kasi baliri bakolera Mungu. Yesu ababwira “bazuke.” (Ufu. 3:1-3) Omu bukweri, Yehova arhakayibirira akasi kerhu.—Ebr. 6:10. w22.05 buk. 3 chi. 6-7

Sulemani aliderhere oku obusime rhunagwarha burhengere oku kasi kakomeere yirhwakola, “luli luhembo lwa Mungu.” (Muh. 5:18, 19) Sulemani alimenyere bwinja ebi ali aderha. Naye aliri mukozi! Aliyumbakire enju, ahinga emizabibu, akwiza ebustani, n’okukola ebisima. Aliyumbakire amavile. (1 Fa. 9:19; Muh. 2:4-6) Kaliri kasi kakomere, na nta ngangane, kalimulerhere obusime. Aliko Sulemani arhawazaga okw’ebyola byonyine by’ebyakamulerhere obusime b’okuli. Analikolere binene omu kasi ka Yehova. Omufano, aliyumangiire akasi k’okuyumbaka ehekalu linja bwenene ly’okuharamiza mu Yehova, n’akola kasi kalimalire myaka mushanvu! (1 Fa. 6:38; 9:1) Enyuma y’okukola kw’amola makasi mombi, ak’ekiroho n’ak’omubiri, yi Sulemani ajaga erhegera okw’akasi k’ekiroho kakagwerhe akamaro bwenene kulusha ak’omubiri. Ayandika ntya: “Bunola b’obuzinda bw’ebyaderherwe, ebintu byoshi byayunvirhwe: Oyubahe Mungu n’okukenga amarhegeko mage.”—Muh. 12:13. w22.05 buk. 22 chi. 8

Ebiblia egwerhe emifano ya bantu banene Yehova ababaliraga oku bulonza. Inde muguma mu bo oyibukire? Nkabaga oyibukire Mwami Manase. Oyola mulume mubi aligoseze Yehova bwenene mu njira zinene. Aharamya ba mungu b’obubeshi, anaheba abandi omurhima mpu nabo bajire ntyo. Aliri ayirha abana bage n’okubahana nka nterekero ku bamungu b’abapagani. Chiro ajira n’obubi bukabizye omu kuheba esanamu ya mungu w’obubeshi omu hekalu lichesibwa lya Yehova. Ebiblia ederhere ntya oku bimulolere: “Ajira maligo manene bwenene omu masu ma Yehova, y’amugayisa.” (2 Ny. 33:2-7) Aliko, amango Manase ahungama n’omurhima goshi, Yehova alimubabalire. (2 Ny. 33:12, 13) Nkabaga wakashuba kuwaza oku Mwami Daudi wajiriraga Yehova ebyaha bikomere, omufano, echaha ch’obugonyi n’ech’okuyirha omuntu. Amango Daudi ahungama n’omurhima gwage goshi n’okuyemera amagosa mage, naye Yehova amubabalira loshi. (2 Sa. 12:9, 10, 13, 14) Nechi, rhwakachizera oku Yehova ali tayari kubabalira. w22.06 buk. 3 chi. 7

Birhaba biyorohere buli mango okugenderera kukomeza obulangalire bwerhu. Hakahika amango rhwagambwa kulindira oku Yehova ayeneza ebilagane byage. Bulala Yehova alamire esiku n’amango, ebisanzi rhwabo rhwakabona oku bilehere, yewe emwage biyufuhire. (2 Pe. 3:8, 9) Ayeneza ebilagane byage omu njira nyinja loshi, aliko nkabaga arhakajira ntyo amango rhwabo rhwalilangalire oku akola kurhurhabala. Bichi byakarhurhabala rhugenderere kukomeza obulangalire bwerhu, amango rhuli rhwalindira oku Mungu ayeneza ebilagane byage? (Yak. 5:7) Yi rhugwarha obulangalire, rhukwanene kuchizera oku Yehova abaho n’oku “anahemba balala boshi banamulonza n’omurhima goshi.” (Ebr. 11:1, 6) Akaba kweri rhuchizerere oku Yehova anabaho, rhwachizera loshi oku nj’ajira byoshi alaganyize. Rhwanakomeza obulangalire bwerhu. Rhukwanene kusalira emwa Yehova, onasome Echinwa chage. Chiro akaba oku rhurhabona Yehova n’amasu, aliko, rhwakagala kumuyegera. Rhwakaganira naye kugerera esala eyi rhunachizerere oku, arhuyunviriza.—Yer. 29:11, 12. w22.10 buk. 26-27 chi. 11-13

