Disiembre

Kon kaisa, may ginasiling ang Biblia nga daw nabudlayan kita maghangop. Ukon lain sa ginapaabot naton ang sabat ni Jehova sa aton mga pangamuyo. Posible ini mangin rason nga magduhaduha kita. Kon balewalaon lang naton ini, magaluya ang aton pagtuo kag mahalitan ang aton kaangtanan kay Jehova. (Sant. 1:7, 8) Kag posible indi naton mabaton ang aton paglaum sa palaabuton. Ginpaanggid ni apostol Pablo sa isa ka angkla ang aton paglaum sa palaabuton. (Heb. 6:19) Kon may bagyo, ang angkla nagabulig sa barko nga indi maanod kag indi makabunggo sa kabatuhan. Pero makabulig lang ang angkla kon ang kadena sini nga naangot sa barko indi mautod. Kon may tuktok ang kadena sang angkla, indi na ini mabakod. Sing kaanggid, kon nagaduhaduha kita, mahimo nga indi na mabakod ang aton pagtuo. Kag kon makaeksperiensia kita sang mga problema, indi kita dapat magduhaduha kay posible madula ang aton pagtuo kay Jehova nga tumanon niya ang iya mga promisa. Kon madula ang aton pagtuo, madulaan man kita sing paglaum. Kon matabo ini sa aton, indi gid kita mangin malipayon. w21.02 30 ¶14-15

Posible nga sobra na 70 anyos si Abraham sang naghalin sila sang iya pamilya sa Ur. (Gen. 11:31–12:4) Mga isa ka gatos ka tuig sia nga nag-istar sa mga tolda sa lainlain nga lugar sa Canaan. Napatay si Abraham sa edad nga 175. (Gen. 25:7) Napatay sia antes natuman ang promisa ni Jehova sa iya nga ihatag sa iya mga kaliwat ang duta sang Canaan. Kag patay na sia sang gintukod ang siudad, ukon ang Ginharian sang Dios. Pero suno sa Biblia, napatay si Abraham nga “tigulang kag kontento.” (Gen. 25:8) Bisan pa sang mga kabudlayan nga naeksperiensiahan ni Abraham, mabakod gihapon ang iya pagtuo kag handa sia nga maghulat kay Jehova. Ngaa nabatas niya ang mga kabudlayan? Bangod sa bug-os nga kabuhi ni Abraham, gin-amligan sia ni Jehova kag ginkabig sia nga abyan. (Gen. 15:1; Isa. 41:8; Sant. 2:22) Pareho kay Abraham, ginahulat naton ang siudad nga may matuod nga mga sadsaran. (Heb. 11:10) Pero, wala na naton ginahulat ang pagtukod sa sini. Kay man, natukod na ang Ginharian sang Dios sang 1914 kag nagagahom na ini sa langit. (Bug. 12:7-10) Ang ginahulat naton amo ang paggahom sini sa bug-os nga duta. w20.08 4 ¶11-12

Para makapamati kita sing maayo sa iban, dapat kita mangin mapainubuson kag mapinasensiahon. Dapat naton ini himuon bangod sang tatlo ka rason. Una, indi kita magahambal gilayon sing negatibo parte sa iban. Ikaduha, mahangpan naton ang ginabatyag kag ang motibo sang aton utod, kag magabulig ini sa aton nga magpakita sang kaluoy sa iya. Kag ikatlo, kon pabay-an naton nga maghambal ang aton utod, mahimo nga may marealisar man sia parte sa iya kaugalingon. Kon kaisa, mahangpan lang naton ang aton ginabatyag kon isugid naton ini sa iban. Nabudlayan ang iban nga kauturan nga isugid ang ila nabatyagan bangod sang mga natabo sa ila sang una, ukon bangod sang ila kultura ukon personalidad. Mahangpan lang naton kon ano gid ang ila ginabatyag kon isugid nila ini sa aton. Mahimo nga magaligad pa ang malawig nga tion para mapahamtang ang ila buot sa aton. Pero kon mangin mapinasensiahon kita pareho kay Jehova, sa ulihi saligan nila kita kag sugiran sang ila ginabatyag. Kon handa na sila nga isugid ang ila ginabatyag, dapat kita mamati sing maayo. w20.04 15-16 ¶6-7

Masami nga makita ang mga isda sa parte sang dagat nga gusto nila ang kainiton ukon kabugnawon sang tubig kag madamo sang pagkaon. Dapat nabal-an man sang mangingisda ang husto nga oras sa pagpangisda. Natun-an ini sang isa ka misyonero nga nagaalagad sa isa ka isla sa Pacific Ocean. Sang ginhagad sia sang isa ka tumandok nga utod nga magpangisda, nagsiling sia, “Sige, kitaay lang kita buas sa alas nuebe sa aga.” Ang utod nagsabat: “Indi puede nga magpagusto lang kita kon ano nga oras kita magpangisda. Dapat magpangisda kita sa oras nga madamo sang isda.” Amo man sini ang ginhimo sang mga disipulo ni Jesus sang unang siglo nga nangin mangingisda sang mga tawo. Nagbantala sila sa oras kag lugar nga madamo sang tawo. Halimbawa, nagbantala sila sa templo, mga sinagoga, mga balay, kag mga tiendahan. (Binu. 5:42; 17:17; 18:4) Sa aton teritoryo, dapat kabalo kita kon ano nga oras ara ang mga tawo sa ila balay kag kon sa diin nga lugar madamo sang tawo. Dapat naton i-adjust ang aton iskedyul para mabantalaan naton sila.—1 Cor. 9:19-23. w20.09 4 ¶8-9

