Mwezi gwa 2

Mwene-wehu oli wayerekana engeso ze Chikristu akarhabala echibaga bwenene. Omuntu “w’olugero” anagendereza omurhula. Akaba olonzeze kuba muntu w’olugero, oyunvirize abandi onabe tayari kuyemera amawazo mabo. Amango oli n’abandi oba tayari kuyemera amawazo mabo nka nta sheriya changwa akanuni ke Biblia bavunire? Orhaseza abandi bayemere amawazo mawe. Osimiswe n’akamaro k’abahanuzi banene. (Mwa. 13:8, 9; Mez. 15:22) Ahali h’okuba mukali changwa orhayemera amawazo m’abandi, obe mwirhonzi. Nka muntu onalonza omurhula, ojire okwawe koshi y’olerha omurhula haguma n’abandi chiro akaba bikomere kujira ntyo. (Yak. 3:17, 18) Ebinwa byawe binja byakarhuleza abandi, kuhebamo na balala banarhupinga.​—Amu. 8:1-3; Mez. 25:15; Mt. 5:23, 24. w24.11 buk. 23 chi. 13

Chiro akaba oku Yesu alihanire akalamo kage “liguma na liguma amango moshi,” achigenderere kurhujirira bintu binene. (Ro. 6:10) Bintu bihe ebyola? Agenderere kukola y’arhuhereza bintu binene binja bwenene rhwakapata kugerera enchungu. Lola eby’ali akola. Yakola nka Mwami werhu, Mudahwa werhu Mukulu, na rhwe ly’echibaga. (1 Ko. 15:25; Efe. 5:23; Ebr. 2:17) Ayumangiire akasi k’okugusha abashigwa n’echigusho chinene, akola kasi nji kahwa embere amalibuko makulu mahwe. (Mt. 25:32) Kandi y’arhabala omuja mwimana onakengukire y’agenderera kurhuhereza ebirhulagirire yi rhukolera Yehova oku bwimana mu zinola siku z’obuzinda. (Mt. 24:45) N’omu mango m’Oburhegesi bwage bwa myaka Chihumbi, nj’agenderera kurhuhereza ebirhukenere. Kweri Yehova ahanire Omugala eju yerhu! w25.01 buk. 24 chi. 12

Amango Yehova amababalira, anababalira loshi-loshi na buzira kushuba kuyibuka. Echola chinarhuma rhwagwarha obwira bukomere haguma na Darha w’embingu eyi rhunayibukire k’obubabale b’okuli eli mpano. Obubabale bunarhengerera oku buzigire n’olukogo lwa Yehova rhurhalikwanene anayereka abanya-byaha. Erhali mpu haki abantu bakahema. Buli muguma werhu akwanene kugwarha eshukrani emwa Yehova Mungu “w’obubabale b’okuli”! (Zb. 130:4; Ro. 4:8) Aliko, obubabale bwerhu buyimangire ku chintu chilebe ch’akamaro. Yesu alifasiriye ntya: “Akaba murhababalire abantu amagosa mabo, Darha naye arhabababalira amagosa menyu.” (Mt. 6:14,15) Bobola, rhukwanene kuyiganya Yehova n’okubabalira abandi. w25.02 buk. 13 chi. 18-19

Waza oku bilolere abantu Yehova alimbulaga omu Sodoma ne Gomora. Omunyakunali oyirikirwe Loti alilamire haguma n’abola bantu. Aliko si rhwakamenya akaba Loti alihubirire bantu banene mubo? Nanga. Baliri bantu babi, aliko si, buli muntu alimenyere echinja n’echibi? Bibonekene oku arhali ntyo ku byaliri, aliko oyibuke okw’echigusho ch’abalume ba mw’eyola vile balilonzeze kufarhira emisi abageni ba Loti. Ebiblia ederhere oku mw’echola chigusho ch’abantu mwaliri “abarhabana kuhika oku bashaja.” (Mwa. 19:4; 2 Pe. 2:7) Rhwakaderha si kweri, oku Yehova Mungu w’obonjo achishogere oku ntaye n’omuguma mw’abola bantu nji wafuuka si? Nanga rhurhakaderha ntyo. Buli bukweri oku Yehova alibwirire Abrahamu oku nta banyakunali ekumi bali mw’eyola vile. (Mwa. 18:32) Bolola, barhaliri banyakunali, na Yehova aligwerhe ehaki y’okubalimbula eju y’ebijiro byabo. Aliko si kweri, rhwakaderha oku ntaye n’omuguma mubo si “nji wafuuka . . . omu bufuuke bw’abarhali banyakunali”? Nanga, rhurhakaderha ntyo! w24.05 buk. 2 chi. 3; buk. 3 chi. 8

