Mwezi gwe 11

Akaba oli muzere, orhabale abana bawe barheganye ebishubizo nk’oku emyaka yabo enali. Mango maguma, rhwakaba eyi rhuli rhwayiga omwazi gukomeere, nk’oguderhere oku bibazo omu mulala, changwa ebilolere okuntu rhunachigendesa, aliko hakaba eyi hali chifungo chiguma changwa bibiri eby’omwana naye akashubizako. Kandi, orhabale abana bawe kurhegeera oku, arhali buli mango baheba okuboko enyanya ku babwira bashubize. Okubafasiriya ebyola, kwabarhabala barhavunikaga omurhima amango oli wageza chigabi chilebe amachishoga abandi oku babashubizage. (1 Ti. 6:18) Buli muguma werhu akarheganya ebishubizo bihere Yehova olukengo n’okuhira omurhima bene-berhu na bali-berhu. (Mez. 25:11) Chiro akaba oku mango maguma rhwakaderha omu binwa bigeke ebirhwagereremo, rhurhakwanene kuderha binene oku birhulolere. (Mez. 27:2; 2 Ko. 10:18) Ahali h’okujira ntyo, rhwanachihangana kuseza obwenge bwerhu ku Yehova, Echinwa chage, n’olubaga lwage loshi.​—Ufu. 4:11. w23.04 buk. 24-25 chi. 17-18

Obuzigire buli bw’akamaro yirhuyorha rhuli masu n’okulanga obwenge bwerhu. (Mt. 22:37-39) Obuzigire rhugwerhe ku Mungu bwarhurhabala rhulembere omu kasi k’amahubiri chiro akaba ebibazo byakarhengerera. (2 Ti. 1:7, 8) Bulala rhunazigira na balala barhakolera Yehova, rhunagenderera kuhubiri chiro akaba rhwakahubiri kugerera etelefone changwa amaruba. Rhurhaheza obulangalire bwerhu oku, lusiku luguma, abaturanyi berhu bakahindamuka n’okurhondera kukola ebinja. (Eze. 18:27, 28) Okuzigira abaturanyi berhu kuheberwemo n’okuzigira bene-berhu na bali-berhu. Rhunayerekana obuzigire buli nk’obola omu “kuhebana omurhima buli muguma n’owindi n’omu kuyumbakana buli muguma n’owindi.” (1 Te. 5:11) Kuguma n’abasoda banakola ahaburhambi bw’ababo omu vita, nerhu rhwakahebana omurhima buli muguma n’owindi. Rhurhakasiima haba nakatyu kubabaza bene-berhu na bali-berhu oku bulonza, omu kubagalulira amabi oku mandi. (1 Te. 5:13, 15) Kandi rhunayerekana obuzigire bwerhu omu kukenga bene-berhu bali bayerekeza omu chibaga.​—1 Te. 5:12. w23.06 buk. 10 chi. 6; buk. 11 chi. 10-11

Njira nguma rhwakakomezamo obwemere bwerhu, kuli kuwaza bwenene oku nchungu. Enchungu chili chintu chirhuyemezeze oku ebilagane bya Mungu nji byayenera. Amango wamawaza bwenene oku mpanvu yarhumaga enchungu yahaanwa na bingana gurhe Yehova alijirire y’ehaanwa, rhwanakomeza obwemere bwerhu omu chilagane cha Mungu ch’akalamo k’esiku n’amango oku gulu linja bwenene nji chayenera. Bulagurhe rhuderhere ntyo? Bichi byajirwaga y’enchungu ehaanwa? Yehova arhuma Omugala muzigirwa, efula yage, mwira wage w’okumurhima, kurhenga embingu n’okuburhwa hanola oku gulu nka muntu mushinganyanya. Amango Yesu aliri oku gulu, aliri alembera ebigeregezo bya mbero zoshi. Naho, alibuzwa n’okufa olufu lwa malumwa manene. Yehova alihaanire echintu ch’akachiro kanene bwenene! Mungu werhu w’obuzigire arhakayemerere haba nakatyu oku Omugala alibuke n’okufa y’arhuha akalamo kenja aliko karhagenderere. (Yoh. 3:16; 1 Pe. 1:18, 19) Yehova ahaanire Omugala w’akachiro kanene bwenene y’arhurhabala. Kandi nj’ajira okwage koshi yirhulama esiku n’amango omu gulu lihya-hya. w23.04 buk. 27 chi. 8-9

Yehova agwerhe enyorha yokufuula abafire si? Buzira ngangane intyo kubinali. Alifuherere abayandikaga Ebiblia kugerera eroho lyage lichesibwa, bayandike echilagane chage ch’obufuuke chamango mayinjire. (Isa. 26:19; Ufu. 20:11-13) Kandi amango Yehova amahana echilagane, buli mango anachiyeneza. (Yos. 23:14) Yehova agwerhe enyorha y’okufuula abafire. Waza oku bi Yobu aderhaga. Alichizerere oku nachiro afa, Yehova nj’amufuula anashuba kulama. (Yob. 14:14, 15) Intyo ku Yehova naye anachiyunva oku bilolere abakozi bage boshi bafire. Agwerhe enyorha y’okubafuula, bagwarhe amagala menja n’obusiime. Gurhe si oku bilolere amamiliare m’abantu bafire marhapataga orozo l’okuyiga okuli oku bilolere Yehova? Alonzeze kubafuula nabo. (Mdo. 24:15) Alonzeze oku nabo bagwarhe orozo l’okugwarha obwira haguma naye, n’okulama esiku n’amango oku gulu.​—Yoh. 3:16. w23.04 buk. 9 chi. 5-6