Waza kw’eyi sene. Yubu ayikere omu luvu n’amalumwa mage magenderere. (Yob. 2:8) Bera bage bali bagenderera kumubwira oku arhali muntu mwinja, n’oku arhanasaga kujira chintu chiguma ch’akamaro. Ebigeregezo byage byaliri nka musozi gunene ahekere oku rhwe, n’omugayo g’okuheza abana bage gwaliri nka migera oku murhima gwage. Burhanzi, Yubu aliyorhere asirire. (Yob. 2:13) Akaba abola bera ba Yubu b’obubeshi baliri bawaza oku okubona Yubu asirire, k’okuderha oku akolajahika Yehova, baliri bachirhebeka. Halihikire amango Yubu azamula erhwe alola kw’abola bera bage b’obubeshi aderha: “Kuhika ahanafira, ntaleka obushwekerezi bwani!” (Yob. 27:5) Bichi byalirhabere Yubu agwarhe obola bushiru anakomere chiro akaba aliri alibuzwa? Chiro akaba oku amalumwa mage malikalihire bwenene, arhahezaga obulangalire bwage ku Mungu wage w’obuzigire oku nji hagera amango amufumya na buzinda akamalire ebyola bigeregezo byage. Alimenyere oku chiro afa, Yehova nj’amufula.—Yob. 14:13-15. w22.06 buk. 22 chi. 9

Yehova arhuhere oluhembo lw’akamaro bwenene. Arhuyemerere rhuyinje rhwasalira emwage. Wazaga lero: Rhwakabwira Yehova byoshi bili omu murhima gwerhu omu kasanzi koshi-koshi n’omu lulimi loshi-loshi. Rhwakamusalira eyi rhunali omu bitaro changwa rhushwekerwe omu prizo, eyi rhunachizerere ku Darha w’obuzigire arhuyunva. Rhugwerhe eshukurani nene k’olola luhembo. Mwami Daudi alisimisizwe n’olukengo aligwerhe l’okusalira. Ayimpira Yehova ntya: “Mani esala lyani libe nka buvumba burheganyizwe embere zawe.” (Zb. 141:1, 2) Omu siku za Daudi, obuvumba buchesibwa bwaliri bwakoleswa omu mparamyo y’okuli, abadahwa baliri baburheganya na bwirhonzi bunene. (Kut. 30:34, 35) Daudi alilonzeze ayinje awaza oku bwirhonzi oku by’akaderhere amango aliri asalira emwa Yehova nka kulala baliri barheganya obuvumba buchesibwa nabo baliri bajira ntyo oku bwirhonzi. Nerhu echola chirhukenere bwenene. Rhulonzeze amasala merhu masimise Yehova. w22.07 buk. 20 chi. 1-2; buk. 21 chi. 4

Okuchiholera kuli kwa Yehova. Yehova arharhuhaga oruhusa l’okuhana omuntu warhugoseze. (Ro. 12:20, 21) Bulala rhurhashinganene, obuhashe bwerhu buherhe aha bugalukire, che chirhumire rhurhakagala kucha olubanja bwinja nk’oku Mungu akajirire. (Ebr. 4:13) Kandi, okuntu rhuli rhwachiyunva kwakarhushumika kurhume byarhukomerera kumenya echintu chinja rhwakajira. Yehova alifuherere Yakobo ayandike ntya: “Oburhe b’omuntu burhayeneza okunali kwa Mungu.” (Yak. 1:20) Rhwakachizera oku Yehova nj’ajira ebintu by’okunali n’okuchizera ok’okunali kwajirirwe. Amango rhwamababalira, rhwanayerekana oku rhulangalire okunali kwa Yehova. Omu kuleka olubanja omu maboko ma Yehova, rhwanachizera oku Yehova nj’amala ebintu bibi byoshi byalerhwaga n’echaha. Omu gulu lihyahya arhulaganyize oku, rhurhakachiyibuka ebintu bibabeze rhwagereremo “birhakachigaluka omu bwenge bwerhu changwa kugaluka omu murhima gwerhu” haba n’akatyu.—Isa. 65:17. w22.06 buk. 10-11 chi. 11-12

