Mugenderere “Kuyumbakana Buli Muguma n’Owindi”

1. Nk’oku olwandiko lwa 1 Watesalonike 5:11 luderhere, kasi kahe rhweshi rhuli rhwakolako?

KA HALI amango echibaga chawe chayumbakirwe changwa kushuba kwiza buhyahya Echumbi ly’Obwami? Akaba ntyo ku bili, nta ngangane ochiyibukire embuganano ntanzi wajagako mw’elyola chumbi lihyahya. Walibwirire Yehova koko bwenene. Kweri, nkabaga waligwerhe busime bunene bwenene, orhanagalaga kuyimpa olwimpo l’oburhanzi bulala waliri walaka. Amachumbi merhu m’Obwami mayumbakirwe bwinja manalerhera Yehova obukuuze. Aliko rhunalerhera Yehova obukuuze bwenene amango rhuli rhwakola oku yindi mbero y’akasi k’okuyumbaka. Akola kasi kali k’akamaro bwenene kulusha akasi k’okuyumbaka amaju. Akola kaheberemo akasi k’okuyumbaka, k’okuderha, okuhira omurhima abantu banahika mw’ezola nju z’okuharamizamo. Akola kasi k’okuyumbaka k’omufano, k’entumwa Paulo aligwerhe omu bwenge amango ayandikaga ebinwa bili omu 1 Watesalonike 5:11, olwandiko ogula mwazi gwerhu guyumangiireko.​—Osome.

2. Bichi rhwaganirako mu gunola mwazi?

² Entumwa Paulo guli mufano gwinja bwenene g’omuntu walimenyere kuyumbaka bene-babo na bali-babo. Alibagwerhe kw’akasisi. Mu gunola mwazi, rhwashamabala okuntu aliri arhabala bene-babo na bali-babo 1) balembere ebigeregezo, 2) bajire omurhula buli muguma n’owindi, na 3) bakomeze obwemere bwabo emwa Yehova. Rhujage rhwalola nka gurhe rhwakamuyiganya omu kuheba zene bene-berhu na bali-berhu omurhima.​—1 Ko. 11:1.

3. Mawazo mahe m’olugero Paulo aligwerhe?

³ Paulo aliziigire bwenene bene-babo na bali-babo. Naye yenyine alihurene ebibazo; bobola akagalire kuyunvira obonjo n’akasisi bene-babo na bali-babo baliri bahurana ebibazo. Mango maguma olufuranga lwa Paulo lwalihwere, byaja byamuhema alonze akasi y’agala kuchishishikala yewe yenyine na bera bage. (Mdo. 20:34) Aliri akola akasi k’okuluka amahema. Amango ahika e Korinto, arhanga hwanza kola na Akila na Prisila, nabo baliri bakola kasi k’okuluka amahema. Aliko “buli lusiku lwe sabato” aliri ahubiri Abayahudi na Bagiriki. Aliko amango Sila na Timoteo bahika eyo munda, “Paulo ahwanza kulaga bwenene oku chinwa,” k’okuderha, ahwanza kuchiseza bwenene oku kasi k’okuhubiri emyazi minja. (Mdo. 18:2-5) Paulo arhayibagiraga chiro omuhigo gwage gw’akamaro aligwerhe omu kalamo, k’okuderha, okukolera Yehova. Bulala Paulo aliyerekene omufano gwinja omu kukola bwenene omu kasi k’okuhubiri n’omu kulonza eby’omubiri alikenere, echola chalimurhabere agale kuhira bene-babo na bali-babo omurhima. Abaheba omurhima bamenye bayemera akalamo kabahidika n’okuhahira emilala yabo kwarhuma basuzagura “ebintu by’akamaro bwenene,” k’okuderha, byoshi rhunakola omu kuharamya Yehova.​—Flp. 1:10.