Nka gurhe wakagenderera kukomeza obwemere bwawe? Omufano, akaba ogwerhe obulangalire b’okulama esiku n’amango oku gulu, wakasoma oku bilolere engani eli omu Biblia ederhere oku Paradizo n’okuyikengerako. (Isa. 25:8; 32:16-18) Owaze gurhe akalamo nji kaba omu gulu lihya-hya. Ba nka wachapa omu bwenge, oli omu gulu lihyahya. Nka rhubikire bwinja-bwinja omu bwenge echilagane ch’egulu lihyahya, ebibazo byerhu byaba “by’akasanzi kageke, birhanakomere.” (2 Ko. 4:17) Obulangalire Yehova akuhere bwakakurhabala ogenderere kulembera ebigeregezo. Akuhere buli choshi wakaba okenere y’opata emisi erhengerere emwage. Bobola amango okenere emisi y’ogala kuyeneza engabane, kulembera echigeregezo, changwa y’ogenderera kugwarha obusiime bwawe, osalire Yehova onajire efunzo lyawe-lyawe y’opata oburhabale. Oyemere bene-benyu na bali-benyu b’Abakristu bakuhebe omurhima. Ogenderere kuwaza bwenene oku bulangalire bwawe bw’amango mayinjire. Naho, waba ‘okomezwe n’emisi yoshi ya [Mugu] egwerhe obukuuze y’ogala kulembera bwenene n’okulindira n’omwishingo.’​—Kol. 1:11. w23.10 buk. 17 chi. 19-20

Rhugwerhe mpanvu zinene z’okubwira Yehova koko omu sala. Rhwakamubwira koko kubuli chintu chinja rhugwerhe; bulala buli mpano yoshi rhugwerhe nyinja enarhenga emwage. (Yak. 1:17) Omufano, rhwakamubwira koko oku gulu lyerhu linja n’okubindi bintu binja bwenene alemere. Kandi rhwakayerekana eshukrani yerhu eju yakalamo kerhu, omulala gwerhu, bera berhu, n’obulangalire bwerhu. Kandi rhunabwira Yehova koko bwenene bulala arhurhabere rhugwarhe obwira bw’akamaro haguma naye. Nkabaga byakarhuhema rhuchihangane kuwaza oku mpanvu rhwewe rhwenyine rhugwerhe z’okubwira Yehova koko. Rhulamire omu gulu liri mu bantu banene barhagwerhe eshukrani. Abantu banazigana kuwaza konyine oku bilolere okuntu bakapata ebibalonzeze ahali h’okuwaza okuntu bakayerekana eshukrani oku bibagwerhe. Nka rhwamahwanza kuyiganya engeso eli nk’eyola, rhwakayinja rhwahuuna konyine omu masala merhu. Yirhuchilanga kw’ebyola byoshi, birhuhemere rhugenderere kukuza n’okuyerekana eshukrani ku byoshi Yehova arhujirire.​—Lu. 6:45. w23.05 buk. 4 chi. 8-9

Yewe nka Darha muzigirwa, Yehova arhasima kurhubona yirhwalibuka. (Isa. 63:9) Chiro akaba ntyo, arharhulanga oku bigeregezo byoshi byakahuzanywa n’enyinji changwa n’ebirimi by’omuliro. (Isa. 43:2) Aliko, arhulaganyize oku arhurhabala “rhubiyambuke.” Kandi chiro akaba rhugwerhe ebigeregezo bili gurhe zene, Yehova arhurhabala rhugenderere kumukolera. Kandi Yehova anarhuhereza eroho lyage lichesibwa ligwerhe emisi yirhugenderera kulembera. (Lu. 11:13; Flp. 4:13) Naho rhwanaja rhwachizera oku buli mango nj’arhuhereza kweri, ebi rhukenere yirhugenderera kuyorha bemana emwage. Yehova alonzeze rhumulangalire. (Ebr. 11:6) Mango maguma rhunachiyunva oku ebibazo byerhu birhukomerere omu kuntu rhurhakagala kubilwisa. Nkabaga rhwakagwarha engangane oku Yehova arharhurhabala. Aliko Ebiblia erhubwirire oku kugerera emisi ya Mungu rhwakagala “kushona echibambazi.” (Zb. 18:29) Bobola ahali h’okugwarha engangane, rhukwanene kusalira n’obwemere boshi, eyi rhuchizerere oku Yehova ashubiza oku masala merhu.​—Yak. 1:6, 7. w23.11 buk. 22 chi. 8-9