Eju y’ehali z’okubula efuranga, baguma bahikire ahabayemera akasi kabahema baje hale n’omulala gwabo, aliko amango moshi byabonekene okw’erhaba simikiro y’obwengehe. Embere oyemere akasi, orhawazaga oku furanga zingana wayinja wapata hoshaho s’owaze n’oku by’ekiroho wakaheza. (Lu. 14:28) Ochibaze ntya: ‘Bichi byakahikira obuhya bwani nka njire hale na mukani changwa bani? Nagala kugenderera kuja oku mbuganano, impubiri, inangeze ebisanzi haguma na bene-berhu na bali-berhu si?’ Akaba oherhe abana, bihemere wanachibaza kandi ntya: ‘Gurhe nalemba abana bani “omu nyigirizo n’enyibuso za Yehova” nobo ntali haguma nabo?’ (Efe. 6:4) Amango oli warhola esimikiro, okulikire obwerekezi bwa Yehova s’arhali obwa bera bawe changwa abantu b’omulala barhakenga amakanuni me Biblia. w25.03 buk. 29 chi. 12

Biba biyorohere okurhebeka Omukristu orhakulire ekiroho, anarhebekwa “n’amayeri” omu kuyemera emyazi y’obubeshi baderhere, emyazi yaba mpu mpu n’engani z’obubeshi z’oku Enterenete, changwa akarhebekwa n’emyazi y’ebigamba by’obwemere. Akayunvira abandi obongwa n’okurhayunvikana nabo, changwa akahwanza kukwazikira busha n’ahanene akajira ebintu bibi amango amageregezwa. (1 Ko. 3:3) Amandiko mahuzenye okukula kw’ekiroho n’okuntu omwana anagenda akula kugera ahabera muntu mukulu. (Efe. 4:15) Hali bintu binene omwana arhaba amenyere anaba akenere omuntu w’okumuyerekeza. Omufano, omuzere w’omukazi akabwira omwali mudorho, amufarhe efune embere bayambuke ebarabara. Aliko, ok’oyola mwana yanakula, haly’amango nyina akahwanza kumuleka ayambuke yenyine, aliko anamuyibusa okw’embere y’okuyambuka, agende alola eyi n’eyi. Amango amaba muntu mukulu, akanamenya gurhe akachilanga obuhanya bwakarhengerera. Konakuguma, amango Abakristu bakulire ekiroho bamarhola esimikiro, banarhanga kuwaza bwenene bichi Ebiblia ederhere yibagala kumenya bichi Yehova awazize, na buzinda banakolesa ebi bayigaga. w24.04 buk. 3 chi. 5-6

Hagerere myaka minene, ey’abageni ba Yehova baba balala bonyine balamire naye embingu. Buzinda alema abantu oku gulu yi nabo baba bageni bage. Baguma mw’abola bageni bage haliri Enoke, Nowa, Abrahamu na Yobu. Ebiblia eyerekene oku baliri bera ba Yehova bulala balimukengere. (Mwa. 5:24; 6:9; Yob. 29:4; Isa. 41:8) Mu myaka minene, Yehova agenderere kuhamagala bera-bage babe bageni bage. (Eze. 37:26, 27) Omufano, obulebi bwa Ezekieli burhubwirire oku Mungu alonzeze abakozi bage banamuharamya bagwarhe obwira bukomere haguma naye. Alaganyize okw’ajira “endagano y’omurhula haguma nabo.” Obola bulebi buyerekene akasanzi amango balala bagwerhe obulangalire b’okulama embingu n’abaherhe obulangalire b’okulama esiku n’amango oku gulu, nji bahebwa omu buguma omu hema lyage ly’omufano nka “chishumba chiguma.” (Yoh. 10:16) Akola kasanzi kakano rhulamiremo! w24.06 buk. 2 chi. 2, 4; buk. 3 chi. 5

