Bichi Echitabu cha Ufunuo Chiderhere Nji Byahikira Abanzi ba Mungu?

 1. Bichi echitabu cha Ufunuo chiyerekene oku bilolere abantu ba Mungu?

ECHITABU cha Ufunuo chiyerekene ok’Obwami bwa Mungu bwarhondere kurhegeka omu mbingu n’oku Shetani achinagizwe kurhenga omu mbingu. (Ufu. 12:1-9) Okola kumuchinagiza kwalerhere omurhula omu mbingu aliko kwarhulerhera ebibazo. Bulagurhe? Bulala Shetani y’aj’amalira oburhe bwage oku bakozi bimana ba Yehova bali bamukolera hanola oku gulu.​—Ufu. 12:12, 15, 17.

 2. Bichi nji byarhurhabala rhugenderere kubera bemana embere za Yehova?

² Gurhe rhwakayorha rhuserere chiro akaba Shetani ali arhurhera? (Ufu. 13:10) Chintu chiguma chakarhurhabala, kuli kumenya ebi nji byaba amango mayinjire. Omufano, omu chitabu cha Ufunuo, entumwa Yowane eyerekene emigisho nji rhwasiimira hanola hofi-hofi. Muguma mw’eyola migisho, nji kwaba kulimbula abanzi ba Mungu. Rhujage rhwalola eby’echitabu cha Ufunuo chiderhere oku bilolere abola banzi, n’echi nji charhurhabala rhugenderere kubera bemana embere za Yehova.

 3. Bimenyeso bihe bishamberwe omu chitabu cha Ufunuo?

³ Omu mustari gurhanzi-rhanzi gwa Ufunuo barhubwirire okw’emyazi rhukala soma ehanirwe “kugerera ebimenyeso,” k’okuderha, omu luderho l’omufano. (Ufu. 1:1) Abanzi ba Mungu bashamberwe omu njira y’omufano. Rhubwene oku bashushanyizwe na binyalubala bilebe. Omufano, hali “echinyalubala chirhengerere omu nyanja.” Chigwerhe “mahembi ekumi na marhwe mushanvu.” (Ufu. 13:1) Echola chinyalubala chikulikirwe “n’echindi chinyalubala chirhengere omu gulu.” Echola chinyalubala chili chaderha nka nkuba-joka n’okuyandagaza “omuliro kurhenga embingu.” (Ufu. 13:11-13) Enyuma w’ahola, rhubwene echindi chinyalubala, k’okuderha, “echinya-lubala ch’omuduku,” chili chayerekezwa n’omukazi w’embaraga ochiyikereko. Ebyola binyalubala bisharhu bishushanyize abanzi bamalwisa Yehova Mungu n’Obwami bwage mu siku zinene. Che chirhumire kuli kw’akamaro rhubamenye bali bande.​—Ufu. 17:1, 3.

4-5. Nka gurhe ebinwa biderherwe omu Danieli 7:15-17 birhurhabere rhumenye amafasiriyo m’ebyola bimenyeso?

⁴ Embere rhumenye abola banzi bali bande, bihemere rhurhange rhuyunve bichi ebyola binyalubala n’embaraga bishushanyize. Enjira nyinja yakarhurhabala rhuyunve, kuli kuleka Ebiblia yonyine erhufasiriye. Ebimenyeso binene bili omu chitabu cha Ufunuo, byafasiribwe mira omu bindi bitabu bye Bibila. Omufano, omulebi Danieli alilorhere ebilorho, na mw’ebyola bilorho abona “binyalubala bine byarhenga omu nyanja.” (Da. 7:1-3) Danieli arhubwirire bichi bishushanyize. Ebyola binyalubala bizibu-zibu bishushanyize “bami” bane changwa marhegesi mane. (Osome Danieli 7:15-17.) Amola mafasiriyo mali wazi marhurhabere rhuyunve oku ebinyalubala bishamberwe omu chitabu cha Ufunuo byakashuba kushushanya amarhegesi m’epolitike.