4. Nka gurhe Paulo na Timoteo balirhabere bene-babo na bali-babo balembere amalibuko?

⁴ Echibaga ch’omu Tesalonike chimala rhondera ntya, abola Bakristu bahyahya bahwanza kuhurana ebigeregezo bikomere. Amango echigusho ch’abantu bagwerhe burhe bunene babula Paulo na Sila, echola chigusho chaheka “bene-berhu baguma emw’abakulu b’evile,” eyi banali bayama ntya: “Abala balume barhali bakenga amarhegeko ma Kayizari.” (Mdo. 17:6, 7) Wakawaza okuntu abola Bakristu bahyahya balikwanene kuyubaha amango babona abola balume b’omu vile bamabahindamukira? Bakahezeze obushiru bwabo omu kasi ka Yehova, aliko Paulo arhalilonzeze echola chibahikire. Chiro akaba oku byalibahemere yewe na Sila barhenge mw’eyola vile, bajira okwabo koshi y’echola chibaga chigenderera kushishikalwa. Paulo ayibusa Abakristu be Tesalonike ntya: “Rhwarhuma mwene-werhu, Timoteo, abahebe emisi n’okubarhuliriza oku bilolere obwemere bwenyu yi harhaba n’omuguma wadundwa n’amala malibuko.” (1 Te. 3:2, 3) Byakashobokana oku Timoteo abaga ahurene ebibazo changwa ebigeregezo omu vile yage y’akaburhano ye Lystra. Alichibwenere okuntu Paulo ahebaga emisi bene-babo na bali-babo ba mw’eyola vile. Bulala Timoteo alichibwenere okuntu Yehova arhabalaga Abakristu mw’eyola vile, akagalire rhabala bene-babo na bali-babo bahyahya bachizere oku nabo Yehova abarhabala.​—Mdo. 14:8, 19-22; Ebr. 12:2.

5. Nka gurhe mwene-werhu muguma oyirikirwe Bryant ayungukaga n’oburhabale mushamuka muguma amuhaga?

⁵ Mu yindi njira ehe Paulo alihebere emisi bene-babo na bali-babo? Amango bashuba galuka omu vile ye Listre, Ikoniyumu, ne Antiokia, Paulo na Barnaba “bashimika abashamuka mu buli chibaga.” (Mdo. 14:21-23) Nta ngangane, abola balume bashimikwaga baliri barhuliriza bene-berhu na bali-berhu ba mw’ebyola bibaga, nk’okuntu abashamuka nabo bali bajira zene. Yunva ebinwa mwene-werhu muguma oyirikirwe Bryant aderhere: “Amango nyeneza myaka 15, darha ajahika omulala n’okuchigendera, na nyama naye achibwa omu chibaga. Nayunva nakabulirwe na navunika omurhima.” Bichi byarhabalaga Bryant alembere amola mango m’ebibazo? Aderhere ntya: “Mushamuka muguma w’echibaga oyirikirwe Tony, aliri ashambala nani oku mbuganano n’amandi mango. Alinshambalire oku bandi bantu balihurene ebigeregezo aliko bagenderera kugwarha obusime. Ashambala nani oku lwandiko lwa Zaburi 27:10 na buli mango aliri ambwira oku ngani ya Hezekiya wakoleraga Yehova oku bwimana chiro akaba eshe arhaliri mufano gwinja.” Nka gurhe okujira ntyo kwarhabalaga Bryant? Aderhere ntya: “Kugerera oburhabale Tony ampaga nahikira kuhwanza akasi k’amango moshi kasimisize.” Bashamuka wee, mube masu munabe juba-juba kurhabala balala bali kuguma na Bryant bakaba bakenere “echinwa chinja” ch’okuheba omurhima.​—Mez. 12:25.

6. Nka gurhe Paulo akolesaga engani z’akalamo k’abantu omu kuheba bene-beba na bali-babo omurhima?

⁶ Paulo ayibusa bene-babo na bali-babo oku “echichu chinene ch’abahamirizi” chaliri chalembera ebibazo bulala Yehova aliri abaha misi minene. (Ebr. 12:1) Paulo alimenyere kangana gurhe engani z’akalamo k’abantu ba mira bagalaga kulembera ebibazo bya buli lubero, zakahebere bene-babo na bali-babo emisi n’okubarhabala bagenderere kuseza obwenge bwabo oku “vile ya Mungu olamire.” (Ebr. 12:22) Intyo ku binali zene. Rhweshi rhunahebwa omurhima amango rhwamasoma engani ziyerekene okuntu Yehova arhabalaga Gideoni, Baraka, Daudi, Samweli n’abandi banene. (Ebr. 11:32-35) Na gurhe si oku bilolere bene-berhu na bali-berhu ba zene bayerekene obwemere? Oku biro byerhu bikulu rhunazigana kupata amaruba bene-berhu na bali berhu bayandikire maderhere okuntu obwemere bwabo bwakomezwe enyuma y’okumala soma engani y’akalamo ya muguma omu Bahamirizi ba Yehova bimana ba zene.