Amola mali mafasiriyo makwirire bwenene oku bilolere obuzigire b’okuli! Ebyola binwa bihebere omurhima abashabene: Mwakazigirana bwenene buli muguma n’owindi. Bihemere obushiru bunene oku bantu bashabene, yibayerekana obuzigire buli muguma n’owindi amango moshi balamire. Omufano, omuliro gwakayorha gukolerere amango muntu mulebe ali ayongera mw’eshali. Nka ntaye ojirire ntyo, omuliro gwakahikira ahagwazima. Konakuguma n’obuzigire b’omulume n’okukazi, bwakagenderera kukomera amango bali bakomeza obwira ahagarhi kabo. Mango maguma omulume n’omukazi bakachiyunva nka obuzigire bwabo buli bwahola, ahanene amango bali bahurana ebibazo by’okubula efuranga, ebibazo by’amagala, changwa ebindi bibazo bilolere okuntu bakalemba abana babo. Bobola yibagenderera kulanga “ebirimi by’omuliro gwa Yah,” omulume n’omukazi bakwanene kukola bwenene yi balanga obwira bwabo buyorhe bukomere haguma na Yehova. w23.05 buk. 20-21 chi. 1-3

Yirhukuza engeso y’obushiru, bichi rhukwanene kujira? Abazere berhu bakarhuheba omurhima rhugwarhe engeso y’obushirhu, aliko barhakarhujira rhube bantu bagwerhe obushiru chiro akaba bowe babugwerhe. Okugwarha engeso y’obushiru kuli nka kuyiga obufundi buhya-hya. Njira nguma wakamenyamo obufundi buhya-hya, kuli kulolereza bwinja-bwinja ebijiro by’omwalimu, naho wanaja wamuyiganya. Konako nerhu, rhwakayiga kugwarha engeso y’obushiru omu kulolereza bwinja-bwinja gurhe abandi banayiyerekana n’okuyiganya omufano gwabo. Bobo si, bichi omufano gwa Danieli gwamarhuyigiriza? Kuguma na Danieli, rhukwanene kumenya Echinwa cha Mungu bwinja. Rhwakakuza obwira bukomere haguma na Yehova omu kuganira naye buli mango, omu kumubwira okuntu koshi-koshi rhuli rhwachiyunva. Kandi rhukwanene kulangalira Yehova n’okuchizera oku akarhurhabala buli mango. Naho amango obwemere bwerhu bwamageregezwa, nji rhwagwarha obushiru. Abantu bagwerhe obushiru baba bakengerwe n’abandi. Bwakanarhabala abandi bahikire kumenya Yehova. Omu kuderha okuli rhugwerhe empanvu zinja z’okukuza engeso y’obushiru. w23.08 buk. 2 chi. 2; buk. 4 chi. 8-9

Echinwa ch’Echigiriki chitafsiribwe “kugerereza,” chaliri chakoleswa omu kuhuzanya okuntu abantu bagendaga bapima amabale m’akachiro, nke oro ne arja yibachizera oku mali mowe kweri-kweri. Bobola birhuhemere rhugerereze ebi rhulirhwayunviriza changwa ebi rhulirhwasoma yirhumenya akaba kweri bili by’okuli. Echola chanagenderera kuba ch’amakaro emwerhu bwenene oku rhunali rhwayegera amalibuko makulu. Ahali h’okuyemera buli choshi abandi yibaderha, rhukwanene kukolesa obuhashe bwerhu b’okuwaza yirhuhuzanya ebi rhuli rhwasoma changwa ebi rhuli rhwayunva, nebi Ebiblia n’olubaga lwa Yehova biderhere. Omu kujirantyo, rhurhahabulwa n’ebinwa by’obubeshi by’abazimu changwa epropaganda zabo. (Mez. 14:15; 1 Ti. 4:1) Rhumenyere oku abantu ba Yehova nji bafuma amalibuko makulu. Ntaye oyinji gurhe akalamo nji kaba omusezi. (Yak. 4:14) Aliko, nji rhube rhulamire amango m’amalibuko makulu changwa nji rhube rhwafire embere marhondere, nji rhwahabwa oluhembo lw’akalamo k’esiku n’amango nka rhugenderere kubera bemana. Rhujage rhwaseza obwenge bwerhu rhweshi oku bulangalire bwerhu bwinja bwenene n’okugenderera kuchirheganya oku lusiku lwa Yehova! w23.06 buk. 13 chi. 15-16

Rhurhamenyere gurhe malebi maguma me Biblia nji mayenera. Chiro n’omulebi Danieli arhalimenyere bwinja buli choshi oku bilolere obulebi ayandikaga. (Da. 12:8, 9) Aliko arhali oku bulala rhurhamenyere bwinja-bwinja gurhe obulebi bulebe nji bwayenera, k’okuderha oku obola bulebi burhakayenera. Buzira ngangane, rhwakachizera oku Yehova arhurhabala rhumenye ebirhukenere kumenya bwinja-bwinja omu kasanzi kakwanene, nk’oku anajiraga omu mango ma mira. Etangazo “ly’omurhula n’obubegere” lyajirwa hanola hofi-hofi. (1 Te. 5:3) Naho amarhegesi m’egulu manarhera amadini m’obubeshi n’oku malimbula moshi. (Ufu. 17:16, 17) Buzinda manarhera abantu ba Yehova. (Eze. 38:18, 19) Naho evita ly’obuzinda lya Armagedoni lyanaba. (Ufu. 16:14, 16) Rhwakachizera oku ebyola byarhengerera hanola hofi-hofi. Okw’akola kasanzi kanahika, rhujage rhwagenderera kuyerekana eshukrani ku Darha w’embingu, omu kuyunviriza bwinja-bwinja amalebi n’okurhabala abandi nabo bajire ntyo. w23.08 buk. 13 chi. 19-20

