Mwezi gwe 12

Yehova agwerhe obuhashe b’okufuula abafire si? Nechi intyo kubinali! Ali “Mugala byoshi.” (Ufu. 1:8) Bulala agwerhe misi minene bwenene y’okuhima buli mwanzi yeshi, chiro n’olufu. (1 Ko. 15:26) Eyindi mpanvu erhumire rhwabona oku Mungu agwerhe obuhashe b’okufuula abafire eli oku, agwerhe obwenge burhagwerhe mipaka. Anahamagala buli nyenyezi omu zino lyayo. (Isa. 40:26) Kandi, ayibukire boshi bafire. (Yob. 14:13; Lu. 20:37, 38) Byakamuyorohera kuyibuka orhwindi rhuntu rhugeke-geke oku bilolere abantu nj’afuula, kuhebamo n’okuntu baliri babonekana, k’okuderha esura yabo, ebintu baliyinji kukola omu kalamo, changwa oborhere bwabo. Okuderha okuli, rhukwanene kuchizera echilagane cha Yehova ch’obufuuke bw’amango mayinjire bulala rhuyinji oku agwerhe enyorha n’obuhashe b’okuchiyeneza. Waza oku yindi mpanvu yakarhuma wachizera echilagane cha Mungu ch’obufuuke: Yehova afuulire abantu. Omu mango ma mira, alihere abalume bemana obuhashe, kuhebamo na Yesu, bafuule abafire. w23.04 buk. 9-10 chi. 7-9

Amango rhwamaganira n’abantu kubuya-buya n’obwirhonzi, byabayorohera bwenene babe tayari kurhuyunviriza n’okugendereza enganiro. Kweri, aliko akaba muntu mulebe alonzeze kulerha obuhaka changwa arhubulire obukenge, birharhuhemere oku rhugenderezage enganiro. (Mez. 26:4) Aliko bantu banene barhazigana kuba ntyo. Baguma changwa banene bakarhuyunviriza. Buzira ngangane rhunayunguka bwenene amango rhwamayiga kuba berhonzi. Osalire Yehova akuhereze emisi, amango okenere kuyorha mwirhonzi, amango oli washubiza oku bibazo, bili nka by’okukuhambarira changwa by’okukubonerera. Oyibuke kw’engeso yawe y’obwirhonzi yakarhuma abandi bahindamula amawazo mabo, n’echola chanarhabala yi murhagendereza obuhaka. Okushubiza oku bwirhonzi n’obukenge kwakarhuma omuntu ahindamula amawazo mage oku birhulolere, n’oku bilolere obukweri bwe Biblia. ‘Buli mango obe tayari kuderhera’ obwemere bwawe, aliko ojire ntyo “oku bwirhonzi n’oku bukenge bunene.” (1 Pe. 3:15) Nechi, oleke obwirhonzi bwawe ebe misi yawe! w23.09 buk. 19 chi. 18-19

Rhuganirage ku njira ene rhwakayerekanamo okulindira. Ey’oburhanzi, omuntu ogwerhe engeso y’okulindira arhagaya juba-juba. Amango abantu bamamuhambarira, anayorha arhulerere arhanagalula amabi oku mandi. (Kut. 34:6) Eyakabiri, omuntu onalindira analembera eyi anarhulerere. Akaba chintu chilebe charholere bisanzi binene okuntu rhurhalilangalire, omuntu oli ntyo anachihangana kurhagwarha oburhe, changwa kurhakaliha. (Mt. 18:26, 27) Eyakasharhu, omuntu onalindira anarhanga kuwaza embere y’okujira chintu chilebe. Nechi, mango maguma binarhuhema rhujire juba-juba. Aliko, amango omuntu onalindira agwerhe kasi kaguma k’akamaro akwanene kuyeneza, anachihangana arhakakolaga juba-juba, changwa mpu akamale juba-juba. Ahali h’okujira ntyo, anarhanga kuchizera oku agwerhe ebisanzi bikwanene by’okupanga okuntu akakola akola kasi. Buzinda anaja arhola ebisanzi by’okukola akola kasi bwinja. Eyakane, omuntu onalindira anachihangana kulwisa ebibazo buzira kulunduma. Ana ajira okwage koshi yagenderera kukolera Yehova eyanagwerhe obusiime. (Kol. 1:11) Abakristu ba boshi bakenere kuyerekana engeso y’okulindira mw’ezila njira zoshi. w23.08 buk. 20-21 chi. 3-6

Empanvu y’akamaro y’okulanga omurhima gwerhu g’omufano eli oku, Yehova anasuzuma omurhima gwerhu. K’okuderha oku Yehova anabona ebirhalukire eby’abantu bakagala kubona, kandi amenyere kweri rhuli bantu banyachi. Naye arhuzigira rhukagenderera kuwaza oku mahano mage makarhurhabala rhulame esiku n’amango. (Yoh. 4:14) Mw’agola mango rhurhakachibabazwa chiro n’olugenzi lubi, n’obubeshi bwa Shetani bwa linola gulu libi. (1 Yo. 5:18, 19) Amango rhwamayegera Yehova, obuzigire bwerhu n’obukenge rhumugwereko bwakomera. Bulala rhurhalonzeze kugayisa Darha w’embingu, rhwashomba chiro n’ewazo ly’okujira echaha. Mwali-werhu oyirikirwe Marta w’omu Croatie waliri ashumikwa ajire eby’obubaraga, aderhere ntya: “Nalibwene oku bikomeere oku gwarha amawazo m’enja, n’okulwisa enyifinjo z’okulonza kujira echintu chilebe chirhakwirire. Aliko, okuyubaha Yehova kwalindangire.” Nka gurhe okuyubaha Mungu kwalimulangire? Marta aderhere oku aliri akengera bwenene oku ngaruka okurhola ensimikiro zibi kunalerha. Nerhu rhukwanene kujira okola kon’oko. w23.06 buk. 20-21 chi. 3-4