Ang isa nga puede naton himuon para mangin abyan kita ni Jesus amo ang pagsakdag sa mga hilikuton sa Cristianong kongregasyon. Mangin suod pa gid kita kay Jesus nga ulo sang kongregasyon kon nagakooperar kita sa mga gintangdo sa pag-atipan sa aton. (Efe. 4:16) Halimbawa, ginasigurado naton nga magamit sa pinakamaayo nga paagi ang tanan nga Kingdom Hall. Gani may mga kongregasyon nga gintingob para mangin isa na lang ka kongregasyon. Paagi sa sini, daku ang nakinot sa kuarta nga gin-amot sa organisasyon. Pero dapat man mag-adjust ang pila ka manugbantala sa sini nga mga pagbag-o. Mahimo nga madugay na nga nagaalagad sa isa ka kongregasyon ining matutom nga mga manugbantala kag suod gid sila sa mga kauturan didto. Pero ginpangabay sila nga magsaylo sa lain nga kongregasyon. Nalipay gid si Jesus nga makita nga nagakooperar gid ining matutom nga mga disipulo! w20.04 24 ¶14

Ang hari sang aminhan kag hari sang bagatnan padayon nga nagadis-uganay para mangin pinakagamhanan sa kalibutan. Halimbawa, pagkatapos sang Bug-os Kalibutan nga Inaway II, gingamhan sang Soviet Union kag sang mga kaalyado sini ang kalabanan nga pungsod sa Europe. Bangod sini, nagdesisyon ang hari sang bagatnan nga makig-alyansa sa puersa militar sang iban pa nga mga pungsod, kag gintawag ini nga North Atlantic Treaty Organization (NATO). Ang hari sang aminhan kag hari sang bagatnan nagapaindisanay man kon sin-o sa ila ang may pinakamabakod nga puersa militar. Nagagasto sila sing daku para sa sini. Sa mga inaway sa Africa, Asia, kag Latin America, ginbuligan sang hari sang aminhan ang mga kaaway sang hari sang bagatnan. Sining nagligad nga mga tuig, ang Russia kag ang mga kaalyado sini nangin gamhanan gid sa bilog nga kalibutan. Ginakontra man nila ang hari sang bagatnan paagi sa mga kompyuter. Ginaakusahan sang hari sang bagatnan ang hari sang aminhan nga ginahalitan sini ang ila ekonomiya kag gobierno paagi sa paggamit sang mga program sa kompyuter. Amo man sini ang ginaakusar sang hari sang aminhan sa hari sang bagatnan. Kag suno gid sa tagna ni Daniel, padayon nga ginasalakay sang hari sang aminhan ang katawhan sang Dios.—Dan. 11:41. w20.05 13 ¶5-6

“Malimtan bala sang iloy ang iya nagatiti pa nga lapsag?” Ginpamangkot ini ni Jehova sang panahon ni manalagna Isaias. “Bisan pa ining mga babayi malipat, indi gid ako malipat sa imo,” siling sang Dios sa iya katawhan. (Isa. 49:15) Talagsa lang ginapaanggid ni Jehova ang iya kaugalingon sa isa ka iloy. Pero ginpaanggid ni Jehova ang iya ginabatyag sa iya mga alagad sa pagpalangga sang isa ka iloy sa iya bata. Ginhimo niya ini bangod gusto niya nga mabal-an nila nga palangga niya sila. Ang kalabanan nga mga iloy magakomporme gid sa ginsiling sang isa ka iloy nga si Jasmin. Nagsiling sia, “Kon ginapatiti sang iloy ang iya bata, nagaresulta ini sa suod nga kaangtanan nga pabaloran gid nila sa bilog nila nga kabuhi.” Mabal-an ni Jehova kon ang isa niya ka alagad mag-untat sa pagtambong sa mga miting kag sa pagbantala. Madamo sang pinalangga naton nga kauturan nga nangin indi aktibo ang nagabalik sa kongregasyon, kag nalipay gid kita sa sini! Gusto ni Jehova nga magbalik sila, kag amo man ina ang gusto naton.—1 Ped. 2:25. w20.06 18 ¶1-3

Indi tanan nga bahandi makita. Ang matuod, indi makita ang pinakahamili nga mga bahandi. Sa iya Sermon sa Bukid, ginsiling ni Jesus nga ang mga bahandi sa langit mas labaw sangsa materyal nga mga butang pareho sang kuarta. Nagsiling pa sia: “Kon diin ang inyo bahandi, didto man ang inyo tagipusuon.” (Mat. 6:19-21) Kon ginapabaloran gid naton ang isa ka butang, tinguhaan gid naton nga matigayon ini. Nagatipon kita sang ‘mga bahandi sa langit’ kon maayo ang aton reputasyon ukon kaangtanan sa Dios. Suno kay Jesus, ini nga mga bahandi indi maguba ukon makawat. Ginpalig-on kita ni apostol Pablo nga ‘ituon ang aton mga mata sa mga butang nga indi makita.’ (2 Cor. 4:17, 18) Nalakip sa sini ang mga pagpakamaayo nga mabaton naton sa bag-o nga kalibutan sang Dios. Ginapabaloran bala naton ini? w20.05 26 ¶1-2