⁵ Rhujage rhwashambala ku bimenyeso biguma bishamberwe omu chitabu cha Ufunuo. Oku rhunali rhwajira ntyo, rhwabona nka gurhe Ebiblia erhurhabere kumenya bichi ebyola bimenyeso biderhere. Leka rhushambale ku chinyalubala chiguma-chiguma nk’oku binakulikirene. Rhwarhanga kulola bichi bishushanyize. Naho, rhwamenya bichi byahikira ebyola binyalubala. Na buzinda, rhwamenya bichi ebyola birhuyigirize.

 6. Echinyalubala cha marhwe mushanvu chiganirirwe omu Ufunuo 13:1-4, chishushanyize bichi?

⁶ Echinyalubala ch’amarhwe mushanvu bili bichi? (Osome Ufunuo 13:1-4.) Rhubwene oku echila chinyalubala chishushire bwenene kapiri aliko chigwerhe amagulu m’echishengera (ours) n’obunu bwa simba chinagwerhe mahembi ekumi. Ebinyalubala bishamberwe omu Danieli sura ya 7 nabyo ntyo kubili. Aliko omu chitabu cha Ufunuo, chinyalubala chiguma chigwerhe ebyola byoshi s’arhali binyalubala bine birhali kuguma. Echola chinyalubala chirhashushanyize burhegesi buguma bwa chihugo chilebe, changwa oburhegesi buguma burhegekere egulu lyoshi. Yowane derhere oku echola chinyalubala chirhegekere “buli buko, buli bantu, buli lulimi, na buli shanja.” Che chirhumire bukwanene kuba burhegesi bukulu kulusha burhegesi bwa chihugo chiguma-chiguma. (Ufu. 13:7) Bobola echola chinyalubala chikwanene kushushanya amarhegesi moshi m’epolitike mamarhambula abantu kugera zene.b​—Muh. 8:9.

 7. Bichi buli rhwe ly’echinyalubala cha marhwe mushanvu lishushanyize?

⁷ Bichi buli rhwe mu amola marhwe mushanvu lishushanyize? Esura ye 17 y’echitabu cha Ufunuo erhurhabere rhubone echishubizo ch’echola chibazo bulala efasiriye echishushanyo ch’echinyalubala chiganirirwe omu sura ye 13. Omu Ufunuo 17:10, barhubwirire ntya: “Hali bami mushanvu: Barhano bahenere, na muguma aliho, owindi arhazihika, aliko hano ahika, abera kasanzi kageke.” Omu marhegesi moshi m’epolitike Shetani amakolesa, mushanvu mu mo malishushanyizwe “n’amarhwe” bulala maligwerhe bukulu bunene changwa burhwali bunene. Amola marhegesi m’egulu lyoshi mahumire bwenene oku bantu ba Mungu. Amango entumwa Yowane alichilamire, marhegesi marhano mw’amola mabaga marhegekere egulu lyoshi: Oburhegesi bwe Misri, bw’Abasiriya, obw’Abababiloni, obw’Abamedi na ba Perse n’obw’Abagiriki. Oburhegesi bwa ndarhu k’okuderha obwa Abaroma bwalichili bwarhegeka amango Yowane ahabwaga oburhumwa bʼokubishulirwa. Burhegesi bw’egulu lyoshi buhe bwakabere bwa mushanvu eyi bonab’obuzinda, changwa rhwe lya mushanvu?

 8. Burhegesi buhe bushushanyizwe n’erhwe lya mushanvu ly’echinyalubala?

⁸ Nk’oku rhukala kubona, obulebi buli omu chitabu cha Danieli burhurhabere rhumenye erhwe lya mushanvu lye naly’obuzinda ly’echola chinyalubala. Obola burhegesi buli bwarhegeka mu chinola chihe ch’obuzinda, k’okuderha omu “lusiku lwa Waliha.” (Ufu. 1:10) Obola burhegesi bujirirwe na mashanja mabiri mayunvikene, k’okuderha, Angletere ne Etats-Unis. Obola burhegesi bwe Angletere ne Etats-Unis burhegekere egulu lyoshi. Che chirhumire rhwakaderha oku lye rhwe lya mushanvu ly’echinyalubala chiganirirwe omu Ufunuo 13:1-4.