Yesu alimenyere ok’obulonza bwa Yehova kuli kuchesa ezino lyage n’okulikula kw’ebisobe byoshi. Echola checharhumaga Mwalimu werhu ayigiriza abanafunzi bage bagende basalira ntya: “Darha werhu oli omu mbingu, ezino lyawe lichesibwe.” (Mt. 6:9) Yesu alimenyere okw’echola ch’echibazo chʼakamaro bwenene chilolere ebilemwa byoshi. Nta chilemwa n’echiguma chigwerhe obwenge omu mbingu changwa oku gulu chachigerere kuchesa ezino lya Yehova kuguma na Yesu. Aliko, amango abanzi ba Yesu bamufarha, balimubeshere oku chaha chihe akolere? Okw’adukangire Eshe! Yesu alimenyere bwinja bwinja ok’okudukanga Yehova changwa okuheba echisobe oku zino lichesibwa ly’Eshe, chaliri chaha chikomere bwenene. Byali muchubukire bwenene okubona bamubeshera n’okumuchira olubanja kw’amola maligo. Nkabaga eyola y’empanvu nkulu yarhumaga Yesu achiyunva “ababere loshi” amango baliri hofi kumufarha.​—Lu. 22:41-44. w24.02 buk. 11 chi. 11

Omu mulindi gwerhu gw’akalamo, rhukwanene kuzigira bwenene Yehova na Yesu kulusha okuntu rhunagizira abantu b’omulala gwerhu. (Mt. 10:37) Aliko echola chirhaderhere oku rhurhakwanene kuyeneza engabane zerhu z’omu mulala, wamenya nka zili zarhubuza kusimiisa Yehova na Kristu. Aliko, yi Mungu na Kristu barhuyemera, birhuhemere rhuyeneze ebi rhukwanene kukola omu mulala gwerhu. (1 Ti. 5:4, 8) Rhukajira ntyo, rhwagwarha obusiime bwenene. Yehova amenyere oku emilala yakagwarha obusiime, amango omulume n’omukazi bali bakolerana buli muguma n’owindi n’obuzigire n’obukenge, amango abazere bazigiire n’okuyigiriza abana babo, n’amango abana nabo bali bakenga abazere babo. (Efe. 5:33; 6:1, 4) Obe mulume, obe mukazi, changwa mwana, rhweshi rhukwanene kukolesa amakanuni me Biblia. Orhajiraga konyine eby’obwene oku bili binja changwa eby’abantu b’aholamire banazigana kujira, changwa eby’abantu basomere binene oku bilolere emilala baderhere oku ojirage. Okolese bwinja ebitabu byerhu biyumangire oku Biblia. Ebyola bitabu bigwerhe amahano menja makakurhabala okolese bwinja amakanuni me Biblia. w23.08 buk. 28 chi.  6-7

Omukazi w’Omukristu akenere kukuza obufundi bw’akamaro. Bufundi bulebe omunyere anayiga amango achili mwana bwakagenderera kumulerhera enyungu omu kalamo kage koshi. Omufano okuyiga bwinja kusoma n’okuyandika. Mu micho miguma, abantu banabona oku birhali by’akamaro abakazi bamenye bwinja kusoma n’okuyandika. Aliko bili binja binali by’akamaro oku Bakristu boshi okumenya kusoma n’okuyandika. (1 Ti. 4:13) Bobola chiro akaba byakaba bikomere, ogenderere kuchihangana kuyiga bwinja kusoma n’okuyandika. Nyungu zihe nji wagwarha? Obufundi buli nk’obola bwakakurhabala ogwarhe efuranga okenere. Kandi byakuyorohera kuyiga Ebiblia n’okuyiyigiriza abandi. N’ech’akamaro bwenene, wayegera Yehova amango ogenderere kusoma Echinwa chage n’okuchikengerako.​—1 Ti. 4:15 w23.12 buk. 20 chi. 10-11

Oheme Yehova akurhabale y’ogala kuhima amashumi. Rhwewe nka bantu barhashinganene, binarhuhema rhulwise buli mango amashumi m’okujira echintu chibi. Shetani ali ajira okwage koshi y’eyola ntambala erhukomerera bwenene. Njira nguma anahabula m’obwenge bwerhu, kuli kugerera ebintu by’okuchisimisa birhachere. Ebyola bintu by’okuchisimisa byakabumbya obwenge bwerhu amawazo mabi embere za Yehova makanarhuma rhwakola echaha chikomere. (Mk. 7:21-23; Yak. 1:14, 15) Rhukenere oburhabale bwa Yehova akaba rhushondere kuhima amashumi m’okujira echintu chibi. Yesu alihebere ebila binwa by’okuhema oburhabale omu sala ly’omufano: “Orharhulekaga mpu rhuje omu mashumi, aliko orhuyokole k’olala mubi.” (Mt. 6:13) Yehova alonzeze kurhurhabala, aliko rhukwanene kumuhema oburhabale. Enyuma y’okumala kuhema oburhabale omu sala, rhukwanene kandi kujira okwerhu koshi yi rhuyaka ebintu byoshi-byoshi byakarhuheba omu mashumi. w23.05 buk. 6-7 chi. 15-17

