Walimenyere si?
Nka gurhe amatofali mavululwaga omu Babiloni ya mira, mayerekene oku engani ye Biblia eli y’okuli?
ABAVULUZI b’ebintu bya mira, bavulwire amafuru manene baliri badwikiramo amatofali baliri bakolesa omu kuyumbaka evile. Omuvuluzi oyirikirwe Robert Koldewey, aderhere oku amola matofali maliri mayosezwa omu mafuru “maliri embuga w’evile, ahaliri ebumba likwirire, n’emirhi minene y’okumadwika.”
Abavuluzi bavulwire ebiyerekene oku abarhegesi bakulu b’omu Babiloni baliri bakolesa ezola furu kandi, omu kujira ebintu bibi bwenene. Profesere muguma oyirikirwe Paul-Alain Beaulieu, ogwerhe bumenyi oku bilolere engani n’endimi z’omu Ashuru yamira, oli Profesere oku Univerisite ye Toronto, aderhere ntya: “Emyandiko y’omu Babiloni yaliyerekene oku Mwami alihanire erhegeko oku balala barhamukengere, balala boshi barhayerekana obukenge oku bintu bichesibwa bakwanene kukabulwa omu furu y’omuliro basirere.” Omufano, emyandiko miguma y’omu mango m’Omwami Nebukadneza ederhere ntya: “Mubalimbule, mubayose, mubakalange, mubasireze omu furu y’omuliro kugera ahabahwanziza kukulira omusi g’omusingu omu furu, kugerera ebirimi by’omuliro gukalihire.”
Echola chiyibusizye abanasoma Ebiblia engani ebonekene omu Danieli sura ya 3. Eyola sura ederhere okuntu Mwami Nebukadneza ashimikakaga echishushanyo chizibu-zibu che oro omu lubanda lwa Dura, embuga w’evile ye Babiloni. Amango misole esharhu y’Abaebrania k’okuderha Shadraki, Meshaki, na Abdenego balahira kuyunamira echola chishushanyo, Nebukadneza agwarha oburhe bwenene, ahaana erhegeko oku bayongere omuliro omu furu “bayichanire kukuba kali mushanvu kulusha okuntu barhulaga bayichanira,” nabuzinda abola barhabana basharhu “bakabulwa mw’elyola kombe ly’omuliro gwe furu.” Malayika ogwerhe emisi abayokola omu lufu.—Da. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Etofali lihire liri kw’akashe k’ezino lya Nebukadneza
Amatofali malibonekene omu Babiloni, mayerekene kandi oku engani ye Biblia eli y’okuli. Manene mw’amola matofali maliri kw’emyandiko yakashe ekuuzize Mwami. Muguma mw’eyola myandiko guderhere ntya: “Nebukadneza, Mwami we Babiloni . . . Enju ya Mwami, nyono Mwami mukulu nye nayiyumbakaga . . . Abantu b’obuuko bwani bajage barhambuliramo esiku namango.” Ebila binwa bishushire nebinwa bya Nebukadneza by’okuchihala biri omu Danieli sura ya 4:30, biderhere ntya: “Eyi Babiloni engana aha, k’arhali nyono nyenyine nayiyumbakaga ebe nju y’obwami oku misi yani nyenyine n’oku bukuuze b’oburhwali bwani?”