Okubona oku abantu bali barhukolera ntyo, echola chiyerekene oku Yehova arhuyemerere. (Mt. 5:11, 12) Shetani yeli walerha obola bupinzani. Aliko Yesu agwerhe emisi bwenene kulusha Shetani! Kugerera oburhabale bwa Yesu, emyazi minja eli yahikira abantu b’amashanja moshi. Bichi birhuyemezeze echola? Echindi chibazo rhunahurana nacho amango rhuli rhwahubiri, kuli kubona oku abantu bali baganira ndimi zinene. Yesu alibishulire entumwa Yowane oku omu siku zerhu, emyazi minja yakahimire echola chibazo. (Ufu. 14:6, 7) Nka gurhe? Rhuli rhwahereza bantu banene nk’oku byakanagalikana orozo l’okuyunviriza emyazi minja y’Obwami. Zene, abantu oku gulu lyoshi, bakasoma emyazi eyumangiire oku Biblia eli oku site yerhu ye Enternete jw.org bulala egwerhe emyazi mu ndimi zirhalukire 1 000! Ebaraza Lirhambwire lyayemerere oku echitabu rhuli rhwakolesa bwenene omu kujira abanafunzi, k’okuderha, Siimira Akalamo Esiku n’Amango!, chitafsiribwe mu ndimi zirhalukire 700! w22.07 buk. 9 chi. 6-7

Yesu aliri ayunvira abantu obonjo. Entumwa Matayo aliderhere ntya: “Amango abona ebigusho by’abantu, abayunvira obonjo bulala baliri nk’abakulirwe k’oluhu n’okukabulwa eyi n’eyi nka ntama zirhaherhe mungeri.” (Mt. 9:36) Na nka gurhe Yehova anachiyunva? Yesu aliderhere ntya: “Darha oli omu mbingu arhakasima hakajira n’amuguma mw’abala badorho asherere.” (Mt. 18:14) Ebyola binwa birhusimisize bwenene bulala birhuyerekere oku Yehova arhuzigire bwenene. Oku rhuli rhwagenderera kumenya Yesu bwinja ku n’obuzigire bwerhu ku Yehova bwagenderera kuyushuka. Wakashuba yiga binene omu kuyerekana obuzigire n’okujira amaja-mbere m’ekiroho amango oli wageza akasanzi haguma na bene-berhu na bali-berhu bakulire ekiroho b’omu chibaga chawe. Orhegere bichi bibalerhere busime bunene. Barhali bachiganya oku bilolere omuhigo barholere g’okukolera Yehova. Obabwire bakubwire oku bibagereremo omu kasi ka Yehova. Amango bikuhemere orhole omuhigo gw’akamaro, obaheme empanulo. Omu kuderha okuli, “ebintu binagenda bwinja kugerera bahanuzi banene.” w22.08 buk. 3 chi. 6-7

Rhweshi, rhwahurana ebibazo birhali kuguma. Aliko rhurhakaba rhwenyine amango rhuli rhwalwisa ebibazo bili nk’ebyola. Kuguma n’eshe w’abana ogwerhe obuzigire, buli mango Darha w’obuzigire, Yehova aba ey’asezeze obwenge bwage kurhwabo. Ali aha burhambi bwerhu, ali juba-juba okuyunviriza amahuno merhu m’oku muhema oburhabale, anagwerhe enyorha y’okurhurhabala. (Isa. 43:2) Rhuchizerere oku rhwakahima ebibazo bulala arhuhere buli choshi rhukenere yi rhugala kulembera. Arhuhere oluhembo lw’esala, Ebiblia, ebilyo binene by’ekiroho, na bene-berhu na bali-berhu bagwerhe obuzigire yi barhurhabala omu mango rhukenere oburhabale. Rhugwerhe eshukurani nene bulala rhugwerhe Darha w’embingu onarhuseza k’obwenge bwage! “Emirhima yerhu enachishinga muye.” (Zb. 33:21) Rhwakayereka Yehova oku rhugwerhe eshukurani oku kuntu anarhushishikala n’obuzigire omu kukolesa byoshi anarhuha y’arhurhabala. Nerhu, rhukwanene kujira echigabi cherhu omu kugenderera kubera omu bulanzi bwa Mungu. K’okuderha oku, rhukagenderera kujira okwerhu koshi yirhukenga Yehova, n’okujira ebintu anabona oku bili binja, arhulanga esiku n’amango! w22.08 buk. 13 chi. 15-16

Bantu banene barhamenyere zene inde bakanihira. Barhachizerere abantu bakengere, omufano, abanya-politike, abasomere esiyanse, n’abachuruzi, akaba buli mango banalonza kujira ebyakabalerhera enyungu. Oku bwindi, barhakengere abakulu b’amadini bachiyirika oku bali Bakristu. Bobola, birhakarhusomeza okubona barhalangalire Ebiblia, echitabu abola bakulu b’amadini banaderha mpu bakengere. Rhwabo bakozi ba Yehova, rhuyemerere oku ali “Mungu w’obukweri” na buli mango aba arhulonzeze amenja. (Zb. 31:5; Isa. 48:17) Rhumenyere oku rhwakalangalira ebi rhunasoma omu Biblia. Rhuyemerere oku “Echinwa cha Mungu choshi nk’oku chinaba, buba bukweri. Rhuyemerere ebi musomi muguma we Biblia ayandikaga: “Nta chintu n’echiguma Mungu aderhere chiba ch’obubeshi changwa mpu chakafundwa bwayenera. Abantu ba Mungu bakalangalira eby’aderhere, bulala balangalire Mungu wabiderhere.” w23.01 buk. 2 chi. 1-2