Amango omulume n’omukazi babwene oku obwira bwabo n’Eshe w’embingu buli bw’akamaro, babatayari kukulikira amahano mage, bulala mamanarhuma bagala kulwisa ebibazo byakarhuma obuzigire bwa buli muguma n’owindi bwahola. Balala bwagwerhe obwira bukomere haguma na Yehova, kandi banachihangana kuyiganya engeso zage nka: obwinja, okulembera, n’okubabalira. (Efe. 4:32–5:1) Amango omulume n’omukazi bamayerekana ezola ngeso byakabayorohera bwenene obuzigire bwabo bugenderere kukomera. Mwali-werhu Lena, wamamala myaka 25 eyali omu buhya aderhere ntya: “Biba biyorohere okuzigira n’okukenga omuntu oli w’ekiroho.” Waza oku mufano guli omu Biblia. Amango Yehova achishoga omulume n’omukazi bakabere bazere ba Masiya walilaganyizwe, alichishogere Yusufu na Mariya kurhenga mu bantu banene b’omu buko bwa Daudi. Bulagurhe? Bulala buli muguma ali gwerhe obwira bukomere haguma na Yehova, kandi na Yehova ali rhegerere oku bakamuhebere oku nafasi y’oburhanzi omu buhya bwabo yi bugenderera kuba bwinja bwenene. w23.05 buk. 21 chi. 3-4

Yesu ali Mungeri werhu, anashinganene, aliko bene-berhu ahebereho yibarhuyerekeza bowe barhashinganene. Nkabaga hali amango byakarhukomerera kubakenga ahanene amango bamarhubwira rhujire bintu bilebe rhurhalonzeze kujira. Mango maguma entumwa Petro aligambirwe kukenga. Amango malayika amubwira oku alye enyama zirhachere ezalilahizwe n’Esheriya ya Musa, Petro alahira, arhali liguma lyonyine si kasharhu koshi! (Mdo. 10:9-16) Bichi byarhumaga alahira? Obola bwerekezi buhya-hya ntacho bwalimubwirire. Oku lwindi lunda, amango abashamuka b’Abakristu b’omu Yerusalemu babwira entumwa Paulo oku alerhe balume 4 oku hekalu, n’okuchichesa nk’oku emigenzo yalihemere. Aliko Paulo alimenyere oku Abakristu barhachili eshishi w’Esheriya ya Musa. Kandi nantacho chibi alijirire. Paulo “arhola abola balume olusiku lwakulikiragaho anachichesa haguma nabo nk’oku emigenzo yanalihemere.” (Mdo. 21:23, 24, 26) Bulala Paulo alikengere obwerekezi, arhabala omu kulerha obuguma ahakagarhi ka bene-babo.​—Ro. 14:19, 21. w23.10 buk. 10 chi. 15-16

Nkabaga orhakawaza ok’obuba eli ngeso y’akamaro y’ogwarha obwira bukomere haguma na muntu mulebe. Aliko, balala balonzoze kugwarha obwira bukomere haguma na Yehova bakwanene “kumuyubaha.” Chiro akaba rhwamakolera Yehova mu myaka engana gurhe, rhweshi rhukwanene kugenderera kumukenga bwenene. Aliko si okuyubaha Mungu k’okuderha gurhe? Omuntu ogwerhe obuba bukwanene ku Mungu anamuzigira, anamukenga bwenene, kandi arhalonza kujira echintu choshi-choshi chakahanyagaza obwira bwage haguma naye. Yesu naye “aliyubahire Mungu.” (Ebr. 5:7) Arhaliri ajanjabala embere za Yehova. (Isa. 11:2, 3) Ahali hokujira ntyo, aligwerhe buzigire bunene bwenene ku Yehova, analilonzeze kumukenga. (Yoh. 14:21, 31) Kuguma na Yesu, nerhu rhunayerekana oku rhumukengere bwenene, n’okumuyubaha, bulala agwerhe obuzigire, ali mwengehe, w’okunali, anagwerhe misi minene. Kandi rhumenyere oku Yehova arhuzigiire bwenene n’oku anasimiiswa n’okuntu rhunayemera amahano mage. Yehova anayunva omugayo amango rhwamamubulira obukenge, aliko rhukamukenga rhunasimiisa omurhima gwage.​—Zb. 78:41; Mez. 27:11. w23.06 buk. 14 chi. 1-2; buk. 15 chi. 5