 9. Echinyalubala chigwerhe “mahembi mabiri nka ntama” chishushanyize bichi?

⁹ Ufunuo sura ye 13 erhubwirire okw’erhwe lya mushanvu ly’echinyalubala, k’okuderha, oburhegesi bwe Angletere ne Etats-Unis, bwalishubire kukola nka chinyalubala chigwerhe “mahembi mabiri nka m’entama aliko chahwanza kuderha nka nkuba-joka.” Echola chinyalubala chajira “ebintu bisomeze bwenene, chiro n’okuyandagaza omuliro kurhenga embingu embere w’amasu m’abantu.” (Ufu. 13:11-15) Ufunuo sura ye 16 ne ye 19 eyerekene echola chinyalubala nka “mulebi w’obubeshi.” (Ufu. 16:13; 19:20) Danieli aliderhere echintu chili nk’echola omu kuderha oku Oburhegesi bw’Egulu bwe Angletere ne Etats-Unis, “bwakalerhere bulimbuzi bunene.” (Da. 8:19, 23, 24, mahugulo m’eshishi.) Na ntyo kubyanabaga amango m’Evita lya Kabiri ly’Egulu Lyoshi. Bombe ebiri ze atomike zahikiraga kumala evita omu Pacifique, zakolwaga n’abantu basomere esiyanse b’omu Angletere ne Etas-Unis. Kweri omu kukola ezola bombe zombi, Oburhegesi bw’Egulu Lyoshi bwe Angletere ne Etats-Unis bwaliyandageze “omuliro oku gulu kurhenga omu mbingu.”

10. Bichi “echishushanyo che chinyalubala” chishushanyize? (Ufunuo 13:14, 15; 17:3, 8, 11)

¹⁰ Halaga echindi chinyalubala chikulikireho. Echila chishushire bwenene na chilala chinyalubala cha marhwe mushanvu, aliko chowe chigwerhe erangi ly’omuduku. Chiyirikirwe “chishushanyo cha chila chinyalubala” chinaderherwe oku “ali mwami wa munane.”c (Osome Ufunuo 13:14, 15; 17:3, 8, 11.) Yowane ayunva ok’oyola “mwami” akarhengerere na buzinda anahera, aliko anashuba kurhengerera. Amola mafasiriyo makwanene kweri oku bilolere Obuguma bw’Amashanja buyinja bwachiseza oku nyungu z’oburhegesi bw’epolitike omu gulu lyoshi! Burhanzi, olola lubaga lwalihamagerwe Mubano gw’Amashanja. Enyuma w’ahola, echola chinyalubala chahera amango m’Evita lya Kabiri ly’Egulu Lyoshi. Buzinda, chaja chashuba kurhengerera nka Buguma bw’Amashanja.

11. Bichi ebinyalubala yibyajira, na bulagurhe rhurhakwanene kubiyubaha?

¹¹ Kugerera ebinwa by’obubeshi, ebinyalubala changwa amarhegesi mali mahira abantu omurhima bapinge Yehova n’abantu bage. Yowane aliderhere oku bali nk’abali bagusha haguma “abami b’egulu lyoshi lilamirweko” oku vita lya Armagedoni, k’okuderha, “olusiku lukulu lwa Mungu Mugala-byoshi.” (Ufu. 16:13, 14, 16) Aliko nta chintu n’echiguma nji rhwayubaha. Mungu werhu mukulu Yehova nj’ajira juba-juba omu kuyokola balala boshi bashigikiire oburhegesi bwage.​—Eze. 38:21-23.