Rhunayumbaka bene-berhu na bali-berhu amango rhwamakomeza obwemere bwabo mu Yehova. Baguma bali bashekerwa n’abantu barhali Bahamirizi ba Yehova. Abandi bali balwisa ebibazo bikomere by’amagala changwa ehali y’okuvunika omurhima. Aliko abandi, bagenderere kulingiriza obuzinda bw’elila gulu libi. Ebyola byoshi byakageregeza obwimana bw’Abakristu zene. Bene-berhu na bali-berhu b’omu myaka 100 ya burhanzi balihurene ebibazo bili nk’ebyola. Entumwa Paulo alikoleseze Amandiko omu kuyumbaka obwemere bwa bene-babo na bali-babo. Omufano, Abakristu b’Abayahudi barhalimenyere nka gurhe bakashubiza abantu b’omulala gwabo baliri baderha okw’enyigirizo z’edini lye Chiyahudi ze zaliri z’akamaro bwenene kulusha ze Chikristu. Nta ngangane, amaruba ma Paulo oku Baebrania malikomeze bwenene abola Bakristu. (Ebr. 1:5, 6; 2:2, 3; 9:24, 25) Eyola nganiro yage yaligwerhe ebinwa biyemezeze, yakabarhabere bayinje bamenya nka gurhe bakashubiza abantu b’omulala gwabo barhaliri bemezi. w22.08 buk. 23-24 chi. 12-14

Abantu mu linola gulu lya Shetani barhamenyere inde bakanihira. Buli mango, abachuruzi, abanya-politike, n’abakulu b’amadini, banabavuna omurhima kugerera olugenzi lwabo. Kandi, bantu banene banachiyunva oku barhakanihira bera babo, abaturanyibabo, na chiro, abantu b’omulala gwabo. Echola chirhakarhusomeza chiro. Ebiblia yabaga yaderhere oku: “Omu siku z’obuzinda . . . , abantu nji baba . . . barhali bemana, . . . bakomezi, . . . balenganyi.” K’okuderha oku, bantu baguma bakabere kuguma na Shetani mungu w’elila gulu libi orhakanihirwa. (2 Ti. 3:1-4; 2 Ko. 4:4) Aliko, rhwabo Bakristu b’okuli, rhumenyere oku rhwakanihira Yehova loshi Rhuchizerere oku arhuzigiire n’oku “arhakajahika haba n’akatyu” bera bage. (Zb. 9:10) Kandi, rhwakanihira Yesu Kristu bulala ahaanire akalamo kage eju yerhu. (1 Pe. 3:18) Rhwashubire kuchibonera rhwenyine oku Ebiblia ehaanire amahano rhwakanihira.—2 Ti. 3:16, 17. w22.09 buk. 2 chi. 1-2

Obusime b’okuli burhali busime muntu anagwarha mu kasanzi kageke. Bwakagenderera omu kalamo koshi k’omuntu. Nka gurhe? Yesu alifasiriye echola omu Mahubiri Mage m’oku Musozi. Yesu aderha ntya: “Abagwerhe obusime bali balala bamenyere oku bakenere Mungu.” (Mt. 5:3) Yesu alimenyere oku abantu balemwaga na nyorha nene y’okumenya n’okuharamya Omulemi wabo Yehova Mungu. Obola “b’obulagirire bw’ekiroho.” Bulala Yehova ali “Mungu w’obusime,” balala banamuharamya nabo bakagwarha obusime. (1 Ti. 1:11) Ka rhwakagwarha obusime amango monyine nta chibazo rhugwerhe? Yesu aliderhere oku chiiro na balala bali omu mishibo bakagwarha obusime. Yesu aliderhere ebila binwa byenebi oku bilolere “balala bali balibuzwa okwenge banakulikiza okunali.” (Mt. 5:4, 10, 11) Yesu aliri arhuyigiriza oku rhwakagwarha obusime b’okuli omu kuyeneza obulagirire bwerhu bw’ekiroho n’okuyegera Mungu s’arhali okugwarha ehali zikwirire omu kalamo kerhu.—Yak. 4:8. w22.10 buk. 6 chi. 1-3