Amango Mwami Uziya agangaza omu burhegesi bwage, aleka kugwarha eshukrani emwa Yehova oku bintu binja byoshi abaga amujirire. Bichi ebyola birhuyigirize? Rhukwanene kuyibuka oku Yehova yenarhuhereza ebintu binja byoshi rhunasimira omu kalamo kerhu n’omu kasi kage. Ahali h’okuchibanda omu chifuba oku bilolere ebirhwayeneze, rhukwanene kugwarha eshukrani emwa Yehova oku byali arhurhabala kuyeneza. (1 Ko. 4:7) Rhukwanene kuyemera oku bwirhohye oku rhurhashinganene n’oku rhukenere empanulo. Mwene-werhu ogwerhe myaka 60 ntya ayandika ntya: “Nayigire oku ntakwanene kugwarha omugayo changwa kuvunika omurhima, amango abandi bamarhegera amagosa mani. Amango naliri nahaabwa amahano eju y’amagosa naliri najira nchili mwana mango maguma, naliri nachihangana kumakolesa n’okukola nk’oku nakanagala.” Amango rhwamakenga Yehova n’okuyorha berhohye, kweri rhwagwarha akalamo kalimo obusiime.​—Mez. 22:4. w23.09 buk. 10 chi. 10-11

Abakristu b’omu siku za Paulo balikenere kulembera. Baliri bahurana ebibazo bili kuguma n’eby’abantu ba mw’ezola siku baliri baharuna. Aliko kandi baliri bahurana ebibazo bulala baliri Bakristu. Banene mubo baliri balibuzwa, barhaliri balibuzwa n’abakulu b’amadini m’Echiyahudi n’abarhegesi b’Abaroma konyine, s’aliko n’emilala yabo nayo yaliri yabalibuza. (Mt. 10:21) Kandi balikwanene kujira okwabo koshi y’enyigirizo z’ebigamba by’obwemere zirhagaba echibaga changwa mpu zibashumike. (Mdo. 20:29, 30) Aliko, abola Abakristu balilembere oku bwimana. (Ufu. 2:3) Nka gurhe? Baliri bawaza oku mifano y’abantu baderherwe omu Biblia balilembere nka Yobu. (Yak. 5:10, 11) Baliri basalira yibagwarha emisi. (Mdo. 4:29-31) Kandi banaliri bachiseza oku bintu binja bakapatire kugerera okulembera kwabo. (Mdo. 5:41) Nerhu rhwakalembera amango rhuli rhwayiga oku kahunda emifano eli omu Biblia y’abantu balembere n’eyindi eli omu bitabu byerhu n’okuyikengerako. w23.07 buk. 3 chi. 5-6

Yehova na Yesu barharhulekerera. Entumwa Petro amalire kuhakana Yesu, alikwanene kurhola esimikiro y’akamaro. Woyo nka mwanafunzi wa Yesu, ka waleka changwa wagenderera kuba mwanafunzi wa Yesu? Yesu alilakirire Yehova oku, obwemere bwa Petro burhaholaga. Yesu alibwirire Petro oku bilolere elyola sala, anayerekana oku alichizerere, oku buzinda Petro akahikire kugwarha emisi y’okukomeza bene-babo. (Lu. 22:31, 32) Petro akwanene kuba eyi aliri ahebwa emisi bwenene amango aliri awaza kw’ebyola binwa bya Yesu! Amango birhuhemere rhurhole esimikiro y’akamaro, Yehova akakolesa abangeri bagwerhe obuzigire barhuhebe omurhima yirhugenderera kuyorha bemena. (Efe. 4:8, 11) Kuguma n’oku Yehova ahaga Petro n’ezindi ntumwa ebintu by’omubiri balikenere, nerhu arhuhereza ebintu by’omubiri rhukenere rhukaheba eby’Obwami oku nafasi y’oburhanzi omu kalamo kerhu. w23.09 buk. 24-25 chi. 14-15

Yehova anabona buli chintu chinja choshi rhunajirira abandi, chiro chaba chigeke bwenene. Yehova anabona k’okuntu rhwachihanire kuli kw’akachiro bwenene n’oku liri deni nji arhulipa. Akaba wachigerere kukola nka mushamuka changwa mugwasi w’akasi Yehova ayibukire akasi wakolere omu siku zigerere n’obushiru waliri wakolesa y’okayeneza. (1 Ko. 15:58) Kandi y’abona obuzigire oli wagenderera kuyerekana. Yehova alonzeze rhweshi rhukuze obuzigire bwerhu kuye n’oku bandi. Rhwakakomeza obuzigire bwerhu ku Yehova omu kusoma Echinwa chage, omu kuchikengerako, n’omukuganira naye buli mango kugerera esala. Rhwakakuza obuzigire ku bene-berhu na bali-berhu omu kubahereza oburhabale bakenere. Ok’obuzigire bwerhu bunali bwagenderera kukula bwenene, ku rhwanayegera Yehova bwenene n’omulala gwerhu gw’ekiroho. Kandi nji rhwasiimira obola bwira esiku n’amango! w23.07 buk. 10 chi. 11; buk. 11 chi. 13; buk. 13 chi. 18