Rhwabo nka bakozi ba Yehova rhunashigikira n’omurhima gwerhu goshi Obwami bwa Mungu, aliko ahanene rhukenere obushiru yirhugala kujira ntyo. (Mt. 6:33) Omufano, mu linola gulu libi birhuhemere rhugwarhe obushiru yirhulama nk’okw’amakanuni ma Yehova maderhere n’okuhubiri emyazi minja y’Obwami. Kandi, byarhuhema rhugwarhe obushiru yirhurhachiheba oku lunda lulebe oku bilolere eby’epolitike mu linola gulu liri mw’akalaba. (Yoh. 18:36) Banene omu bakozi ba Yehova bali balibuka eju y’okubula efuranga, okulibuzwa, okushwekwa omu pirizo eju y’okulahira kuba oku lunda lulebe oku bilolere eby’epolitike changwa okurhaja omu makasi m’echisoda. Rhunagwarha emisi n’obushiru amango rhwamayiga oku bilolere emifano ya balala baliyerekene obushiru omu kushigikira oburhegesi bwa Yehova. Omwami werhu Yesu Kristu alilahire loshi-loshi kuba chigabi ch’epolitike ya linola gulu lya Shetani, amango aliri hanola oku gulu. (Mt. 4:8-11; Yoh. 6:14, 15) Amango moshi alilangalire Yehova y’amuhereza emisi. w24.07 buk. 3 chi. 4; buk. 4 chi. 7

Yehova ayandikisize eyola ngani egayisize oku nyungu yerhu. Echola chinarhurhabala rhumenye bulagurhe anashomba echaha. Echaha chinarhuharabisiza obwira bwerhu haguma na Yehova n’okurhuheka ewa lufu. (Isa. 59:2) Shetani anashomba Yehova n’abantu. Echola che charhumaga arhebeka Adamu na Eva bajire echaha, na zene agenderere kurhebeka abantu. Bobola amango Adamu na Eva bajira echaha, nkabaga Shetani aliwazize okw’aharabisize omupango gwa Yehova oku bantu. Aliko arhalimenyere kangana gurhe Yehova ali bazigire. Mungu arhahindamulaga habanakatyu omupango gwage okubilolere oluburho lwa Adamu na Eva. Bulala abazigire boshi, av’abaha ahola hanaho obulangalire. (Ro. 8:20, 21) Yehova alimenyere oku baguma m’olola luburho bakachishogere kumuzigira n’okulonza oburhabale bwage yi balwisa echaha. Yehova ajirire okuntu bigalikane y’abola bantu bamuyegera n’okuyokolwa omu chaha. w24.08 buk. 3 chi. 3-4

Banene omu bakozi ba Yehova bagwerhe binene by’okukola omu kalamo. Rhunakola amakasi merhu m’omubiri yi rhushishikala emilala yerhu. (1 Ti. 5:8) Bakristu banene banashishikala abalwala changwa abashajire b’omu milala yabo. Kandi rhweshi rhukenere kushishikala amagala merhu, n’echola chinahema ebisanzi. Omu kuyongera, rhugwerhe amakasi m’okukola omu chibaga. Akasi k’akamaro bwenene rhugwerhe, kuli kujira okwerhu koshi yi rhuhubiri emyazi minja. Okusoma e Bibliya chili chiguma omu “bintu by’akamaro” bwenene ku rhwewe nka Bakristu. Che chirhumire rhukwanene kuheba obusomi bwerhu bwe Bibliya oku fasi y’oburhanzi. Ezaburi y’oburhanzi ederhere ntya oku bilolere omuntu ogwerhe obusime: “Anasimiswa n’erhegeko lya Yehova, kandi analisoma n’omulenge gw’eshishi ezuba n’ebudufu.” (Zb. 1:1, 2) Kweri, bibonekene oku birhuhemere rhugeze ebisanzi eyi rhuli rhwasoma e Bibliya. Kasanzi kahe kakaba kenja k’okusoma e Bibliya? Nkabaga buli muguma akaba agwerhe echage chishubizo. Aliko ech’akamaro kuli kuchishoga akasanzi kakarhurhabala kuyisoma oku kahunda. w24.09 buk. 3 chi. 5-6

Rhwakaderha ok’Omukristu okulire ekiroho arhabakenere oburhabale bw’abandi si? Nanga. Hali amango Abakristu bakulire ekiroho nabo baba bakenere oburhabale. Omukristu orhakulire ekiroho akalonza okw’abandi bamubwire bichi ajirage changwa bamurholere esimikiro alikwanene arhole yenyine. S’aliko omuntu okulire ekiroho yewe, amango amahema oburhabale oku bandi bagwerhe obwengehe banagerere mu binene, ab’amenyere bwinja bwinja okw’engabane y’okurhola esimikiro, eli yage yewe yenyine bulala amenyere bwinja oku nj’aheka “omuzigo gwage yenyine.” Nk’okw’abantu bakulire boshi barhaba kuguma, ku n’Abakristu bakulire ekiroho nabo barhajira engeso zili kuguma. Omufano, hali echihe baguma bakaba bengehe bwenene, abandi eyibagwerhe obushiru bwenene, hali n’abandi nabo banahaana bwenene, n’abandi bakaba eyi bajira akababaro kanene bwenene. Omu kuyongera, Bakristu babiri bakulire ekiroho bakaba yibahurana ehali zili kuguma, hali amango bakarhola esimikiro zirhali kuguma aliko ey’ezola sikimiro zombi zipatene n’amakanuni me Biblia. Ahanene ebyola binabonekana amango Abakristu bamarhola esimikiro ziyumangire oku zamiri zabo. Che chirhumire barhakwanene kuchirana olubanja amango esimikiro zabo zirhali kuguma. Aliko, banachihangana yi bagenderera kubera omu buguma.​—Ro. 14:10; 1 Ko. 1:10. w24.04 buk. 4 chi. 7-8