Oburhegerezi bwarhabala Omukristu amenye “amango m’okusira n’amango m’okuderha.” (Muh. 3:7) “Okusira kwa muhya kurhali kubula echakaderha.” Ebyola bili binwa abantu banazigana kuderha. K’okuderha oku, hali amango kuba kwinja omuntu agenderere kusira ahali h’okuderha. Rhurhole omufano. Mushamuka muguma wagerere mu binene omu kalamo, bamamuhema mpu aje kurhabala ebindi bibaga oku bibazo bali bahurana. Yunvaga eby’owindi mushamuka amuderhagako: “Buli mango anaba merangwe y’arhaheba embuga haba n’akatyu esiri elolere ebindi bibaga.” Bulala oyula mushamuka ali mwengehe bwenene, ababo bashamuka omu chibaga banamukenga. Baba bachizerere oku arhaheba embuga esiri z’ababo. Okulangalirwa chili chindi chintu rhukenere y’abandi barhunihira. Rhunalangalira omuntu munihirwa bulala rhuyinji oku buli mango anaderha okuli.—Efe. 4:25; Ebr. 13:18. w22.09 buk. 12 chi. 14-15

Banene banahulika amarhwiri amango obwengehe b’okuli “buli bwayakuza n’omulenge omu barabara. (Mez. 1:20) Nk’oku Ebiblia ederhere, hali bigusho bisharhu by’abantu banakabulira obwengehe: “ebihwinja,” “enchunaguzi,” na “abasire.” (Mez. 1:22-25) “Ebihwinja” bali bantu banayemera buli chintu choshi chaderherwe kandi bakanarhebekwa juba-juba. (Mez. 14:15, mahugulo m’eshishi.) Waza oku mufano gw’amamiliyoni m’abantu bali barhebekwa n’abakulu b’amadini changwa n’abarhegesi b’epolitike. Baguma banavunika omurhima amango bamamenya oku eby’abakulu b’amadini babayigirize bili by’obubeshi. Aliko abola baderherwe omu Mezali 1:22 bachishogere bonyine kubera bihwinja bulala balonzeze kubera ntyo. (Yer. 5:31) Barhaba balonzeze kuyiga ebye Biblia ederhere changwa kukenga esheriya zilimo. Kweri, rhurhalonzeze kuyiganya balala banachijira nka bihwinja oku bulonza!—Mez. 1:32; 27:12. w22.10 buk. 19 chi. 5-7

Olubaga lwa Yehova lunayibusa buli mango rhuhereze abashamuka eadrese zerhu n’enimero z’etelefone yi bagala ganira nerhu amango ebintu bihemere kujira juba-juba byamarhengerera. Kandi rhwakahaabwa obwerekezi oku bilolere aha rhwalibirhira, okuyaka juba-juba, n’okuntu rhwakahaabwa oburhabale, changwa oku bilolere nka gurhe na mangochi rhwakarhabala abandi. Akaba rhurhakengere obola bwerekezi, rhwakaheba akalamo kerhu n’ak’abashamuka omu buhanya, abola balume bemana bali bagenderera kurhulanga. (Ebr. 13:17) Bene-berhu na bali-berhu banene balekere enju zabo eju y’ebinjira, changwa akavulindi, bajirire koshi bagalire yi bakoomera ehali zihyahya bakala balimo n’okukola binene omu kasi ka Yehova. Kuguma n’Abakristu b’omu myaka 100 ya burhanzi balibirhiraga eyi n’eyi eju y’obupinzani, bagenderere “kutangaza emyazi minja y’echinwa.” (Mdo. 8:4) Okuhubiri kwabarhabere baseze obwenge bwabo oku Bwami ahali h’okubuseza oku bibazo bahurene. N’echola chabarhabere bagendereze n’omwishingo gwabo n’omurhula. w22.12 buk. 19 chi. 12-13

Yehova anabona oku buli muguma werhu ali w’akachiro. Embere Yesu arhume entumwa zage omu kasi k’okuhubiri, alibarhabere bamenye bayubaha abantu bali b’abapinga. (Mt. 10:29-31) Alijirire ntyo omu kuganira oku nyunyi zalimenyikene omu Israeli, k’okuderha, ebishwa (ebitaranviyo). Ezola nyunyi zaligwerhe kachiro kageke bwenene omu siku za Yesu. Aliko alibwirire abanafunzi bage ntya: “Ntacho n’echiguma mubyo chakarhoga ahashi Yisho akafunda kumenya.” Naho ayongera ntya: “Muli b’akachiro kulusha bishwa binene.” Yesu alirhabere abanafunzi bage bachizere oku Yehova anabona buli muguma oku ali w’akamaro, n’oku nta mpanvu baligwerhe y’okuyubaha obupinzani. Abanafunzi bakayibukire ebyola binwa bya Yesu amango bakabwene ezola nyunyi eyi bali bahubiri omu mavile n’omu mavilaje. Amango moshi-moshi wamabona akanyunyi katyuli, oyibuke oku Yehova akubwene oku oli w’akamaro, bulala nawe ‘oli wakachiro kulusha bishwa binene.’ Akurhabala orhayubahaga amango abantu bamakupinga. w23.03 buk. 18 chi. 12