Buli Mukristu akwanene kurhola esimikiro oku bilolere okuntu ashishikala amagala mage. Amango Abakristu bali bachishoga okuntu bakwanene kubukwa, bakwanene kukenga esheriya ze Biblia ziderhere oku rhukwanene kuyaka eshagama n’obulaguzi. (Mdo. 15:20; Gal. 5:19, 20) Aliko omu yindi njira bakachishoga bonyine okuntu babukwa. Bantu baguma banaja kuhema konyine oburhabale oku banganga bali omu eneo yabo, aliko abandi banalonza eyindi njira bakabukwamo. Rhwakaba rhuchizerere rhwenyine oku njira ndebe y’okubukwa yakarhurhabala changwa yakarhulerhera obuhanya, aliko rhukwanene kukenga esimikiro za bene-berhu na bali-berhu oku bilolere okuntu balonzeze kubukwa. Bobola, rhurhayibagiraga chiro ebila bintu bine: 1) Obwami bwa Mungu bonyine bunji bwafumya loshi-loshi abantu. (Isa. 33:24) 2) Buli Mukristu akwanene “kuchiyemeza loshi” ebili binja bwenene emwage amango amarhola esimikiro oku bilolere amagala mage. (Ro. 14:5) 3) Rhurhachiira abandi olubanja oku bilolere esimikiro barholere, kandi rhurhanajira echintu choshi-choshi chakarhuma basibuka. (Ro. 14:13) 4) Abakristu banayerekana obuzigire n’okumenya ok’obuguma bw’echibaga bobw’akamaro bwenene kulusha amawazo mabo bowe bonyine.​—Ro. 14:15, 19, 20. w23.07 buk. 24 chi. 15

K’ozigire Yehova bwenene si? Nechi! Kurhenga mira, bantu banene baliri bachiyunva okuntu oli wachiyunva. (Zb. 104:33, 34) Banene balichihanire yi bakolera Yehova. Kweri ntyo kw’Abanaziri bamira balijirire. Abanaziri baliri ba Izraeli b’obushiru baliri bayemera bachiyime bintu bilebe yibagala kolera Yehova omu njira eli kwagokwago. Esheriya ya Musa yaliyemerere ok’omulume changwa omukazi akahanire echilagane ch’okukolera Yehova, omu kuchishoga kulama akalamo k’Obunaziri mu mango malebe. (Hes. 6:1, 2) Amango omw’Izraeli akajirire echilagane ch’Obunaziri, hali ebintu arhakachijirire abandi Baizraeli bagendaga bajira. Bobola si, bulagurhe omw’Izraeli akachishogere kujira echilagane ch’Obunaziri? Echaliri chashunika omw’Izraeli oli nk’oyola, bwaliri buzigire bunene aligwerhe ku Yehova n’eshukrani erhengere oku murhima oku migisho minene minja amuhere.​—Kum. 6:5; 16:17. w24.02 buk. 14 chi. 1-2

Omu Biblia, echinwa che Chiebrania chitafsiribwe “obwimana,” changwa “obuzigire bwimana,” chinazigana kuderha oku bwimana changwa obuzigire bwimana Mungu anayereka bera bage. Echola chinwa chen’echo chinakoleswa, omu kuyerekana obuzigire abakozi ba Mungu banayerekana bonyine ku bonyine. (2 Sa. 9:6, 7) Obwimana bwerhu bwakagenderera kugwarha emisi oku esiku yizanachichunda. Rhulole gurhe obwimana bwa Danieli bwali genderere kukomera. Obwimana bwa Danieli ku Yehova bwaligeregezwe omu kalamo kage koshi. Aliko echigeregezo chikomere bwenene chalimuhikire amango aligwerhe myaka echubukire 90. Abarhwali b’okubwami baliri bakolera Mwami Dariyo, balishombere Danieli barhanali kengere Mungu wage. Naho bamujira enama y’okumuyirha. Bashumika mwami ahebeho erhegeko lyakarhumire barhegera akaba Danieli akabere mwimana ku Mungu wage changwa ku mwami. Byoshi Danieli alikwanene kujira yayerekana oku ali mwimana ku mwami kwaliri kuleka kusalira Mungu wage Yehova mu siku 30. Danieli achishoga kuyorha mwimana ku Yehova.​—Da. 6:12-15, 20-22. w23.08 buk. 5 chi. 10-12

Yehova alonzeze rhulembere amango rhuli rhwayereka bene-berhu na bali-berhu obuzigire. Amango bene-berhu changwa bali-berhu barharhukolere okuntu Omukristu akakolera owabo, rhwakachizera oku barhalilonzeze barhujirire kubi, n’oku bali bachiseza kujira ebi Yehova alonzeze. (Mez. 12:18) Mungu anazigira abakozi bage bemana chiro akaba barhali bashinganyanya. Chiro akaba rhwajirire amagosa, anagenderera kuba mwira werhu arhanarhuyunvira oburhe. (Zb. 103:9) Rhugwerhe shukrani nene bwenene okubona gurhe Yehova anarhubabalira, nerhu rhukwanene kumuyiganya omu kubabalira abandi! (Efe. 4:32–5:1) Rhuyibuke ok’okuntu obuzinda buli bwayegera, rhukwanene kuyorha haguma na bene-berhu na bali-berhu. Rhwakachizera okw’ebigeregezo byagenderera kuluga. Mango maguma rhwakachibugana omu pirizo eju y’obwemere bwerhu. Amango ebyola byamarhuhikira, rhwakakenera bene-berhu na bali-berhu bwenene kulusha.​—Mez. 17:17. w24.03 buk. 15-16 chi. 6-7