Amango entumwa Paulo aganira oku bilolere obwemere, obulangalire, n’obuzigire, alimalire omu kuderha oku “enkulu mw’ezola [ngeso] buli buzigire.” (1 Ko. 13:13) Bichi byarhumaga Paulo aderha ntyo? Omu mango mayinjire, rhurhakalagirira kugwarha obwemere omu bilagane bya Mungu by’egulu lihyahya, bulala ebi rhulangalire, byoshi nji byaba eyi byayenere. Aliko amango moshi nji rhwakenera kuyerekana obuzigire ku Yehova n’oku bandi bantu. Nantyo, obuzigire bwerhu ku Yehova n’oku bandi bantu nji bwagenderera kukomera amango moshi. Kandi, amango rhwamayerekana obuzigire ku bene-berhu, rhwanayerekana oku rhuli Bakristu b’okuli. Yesu alibwirire entumwa zage ntya: “Ahola abantu boshi bamenya oku muli banafunzi bani: Akaba muherhene k’obuzigire.” (Yoh. 13:35) Kandi, okugwarha obuzigire buli muguma n’owindi kunagendereza obuguma. Paulo aliderhere oku obuzigire chili “chifundo chishinganene ch’obuguma.” (Kol. 3:14) Entumwa Yohana aliyandikiire bene-babo na bali-babo ntya: “Buli yeshi ozigire Mungu akwanene kuzigira na mwene-wabo.” (1 Yo. 4:21) Amango rhwamayerekana obuzigire buli muguma n’owindi, rhwanayerekana oku rhuzigire Mungu. w23.11 buk. 8 chi. 1, 3

Ebiblia ehuzenye akalamo kerhu rhwabo nka Bakristu n’omulindi. Balala bali balibirha n’okuhika oku mustari g’obuzinda g’omulindi, njibahabwa oluhembo lw’akalamo k’esiku n’amango. (2 Ti. 4:7, 8) Rhukwanene kujira okwerhu koshi yirhugenderera kulibirha, ahanene bulala, kulusha mira rhuli hofi n’omustari g’obuzinda g’omulindi gwerhu. Entumwa Paulo, wamalaga bwinja omulindi gwage gw’akalamo, aliyerekene bichi byamurhabalaga y’alibirha bwinja m’ogola mulindi kuhika oku buzinda. Arhuhanwire oku “rhukabulire hale buli muzigo . . . rhunaje rhwalibirha omu kulembera omulindi gwaheberwe embere zerhu.” Paulo alishondere kuderha oku nta gwindi muzigo Omukristu akwanene kuheka? Nanga, arhali ntyo kw’alonzaga kuderha. Aliko alonzaga kuderha oku rhukwanene kukabula buli muzigo gurhagwerhe kamaro. Omuzigo guli nk’ogola gwakarhuma rhurhalibirha juba-juba n’okurhuma rhwaluha. Yirhugala kulibirha omu kulembera, rhukwanene kurhegera juba-juba akaba rhuhekere omuzigo guli nk’ogola gwakarhuma rhurhagenderera kulibirha n’okugukabulira hale ahohan’aho. Aliko mw’akola kasanzi kan’akola, rhukwanene kuheka omuzigo rhukwanene kuheka. Nka rhurhajirire ntyo, rhurhakayorha oku mustari gw’abali omu mulindi.​—2 Ti. 2:5. w23.08 buk. 26 chi. 1-2

Engeso y’olugero enarhurhabala kandi rhukenge amawazo m’abandi. Omufano, bali-berhu baguma banasiima kuchilimbisa (okuchipodowa; nk’okugeza etilo n’ebindi-bindi). Bakristu baguma banachishoga kunywa oku mavu n’olugero, aliko abandi bowe bachishogere okurhamanywa. Abakristu boshi balonzeze kugwarha amagala menja, aliko banachishoga enjira z’okubukwa zirhali kuguma. Akaba rhunawaza buli mango oku rhwabo rhwerhunajira ebintu binja, n’okuseza bene-berhu bajire nk’oku rhwabo rhunajira, rhwagayisa abandi, n’okulerha akalaba omu chibaga. (1 Ko. 8:9; 10:23, 24) Omufano, ahali h’okurhuhirira h’amarhegeko maserere oku bilolere emyambaro, Yehova arhuhere amakanuni makarhuyerekeza. Rhukwanene kuyambala omu njira ehereze Mungu werhu olukengo, eyerekene olugero, emipaka, enayerekene oku rhugwerhe “obwenge buli oku mustari.” (1 Ti. 2:9, 10) Bobola, rhurhayambala mpu yirhuba ba mumbone. Amakanuni me Biblia makarhabala kandi abashamuka bamenye bachiheberaho amarhegeko mabo bonyine oku bilolere okuyambala, okugembwa changwa okusuka enviri. w23.07 buk. 23-24 chi. 13-14