Gurhe wakajira akaba buli mango onachiyunva oku ntacho omalire? Osome n’okukengera oku mandiko me Biblia makakurhabala ochizere ok’oli w’akamaro omu masu ma Yehova. Orhachihuzanyaga n’abandi, orhanachihandaga oku by’orhakagala kujira. Yehova arhalonzeze ok’ojire ebirhalukire obuhashe bwawe. (Zb. 103:13, 14) Akaba hali omuntu wachigerere kukukolera kubi bwenene, orhachivumagulaga oku liri gosa lyawe! Oyibuke oku Yehova nj’achira olubanja balala banakolera abandi kubi, aliko anarhabala balala bakolerwe kubi. (1 Pe. 3:12) Orhagwarhaga engangane oku Yehova akakukolesa omu kurhabala abandi. Akuhere olukengo l’okukola haguma naye omu kasi k’okuhubiri. (1 Ko. 3:9) Nkabaga eju y’ebibazo bikomere wagereremo omu kalamo, byakakuyorohera kuyunva gurhe abali balibuka bali bachiyunva. Wakajira binene y’obarhabala. w24.10 buk. 7-8 chi. 6-7

Yehova abalonzeze rhukolerwe bwinja, n’amango abandi bamarhukolera kubi anaba ey’ali abona. “Yehova asima ehaki.” (Zb. 37:28) Yesu arhuyemezeze oku Yehova nj’ajira “okuntu ehaki ekolwe . . . juba juba” omu kasanzi kakwanene. Na hanola hofi akula amabi moshi rhwahurene, nj’anamala n’okukolerwa kubi koshi barhujirire. (Zb. 72:1, 2) Okurhunali rhwalinga akasanzi ehaki yabaho, Yehova arhurhabala rhulwise okukolerwa kubi. (2 Pe. 3:13) Anarhuyigiriza gurhe rhwakayaka bibazo binene amango bamarhukolera kubi. Kugerera Omugala, Yehova arhuhere omufano gushinganene gwakarhuyereka gurhe rhwakajira amango rhwamakolerwa kubi. Yehova anarhuhereza n’ehano lye Biblia rhwakakolesa amango rhuli rhwakolerwa kubi. w24.11 buk. 2-3 chi. 3-4

Okuderha ku Yesu alise bantu kamama chaliri chibazo bulala haliri hofi balume bahikire ku 5000. Na kuhebamo abakazi n’abana, balikwanene kuhereza bantu bahikire ku 15 000 ebilyo. (Mt. 14:21) Andreya aderha ntya: “Hanola hali omwana w’oburhabana ogwerhe migati erhano na bufi bubiri. Aliko si ebila byakayenera abala bantu bangan’aha?” (Yoh. 6:9) Abakene n’abandi bantu babagendaga bazigana kulya emigati y’eshayiri n’obufi bugekegeke buyumire buli m’omunyu. Aliko ebilyo oyola mwana w’oburhabana aligwerhe birhakatosheze bantu bangan’aho! Omu kulonza kuyereka abola bantu kamama engeso y’okuhana, Yesu abwira abola bantu bayikale bigusho-bigusho omu byasi. (Mk. 6:39, 40; Yoh. 6:11-13) Naho Yesu asalira omu kubwira Eshe koko kw’eyola migati n’ezola fi. Omu kujira ntyo ayerekana oku Mungu y’eshoko y’ebyokulya n’okwagwerhe eshukrani kw’ebyola bilyo. Kuli kw’akamaro okuyiga omufano gwa Yesu omu kusalira embere rhulye. Naho Yesu agabira abola bantu ebyola bilyo, balya bayugurha n’ebindi byasigala eby’arhalonzaga oku bife busha. w24.12 buk. 2-3 chi. 3-4