Ebiblia ederhere oku misole yaliyegerere Yehova, yaliyemererwe naye, yanagwarha obusiime omu kalamo. Daudi ali muguma mubo. Amango aliri musole, achishoga kuba mwira wa Mungu, nabuzinda aba mwami mwimana. (1 Fa. 3:6; 9:4, 5; 14:8) Amango wamayiga oku bilolere Daudi, omufano gwage gwa kuheba omurhima okolere Yehova oku bwimana. Changwa wakayiga binene oku bilolere omufano gwa Marko changwa ogwa Timoteo. Wabona kubarhonderaga kukolera Yehova amango bali chili misole bwenene, banagenderera kumukolera oku bwimana. Esimikiro yabo y’okukolera Yehova ya musimisa, nabo yabalerhera obusiime. Okuntu oli wakolesa akalamo kawe zene, kwayerekana okuntu akalamo kawe nji kaba omu mango mayinjire. Nk’olangalire Yehova ahali h’okuchilangalira woyo wenyine, akurhabala orhole esimikiro z’obwengehe. Watosheka, n’okugwarha akalamo kali m’obusiime. Oyibuke oku Yehova anasimiswa n’eby’oli wamukolera. Nta yindi njira nyinja wakakolesa mw’akalamo kawe kulusha okukolera Darha w’obuzigire Yehova. w23.09 buk. 13 chi. 18-19

Entumwa Paulo alimenyere oku bene-babo na bali-babo b’Abakristu barhali bashinganyanya. Omufano, baguma b’omu chibaga che Yerusalemu baliri bayubaha Paulo. (Mdo. 9:26) Buzinda, bantu baguma mubo bamuderha kubi yibamuharabisiza erenge. (2 Ko. 10:10) Paulo alibwene omushamuka oli warhola esimikiro zibi, nkabaga zakarhumire abandi baleka echibaga. (Gal. 2:11, 12) Na muguma omu bera b’okumurhima ba Paulo yekala Marko, alimuvunire omurhima bwenene. (Mdo. 15:37, 38) Paulo akalekere nguma mw’ezola hali yarhuma aleka kugeza ebisanzi haguma n’abola bamugosezaga. Aliko, agenderera kuyereka bene-babo na bali-babo obuzigire, anagenderera kukolera Yehova oku bwimana. Bichi byarhabalaga Paulo kulembera? Paulo alizigire bene-babo na bali-babo. Obuzigire Paulo aligwerhe oku bandi, bwalimushunikire amenye achiseza oku kurhashinganana kw’abandi, aliko achiseze oku ngeso zabo zinja. Kandi, obuzigire bwalirhabere Paulo ajire ecchintu chishambarwe omu lwandiko lwa zene. w24.03 buk. 15 chi. 4-5

Ebiblia egwerhe ngani zinene ziyerekene akamaro k’obwirhonzi. Rhuganire oku mufano gwa Isaka. Amango ahamiraga omu chihugo che Palestine, omu Gerari, abaturanyi bage bamuyunvira obongwa, bayinja bachukira ebishimu by’amenji abakozi b’eshe bachokolaga. Ahali h’okubalwisa y’abanyaga (kunyega) ebishimu byage, Isaka agenda n’omulala gwage hale n’abola baturanyi bage baligwerhe obongwa aja kuchokola ebindi bishimu. (Mwa. 26:12-18) Aliko emunda ahamiraga, Abafilistini nabo baderha mpw’ebishumu achokwere bili byabo. Chiro akaba oku ebyola byoshi byaliri byamuhikira, Isaka aliri achihangana kujira omurhula. (Mwa. 26:19-25) Bichi byamurhabalaga agenderere kubera mwirhonzi chiro akaba oku abandi baliri bachihangana kumuhambarira? Kweri, alilolereze bwinja omufano gw’abazere bage. Aliyigire binene kugerera ebijiro by’omurhula by’Abrahamu, “n’omurhima gurhulerere g’obwirhonzi” gwa Sara.​—1 Pe. 3:4-6; Mwa. 21:22-34. w23.09 buk. 15 chi. 4

Yehova, arhuma oku buzigire Omugala murhanzi oku gulu, kuyigiriza abantu boshi oku bilolere Obwami, n’okuhaana akalamo kage nka nchungu yarhuyokola omu chaha n’omu lufu. Yehova afuula Yesu arhegeke omu mbingu nka Mwami w’Obwami bwa Mungu. Erhwe likulu lye Biblia liderhere oku, ezino lyage limenyeswe oku anali ayeneza omuhigo gwage oku bilolere egulu kugerera Obwami bwage buli bwarhegekwa na Kristu. Omuhigo gwa Yehova gurhakahindamuka. Alaganyize oku byoshi nji byayenera bwinja-bwinja nko kw’anaderhere. (Isa. 46:10, 11, amahugulo m’eshishi; Ebr. 6:17, 18) Egulu nji lyaba paradizo, ah’oluburho lwa Adamu na Eva lushinganyanya lw’abanyakunali nji lwa “simiira akalamo esiku n’amango.” (Zb. 22:26) Aliko arhali ebyola byonyine bi Yehova nj’ayeneza. Kandi, nj’aheba abakozi bage omu buguma omu mbingu n’okugulu. Naho boshi omu mahanga nji bakenga oku bwimana Yehova nka Murhegesi wabo. (Efe. 1:8-11) Kweri, orhasomezwe n’enjira esimisize Yehova anayeneza m’omuhigo gwage si? w23.10 buk. 20 chi. 7-8