Yehova akoleseze emifano y’abola bakazi babiri yarhuyereka gurhe rhwakagwarha amango mayinjire malim’obusiime. Balala banayemera obulalike “b’omukazi w’echinganyi” banalonzeza obusiime omu kujira eby’obubaraga. Aliko barhababamenyere oku ebijiro byabo byabalerhera engaruka zibi omu mango mayinjire. Ebijiro byabo byabaheka oku lufu. (Mez. 9:13, 17, 18) Balala bayemerere obulalike b’omukazi oshushanyize “obwengehe b’okuli”! (Mez. 9:1) Amango mabo mayinjire nji marhaba kuguma n’amabalala bandi! Kandi bagwerhe obusiime bulala bagwerhe byoshi bakenere yi bagenderera kugwarha obwira bukomere haguma na Yehova. Yirhwayiga kuzigira ebi Yehova anazigira n’okushomba ebi Yehova anashomba. (Zb. 97:10) Kandi, rhugwerhe obusiime b’okuhamagala abandi nabo bayinje bayige kugerera “obwengehe b’okuli.” Rhuli “nka bakozi bali bahamagala n’omulenge oku misozi y’evile n’okuderha: ‘Buli yeshi w’echiganyi ayinje hano.’” Enyungu rhwapata na balala bali bayemeera obulalike zirhali zakuhwera aho han’aho, zili zakugenderera n’okurhuma rhwalama esiku n’amango nka rhuli rhwalambagira omu njira y’obumenyi.​—Mez. 9:3, 4, 6. w23.06 buk. 24 chi. 17-18

Gurhe onachiyunva amango omuntu onakola naye changwa ey’onasoma naye amakubaza echibazo oku bilolere obwemere bwawe? Onayunva obuba changwa omulago si? Banene mu rhwabo intyo ku rhunachiyunva. Aliko, echibazo chili nk’echola chakarhurhabala rhumenye okuntu omuntu ali awaza changwa obwemere bwage. Chakanarhuma byarhuyorohera kumubwira emyazi minja. Aliko mango maguma omuntu akabaza ebibazo, bulala arhayemerere ebirhuli rhwamubwira changwa ey’alonzeze kulerha obuhaka konyine. Echola chirhakwanene kurhusomeza. Ebyola binazigana kurhengerera, bulala bayunvirhe myazi minene y’obubeshi oku bilolere obwemere bwerhu. (Mdo. 28:22) Oku bwindi, rhulamire omu “siku zizinda,” akasanzi bantu banene “barhalonzeze obunvikane chiro” banali bantu “bakalihire.” (2 Ti. 3:1, 3) Nkabaga wachigerere kuchibaza, ‘Gurhe nakayorha ntulerere n’okushubiza bwinja amango muntu mulebe amalonza kulerha obuhaka oku bilolere enyigirizo ze Biblia nyemerere? Obwirhonzi bwakurhabala. Omuntu oli mwirhonzi anagala kuyorha arhulerere, changwa amango arhachizerere ebyashubiza. w23.09 buk. 14 chi. 1-2.

Mango maguma banarhuha amahano oku bilolere okusiima efuranga n’oku bilolere ebintu byoshi byoshi rhwakajira byakavuna amarhegeko ma Mungu. Ebintu byakarhubera bwinja amango moshi rhwamakulikiza obwerekezi bwa Yehova. ( Isa. 48:17, 18; 1 Ti. 6:9, 10) Buzira ngangane, rhumenyere oku Yehova agenderera kukolesa abalume bayumangiire omu kurhuhereza obwerekezi omu mango m’amalibuko makulu na kugera omu mango ma Myaka Chihumbi y’Oburhegesi bwa Yesu. Rhwagenderera kukulikira obola bwerekezi chiro akaba oku rhwalilonzeze rhujire ebindi bintu. Byarhuyorohera kujira ntyo akaba rhugenderere kukulikira obwerekezi bwa Yehova kurhenga zene. Bobola, rhwakakulikira Yehova oli warhuyerekeza kuhebamo na balala ashimikire yibarhuyerekeza. (Isa. 32:1, 2; Ebr. 13:17) Rhujage rhwahigirira kukulikira echirongozi cherhu Yehova n’obwizere boshi bulala anarhuyerekeza omu njira erhakarhuma rhwaharabisya obwira bwerhu haguma naye n’okurhuyerekeza yirhugwarha akalamo k’esiku n’amango omu gulu lihyahya. w24.02 buk. 25 chi. 17-18

Entumwa Paulo alisimisizwe n’akalamo kakwirire omu kasi ka Yehova, aliko aliri alwisa ebibazo kamama. Mango manene Paulo aliri ajira olugenzi lulehere, na mw’agola mango birhaliyorohere kubalama. Amango Paulo aliri abalama mango maguma aliri ahurana “obuhanya bw’enyinji” ‘n’obuhanya bw’ebishambo.’ Hali n’amango abanzi bage baliri bamukubirha. (2 Ko. 11:23-27) Ababo b’Abakristu nabo barhaligwerhe eshukrani amango moshi, oku bintu aliri abakolera omu kubarhabala. (2 Ko. 10:10; Flp. 4:15) Bichi byarhabalaga Paulo agenderere kukolera Yehova? Kugerera Amandiko, Paulo aliyigire binene oku bilolere engeso za Yehova n’oku byaliri ageramo yenyine. Paulo achizera kweri oku Yehova Mungu amuzigire. (Ro. 8:38, 39; Efe. 2:4, 5) Kandi Paulo ahikira kuzigira Yehova bwenene. Paulo aliyerekene obuzigire bwage ku Yehova “omu kukolera n’okugenderera kukolera abachesibwa.”​—Ebr. 6:10. w23.07 buk. 9 chi. 5-6