Ang mga gintudlo ni Moises sa mga Israelinhon nagpabakod gid sang ila pagtuo kag nagpalig-on sa ila, pareho sang hustuhan lang nga ulan para magtubo ang tanom. Ano ang himuon naton para may amo man sini nga epekto ang aton pagtudlo sa iban? Kon nagapamalaybalay kita ukon nagabantala sa publiko nga mga lugar, gamiton naton ang aton Biblia para isugid sa mga tawo nga Jehova ang ngalan sang Dios. Puede naton sila hatagan sang matahom nga mga publikasyon, patan-awon sang manami nga mga video, kag ipakita sa ila ang mga unod sang aton website nga nagapadungog kay Jehova. Sa ulubrahan, sa eskwelahan, ukon samtang nagabiyahe kita, mahimo may mga kahigayunan nga maistorya naton sa iban ang parte sa aton Dios kag kon ano ang iya mga kinaiya. Kon sugiran naton ang iban parte sa dalayawon nga pagahimuon ni Jehova para sa aton kag sa duta, ginabuligan naton sila nga mabal-an nga palangga gid kita ni Jehova, kag mahimo bag-o ini nga panudlo sa ila. Paagi sa pagsugid sang mga kamatuoran parte sa aton mahigugmaon nga Amay, nagabulig kita sa pagpakabalaan sa ngalan sang Dios. Ginabuligan naton ang mga tawo nga mahangpan nga gintudluan gali sila sang madamo nga kabutigan parte kay Jehova. Makapaumpaw gid sa mga tawo ang mga ginatudlo naton halin sa Biblia.—Isa. 65:13, 14. w20.06 10 ¶8-9

Ano nga mga kinaiya ang dapat naton ipakita para mabuligan naton ang mga gusto magbalik kay Jehova? Binagbinagon naton ang aton matun-an sa ilustrasyon ni Jesus parte sa isa ka anak nga naghalin sa ila balay. (Luc. 15:17-24) Sang ulihi, nakamarasmas ini nga anak kag nagbalik sia sa ila balay. Nagdalagan ang iya amay para sugataon sia. Ginhakos sia sang iya amay sing hugot para ipabatyag sa iya nga palangga niya sia. Ginkonsiensia gid sia sa iya ginhimo kag para sa iya indi na sia bagay nga tawgon nga anak. Ginsugid sang anak sa iya amay ang iya ginabatyag kag naluoy gid sa iya ang iya amay. Dayon may mga ginhimo ang amay para ipabatyag sa iya anak nga nalipay sia nga nagbalik ang iya pinalangga nga anak. Para ipakita sang amay nga nalipay sia nga naghinulsol ang iya anak nga nagbalik sa iya, nagpahanda sia sing sinalusalo kag ginpasuksukan sang manami gid nga bayo ang iya anak. Si Jehova pareho sa amay sa sina nga ilustrasyon. Palangga niya ang aton mga kauturan nga indi aktibo kag gusto niya nga magbalik sila sa iya. Kon ilugon naton si Jehova, mabuligan naton sila nga makabalik. Para mahimo ini, kinahanglan naton ipakita ang pasensia, empatiya, kag gugma. w20.06 25-26 ¶8-9

Nagsiling si Jesus nga ‘nalipay’ ang iban sang natun-an nila ang kamatuoran, pero nagluya ang ila pagtuo sang nakaeksperiensia sila sang mga problema. (Mat. 13:3-6, 20, 21) Posible nga wala nila mahangpan nga ang mga nagasunod kay Jesus makaeksperiensia sang mga kabudlayan. (Mat. 16:24) Ukon posible nga abi nila nga kon mangin Cristiano ang isa, indi na sia makaeksperiensia sing problema, kundi puro lang pagpakamaayo. Pero indi gid malikawan ang mga kabudlayan sa sini nga kalibutan. Mahimo magbag-o ang aton kahimtangan nga makapasubo sa aton. (Sal. 6:6; Man. 9:11) Ang kalabanan sa aton mga kauturan kumbinsido gid nga ang ila ginapatihan amo ang kamatuoran. Ngaa masiling naton ini? Wala nagluya ang ila pagtuo bisan pa nasakitan sila sa ginhimo ukon ginsiling sang isa ka utod. Mabakod gihapon ang ila pagtuo bisan pa nga nakahimo sang sala ang isa ka utod. (Sal. 119:165) Kon may problema sila, wala nagaluya ang ila pagtuo, kundi mas nagabakod ini. (Sant. 1:2-4) Dapat mangin pareho sini kabakod ang aton pagtuo. w20.07 8 ¶1; 9 ¶4-5

Antes mo basahon ang Biblia, pangabaya si Jehova nga buligan ka nga makita ang mga leksion nga makabulig sa imo. Halimbawa, pangabaya si Jehova nga buligan ka nga makita ang mga prinsipio sa Biblia nga makabulig sa imo nga masarangan ang imo problema, kag mabal-an kon ano ang dapat mo himuon. (Fil. 4:6, 7) Ginhatagan kita ni Jehova sang dalayawon nga ikasarang nga maimadyin ang mga butang. Kon nagabasa ka sang isa ka kasaysayan sa Biblia, imadyina nga ikaw ang panguna nga karakter. Imadyina ang iya mga nakita kag nabatyagan, kag imadyina ang mga nagakatabo. Paagi sa sini, mangin tuodtuod ang kasaysayan nga imo ginabasa. Dayon, magpamalandong. Ang pagpamalandong amo ang paghunahuna sing maayo sa imo ginabasa kag kon paano mo ini iaplikar. Makabulig ini sa imo nga mahangpan sing maayo ang imo ginabasa kag mabal-an kon ano ang kaangtanan sini sa iban pa nga impormasyon. Kon nagabasa ka sang Biblia pero wala ka nagapamalandong, daw pareho lang ina nga may puzzle ka nga nagalinapta sa lamesa pero wala mo ini ginasugponsugpon. Kon nagapamalandong ka, daw pareho lang nga ginasugponsugpon mo ang puzzle para makita mo kon ano gid ang hitsura sini. w21.03 15 ¶3-5