Amango Abayudi barhengaga e Babiloni bagera e Yerusalemu, buzira kulegama bahwanza kuhurana n’ebibazo by’okuhahira emilala yabo. Kandi haliri akavulindi omu burhegesi bwe Perse n’obupinzani kurhenga oku mashanja malibazungulukire. Baguma mubo babona oku bikomere okushuba kuyumbakira Yehova ehekalu, echintu chaliri ch’akamaro bwenene omu kalamo kabo. Nantyo, Yehova arhuma balebi babiri, Hagai na Zekaria, barhabale abantu bashube bagwarhe obushiru. (Hag. 1:1; Zek. 1:1) Aliko, hofi myaka 50 enyuma waho, Abayahudi bali kenere kushuba kuhebwa omurhima. Ezra, walikomere ku koporora (kukopye) Esheriya, arhenga e Babiloni kuja e Yerusalemu kuheba omurhima olubaga lwa Mungu yibaheba obuharamye b’okuli oku nafasi y’oburhanzi omu kalamo kabo. (Ezr. 7:1, 6) Kuguma n’oku obulebi bwa Hagai na Zekaria bwarhabalaga olubaga lwa Mungu omu mango mageraga yibagenderera kulangalira Yehova amango m’obupinzani, nerhu bwakarhuma rhwalangalira oku Yehova arhurhabala chiro akaba ebibazo rhuli rhwahurana omu kalamo kerhu.​—Mez. 22:19. w23.11 buk. 14-15 chi. 2-3

Gurhe rhwakajira yirhuyerekana oku rhugwerhe obuzigire ku bene-berhu na bali-berhu? Njira nguma y’okujira ntyo, kuli kubaha echirhulirizo. Rhwagala “kugenderera kurhulirizana buli muguma n’owindi” akaba rhugwerheneko akababaro. (1 Te. 4:18) Gurhe rhwakagenderera kukomeza obuzigire bwerhu ku buli muguma n’owindi? Omu kubabalira amagosa ma bene-berhu na bali-berhu chiro akaba bikomere kujira ntyo. Bulagurhe bili by’akamo bwenene zene kuyerekana obuzigire bwerhu ku buli muguma n’owindi? Lola empanvu Petro ahanaga: “Obuzinda bw’ebintu byoshi buli hofi. Bobola, . . . mugwarhaneko obuzigire bukomere buli muguma n’owindi.” (1 Pe. 4:7, 8) Ok’obuzinda bwa linola gulu libi buli bwayegera, bichi rhwakalangalira? Yesu abwira abanafunzi bage ntya: “Amashanja moshi nji mabashomba eju y’ezino lyani.” (Mt. 24:9) Yirhugendereza obwimana bwerhu ku Yehova chiro akaba rhushomberwe, rhukenere kuyorha omu buguma. Byoshi Shetani y’ajira y’ashanda obuguma bwerhu byafa busha, akaba rhugwerhe obuzigire ku bene-berhu na bali-berhu.​—Flp. 2:1, 2. w23.11 buk. 13 chi. 18-19

Obukweri b’omu Chinwa cha Mungu bujira misi minene bwenene. Omu kuyigiriza abantu oku bilolere Yehova n’okuntu aba, kweri rhunabona echintu chinja bwenene. Abantu barhachigenderera kubera mpumi changwa kugenderera kurhebekwa na Shetani, kandi bakola bakarhondera kubona engeso zinja za Darha werhu. Banagwarha obuba eyibayunva emisi ya Mungu erhagwerhe mipaka. (Isa. 40:26) Yibayiga kumulangalira eju y’ehaki yage eshinganene. (Kum. 32:4) Yibayiga bwenene oku bilolere obwengehe bwage bunene. (Isa. 55:9; Ro. 11:33) Kandi banayunva barhulirizwe eyi bamenya oku Mungu buba buzigire. (1 Yo. 4:8) Naho eyi baba bamayegera Yehova, obulangalire bwabo b’okulama esiku n’amango nka bana ba Mungu bwanakomera bwenene. Luli lukengo lunene rhugwerhe l’okurhabala abantu bayegere Darha! Amango rhwamajira ntyo, Yehova anarhubona oku rhuli “bakozi haguma naye.”​—1 Ko. 3:5. w24.02 buk. 12 chi. 15

Akaba oli wayiga Ebiblia changwa oli w’omu mulala gw’Abahamirizi ba Yehova, oli wawaza gurhe nawe wakabatizwa si? Ogola guli muhigo gwinja bwenene! Embere obatizwe bihemere orhange ochihane emwa Yehova. Nka gurhe wakachihana emwa Yehova? Kuli kulaganya Yehova omu sala oku wamuharamya yewe yenyine n’oku waheba obulonza bwage oku nafasi y’oburhanzi omu kalamo kawe. Naho, wanalaganya Yehova oku wagenderera kumuzigira “n’omurhima gwawe goshi, nʼobugumaguma bwawe boshi, n’obwenge bwawe boshi n’emisi yawe yoshi.” (Mk. 12:30) Amango wamachihana emwa Yehova nta windi muntu obaho, mwaba mwembi Yehova mwenyine. Aliko, obubatizo bowe onabujira embere z’abantu banene; wanayereka abandi oku wachihanire emwa Yehova. Okuchihana kwawe emwa Yehova chirhali chilagane cha ntyantya, omuhigo gwawe gukwanene kuba gokugenderera kuyeneza echola chilagane na ntyo ku Yehova alonzeze ojirage.​—Muh. 5:4. w24.03 buk. 2 chi. 2; buk. 3 chi. 5