Amango Yesu aliri oku gulu, alikuzize Eshe omu kumenya oku y’Eshoko y’ebisomerene byage. (Mk. 5:18-20) Kandi Yesu alikuzize Yehova omu kuntu aliri aderha okubilolere Eshe n’omu kuntu aliri akolera abandi. Mango maguma Yesu aliri ayigiriza omu sinagogi. Omu baliri bamuyunviriza haliri omukazi wali wamamala myaka 18 eyagwerhe abazimu. Abazimu bali bagonyeze omubiri gwage kabiri omukuntu arhakachigalire kuyinamuka. Yesu abona ok’oyola mukazi y’alibuka bwenene analilonzeze kumurhabala. Naho amuyegera, aganira naye omu njira y’obwirhonzi amubwira ntya: “Mukazi, wamafuma obulwala bwawe.” Naho amuheba kw’efune av’ayinamuka hon’aho, “arhondera kukuza Mungu,” amagala mage n’olukengo lwage byagaluka bwinja bwinja! (Lu. 13:10-13) Oyola mukazi aligwerhe empanvu nyinja y’okuha Yehova obukuze, nerhu ntyo kurhukwanene kujira. w25.01 buk. 2-3 chi. 3-4

Oku buhashe bwerhu, rhurhakagala kugalula byoshi Adamu na Eva bahezeze. (Zb. 49:7-9) Buzira burhabale, rhurhakagwarhire obulangalire bw’akalamo k’amango mayinjire changwa obufuke. Omu hali eli nk’eyola, olufu lwerhu lwakabere kuguma n’olw’enyama. (Muh. 3:19; 2 Pe. 2:12) Darha w’obuzigire Yehova, arhuhere empano yalipire edeni ly’echaha rhwashokwere ku Adamu. Yesu alifasiriye echola ntya: “Mungu alizigire egulu bwenene, ahana Mugala wage w’echinege, yi buli muguma wayerekana obwemere muye, arhaharabiswaga s’aliko apate akalamo k’esiku n’amango.” (Yoh. 3:16) Kandi eyola mpano yarhumire byagalikana rhugwarhe obwira bukomere haguma na Yehova. Rhwakayunguka n’olola luhembo lusomeze n’okupata obubabale bw’ebyaha changwa bwe deni lyerhu. w25.02 buk. 3 chi. 3-6

Bichi byarhabalaga Sauli abatizwe? Amango Waliha Yesu wakuzizwe amurhengerera, Sauli ahuma. (Mdo. 9:3-9) Amala siku 3 buzira kulya. Byakanashobokana kw’agola mango aliwazize bwenene oku byamuhikiraga. Kweri Sauli azinda ey’ayemerere oku Yesu ye Masiya n’oku Abanafunzi bage bali omu dini ly’okuli. Hali binene rhwakayiga kugerera omufano gwa Sauli. Akayemerere echiburi changwa okuyubaha abantu byamubuza kubatizwa. Aliko arhayemeraga byaba ntyo. Sauli ayemera aba Mukristu chiro akaba oku alimenyere k’okujira ntyo kwakarhumire bamulibuza. (Mdo. 9:15, 16; 20:22, 23) Amalire kubatizwa, agenderera kulangalira oku Yehova amurhabala ahime bibazo binene. (2 Ko. 4:7-10) Amango wamabatizwa n’okuba Muhamirizi wa Yehova wakahurana n’ebibazo binene by’okugeregeza obwemere bwawe, aliko wapata oburhabale. Wakachizera kw’amango moshi, Mungu na Kristu bakuhereza oburhabale okenere y’ogala kulembera n’okuyorha mwimana.​—Flp. 4:13. w25.03 buk. 4 chi. 8-9

Okusoma e Bibliya guli muhigo gwinja rhwakachihangana kuguhikira. Aliko, olekere okusoma e Bibliya konyine, hali ebindi rhukwanene kujira akaba rhulonzeze kupata enyungu. Ba nka wawaza kw’eyila hali: Emirhi eba ekenere amenji y’ekula. Aliko envula nene ekala yarhoga mu bisanzi bigeke obudaka bwakapata menji manene bwenene. Amango ebyola byamahika, envula nene erhakachiba ey’egwerhe akamaro. Obudaka buba bukenere bichanji binene yi bukulula amenji m’envula marhabale emirhi ekule. Intyo kon’oko, rhurhakwanene kusoma e Bibliya juba juba, bulala echola chakarhuma rhurhabona ebisanzi by’okukengera oku birhwasomere, oku biyibuka n’okubikolesa. (Yak. 1:24) Hali amango wachigerere kubona ok’oli wasoma e Bibliya juba juba si? Gurhe wakajira? Osome kubuyabuya. Ochihangane owaze oku by’oli wasoma changwa oku biwamalire kusoma. Wakarhola bisanzi binene by’okuyiga wanaja waheba mu n’ebisanzi by’okuwaza changwa kukengera oku biwayigire. w24.09 buk. 4 chi. 7-9