7. Bichi ehano lya Paulo lili omu Waroma 14:19-21 lyakuyigirize?

⁷ Rhunayumbaka bene-berhu na bali-berhu amango rhuli rhwaderha n’okujira ebintu byakalerha omurhula omu chibaga. Rhurhayemera okurhagwarha amawazo mali kuguma kwarhulerha mw’akavulindi. Kandi rhwayemera amawazo m’abandi akaba ebi baderhere birhavunire amakanuni me Biblia. Rhushambalage ku mufano muguma. Omu chibaga che Roma, mwaliri Abayahudi n’abandi Bakristu b’amandi mashanja. Amango Esheriya ya Musa ekulwaho, abanaharamya Yehova barhalichihemerwe bakenge amarhegeko malilahize kulya bilyo bilebe. (Mk. 7:19) Gurhenga amola mango na kugenderera, Bakristu baguma b’Abayahudi balichiyunvirhe huru okulya byoshi-byoshi. Aliko abandi Bakristu b’Abayahudi bowe balibwene oku kurhali kwinja okulya ebyola bilyo. Echola chibazo chalerha akavulindi omu chibaga. Paulo achiseza bwenene oku kamaro k’okugendereza omurhula anaderha ntya: “Kurhali kwinja okulya enyama changwa okunywa edivayi changwa kujira chintu choshi-choshi chakarhuma mwene-wenyu asibuka.” (Osome Waroma 14:19-21.) Paulo arhabala bene-babo na bali-babo babone buhanya bungana gurhe obola buhaka bwaliri bwalerha ku buli muntu bwage-bwage n’oku chibaga choshi. Kandi, aliri tayari kuhindamula engeso yage y’arharhuma abandi basibuka. (1 Ko. 9:19-22) Kuguma naye, nerhu rhwakayumbaka bene-berhu na bali-berhu n’okugendereza omurhula amango rhurhajire buhaka oku bilolere eby’abandi basimiire.

8. Gurhe Paulo ajiraga amango echibazo ch’akamaro chabaga chamalerha akavulindi omu chibaga?

⁸ Paulo aliri agendereza omurhula haguma n’abantu baligwerhe obuhaka oku bilolere ebintu by’akamaro. Omufano, Bakristu baguma b’omu chibaga ch’omu myaka 100 ya burhanzi baliri baderha oku abantu b’amashanja babere Bakristu bakwanene kuchibwa, nkabaga y’Abayahudi barhayinja babaderha-derha kubi. (Gal. 6:12) Aliko Paulo arhayemeraga chiro eyola miganiize, aliko ahali h’okuhanzika okw’abola bantu bakulikire miganiize yage, oku bwirhohye ahema amahano oku ntumwa n’abashamuka b’omu Yerusalemu. (Mdo. 15:1, 2) Bulala Paulo alijirire ntyo omu kumala obola buhaka, echola charhabala abola Bakristu bagendereze omwishingo n’omurhula omu chibaga.​—Mdo. 15:30, 31.

9. Nka gurhe rhwakakulikira omufano gwa Paulo?

⁹ Amango echibazo chikomere chamarhengerera, rhwanagendereza omurhula omu kulonza obwerekezi ku balala Yehova ashimikire bashishikale echibaga. Ahanene amahano mayumangiire oku Biblia makabonekana omu bitabu byerhu changwa omu maruba olubaga lwa Yehova lunarhumira ebibaga. Nka rhwamaseza obwenge bwerhu k’obola bwerekezi, ahali h’okuheba amawazo merhu embere, rhwarhabala omurhula gugenderere kuba omu chibaga.

10. Bindi bichi Paulo alijirire y’agendereza omurhula omu chibaga?

¹⁰ Paulo aligendereze omurhula omu kuchiseza oku ngeso zinja za bene-babo na bali-babo ahali h’okuchiseza oku buzamba bwabo. Omufano, oku buzinda bw’amaruba mage ayandikiraga Abaroma, Paulo aderha amazino ma bantu banene n’ahanene, aliri aderha echintu chinja ku buli muguma mu bo. Rhwakayiganya Paulo omu kuderha buzira kubisha engeso zinja za bene-berhu na bali-berhu. Amango rhwamajira ntyo, rhwanaha bene-berhu na bali-berhu eyindi mpanvu y’okukomeza obwira buli muguma n’owindi, n’echola chanakomeza obuzigire omu chibaga.