Puede kuntani pamensaron ni apostol Pablo nga kon wala sia nangin Cristiano, wala kuntani sia mapriso. Puede man kuntani nga maakig sia sa mga tawo sa distrito sang Asia nga nagbiya sa iya, kag puede kuntani nga indi na niya pagsaligan ang iya mga abyan. Pero wala ini ginhimo ni Pablo. Bisan pa kabalo si Pablo nga malapit na sia patyon, wala niya ginkalimtan nga importante gid nga mahimaya si Jehova. Kag pirme niya ginahunahuna kon paano niya mapalig-on ang iban. Nagsalig sia kay Jehova kag pirme sia nagapangamuyo sa iya. Sa baylo nga magpokus sa mga kauturan nga nagbiya sa iya, ginpasalamatan niya ang iya mahigugmaon nga mga abyan nga nagbulig sa iya. Padayon man nga gintun-an ni Pablo ang Pulong sang Dios. (2 Tim. 3:16, 17; 4:13) Kag ang pinakaimportante, sigurado sia nga palangga sia ni Jehova kag ni Jesus. w21.03 18 ¶17-18

Sang mga ikaduha nga siglo C.E., madamo nga indi matuod nga mga Cristiano ang nagsulod sa Cristianong kongregasyon. Gintudlo nila ang butig nga mga panudlo imbes nga ang mga kamatuoran sa Pulong sang Dios. Sugod sadto asta sang mga 1870, wala sing naorganisar nga grupo sang katawhan sang Dios sa duta. Ang indi matuod nga mga Cristiano nagdamo nga daw hilamon, gani mabudlay na makilala kon sin-o gid ang matuod nga mga Cristiano. (Mat. 13:36-43) Ngaa importante ini nga impormasyon? Bangod ginapakita sini nga wala sing mga manuggahom ukon mga gobierno sugod sang ikaduha nga siglo asta sang mga 1870 ang matawag nga hari sang aminhan kag hari sang bagatnan nga ginsambit sa Daniel kapitulo 11. Kay man, wala sing naorganisar nga grupo sang katawhan sang Dios nga puede nila salakayon sadto nga tion. Pero, makasiling kita nga pagligad sang 1870, may ara naman hari sang aminhan kag hari sang bagatnan. w20.05 3 ¶5

Gintagna ni Joel nga halitan sang mga apan ang duta sang Israel. Ubuson gid sini nga mga insekto ang tanan nga pananom! (Joel 1:4) Madugay na naton nga ginhangop nga ginatagna sini ang padayon nga pagbantala sang katawhan ni Jehova nga pareho sang nagapanong nga mga apan nga indi mapauntat. Ginhangop naton nga ini nga pagbantala may daku nga epekto sa “duta,” ukon sa katawhan nga kontrolado sang mga lider sang relihion. Pero kon binagbinagon naton ang kabilugan sini nga tagna, mahangpan naton nga lain ang ginapatuhuyan sini. Nagpromisa si Jehova parte sa mga apan: “Tabugon ko palayo sa inyo ang nagasalakay halin sa aminhan [ang mga apan].” (Joel 2:20) Kon nagapatuhoy ang mga apan sa mga Saksi ni Jehova nga nagatuman sa sugo ni Jesus nga magbantala kag magtudlo sa mga tawo, ngaa nagpromisa si Jehova nga tabugon niya sila? (Ezeq. 33:7-9; Mat. 28:19, 20) Maathag nga indi pagtabugon ni Jehova ang iya matutom nga mga alagad kundi ang kaaway sang iya katawhan. w20.04 2-3 ¶3-5

Ano ang dapat naton himuon kon pamatyag naton wala dayon ginsabat ni Jehova ang aton pangamuyo? Si Santiago nagsiling nga dapat ‘padayon kita nga magpangayo’ sa Dios. Wala natak-an si Jehova bisan pa sulitsulit kita nga mangayo sing kaalam sa iya. Indi gid sia maakig sa aton. Kon mangamuyo kita sa aton Amay sa langit sing kaalam para mabatas ang aton mga problema, “maalwan Sia nga nagahatag.” (Sal. 25:12, 13) Nabal-an niya ang aton mga problema, nasubuan sia kon nagaantos kita, kag gusto gid niya kita buligan. Nagahatag gid ini sa aton sang kalipay. Pero, paano naman kita ginahatagan ni Jehova sing kaalam? Paagi sa iya Pulong. (Hulu. 2:6) Para mabaton naton ina nga kaalam, dapat naton tun-an ang Pulong sang Dios kag ang aton mga publikasyon. Pero magluwas sa pagtuon, may dapat pa kita himuon. Dapat naton sundon ang ginapahimo sang Dios sa aton. Si Santiago nagsulat: “Mangin mga manugtuman kamo sang pulong kag indi mga manugpamati lamang.” (Sant. 1:22) Kon ginasunod naton ang laygay sang Dios, mangin mas mahidaiton kita, makatarunganon, kag maluluy-on. (Sant. 3:17) Ini nga mga kinaiya makabulig sa aton nga mabatas ang bisan ano nga problema kag indi madula ang aton kalipay. w21.02 28-29 ¶10-11