Amango olubaga lwerhu lwamaha abashamuka obwerekezi, bihemere babusome bwinja-bwinja n’okujira okwabo koshi yi babukolesa. Banapata obwerekezi arhali okuntu bakageza bigabi bilebe by’embuganano changwa okuntu bakasalirira echibaga konyine, si n’okuntu bakashishikala entama za Kristu. Amango abashamuka bamakolesa obwerekezi boshi bahabirwe n’olubaga, bene-babo na bali-babo bachiyunva oku Yehova abazigire n’okw’anali abashishikala. Amango rhwamapata obwerekezi burhengere oku bashamuka b’echibaga, rhukwanene kubukulikira oku bulonza. Omu kujira ntyo, akasi kayorohera abola bali barhuyerekeza. Ebiblia erhuhebere omurhima rhukenge balala bali barhuyerekeza rhunachichimye. (Ebr. 13:7, 17) Mango maguma byakarhukomerera kujira ntyo. Bulagurhe? Bulala abola balume barhashinganene. Aliko, nka rhwamachiseza oku ngeso zabo zibi ahali h’okuchiseza oku ngeso zabo zinja, kweri rhwanaba eyi rhwamarhabala abanzi berhu. Bulagurhe rhuderhere ntyo? Rhuderhere ntyo bulala rhwakarhondera kugwarha engangane oku Mungu ali akolesa olubaga lwage omu kurhuyerekeza. w24.04 buk. 10 chi. 11-12

Balala boshi nji bafa amango m’amalibuko makulu, nji balimbulwa loshi loshi buzira kugwarha obulangalire b’okufuka si? Amandiko marhubwirire oku balala banapinga Yehova nʼengabo zage, nji balimbulwa oku Armagedoni, barhakanafuuka. (2 Te. 1:6-10) Aliko si, gurhe oku bilolere abandi bantu? Omufano, nkabaga baguma nji bakafa omu mango m’amalibuko makulu eju y’obulwala, obushaja, omu agisida, changwa owindi muntu anabayirha? (Muh. 9:11; Zek. 14:13) Baguma mw’abola bantu nji bafuuka omu barhali banya-kunali befuuke amango m’egulu lihyahya si? (Mdo. 24:15) Ntacho rhumenyere oku bibalolere. Aliko hali binene rhumenyere oku bilolere ebihe by’amango mayinjire. Omufano, rhumenyere okw’amango m’evita ly’Armagedoni abantu nji bachibirwa olubanja omu kukulikiza ebi baliri bakolera bene-babo Kristu. (Mt. 25:40) Abola bantu nji bachibirwa olubanja oku bali ntama nji baba eyi bayerekene oku bashigikire abashigwa na Kristu.​—Ufu. 12:17. w24.05 buk. 10-11 chi. 9-11

“Ebiblia ederhere oku rhulamire omu “bihe bidarhi bikomere” bwenene. (2 Ti. 3:1) Abakozi ba Yehova yibahurana ebibazo abandi nabo bali bahurana mu linola gulu libi lya Shetani. Aliko kandi yirhwalibuzwa bulala rhuli rhwakolera Yehova. Bichi binarhurhabala rhugenderere kukolera Yehova chiro akaba yirhwahurana n’ebyola bibazo? Mpanvu nguma y’akamaro eli okuntu rhunabona Yehova anarhurhabala n’okumenya okw’ali “Mungu olamire.” (Yer. 10:10; 2 Ti. 1:12) Yehova anabona ebibazo byoshi rhuli rhwahurana, n’amango moshi aba alonzeze kurhurhabala. (2 Ny. 16:9; Zb. 23:4) Amango rhwamayibuka oku Mungu werhu ab’arhulagireko n’oku buli mango aba tayari kurhurhabala, rhwakagwarha emisi y’okulembera buli chigeregezo choshi. w24.06 buk. 20 chi. 1-2