Mu binola bihe, rhuli rhwahurana bigeregezo kamama, nk’obupinzani b’omu mulala changwa okuheza akasi kerhu. Amango rhwamalembera ebibazo mu mango manene, rhwakagera amango rhwachiyunva rhurhachigwerhe bunihire eyi rhwanavunikire omurhima. Shetani y’akolesa ebila bisanzi y’arhuma rhwachiyunva oku Yehova arharhuzigiire. Ibilisi alonzeze rhuwaze oku Yehova n’olubaga lwage bobali barhulerhera amalibuko. Ebintu bili nk’ebyola byalihikiire Abaizraeli baguma baliri omu Misri. Burhanzi, baliyemerere oku Yehova yiwashimikire Musa na Haruni yi babayokola omu buja. (Kut. 4:29-31) Aliko enyuma amango Farao arhuma akalamo kabo kakomera bwenene, barhondera kulundumira Musa na Haruni eju y’ebibazo bali bahurana. (Kut. 5:21) Balundumira bwenene abakozi bemana ba Yehova. Bigayisize bwenene! Akaba ogenderere kulembera ebibazo mu mango manene, obwire Yehova byoshi bikuli oku murhima omu sala lyawe onalonze oburhabale bwage. w22.11 buk. 15 chi. 5-6

Yehova y’Eshoko y’Akalamo anagwerhe emisi y’okufuula abafire. Alihere omulebi Eliya emisi y’okufuula mugala wa mukana muguma we Serafati. (1 Fa. 17:21-23) Enyuma w’ahola, kugerera oburhabale bwa Mungu, omulebi Elisha afuula mugala wa mukazi muguma w’Omushunemu. (2 Fa. 4:18-20, 34-37) Abola bantu bafulwaga n’abandi biyerekene oku Yehova agwerhe emisi y’okushuba kugalulira abafire akalamo. Amango Yesu aliri oku gulu, aliyerekene oku Eshe alimuhere eyola misi. (Yoh. 11:23-25, 43, 44) Zene, Yesu ali embingu anahaabirwe “obukulu boshi . . . omu mbingu n’oku gulu.” Bobola akayeneza echilagane ch’oku “balala boshi bali omu shinda z’olwibuko” nji bafuuka n’okuhaabwa obulangalire b’okugenderera kulama esiku n’amango.—Mt. 28:18; Yoh. 5:26-29. w22.12 buk. 5 chi. 10

Amango abantu balahira kuyunviriza Ezekieli, baliri balahira kuyunviriza Yehova naye. Ebinwa by’olwandiko lwa zene byalirhumire Ezekieli achizera oku chiro akaba abantu balahire kumuyunviriza, arhali byebiderhere oku afundire kukola engabane yage nka mulebi. Kandi Yehova abwira Ezekieli oku abantu “nji bamenya oku omulebi aliri ahagarhi kabo.” (Eze. 2:5; 33:33) Nta ngangane, ebyola binwa bihebere omurhima byalihere Ezekieli emisi alikenere y’ayeneza akasi kage k’okuhubiri. Nerhu rhugwerhe obushiru bulala rhumenyere oku Yehova arhurhumire rhuje kuhubiri. Arhuhere olukengo omu kurhuhamagala “bahamirizi” bage. (Isa. 43:10) Olola luli lukengo lunene! Kuguma n’oku Yehova abwiraga Ezekieli: “Orhayubahaga,” nerhu Yehova arhubwirire oku: “Rhumenye rhwajanjabala.” (Eze. 2:6) Bulagurhe nta mpanvu rhugwerhe z’okuyubaha abali barhulwisa? Kuguma na Ezekieli, nerhu rhwarhumirwe na Yehova rhunagwerhe oburhabale bwage.—Isa. 44:8. w22.11 buk. 3-4 chi. 4-5