Mas daku ang posibilidad nga padayon nga mag-uswag kag magpabawtismo ang isa ka Bible study kon ginabuligan sia sang mga kauturan sa kongregasyon. Ang tanan nga manugbantala makabulig para magdesisyon ang ginatudluan sang Biblia nga mangin bahin sang kongregasyon. Ang isa ka payunir nagsiling: “May hulubaton nga nagasiling nga kinahanglan magbuligay ang bilog nga baryo para ang isa ka bata mangin isa ka maayo nga tawo sa ulihi. Nagapati ako nga kinahanglan man magbuligay ang bilog nga kongregasyon para mangin disipulo ang isa nga ginatudluan sang Biblia.” Kinahanglan magbuligay ang mga miembro sang pamilya, mga abyan, mga maestro, kag mga maestra para maghamtong ang isa ka bata. Kinahanglan nila sia palig-unon kag tudluan. Mabuligan man sang mga manugbantala ang mga ginatudluan sang Biblia nga mag-uswag kag magpabawtismo paagi sa ila mga laygay, pagpalig-on, kag maayo nga halimbawa. (Hulu. 15:22) Kon ang isa ka utod may Bible study, ngaa dapat sia magpabulig sa iban nga kauturan? Bangod madamo ang puede makabulig para mag-uswag ang isa ka Bible study. w21.03 8 ¶1-3

Dapat maghalong ang tanan nga Cristiano, bata man ukon tigulang, nga indi magpakunokuno nga nagaalagad kay Jehova pero may ginahimo gali sila nga sala. Nagsiling si apostol Juan nga indi kita makalakat sa kamatuoran kon nagahimo kita sang imoral. (1 Juan 1:6) Para malipay sa aton si Jehova, dapat naton dumdumon nga makita niya ang tanan naton nga ginahimo. Bisan pa matago naton sa mga tawo ang ginahimo naton nga sala, makita ini gihapon ni Jehova. (Heb. 4:13) Indi naton dapat pagsundon ang pagtamod sang kalibutan sa sala. Sang panahon ni Juan, nagsiling ang mga apostata nga puede gihapon mangin suod sa Dios ang isa ka tawo bisan pa nagahimo sia sang sala. Amo man sini ang pagpati sang mga tawo subong. Madamo ang nagapati sa Dios, pero wala sila nagakomporme sa pagtamod ni Jehova sa sala, ilabi na parte sa pagpakig-sex. Bisan pa para kay Jehova sala ang ila ginahimo, nagasiling sila nga indi ini sala kay amo ini ang ila gusto. w20.07 22 ¶7-8

Ginapangapinan mo bala ang imo mga utod nga babayi sa kongregasyon? Binagbinaga ini nga sitwasyon. Natalupangdan sang pila ka kauturan nga pirme lang ulihi mag-abot sa mga miting ang isa ka sister nga indi Saksi ang bana, kag nagapauli sia dayon pagkatapos sang miting. Natalupangdan man nila nga talagsa niya lang ginaupod ang iya kabataan. Gani ginapakalain nila ang sister kay wala niya kuno ginahimo ang iya bug-os nga masarangan para ipaathag sa iya bana ang iya mga ginapatihan. Pero wala sila kabalo nga ginahimo gid sang sister ang iya bug-os nga masarangan, ugaling indi sia makapagusto sa luyag niya nga himuon, kag wala man sia sing mahimo kon indi magpasugot ang iya bana nga updon niya ang ila kabataan. Kon dayawon mo ang sister sa iya mga pagpanikasog kag isugid mo sa iban nga kauturan ang mga maayo niya nga ginahimo, posible nga magauntat ang pagpakalain sa iya. Kabalo ang mga gulang nga gusto ni Jehova nga dapat atipanon sing maayo ang mga utod nga babayi. (Sant. 1:27) Gani ginailog sang mga gulang ang pagkamakatarunganon ni Jesus. Wala sila nagahimo sang indi kinahanglanon nga mga pagsulundan kundi nagapakita sila sang kaayo kag pagpasunaid. (Mat. 15:22-28) Kon ginapanikasugan sang mga gulang nga buligan ang ila mga utod nga babayi sa kongregasyon, mabatyagan sini nga mga utod nga palangga sila ni Jehova kag sang iya organisasyon. w20.09 24-25 ¶17-19