Bantu banene baba bayemerere oku rhuba rhukenere oburhegesi bw’abantu, n’oku rhukwanene kukenga amasheriya maguma-maguma maheberweho n’abola “bakulu b’enyanya.” Aliko nkabaga barhakakenga esheriya barhasimire changwa eyi bawazize oku erhagwerhe kamaro. Ebiblia eyemerere oku, amarhegesi m’abantu mali mayerekezwa na Shetani, manalerha amalibuko, aliko hano hofi-hofi malimbulwa. (Zb. 110:5, 6; Muh. 8:9; Lu. 4:5, 6) Kandi erhubwirire oku “buli yeshi onapinga obukulu anaba eyi amapinga omupango gwa Mungu.” Yehova alekerere abarhegesi bagenderere kurhambula y’ebintu biyorha oku mustari, anarhuhemere rhubakenge. Eju y’echola rhukwanene “kuhereza boshi ebi bakwanene kuhabwa,” ebyola biheberwemo kulipa ebitansi, n’okukenga. (Ro. 13:1-7) Rhwakabona oku esheriya ndebe erhakwanene, changwa erhali y’ehaki, enakomere bwenene kuyikenga. Aliko rhunakenga abola bakulu bulala Yehova arhubwirire rhujire ntyo, amango moshi barharhubwirire rhuvune amarhegeko mage.​—Mdo. 5:29. w23.10 buk. 8 chi. 9-10

Amango Samsoni aburhwa, Abafilistini baliri barhegeka Abaizraeli n’okubalibuza. (Amu. 13:1) Obola burhegesi bwabo buli m’obwikazize bwalilerhere Abaizraeli malibuko manene. Yehova alichishogere Samsoni “ayerekeze olubaga lwe Izraeli n’okubayokola omu fune z’Abafilistini.” (Amu. 13:5) Samsoni alikwanene kulangalira Yehova, y’agala kukola akola kasi kakomere. Lekaga rhuganire oku mufano guyerekene okuntu Samsoni alilangalire Yehova, na gurhe amuherezaga oburhabale. Mango maguma abasoda b’Abafilistini baliyinjire kufarha Samsoni e Lehi, nkabaga vile nguma yaliri omu Yuda. Abalume be Yuda baliyubahire, naho bava bachishoga kuhaana Samsoni oku banzi babo. Abantu b’eshanja lya Samsoni bamushweka mu nkoba ebiri zihya-hya n’okumuhaana oku Bafilistini. (Amu. 15:9-13) Aliko, “eroho lya Yehova lyahereza [Samsoni] emisi” n’okuchishwekula mw’ezola nkoba. Naho ajire “abona egufa libishi-bishi ly’omushaya gw’echishakalume ch’epunda,” alirhola, alikolesa omu kuyirha Bafilistini 1 000!​—Amu. 15:14-16. w23.09 buk. 2 chi. 3-4

Yehova ali arhuyereka kubuya-buya “omuhigo [gwage] gw’esiku n’amango” guli omu Biblia. Mu njira nguma changwa eyindi, Yehova akachishoga enjira zilengene yayeneza omuhigo gwage n’amango moshi anagala bulala “ajirire buli chintu yichiyeneza obulonza bwage.” (Mez. 16:4) Chechirhumire byoshi Yehova anajira byabaho esiku n’amango. Omuhigo gwa Yehova guli guhe, na bichi ajirire yaguyeneza? Mungu ali bwirire abantu b’oburhanzi omuhigo gwage gwali guhe oku bibalolere. Bali kwanene ‘kuburha n’okuba banene, banayunjuze egulu, n’okulirhegeka, banarhegeke . . . na buli chilemwa chilamire’ oku gulu. (Mwa. 1:28) Amango Adamu na Eva baba bigamba, bakola echaha n’okurhuma echaha chayenera oku mulala gw’abantu. Echola chirhabuzaga Yehova kuyeneza omuhigo gwage. Yehova ahindamula okuntu akayeneze ogola muhigo. Aho h’anaho, ahigirira kushimika Obwami embingu bwakayeneze omuhigo gwage gurhanzi oku bilolere abantu n’okubilolere egulu.​—Mt. 25:34. w23.10 buk. 20 chi. 6-7

Yehova akarhurhabala rhugenderere kubera bemana. Buli mango birhaba biyorohere, ahanene amango rhuli rhwalwisa obuzamba bon’obo mu siku zinene. Hali amango obuzamba bwerhu bwakabonekana nka bukomere bwenene kulusha obu Petro aliri alwisa. Aliko Yehova akarhuhereza emisi yirhurhavunika omurhima. (Zb. 94:17-19) Omufano, mwene-werhu muguma alichihebere omu kalamo k’okulala n’ababo balume mu myaka minene amango arhaliza kuyiga okuli. Ahindamula akalamo kage loshi-loshi, n’okuhwanza kulama nk’oku amakanuni me Biblia maderhere. Aliko, mango maguma aligenderere kuchihangana kulwisa enkengero zibi. Bichi byamurhabalaga agenderere kulwisa? Afasiriye ntya: “Yehova anarhuhereza emisi.” Ayongerere ntya: “Kugerera eroho lichesibwa lya Yehova . . . , nayigire oku byakashoboka oku [genderera] kulambagira omu njira y’okuli . . . Yehova agenderere kunkolesa, chiro akaba oku ntashinganene, anagenderere kumpereza emisi.” w23.09 buk. 23 chi. 12