Zene rhugwerhe busiime bunene okubona oku abashamuka n’abagwasi b’akasi bali banihirwa. Rhuli rhwabwira Yehova koko bulala abola bene-berhu bimana bali barhushishikala bwinja! Aliko si mu njira zihe, rhwakayerekanamo nerhu oku rhuli banihirwa? Rhuzigiire bene-berhu na bali-berhu, rhunalonza kumenya emyazi yabo. Aliko rhurhakwanene kuchiheba omu byabo. Bakristu baguma b’omu myaka 100 ya burhanzi, baliri “baderha-derha abandi kubi n’okuchiheba omu birhabalolere, omu kuderha oku bibarhakwanene kuderhako.” (1 Ti. 5:13) Rhurhakashonda haba n’akatyu rhube kuguma nabo. Rhuderhe oku hali omuntu wamakubwira emyazi yage y’esiri, amakubwira okw’eli siri na ntaye okwanene kuyibwirako. Omufano, mango maguma mwali-werhu akarhubwira echibazo ali ahurana nacho ch’amagala changwa ebindi bibazo agwerhe, aliko amakuhema oku nta windi muntu obibalirage ko. Rhukwanene kukenga ebi arhuhemere. w22.09 buk. 10 chi. 7-8

Echinwa che Chigiriki chitafsiribwe, “okuhindamula amawazo merhu,” chakashuba kuderhwa “kujira buhyahya okuntu rhunawaza.” Bobola, birhaderhere oku kuli kufachakujira bintu binja bigeke. Rhukwanene kuwaza oku bilolere oborhere bwerhu bwa ndani n’okulola ebi rhukwanene kuhindamula yi rhukenga amakanuni ma Yehova nk’oku rhwakanagala. Rhukwanene kugenderera kujira ntyo. Amango nji rhwahikira kuba bashinganyanya, nji rhwagala kusiimisa Yehova mu buli chintu nji rhwagala kujira. Oku akola kasanzi kanahika, birhuhemere rhukole bwenene yi rhuhikira ogola muhigo. Oyibuke ebi Paulo aderhere omu Waroma 12:2 oku birhuhemere rhuhindamule amawazo merhu yi rhumenya ebi Mungu alonzeze rhujire. Ahali h’okuyemera kuyiganya amawazo n’ebijiro by’abantu ba linola gulu libi, ech’oburhanzi, rhukwanene rhuchigerereze rhwabo rhwenyine rhulole kangana gurhe rhuli rhwaleka amawazo ma Mungu s’arhali am’egulu momayerekezage emihigo n’esimikiro zerhu. w23.01 buk. 8-9 chi. 3-4

Ka Yehova anarhulwirako mu buli hali rhuli rhwageramo? K’anayerekeza buli chintu choshi charhuhikire omu kalamo kerhu, na ntyo anaba agwerhe empanvu nyinja y’okulekerera ebintu bibi birhuhikire? Nanga, Ebiblia erhayigirize ntyo. (Muh. 8:9; 9:11) Aliko echirhumenyere ch’echila: Amango rhuli rhwahurana ebibazo, Yehova anaba ey’amenyere kandi anayunviriza amalira merhu m’okumuhema oburhabale. (Zb. 34:15; Isa. 59:1) Oku bwindi, Yehova anarhurhabala rhulembere ebigeregezo rhunabihime. Nka gurhe? Njira nguma Yehova anarhurhabalamo kuli kurhurhuliriza, n’okurhuheba omurhima, kanene omu mango makwanene. (2 Ko. 1:3, 4) Ka wakawaza amango Yehova akurhabere omu kalamo kawe omu kukurhuliriza, n’okukuheba omurhima omu mango walikenere bwenene echola? Mango manene rhunarhegeera oku Yehova arhurhabere rhulembere ebibazo amango ebyola bibazo byamahwa. w23.01 buk. 17-18 chi. 13-15

Echila chinyalubala chishushire bwenene na chilala chinyalubala cha marhwe mushanvu, aliko chowe chigwerhe erangi ly’omuduku. Chiyirikirwe “chishushanyo cha chila chinyalubala” chinaderherwe oku “ali mwami wa munane.” (Ufu. 13:14, 15; 17:3, 8) Yowane ayunva ok’oyola “mwami” akarhengerere na buzinda anahera, aliko anashuba kurhengerera. Amola mafasiriyo makwanene kweri oku bilolere Obuguma bw’Amashanja buyinja bwachiseza oku nyungu z’oburhegesi bw’epolitike omu gulu lyoshi! Burhanzi, olola lubaga lwalihamagerwe Mubano gw’Amashanja. Enyuma w’ahola, echola chinyalubala chahera amango m’Evita lya Kabiri ly’Egulu Lyoshi. Buzinda, chaja chashuba kurhengerera nka Buguma bw’Amashanja. Kugerera ebinwa by’obubeshi, ebinyalubala changwa amarhegesi mali mahira abantu omurhima bapinge Yehova n’abantu bage. Yowane aliderhere oku bali nk’abali bagusha haguma “abami b’egulu lyoshi lilamirweko” oku vita lya Armagedoni, k’okuderha, “olusiku lukulu lwa Mungu Mugala-byoshi.”—Ufu. 16:13, 14, 16. w22.05 buk. 10 chi. 10-11