12. Bichi nji byahikira ebinyalubala byoshi?

¹² Bichi nji byahikira ebinyalubala byoshi? Ufunuo 19:20 eshubize ntya: “Echola chinyalubala chafarhwa, bombi n’olala mulebi w’obubeshi waliri ajira ebimenyeso embere zage akolesaga omu kuhabula balala bagwerhe echimenyeso cha chilala chinyalubaba na balala bali baharamya echishushanyo chage. Boshi bakabulwa omu nyanja y’omuliro eli yakolezwa n’echibiriti (soufre) eyibanachizene.” Bobola, oku binachili byarhegeka, k’okuderha amola marhegesi mali banzi ba Mungu nji balimbulwa burundu.

13. Bibazo bihe amarhegesi maguma mali malerhera Abakristu boshi?

¹³ Bichi ebyola birhuyigirize? Rhwabo nka Bakristu rhukwanene kugwarha obwimana ku Mungu n’Obwami bwage. (Yoh. 18:36) Yi rhugala kujira ntyo, bihemere rhurhachihebaga haba n’akatyu omu by’epolitike bya linola gulu. Aliko byakarhukomerera okurhachiheba omu by’epolitike bulala amarhegesi malinola gulu mashondere rhumashigikire omu binwa n’omu bijiro. Balala boshi banaleka amola marhegesi mabahidike, banahebwa kw’echimenyeso ch’echinyalubala. (Ufu. 13:16, 17) Aliko buli yeshi onahirwa kw’echola chimenyeso, anachikula oku lunda lwa Yehova, nj’arhanagwarha akalamo k’esiku n’amango. (Ufu. 14:9, 10; 20:4) Che chirhumire kuli kw’akamaro bwenene, rhumenye rhwachihira chiro n’eliguma omu by’epolitike chiro akaba oku amarhegesi manarhuhidika bwenene rhumashigikire!

14. Nk’oku olwandiko lwa Ufunuo 17:3-5 luderhere, chindi chintu chihe chisomeze entumwa Yowane abonaga?

¹⁴ Entumwa Yowane aderhere oku “alisomezwe bwenene” n’echindi chintu abonaga. Byebichi ebyola? Omukazi aliyikere ku chinyalubala chiguma mw’ebyola binyalubala bikalihire. (Ufu. 17:1, 2, 6) Ashushire nka “mbaraga nkulu” anayirikirwe “Babiloni mukulu.” Anajira “obubaraga” bwage “n’abami balinola gulu.”—Osome Ufunuo 17:3-5.

15-16. “Babiloni Mukulu ali nde,” na nka gurhe rhumenyere echola?

¹⁵ “Babiloni Mukulu yende”? Oyola mukazi arhakashushanya oburhegesi bulala echitabu cha Ufunuo chiderhere oku ali ajira obubaraga bwage n’abarhegesi b’epolitike b’elila gulu. (Ufu. 18:9) N’okuba ayikere oku chinya-lubala ey’ali achiyerekeza, biyerekene oku ali alwisa arhegeke abala barhegesi. Oku Bwindi, arhakashushanya abachuruzi bagwerhe obuhugu b’elila gulu lya Shetani. Bulala hali ahandi baganirweko omu chitabu cha Ufunuo, banayirikirwe “bachuruzi b’elila gulu.”​—Ufu. 18:11, 15, 16.

¹⁶ Omu mandiko, echinwa “mbaraga” chinakoleswa omu kuderha balala banachiyirika oku banakolera Mungu aliko banayinja baharamya ebishushanyo mu njira nguma; changwa omu yindi njira chakakoleswa omu kuderha balala bali bera b’elila gulu. (1 Ny. 5:25; Yak. 4:4) Oku lwindi lunda, Ebiblia ederhere oku balala banakolera Yehova oku bwimana baba bachere, enabayirikire “babikira.” (2 Ko. 11:2; Ufu. 14:4) Ebabiloni ya mira yeyaliri shoko y’obuharamye boshi b’obubeshi. Che chirhumire, Babiloni Mukulu akwanene kushushanya obuharamye boshi b’obubeshi. Ashushanyize amadini moshi m’obubeshi m’oku gulu.​—Ufu. 17:5, 18; olole omwazi guli oku jw.org guderhere: “Babiloni Mukulu Yende?”