Mapainubuson gid si manalagna Daniel kag pirme sia nagapagiya kay Jehova. Halimbawa, sang gingamit sia ni Jehova para ipaathag ang kahulugan sang damgo ni Nabocodonosor, wala nagsiling si Daniel nga sia ang dapat padunggan. Sa baylo, mapainubuson sia nga nagsiling nga si Jehova lang ang dapat dayawon kag padunggan. (Dan. 2:26-28) Ano ang matun-an naton sa sini? Kon nanamian ang mga kauturan sa aton pamulongpulong ukon may maayo kita nga mga eksperiensia sa ministeryo, dapat naton ihatag kay Jehova ang tanan nga kadungganan. Dapat naton batunon nga nahimo lang naton ini bangod ginbuligan kita ni Jehova. (Fil. 4:13) Kon himuon naton ini, ginailog man naton ang halimbawa ni Jesus. Nagsalig si Jesus kay Jehova. (Juan 5:19, 30) Wala gid niya gintinguhaan nga kuhaon ang responsibilidad sang iya Amay sa langit. Ang Filipos 2:6 nagasiling nga ‘wala maghunahuna si Jesus nga mang-agaw, buot silingon, nga mangin tupong sia sa Dios.’ Nahangpan ni Jesus nga may mga butang nga wala sia sing kinamatarong nga himuon kag nagpasakop sia sa awtoridad sang iya Amay. w20.08 11 ¶12-13

May iban nga nagadalagan sa dalan nga nagapadulong sa kabuhi nga may mga problema nga indi makita kag mahimo indi mahangpan sang iban. Kon indi mo na mahimo ang gusto mo himuon sa pag-alagad kay Jehova kag pamatyag mo indi ka mahangpan sang iban, mapalig-on ka sa halimbawa ni Mefiboset. (2 Sam. 4:4) Napiang sia halin sang bata pa sia, kag gintratar sia ni Hari David sing indi makatarunganon base sa ginsiling sang iban parte sa iya. Pero wala sia naakig, kag nagpasalamat pa sia sa maayo nga natabo sa iya. Nagpasalamat sia sa ginpakita sa iya ni David nga kaayo sang una. (2 Sam. 9:6-10) Gani sang gintratar sia ni David sing indi makatarunganon, gintinguhaan niya nga mahangpan ang bug-os nga sitwasyon. Wala sia naakig kay nagsala si David. Kag wala niya ginbasol si Jehova sa ginhimo ni David. Ginhunahuna ni Mefiboset kon paano niya masuportahan ang hari nga ginpili ni Jehova. (2 Sam. 16:1-4; 19:24-30) Ginpasulat ni Jehova sa iya Pulong ang maayo gid nga halimbawa ni Mefiboset kay may matun-an kita sa sini.—Roma 15:4. w20.04 26 ¶3; 30 ¶18-19

Ang pila ka kauturan sa kongregasyon mahimo itangdo bilang misyonero, espesyal payunir, ukon regular payunir. Nagabantala sila kag nagatudlo sa iban sing bug-os tion. Ang kalabanan nga nagaalagad kay Jehova sing bug-os tion indi manggaranon, pero ginapakamaayo gid sila ni Jehova. (Mar. 10:29, 30) Palangga gid naton ini nga mga kauturan, kag nagapasalamat gid kita nga bahin sila sang kongregasyon. Ang gintangdo lang bala nga mga brother kag ang mga nagaalagad sing bug-os tion ang may responsibilidad sa kongregasyon? Indi. Ang kada manugbantala sang maayong balita importante sa Dios kag sa kongregasyon. (Roma 10:15; 1 Cor. 3:6-8) Kay man, ang isa sa pinakaimportante nga katuyuan sang kongregasyon amo ang pagtudlo sa iban para mangin disipulo sila sang aton Ginuong Jesucristo. (Mat. 28:19, 20; 1 Tim. 2:4) Ginatinguhaan sang tanan nga bawtismado kag indi bawtismado nga manugbantala sa kongregasyon nga unahon sa ila kabuhi ini nga hilikuton.—Mat. 24:14. w20.08 21 ¶7-8

Buligan kita ni Jesus kon makaeksperiensia kita sang mga problema, pareho sa ginasiling sang teksto subong nga adlaw. Makapalig-on gid sa aton ining ginsiling ni Jesus. Ngaa? Bangod may mga tion nga nabudlayan kita nga magbatas. Halimbawa, kon mapatyan kita sang pinalangga, indi dayon madula ang aton kasubo pagligad lang sang pila ka adlaw. Posible nga tinuig pa naton ini nga mabatyagan. Para naman sa mga tigulang na, may mga tion nga nabudlayan gid sila. Ang iban naman nabudlayan bangod na-depress sila. Bisan pa sang sini nga mga kabudlayan, nagapadayon kita kay kabalo kita nga kaupod naton si Jesus “sa tanan nga tion,” lakip na sa tion nga makaeksperiensia kita sang mabudlay nga mga problema. (Mat. 11:28-30) Ang Pulong sang Dios nagapasalig sa aton nga ginagamit ni Jehova ang mga anghel para buligan kita. (Heb. 1:7, 14) Halimbawa, ginabuligan kita sang mga anghel sa aton pagbantala sang “maayong balita sang Ginharian” sa mga tawo “sa tagsa ka pungsod kag tribo kag hambal kag katawhan.”—Mat. 24:13, 14; Bug. 14:6. w20.11 13-14 ¶6-7