Bene-berhu muchili misole, byabahema obushiru yi muba balume bakulire ekiroho. Bikuhemere ochishoge emifano minja wayiganya, y’okuza obuhashe bwawe b’okuwaza, okuba munihirwa n’okuyiga obufundi bwakakurhabala omu kalamo, onachirheganye oku zindi ngabane z’omu mango mayinjire. Amango wamawaza oku bintu byoshi okwanene okole, nkabaga wakachiyunva oku bikomeere bwenene. Aliko wakabigala. Oyibuke oku kweri Yehova alonzeze kukurhabala. (Isa. 41:10, 13) Kweri, bene-benyu na bali-benyu omu chibaga nabo bakurhabala. Amango wamahikira omuhigo gwawe g’okuba mulume w’Omukristu okulire ekiroho, wagwarha akalamo kenja kanasimisize. Rhubazigiire, bene-berhu muchili misole! Yehova ajage agenderera kubagisha bwenene oku munali mwakola yi muba balume b’Abakistu bakulire ekiroho. w23.12 buk. 29 chi. 19-20

Owaze oli omu chigusho chinene cha bene-benyu na bali-benyu. Mwagezeze akasanzi kasimisize haguma, n’oku buzinda mwamarhola efoto mweshi haguma. Naho, mwamarhola zindi foto ebiri eyi muwazize oku nkabaga ey’oburhanzi erhalikwirire. Ahola mukola mugwehe foto esharhu. Aliko, ku foto nguma mw’ezola, wanarhegera oku hali mwene-wenyu muguma orhalishekere. Wanava wayishanda bulala mugwerhe zindi foto ebiri, aha mweshi muli mwasheka kuhebamo n’oyola mwene-wenyu. Rhuzigana kuyibuka ebisanzi binja rhwagezeze haguma na bene-berhu na bali-berhu. Aliko, nkabaga mango maguma mw’agola, mwene-werhu changwa mwali-werhu muguma, aliderhere changwa ajira echintu chirhugayisize. Gurhe walijirire amola mango? Rhurhakabishanda kuguma n’oku rhwakashanda inguma mw’ezola foto si? (Efe. 4:32) Rwakashanda ebyaha bigeke geke bya bene-berhu na bali-berhu, bulala rhuyibukire ebisanzi bikwirire rhwagezeze haguma nabo. Ebihe bili nk’ebyola birhukwanene kusimira n’okubika omu bwenge. w23.11 buk. 12-13 chi. 16-17

Ebinwa by’Echigiriki bikolesezwe ahala, biyerekene ok’omukazi w’Omukristu akwanene ayambale omu kuntu kuyerekene oku achikengere anakengere abandi. Rhuchivugiire mwabo bali-berhu bulala munayerekana olugero omu kuntu munayambala! Obwirhegerezi eli yindi ngeso y’akamaro bali-berhu bakulire ekiroho banayerekana. Obwirhegerezi bili bichi? Eli ngeso nyinja enarhurhabala kurhegeera echibi n’echinja, naho rhwanaja rhwachishoga kujira echinja. Rhuganire oku mufano gwa Abigaili. Eba alirholere esimikiro ebihire yakalerhere engaruka zibi oku mulala goshi. Abigaili ajira echajira aho han’aho. Alimenyere echintu chinja akwanene kujira, y’ayokola akalamo k’abandi. (1 Sa. 25:14-23, 32-35) Obwirhegerezi bwakarhurhabala rhumenye amango rhukwanene kuderha n’amangochi rhurhakwanene kuderha. Kandi echola ch’akarhurhabala amango rhuli rhwayerekana oku rhulagire oku bandi.​—1 Te. 4:11. w23.12 buk. 20 chi. 8-9

Entumwa Paulo abiyandikiraga ebyola binwa echibaga che Roma. Bene-berhu na bali-berhu b’eyola munda, babaga bayigire oku bilolere Yehova na Yesu, babaga bayerekene obwemere, banabaga babere Bakristu. Eju y’echola, Mungu ‘abayirika banya-kunali kugerera obwemere bwabo,’ anabashiga amavurha kugerera eroho lyage lichesibwa. (Ro. 5:1) Bakajire balangalira oku Mungu nj’abahereza oluhembo lwinja bwenene, banalichizerere oku nji balupata. Buzinda Paulo ayandikira Abakristu bashiigwa be Efeso oku bilolere obulangalire Mungu abaga abahere. Echola chilagane chakarhumire bapata “echi bashokola bowe nka bachesibwa.” (Efe. 1:18) Kandi Paulo alibwirire n’Abakolosayi ngahe nji bahabirwa oluhembo lwabo. Ali buyirikire “bulangalire bubikirwe eju yenyu omu mbingu.” (Kol. 1:4, 5) Abakristu bashiigwa bagwerhe obulanagalire oku nji bafuuka, n’okulama akalamo k’esiku n’amango omu mbingu emunda nji barhambula haguma na Kristu.​—1 Te. 4:13-17; Ufu. 20:6. w23.12 buk. 9 chi. 4-5