Rhukwanene kugenderera kulangalira olubaga lwa Yehova. Amango byamahema oku bahindamule chintu chilebe oku bilolere obukweri burhengere omu Biblia, changwa oku bilolere okuntu akasi k’Obwami kanakolwa, balala bali bayerekeza barhagangana kuhindamula chintu chilebe akaba ntyo ku byahemere. Banajira ntyo bulala embere wabyoshi banalonza kusimisa Yehova. Kandi, banajira okwabo koshi yi barhola esimikiro ziyumangire oku Chinwa cha Mungu, omu kuba mufano gwinja abandi bakozi boshi ba Yehova bakayiganya. Entumwa Paulo alihanwire ntya: “Ogenderere kukulikira omufano gw’ebinwa bigwerhe enyungu.” (2 Ti. 1:13) “Omufano gw’ebinwa bigwerhe enyungu” zili nyigirizo ze Chikristu zibonekene omu Biblia. (Yoh. 17:17) Enyigirizo zili nk’ezola y’eshoko ya buli chintu rhuba rhuyemerere. Olubaga lwa Yehova lwarhuyigirize rhuyorhe rhunanirire kw’ezola nyigirizo. Amango moshi rhugenderere kujira ntyo, rhwagishwa. w24.07 buk. 11-12 chi. 12-13

Bulala entumwa Petro alichibwenere bwinja akamaro k’okuhungama n’okubabalirwa, akagalire kuyigiriza abandi eby’ayigaga. Kasanzi kageke enyuma w’efete ye Pentekoste, Petro agezeza Bayahudi kamama barhaliri bemezi ejambo, abafasiriya oku babayirhaga Masiya. Abaheba omurhima oku buzigire omu kubabwira ntya: “Che chirhumire, muhungame munahindamuke y’ebyaha byenyu bishandwa, y’ebihe by’okuluhusya birhenga emwa Yehova yenyine.” (Mdo. 3:14, 15, 17, 19) Naho Petro ayerekana ok’okuhungama kunashunika omunya-byaha ahindamule amawazo mage mabi, olungezi lwage, anaj’akulikira enjira mpyahya esimisize Mungu. Kandi Petro aliyerekene oku Yehova ashangula ebyaha byabo byoshi n’oku birhakachibonekana. Amango rhwamahungama ebyaha byerhu, chiro n’ebyaha bikomere bwenene rhwakachiyunva rhugwerhe omurhula bulala rhumenyere oku Yehova anarhubabalira loshi! w24.08 buk. 12 chi. 14

Akaba rhugwerhe obwemere bukomere oku Yehova alimbula hanola hofi hofi linola gulu libi, rhurhawaza ok’okugwarha efuranga changwa ebintu by’omubiri ch’echintu ch’akamaro bwenene. Abantu nji “bakabula e arja yabo omu barabara” bulala nji barhegera oku “ebe e arja changwa e oro nji birhagala kuyokola akalamo kabo oku lusiku lw’ebisirani bya Yehova.” (Eze. 7:19) Ahali h’okulonza efuranga bwenene, birhuhemere rhurhole esimikiro zarhurhabala rhugale kuchishishikala rhwewe rhwenyine, omulala gwerhu, zakanarhuma rhwagenderera kukolera Yehova. Echola chiheberwe m’okuhima amashumi m’okurhola amadeni marhali m’akamaro changwa okuchilundira ebintu binene by’omubiri. Kandi rhwaba merangwe yi rhugala kuyaka kusima bwenene ebintu by’omubiri rhukala rhugwerhe. (Mt. 6:19, 24) Obwemere bwerhu nji bwageregezwa oku bilolere ebintu by’omubiri changwa oku bilolere ebindi bintu, amango rhwaba rhuli rhwalingiriza obuzinda bwa linola gulu libi buhike. w24.09 buk. 11 chi. 13-14

Byakashobokana rhuhime loshi-loshi buguma omu buzamba bwerhu. Aliko byakarhuhema rhugenderere kulwisa obwindi buzamba mu mango manene. Rhuganire oku mufano gw’entumwa Petro. Eju y’okuyubaha abantu, alilahire Yesu kasharhu koshi. (Mt. 26:69-75) Byalibonekene nka Petro ahimire obola buba amango aliri ayigiriza embere we Sanedrini. (Mdo. 5:27-29) Aliko myaka milebe enyuma w’aho aleka kulya n’Abakristu barhaliri Bayahudi, aliyubahire eby’Abakristu b’Abayahudi bakawazize eju yage. (Gal. 2:11, 12) Obuba bwa Petro bwalishubire kugaluka. Nkabaga arhaliza kumala obola buba loshi-loshi. Rhwakachibugana omu hali zili nk’ezola. Chiro akaba ntyo rhwakahima enyifinjo mbi egenderere omu kukulikiza ehano lya Yesu ‘ly’okugenderera kuba masu.’ (Mt. 26:41) Na chiro wakaba oli wachiyunva okomere ekiroho, ogenderere kuchilanga ehali zakakurhozeza omu mashumi. Ogenderere kujira okwawe koshi y’ohima amashumi.​—2 Pe. 3:14. w24.07 buk. 18-19 chi. 17-19