11. Nka gurhe rhwakashuba kuyunvikana n’abandi amango obuhaka bwamarhengerera?

¹¹ Mango maguma, obuhaka bwakarhengerera ahagarhi ka Bakristu babiri bakulire ekiroho. Echola chalihikiire Paulo na mwira wage w’oku murhima Barnaba. Obuhaka bukomere bwalirhengerere ahagarhi k’abola balume babiri bulala muguma aliri alonza baheke Marko omu lugenzi lwabo lw’abamisiyonere aliko owindi alahira. “Obuhaka bunene” bwarhengerera ahagarhi kabo n’echo charhuma baleka kubalama haguma. (Mdo. 15:37-39) Aliko Paulo, Barnaba, na Marko balishubire yunvikana omu kuyerekana ok’omurhula n’obuguma omu chibaga by’ebyaliri by’akamaro bwenene. Buzinda, Paulo aderha bwinja oku bilolere Barnaba na Marko. (1 Ko. 9:6; Kol. 4:10) Nerhu, rhukwanene kumala empanvu z’okurhayunvikana rhwakaba rhugwerhe n’abandi omu chibaga, naho, rhwanaja rhwagenderera kuseza obwenge bwerhu oku ngeso zabo zinja. Omu kujira ntyo, rhwagendereza omurhula n’obuguma.​—Efe. 4:3.

12. Bibazo bihe bene-berhu na bali-berhu bali bahurana?

¹² Rhunayumbaka bene-berhu na bali-berhu amango rhwamakomeza obwemere bwabo mu Yehova. Baguma bali bashekerwa n’abantu b’omu mulala gwabo barhali Bahamirizi ba Yehova, aba banakola nabo changwa aba banasoma nabo. Abandi bali balwisa ebibazo bikomere by’amagala changwa ehali y’okuvunika omurhima. Aliko abandi bamakolera Yehova mu myaka minene, banagenderere kulingiriza obuzinda bw’elila gulu libi. Ebyola byoshi byakageregeza obwimana bw’Abakristu zene. Bene-berhu na bali-berhu b’omu myaka 100 ya burhanzi balihurene ebibazo bili nk’ebyola. Bichi Paulo alijirire y’akomeza bene-babo na bali-babo?

13. Nka gurhe Paulo arhabalaga balala baliri bashekerwa eju y’obwemere bwabo?

¹³ Paulo alikoleseze Amandiko omu kuyumbaka obwemere bwa bene-babo na bali-babo. Omufano, Abakristu b’Abayahudi barhalimenyere nka gurhe bakashubiza abantu b’omulala gwabo baliri baderha okw’enyigirizo z’edini lye Chiyahudi ze zaliri z’akamaro bwenene kulusha ze Chikristu. Nta ngangane, amaruba ma Paulo oku Baebrania malikomeze bwenene abola Bakristu. (Ebr. 1:5, 6; 2:2, 3; 9:24, 25) Eyola nganiro yage yaligwerhe ebinwa biyemezeze, yakabarhabere bayinje bamenya nka gurhe bakashubiza abantu b’omulala gwabo barhaliri bemezi. Zene, rhwakarhabala bene-berhu na bali-berhu bali bashekerwa, bakolese ebitabu byerhu biyumangiire oku Biblia omu kuderhera obwemere bwabo. N’akaba emisole yerhu eli yashekerwa bulala eyemerere oku ebintu byalemwaga, rhwakabarhabala babone emyazi omu ma bronshire Uhai Ulitokana na Muumba?(K’Akalamo Kalemwaga Si?), na Maswali Matano Muhimu Kuhusu Chanzo cha Uhai? (Bibazo Birhano by’Akamaro oku Bilolere Omurhondero gw’Akalamo) omu kuyerekana bulagurhe bayemerere oku akalamo kalemwaga.