Echinwa “kulanga” chili chinwa chagendaga chakoleswa omu chisoda, chinakoleswa ahanene okuntu abasoda banalanga evile eyorhe omu bulanzi yibarhayirhera. Abantu balilamire omu vile abola balanzi balirimo, baliri bachiyunva bali omu bulanzi bulala balimenyere okw’abasoda bali babalanga. Intyo kon’oko, amango omurhula gwa Mungu gulangire obwenge n’emirhima yerhu, rhwachiyunva rhurhulerere n’okumenya oku rhuli omu bulanzi. (Zb. 4:8) Kuguma na Hana, chiro akaba ehali yerhu erhahindamukire aho han’aho, rhwakagenderera kuchiyunva rhugwerhe omurhula. (1 Sa. 1:16-18) Kandi amango rhwamachiyunva rhurhulerere, binarhuyorohera ahanene kuwaza bwinja n’okurhola esimikiro z’obwengehe. Bichi rhukwanene kujira? Amango oli omu bibazo bikuchubukire, wakahamagala “omulanzi.” Nka gurhe? Osalire kugera aha wachiyunva ogwerhe omurhula gwa Mungu. (Lu. 11:9; 1 Tes. 5:17) Akaba oli wahurana echigeregezo, ogenderere kusalira, wachibonera oku Yehova akuhereza omurhula gwage gwalanga omurhima n’obwenge bwawe.​—Ro. 12:12. w24.01 buk. 21 chi. 5-6

Y’achesa ezino ly’Eshe, Yesu alilembeere amango baliri bamushurha, bamudukanga, n’okulembera buli bubeshi boshi. Alimenyere oku bulala akengere Eshe omu bintu byoshi, ntacho akayunvira eshoni. (Ebr. 12:2) Kandi alimenyere oku Shetani yew’aliri amurhera mw’ebyola bisanzi bikomere. (Lu. 22:2-4; 23:33, 34) Shetani alichizerere kw’avuna obushwekerezi bwa Yesu, aliko ntacho n’echiguma aligerereko! Yesu aliyerekene bwinja bwinja oku Shetani ali mubeshi mubi, n’oku Yehova agwerhe abakozi bemana, bakagenderera kumukolera oku bwimana chiro n’amango bali omu bibazo bikomere! Olonzeze kusimisa Omwami wawe oli warhegeka si? Ogenderere kusingiza ezino lya Yehova, n’okurhabala abandi kuyiga engeso zinja zoshi za Mungu werhu. Amango wamajira ntyo, wanaba eyi wamayiganya Yesu. (1 Pe. 2:21) Kuguma na Yesu, waba eyi wamasimisa Yehova n’okuyerekana ok’omwanzi wage Shetani ali mubeshi mubi! w24.02 buk. 11-12 chi. 11-13

Omu myaka 5 yamagera bantu barhalukire muliyoni muguma b’abatizwe n’okuba Bahamirizi ba Yehova. Amango wamachihana emwa Yehova woyo wenyine, eyi wamachishoga kuba mwanafunzi wa Yesu Kristu, n’okujira obulonza bwa Yehova chechibage chintu ch’akamaro bwenene omu kalamo kawe. Ebyola biheberwemo bichi na bichi? Yesu aderhere ntya: “Akaba muntu mulebe alonzeze kunkulikira akwanene kuchilahira yewe yenyine.” (Mt. 16:24) Echinwa ch’Echigiriki chitafsiribwe “kuchilahira wenyine” chakashuba kuderha “okw’arhachilama okw’alonzeze yewe yenyine.” Rhwabo bantu bachihanire yi rhukolera Yehova, birhuhemere rhulekane na buli chintu choshi chirhasimisize Yehova. (2 Ko. 5:14, 15) Ebyola biderhere ok’okwanene kulekana “n’ebijiro by’omubiri,” omufano nk’ebijiro by’obumaguza. (Gal. 5:19-21; 1 Ko. 6:18) Bobola si, okukenga amola marhegeko kwabihya akalamo kawe? Nanga. Akaba ozigiire Yehova wachizera ok’okukenga esheriya zage kuli kw’akamaro emwawe.​—Zb. 119:97; Isa. 48:17, 18. w24.03 buk. 2 chi. 1; buk. 3 chi. 4

Yehova anahana eroho lyage lichesibwa oku bantu ayemerere. (Mt. 12:18) Rhwakachibaza ntya: ‘Inanyerekana ziguma omu ngeso z’eroho lichesibwa omu kalamo kani si?’ Okala oyerekana engeso y’okulembera kulusha okuntu byaliri amango orhaliza kumenya Yehova si? Ok’onali wagenderera kukuza engeso ze roho lya Mungu, kuwanagenderera kuchizera oku Yehova asimisizwe nawe! Yehova anakolesa akamaro k’enchungu oku b’ayemerere. (1 Ti. 2:5, 6) Aliko si, gurhe byakaba nka rhugenderere kuchiyunva oku Yehova arharhuyemerere chiro akaba oku rhugwerhe obwemere omu nchungu rhwanabatizwe? Oyibuke oku rhurhakwanene kulangalira enkengero zerhu amango moshi, si rhukwanene kulangalira Yehova. Yehova anabona boshi bagwerhe obwemere omu nchungu, oku bali banyakunali omu masu mage, analaganyize okw’abagisha.​—Zb. 5:12; Ro. 3:26. w24.03 buk. 30 chi. 15; buk. 31 chi. 17