Nta muntu wachigerere kurhabala abandi kulusha Yesu. Amango Yesu aliri oku gulu alirhabere abantu turu zinene kugerera ebisomerene. (Lu. 9:12-17) Alihanire empembo elushire zoshi omu kuhaana akalamo kage eju yerhu. (Yoh. 15:13) N’amango afuka arhalekaga kugenderera kurhabala abandi. Nk’okw’abaga alaganyize, alihemere Yehova asheshe eroho lichesibwa lirhuyigirize n’okurhurhuliriza. (Yoh. 14:16, 17, Amahugulo m’eshishi; 16:13) Kugerera embuganano z’echibaga Yesu agenderere kurhuhereza byoshi rhukenere yi rhujira abanafunzi omu gulu lyoshi. (Mt. 28:18-20) Entumwa Paulo ayandikire okw’amango Yesu azamuka embingu, alihanire “empembo omu bantu.” (Efe. 4:7, 8.) Paulo afasiriye oku Yesu ahanaga ezola mpembo yi zirhabala echibaga omu njira zilengene. (Efe. 1:22, 23; 4:11-13) Kweri abola balume barhali bashinganyanya che chirhumire banajira amagosa. (Yak. 3:2) Aliko Waliha werhu Yesu Kristu anabakolesa omu kurhurhabala, zili mpembo arhuhere. w24.10 buk. 18 chi. 1-2

Daudi abwira omugala Sulemani okw’akapatire migisho minene amango monyine akakengere Yehova Mungu. Ech’okugayisa, oku buzinda bw’akalamo ka Sulemani, arhondera kuharamya abandi ba mungu. Buzinda Yehova amukula kw’efune yage, Sulemani av’aheza obwengehe b’okurhambula oku bwinja n’okuhaki. (1 Fa. 11:9, 10; 12:4) Bichi birhuyigirize? Okukenga kunarhulerhera emigisho. (Zb. 1:1-3) Kweri Yehova arharhulaganyize okw’arhuhereza obuchire changwa obukuuze bwa Sulemani. Aliko rhukakenga Mungu werhu, arhuyerekeza n’okurhuha obwengehe b’okurhola esimikiro zinja. (Mez. 2:6, 7; Yak. 1:5) Amahano ma Yehova makarhurhabala amango rhuli rhwarhola esimikiro okubilolere akasi, amasomo, efuranga, n’okubilolere okuchisimisa. Okukulikira amola mahano kwalanga obwira bwerhu haguma na Yehova, nji rhwapata n’akalamo k’esiku n’amango. (Mez. 2:10, 11) Rhwakagwarha abera benja, n’emilala yerhu yagwarha obusime. w24.11 buk. 10-11 chi. 11-12

Abazere bagwerhe njira zinene bakarhonderesa mw’enganiro esimisize haguma n’abana babo okubilolere Ebiblia changwa okubilolere okugwarha obwemere mu Mungu. Bakajira ntyo amango bamalambagirira enju y’okubika mw’ebintu bya mira. Wakayereka omwana wawe okuntu echintu, changwa echihe ch’omu mango ma mira chipatene na chintu chilebe chiderherwe omu Biblia. Echola chakarhabala omwana wawe abone okw’ebye Biblia ederhere bili by’okuli. Nkabaga wakayigiriza omwana wawe okubilolere ebale lye Moabu. Elyola bale ligwerhe myaka 3000 liyandikirwe ku n’ezino lya Yehova. Kandi efoto y’elyola bale lye Moabu ebonekene ahabanayerekana ebintu byamira hayirikirwe “E Bibliya n’Ezino lya Mungu” oku Biro Bikulu bya Bahamirizi ba Yehova omu Warwick, New York. Ebale lye Moabu liyerekene oku Mwami Mesha we Moabu alichijirire chigamba oku Baizraeli. Intyo ku ne Bibliya nayo enaderhere. (2 Fa. 3:4, 5) Amango omwana wawe amachibonera yewe yenyine okw’ebye Biblia ederhere bili by’okuli, obwemere bwage bwakomera. w24.12 buk. 14 chi. 4; buk. 15 chi. 6