14. Chiro akaba oku Paulo aliri akola bwenene omu kasi k’okuhubiri n’okuyigiriza, bichi alijirire?

¹⁴ Paulo alihebere bene-babo na bali-babo omurhima bayerekane obuzigire kugerera “ebijiro binja.” (Ebr. 10:24) Aliri arhabala bene-babo na bali-babo kugerera ebinwa byage n’ebijiro byage. Omufano, amango bene-babo na bali-babo b’omu Yudea baliri bahurana n’enzara, Paulo abalerhera ebintu balikenere. (Mdo. 11:27-30) Chiro akaba oku Paulo aliri akola bwenene omu kasi k’okuhubiri n’okuyigiriza, buli mango aliri alonza nka gurhe akarhabala balala balikenere ebintu by’omubiri. (Gal. 2:10) Omu kujira ntyo, akomeza obwizere bwa bene-babo na bali-babo oku Yehova abashishikala. Zene, amango rhuli rhwakolesa oku bulonza akasanzi kerhu, emisi, n’obufundi bwerhu omu kuhaana oburhabale amango m’echinjira, nerhu rhwanakomeza obwemere bwa bene-berhu na bali-berhu. Kandi, rhwakashuba kujira ntyo amango rhuli rhwahaana enshololo yerhu oku kahunda oku bilolere akasi k’omu gulu lyoshi. Amango rhwamakolesa ezola njira n’ezindi, rhwanarhabala bene-berhu na bali-berhu balangalire oku Yehova arhakabajahika haba n’akatyu.

15-16. Nka gurhe rhukwanene kukolera balala obwemere bwabo buli bwazamba?

¹⁵ Paulo aligenderere kurhabala balala baligwerhe obwemere buzambire. Aliri abayereka olukogo omu kushambala nabo omu njira eshagalukire enahebere omurhima. (Ebr. 6:9; 10:39) Omufano, omu maruba mage arhumiraga Abaebrania, alikoleseze bwenene echinwa “rhwabo,” omu kuyerekana oku naye alikwanene kukolesa amahano aliri abaha. (Ebr. 2:1, 3) Kuguma na Paulo, rhurhalekereraga balala bagwerhe obwemere buzambire. S’ahubwe rhubakomeze omu kubayereka oku kweri rhubalagireko. Omu kujira ntyo, rhwabayereka oku kweri rhubazigiire. Obushagaluke n’omulenge rhwakakolesa amango rhuli rhwaganira nabo bili byakamaro, kuguma n’ebindi bintu byoshi-byoshi rhwakaderha.

¹⁶ Paulo arhabala bene-babo na bali-babo bachizere oku Yehova amenyere akasi kenja bali bakola. (Ebr. 10:32-34) Nerhu rhwakajira ntyo amango rhuli rhwarhabala bene-berhu na bali-berhu ab’obwemere bwabo bwahanzize kuzamba. Rhwakamubwira arhubalire nka gurhe amenyaga okuli, changwa rhwakamuheba omurhima ashube awaze oku mango maguma abonaga oku Yehova ali amurhabala. Rhwakakolesa akola kasanzi omu kumurhabala achizere oku Yehova arhasaga yibagira ebijiro byage binja by’obuzigire n’oku arhamujahika chiro n’akatyu omu mango mayinjire. (Ebr. 6:10; 13:5, 6) Nkabaga ezola nganiro zakaheba omurhima bene-berhu na bali-berhu bazigirwa bagenderere kumukolera.

17. Bufundi buhe rhwakagenderera kukomeza?

¹⁷ Nka kulala omuntu oli wakola oku kasi k’okuyumbaka anagenderera kuyongeza obufundi bwage okw’ebisanzi binali byagera, nerhu, rhwakagenderera kugwarha bufundi bunene omu kuheba bene-berhu na bali-berhu omurhima. Rhwakabarhabala bagwarhe emisi y’okulembera ebigeregezo omu kuganira nabo oku mifano ya balala balembeere omu mango magerere. Rhwakagendereza omurhula omu kushambala oku ngeso zinja z’abandi, rhungendereze omurhula amango guli omu buhanya, kandi rhuyunvikane amango obuhaka bwamarhengerera. Kandi, rhwakagendereza kukomeza obwemere bwa bene-berhu na bali-berhu omu kuganira nabo oku nyigirizo z’akamaro ze Biblia, omu kubaha oburhabale bakenere, n’okurhabala olala yeshi-yeshi ogwerhe obwira burhakomere haguma na Yehova.

18. Bichi ohigirire kujira?

¹⁸ Balala banakola oku makasi m’echiteokrasi m’okuyumbaka, banagwarha omwishingo n’obusime. Rhwakagwarha omwishingo n’obusime amango rhuli rhwarhabala bene-berhu na bali-berhu bagwarhe obwemere bukomere. Enju rhwayumbakire, zakahika amango zashaja, aliko abantu rhwahebere omurhima, bowe bakabera esiku n’amango! Rhujage rhwahigirira “kugenderera kuhebana omurhima buli muguma n’owindi n’okuyumbakana buli muguma n’owindi.”​—1 Te. 5:11.