Gusto naton nga mahangpan sang aton ginatudluan nga ang iya mga ginatun-an naghalin sa Pulong sang Dios. (1 Tes. 2:13) Paano naton ini himuon? Palig-una ang imo ginatudluan nga ihambal ang iya mga natun-an. Imbes nga ikaw lang pirme ang magpaathag sa iya sang mga teksto, pangabaya sia nga ipaathag sa imo ang iban nga teksto. Buligi sia nga iaplikar ang iya mga natun-an. Maggamit sang mga pamangkot nga magapalig-on sa iya nga isugid ang iya ginahunahuna kag ginabatyag parte sa teksto nga iya ginbasa. (Luc. 10:25-28) Halimbawa, pamangkuta sia: “Ano nga kinaiya ni Jehova ang matun-an mo sa sini nga teksto?” “Ano sa banta mo ang benepisyo sa imo kay nabal-an mo na subong ini nga mga kamatuoran sa Biblia?” “Ano ang masiling mo sa imo natun-an?” Indi ang kadamuon sang iya nabal-an ang pinakaimportante, kundi kon bala ginapabaloran niya kag ginaaplikar ang iya mga natun-an. Gamita ang Biblia sa pagtudlo. Dapat mangin mapainubuson ka kon gusto mo nga mag-uswag sa imo paagi sang pagtudlo sa iban. w20.10 15-16 ¶5-6

Makasalig kita nga ang pagbantala sang Ginharian matapos gid sa husto nga tion. Binagbinaga ang natabo sang panahon ni Noe. Ginpakita ni Jehova nga kabalo gid sia kon san-o ang pinakamaayo nga tion nga himuon ang isa ka hilikuton. Mga 120 ka tuig antes sang Baha, nakadesisyon na si Jehova kon san-o niya ini pahanabuon. Pagligad sang madamo nga tinuig, ginsugo ni Jehova si Noe nga maghimo sang arka. Sa sulod sang mga 40 ukon 50 ka tuig antes sang Baha, nangin masako gid si Noe sa paghimo sang hilikuton nga ginsugo sa iya ni Jehova. Bisan pa wala namati ang mga tawo sa iya, padayon nga ginbantala ni Noe ang paandam ni Jehova asta sa tion nga nagsiling si Jehova nga magsulod na sa arka. Dayon sa husto gid nga tion, “ginsira ni Jehova ang puertahan.” (Gen. 6:3; 7:1, 2, 16) Malapit na lang gid ang tion nga magasiling si Jehova nga natapos na ang pagbantala sang Ginharian. Dayon laglagon niya ang kalibutan ni Satanas kag paistaron niya sa bag-ong kalibutan ang mga tawo nga matinumanon sa iya. Samtang wala pa ini, ilugon naton si Noe kag ang iban pa nga padayon nga nangin mapisan sa ila hilikuton. Kabay pa nga unahon naton pirme sa aton kabuhi ang pagbantala, mangin mapinasensiahon kita, kag pabakuron naton ang aton pagtuo kay Jehova kag sa iya mga promisa. w20.09 13 ¶18-19

Kon indi maathag kon sin-o ang may awtoridad sa pamilya ni Jehova, mangin indi malipayon ang iya pamilya bangod indi sila organisado. Halimbawa, indi sila kabalo kon sin-o ang magahimo sang desisyon kag kon sin-o ang magapatuman sini. Kon para sa kaayuhan ang paghatag sang awtoridad sa lalaki sa pamilya, ngaa madamo nga babayi ang nagabatyag nga ginapintasan sila? Bangod wala ginasunod sang madamo nga lalaki ang mga ginapatuman ni Jehova. Sa baylo, ginasunod nila ang mga kustombre sa ila lugar. Mahimo nga nalipay sila kon ginasakit nila ang ila asawa. Halimbawa, mahimo kontrolon sang bana ang iya asawa para ipakita nga mas importante sia ukon pamatud-an sa iban nga matuod sia nga lalaki. Mahimo magpensar sia nga OK lang nga indi sia palangga sang iya asawa. Ang importante sa iya amo nga nahadlok ang iya asawa sa iya. Kag kon mahadlok na ang iya asawa sa iya, mas mahapos na sa iya nga kontrolon ang iya asawa. Sala gid kon ginapamensar kag ginahimo ini sang mga lalaki. Kay man, wala nila ginarespeto ang mga babayi, kag indi amo ini ang gusto ni Jehova nga himuon nila.—Efe. 5:25, 28. w21.02 3 ¶6-7

Kon may ginakabalak-an ka nga problema, makapangayo ka sing bulig kay Jehova paagi sa pangamuyo. Mahimo sabton ni Jehova ang imo mga pangamuyo paagi sa paghatag sa imo sang “paghidait sang Dios nga labaw sa tanan nga paghangop” sang tawo. (Fil. 4:6, 7) Buligan ka ni Jehova nga mangin kalmado paagi sa iya gamhanan nga balaan nga espiritu. (Gal. 5:22) Kon nagapangamuyo ka kay Jehova, isugid sa iya ang tanan mo nga ginabatyag. Isugid sa iya kon ano gid ang imo problema kag kon ano ang imo ginabatyag parte sa sini. Pangabaya sia nga hatagan ka sing kaalam nga mabal-an ang solusyon sa imo problema kag sing kusog para masolbar ini. Kon wala ka na sang mahimo sa imo problema, pangabaya si Jehova nga buligan ka nga indi mabalaka sing sobra. Kon ginasugid mo kay Jehova kon ano gid ang imo problema, mas madali mo makita ang iya sabat sa imo mga pangamuyo. Kon wala dayon ginsabat ang imo pangamuyo, magpadayon gihapon sa pagpangamuyo. Gusto ni Jehova nga isugid mo sa iya kon ano gid ang imo problema, kag gusto man niya nga padayon mo ini nga ipangamuyo.—Luc. 11:8-10. w21.01 3 ¶6-7