17. Bichi nji byahikira Babiloni Mukulu?

¹⁷ Bichi byahikira Babiloni Mukulu? Ufunuo 17:16, 17 eshubize kw’echola chibazo omu kuderha ntya: “Amahembi ekumi wabonaga n’echinyalubala, nji mashomba eyola mbaraga n’okuyileka buzira chintu na butambara nji balya n’enyama yage n’okuyisireza yoshi oku muliro. Bulala Mungu ahebere echola omu mirhima yabo yi bayeneza ewazo lyage.” Nechi, Yehova nj’ashunika amashanja makolese echinyalubala ch’omuduku, k’okuderha Obuguma bw’Amashanja, barhere amadini moshi m’obubeshi m’oku gulu n’okumalimbula loshi-loshi.​—Ufu. 18:21-24.

18. Nka gurhe rhwakayerekana oku rhurhashigikire haba n’akatyu Babiloni Mukulu?

¹⁸ Bichi echola chirhuyigirize? Rhukwanene kugenderera kugwarha “obuharamye buchere burhanazingire embere za Mungu werhu.” (Yak. 1:27) Rhurhahira chiro haba n’eliguma rhukayemera rhwashumikwa n’enyigirizo z’obubeshi, esiku zikulu z’echipagani, n’ebijiro by’obukurungu bya Babiloni Mukulu! Rhunajage rhwagenderera kukengusya abantu “barhenge emwage,” yi Mungu arhababona oku bali basangira oku byaha byage.​—Ufu. 18:4.

19. “Enkuba-joka egwerhe erangi ly’omuliro,” ye nde?

¹⁹ Echitabu cha Ufunuo chishubire kuderhera oku “nkuba-joka nzibu-zibu y’erangi ly’omuliro.” (Ufu. 12:3) Eyola nkuba-joka eli yalwisa Yesu na bamalayika bage. (Ufu. 12:7-9) Eli yarhera abantu ba Mungu, n’okuha echinyalubala changwa oburhegesi bw’abantu emisi. (Ufu. 12:17; 13:4) Eyola nkuba-joka ali nde? Ali ela “njoka ya mira, eyirikirwe Shetani Ibilisi.” (Ufu. 12:9; 20:2) Yeli ashumika abandi boshi babe banzi ba Yehova.

20. Bichi nji byahikira enkuba-joka?

²⁰ Bichi nji byahikira enkuba-joka? Ufunuo 20:1-3 erhuyerekere oku malayika muguma nj’akabula Shetani omu abiso, eyola yi nji yaba nka pirizo yage. Amango Shetani nj’aba ashwekerwe mw’eyola abiso, “nj’arhachihabula haba n’akatyu amashanja kugera amango myaka 1 000 yahwa.” Oku buzinda, Shetani n’abazimu bage nji balimbulwa loshi omu “nyanja y’omuliro ekolezezwe ne soufre.” (Ufu. 20:10) Ba nka wachapa omu bwenge egulu lirhali mu Shetani n’abazimu bage. Ebyola nji byaba bisanzi bisimisize bwenene!

21. Bulagurhe ebi rhwasomere omu chitabu cha Ufunuo byakarhulerhera obusime?

²¹ Bihebere omurhima bwenene okuyunva amafasiriyo mʼebimenyeso bishamberwe omu chitabu cha Ufunuo! Rhurhagalire kurhegera konyine bande bali banzi ba Yehova aliko kandi rhwamenyere bichi nji byabahikira. Nechi, “ogwerhe obusime ali olala onasoma oku mulenge na balala bali bayunviriza ebinwa by’obula bulebi”! (Ufu. 1:3) Aliko si, enyuma y’okulimbulwa kw’abanzi boshi ba Mungu, migisho mihe abimana ba Mungu nji bapata? Nji rhwashambala kw’echola omu mwazi gukulikire ho.