Buli bunyumpa bujira ebibazo. Ebiblia ederhere bwinja bwinja okw’abashabene bagwarha “amalibuko omu mubiri gwabo.” (1 Ko. 7:28) Bulagurhe? Bulala omulume n’omukazi barhashinganene, barhanagwerhe engeso zili kuguma barhanasiima ebintu biguma. Abashabene bakaba eyi bakuliraga omu fasi n’emicho elengene. Nkabaga okw’ebisanzi yibyanagera bakahwanza kuyerekana ngeso ziguma barhaliri bayerekana amango barhaliza kushabana. Chiguma mw’ebyola chakalerha ebibazo. Nkabaga bakahwanza kuhesanya amagosa buli muguma n’owindi eju y’ebibazo byarhengerere omu bunyumpa, chiro akaba oku bombi banajira amagosa banalikwanene kuyikala n’okumala ebyola bibazo. Chiro bakanawaza oku balekane changwa bashande obuhya. Aliko si, okulekana changwa okushanda obuhya kokwamala ebibazo byabo? Nanga. Yehova alonzeze omulume n’omukazi bagenderere kulama haguma chiro akaba muguma akabona oku bikomere kulama n’owabo. w24.03 buk. 16 chi. 8; buk. 17 chi. 11

Enyuma y’okuchihaana emwa Yehova n’okubatizwa, obulangalire bwawe b’okulama esiku n’amango omu paradizo oku gulu bwagenderera kukula amango oli wagenderera kuyiga binene n’okuba Mukristu okulire ekiroho. (Ebr. 5:13–6:1) Nkabaga wakaba eyi wagerere omu hali eli kuguma n’ebiyandikirwe omu Waroma 5:2-4. Nkabaga wakaba eyi wahurene n’ebigeregezo bilengene, aliko wabilembera na Yehova akuyereka oku achivugire woyo. Bulala omenyere oku Yehova akuzigiire, anasimisizwe nawe, zene okala ogwerhe mpanvu zinene kulusha mira z’okulangalira eby’alaganyize. Obulangalire bwawe bwagenderere kukomera kulusha oku byaliri burhanzi. Omenyere oku ebyola nji byayenera. Obola bulangalire bwawe bwabere b’okuli kweri kweri. Onakola osimisiizwe nabo bwenene, bunakuhumire oku murhima bwenene. Buhumire kubuli chigabi ch’akalamo kawe, bunahindamula okuntu onakolera omulala gwawe, okuntu onarhola esimikiro, na chiro okuntu onakolesa ebisanzi byawe. Entumwa Paulo ayongerere echindi chintu ch’akamaro oku bilolere obulangalire wagwarhire enyuma y’okumala kuyemerwa na Mungu. Akurhabere ochizere okw’ebyolangalire byayenera.​—Ro. 15:13. w23.12 buk. 12-13 chi. 16-19

Amango rhwamahurana echigeregezo chikomere, okuntu rhulirhwachiyunva, enkengero zerhu, birhakachiba nk’okubirhula biba. Rhwakayunva nk’obwenge bwerhu buli bwahehwa eju y’okuntu rhuli rhwachiyunva. Gurhe Yehova anarhurhabala amango rhwamahurana n’ehali zili nk’ezola? Arhulaganyize okw’arhurhuliriza. Amango hali omulaba omu nyanja, echombo chakaba omu buhanya chanarhondera kuja eyi n’eyi. Byombo binene bijira emigara y’echuma omu mbavu enabirhabala bimenye byaja eyi n’eyi. Abantu bali mw’echola chombo bakachiyunva bali omu bulanzi n’olungenzi lwabo lwaba lwinja. Eyola migara enakola bwinja amango echombo chili chagenda. Intyo kon’oko, Yehova anarhurhuleza nerhu amango rhugenderere kumuharamya oku bwimana omu bihe bikomere. w24.01 buk. 22 chi. 7-8

Amango ogwerhe obuba, ochibaze ntya: ‘Bichi Yehova ajirire?’ Owaze oku bintu alemere. Omufano, amango ‘rhamalolereza bwinja’ okuntu Yehova anashishikala enyunyi n’amauwa, chiro akaba oku birhagwerhe obuhashe b’okuyerekana engeso za Mungu birhakanamuharamya, rhwachizera oku nerhu arhushshikala. (Mt. 6:25-32) Waza kandi oku bi Yehova ajirire balala banamuharamya. Wakayiga oku bilolere mufano muguma g’omuntu oganirirwe omu Biblia waliyerekene obwemere busomeze, changwa wakasoma oku bilolere omufano gwa mukozi muguma wa Yehova wa mu manola mango. Omu kuyongera, owaze oku bintu Yehova akukolere. Gurhe Yehova akurhabere y’ohikira kumumenya? (Yoh. 6:44) Gurhe ashubize oku masala mawe? (1 Yo. 5:14) Gurhe onayunguka buli lusiku n’enterekero y’Omugala muzigirwa?​—Efe. 1:7; Ebr. 4:14-16. w24.01 buk. 4 chi. 6; buk. 7 chi. 17