Amango Yesu ayiga kusoma Amandiko Machesibwa yewe yenyine arhahikiraga kumenya Amandiko konyine, s’aliko, anamasiima n’okuleka mayerekeze ebijiro byage. Omufano, oyibuke bichi byabaga omu hekalu amango Yesu aligwerhe myaka 12. Abalimu balimenyere Esheriya ya Musa bwinja “basomezwa n’obuhashe bwage [Yesu] b’okumenya ebintu n’ebishubizo byage.” (Lu. 2:46, 47, 52) Nerhu rhwakahikira kumenya n’okusiima Echinwa cha Mungu amango rhulirhwasoma Amandiko oku kahunda. Rhwakayunguka nabyo kugerera ebi Yesu abwiraga balala balimenyere Esheriya bwenene, kuhebamo abandisi, Abafarisayo n’Abasadukayo. Abola bakulu b’amadini baliri bazigana kusoma Amandiko, aliko barhaliri bayunguka kugerera ebi baliri basoma. Yesu aliyerekene bintu bisharhu byaliri byarhuma abola balume barhayunguka bwenene n’Amandiko. Ebinwa ababwiraga byakarhurhabala rhukomeze obuhashe bwerhu 1) b’okuyunva ebi rhuli rhwasoma, 2) b’okupata obuchire bw’ekiroho, na 3) okuleka Echinwa cha Mungu chirhubumbe k’okuderha, chirhuhindamule. w23.02 buk. 8-9 chi. 2-3

Bintu biguma rhukwanene kuchilangako byakarhulerhera obuhanya, kuli kusharhira oku orhali balo changwa orhali mukawe, obulalu, obudambi, ebinwa by’okubabaza abandi, n’okulola amasharha m’obubandi, epornografiya, n’ebindi bili nk’ebyola. (Zb. 101:3) Ibilisi buli mango analonza orozo l’okuhanyagaza obwira bwerhu haguma na Yehova. (1 Pe. 5:8) Nka rhurhakengukire, Shetani akakuza omu mirhima yerhu, obongwa, obulyalya, obuhugu, akabolo, changwa olushombo, omwibone, n’okubikira abandi omujinya. (Gal. 5:19-21) Nka rhurharholere entambu y’okumashigula ahola h’anaho omu mirhima n’omu bwenge bwerhu, makagenderera kukula nka murhi gugwerhe esumu n’okuja marhulerhera obuhanya. (Yak. 1:14, 15) Buhanya buguma burhabonekene bwinja-bwinja bali bera. Rhukwanene kuyibuka oku hakagera amango rhwanaba kuguma nabalala rhunageza ebisanzi haguma nabo. (1 Ko. 15:33) Rhukachilanga kuguma n’oku Yesu ali rhubwirire rhujire, rhwachilanga oku bera barhakwanene, barhakulikira amakanuni ma Yehova. (Lu. 21:34; 2 Ko. 6:15) Rhwabona obuhanya n’okubuyaka. w23.02 buk. 16 chi. 7; buk. 17 chi. 10-11

Obuzigire bwawe ku Yehova bwagenderere kukomera ok’onali wagenderera kumenya binene okubi mulolere. Kweri rhwakamuyegera zene n’esiku n’amango. Wakanagala kujira ntyo. Oku buzigire, akuhebere omurhima osimiise omurhima gwage. (Mez. 23:15, 16) Wakajira ntyo kugerera ebinwa n’ebijiro byawe. Okuntu olamire kwayerekana oku kweri ozigiire Yehova. Ogola g’omuhigo gwinja bwenene wakarhola omu kalamo kawe. Nka gurhe wakayerekana oku ozigiire Yehova? Ech’oburhanzi, wakaderha esala ly’akamaro bwenene, wanahaana akalamo kawe emwa Mungu muguma yenyine w’okuli. (Zb. 40:8) Naho wanajawayereka abantu boshi oku wahaanire akalamo kawe emwa Mungu omu kubatizwa. Obubatizo kali kasanzi k’obusiime kandi k’akamaro bwenene omu kalamo kawe. Wanahwanza kulama akalamo kahyahya, orhachilama oku bulonza bwawe wenyine, si wajawalama omu kujira obulonza bwa Yehova. (Ro. 14:8; 1 Pe. 4:1, 2) Eyola yakabonekana nk’eli simikiro ekomeere, nechi enakomeere kweri. Aliko yakakurhabala olame akalamo kenja orhankalola. w23.03 buk. 5-6 chi. 14-15