Sa mga kongregasyon, may mga mag-asawa kag mga pamilya. Pero may mga kauturan man nga soltero kag dalaga. Paano naton dapat tamdon ang mga soltero kag dalaga? Binagbinaga kon paano sila gintamod ni Jesus. Sa tion sang ministeryo ni Jesus diri sa duta, wala sia nagpangasawa. Gingamit niya ang iya tion sa iya asaynment kag nagpokus sia sa sini. Wala gid gintudlo ni Jesus nga dapat magpangasawa ukon magpamana ang mga Cristiano. Kag wala man niya gintudlo nga dapat sila magpabilin nga soltero ukon dalaga. Pero nagsiling sia nga may pila nga nagdesisyon nga indi magpangasawa ukon magpamana. (Mat. 19:12) Ginrespeto ni Jesus ang mga wala nagpangasawa ukon nagpamana. Wala ginhunahuna ni Jesus nga may kulang sa ila kabuhi ukon mas maayo ang mga mag-asawa sangsa ila. Pareho kay Jesus, wala man nagpangasawa si apostol Pablo sa tion sang iya ministeryo. Wala gid gintudlo ni Pablo nga isa ka sala kon magpangasawa ukon magpamana ang isa ka Cristiano. Kabalo sia nga desisyon ini sang kada isa. w20.08 27-28 ¶7-8

Malawig nga nagkabuhi si apostol Juan, kag madamo sia sang makalilipay nga eksperiensia. Nakaeksperiensia man sia sang madamo nga kabudlayan nga puede magpaluya sang iya pagtuo. Pero ginhimo niya ang iya bug-os nga masarangan para tumanon ang mga sugo ni Jesus, pareho sang sugo nga higugmaon ang iya mga kauturan. Gani sigurado gid si Juan nga ginhigugma sia ni Jehova kag ni Jesus kag buligan nila sia nga mabatas ang mga kabudlayan. (Juan 14:15-17; 15:10) Wala gid si Juan naimpluwensiahan ni Satanas ukon sang iya kalibutan. Ginhigugma gid ni Juan ang iya mga kauturan paagi sa iya ginsiling kag ginhimo. Pareho kay Juan, nagaistar man kita sa kalibutan nga ginagamhan ni Satanas, nga wala gid nagapakita sang gugma. (1 Juan 3:1, 10) Gusto ni Satanas nga indi na naton pagpalanggaon ang aton mga kauturan, pero indi ina matabo kon indi kita magpaimpluwensia sa iya. Dapat naton palanggaon ang aton mga kauturan, kag pamatud-an naton ini sa aton mga ginasiling kag mga ginahimo. Kon himuon naton ini, mangin malipayon gid kita kay bahin kita sang pamilya ni Jehova.—1 Juan 4:7. w21.01 13 ¶18-19

Mabudlay gid ang kabuhi sa kalibutan nga kontrolado ni Satanas, kag kon kaisa, indi kita kabalo kon ano ang dapat naton himuon. (2 Tim. 3:1) Pero indi kita dapat mabalaka ukon mahadlok. Kabalo si Jehova kon ano ang aton mga problema. Kon kinahanglan naton sing bulig, nagpromisa sia nga uyatan niya kita sang iya makusog nga tuo nga kamot. (Isaias 41:10, 13) Makasalig kita nga buligan gid kita ni Jehova. Kay man, makabulig ang pagbasa sang Biblia para masarangan naton ang bisan ano nga problema. Ang aton mga video, mga drama sa Biblia, kag mga artikulo sa “Iluga ang Ila Pagtuo” makabulig sa aton para mangin tuodtuod ang mga kasaysayan sa Biblia. Antes mo tan-awon, pamatian, ukon basahon ini nga mga kasaysayan, pangabaya si Jehova nga buligan ka nga makita ang importante nga mga leksion nga makabulig gid sa imo. Imadyina nga ikaw ang panguna nga karakter. Pamalandungi kon ano ang ginhimo sining matutom nga mga alagad ni Jehova kag kon paano niya sila ginbuligan nga masarangan ang ila mga problema. Dayon iaplikar ang imo mga natun-an sa imo sitwasyon subong. Pasalamati si Jehova kay padayon ka niya nga ginabuligan. Kag ipakita ang imo apresasyon sa mga bulig nga nabaton mo paagi sa pagpangita sang mga kahigayunan nga mapalig-on kag mabuligan ang iban. w21.03 19 ¶22-23

Ang mag-asawa nga nagaplano nga magbata dapat mamangkot sa ila kaugalingon: ‘Mapainubuson bala kami? Palangga bala namon si Jehova kag ginapabaloran bala namon ang iya Pulong? Nagakabagay bala kami nga pilion ni Jehova nga mag-atipan sang isa ka bata nga hamili sa iya?’ (Sal. 127:4) Kon isa ikaw ka ginikanan, pamangkuta ang imo kaugalingon: ‘Ginatudluan ko bala ang akon kabataan nga mangin mapisan sa pag-obra?’ (Man. 3:12, 13) ‘Ginapanikasugan ko gid bala nga amligan ang akon kabataan sa malain nga mga impluwensia?’ (Hulu. 22:3) Imposible nga maamligan mo ang imo kabataan sa tanan nga problema. Pero may mahimo ka para mangin handa sila sa mga problema. Bangod palangga mo sila, padayon sila nga tudlui nga magsalig sa mga laygay sang Pulong sang Dios. (Hulu. 2:1-6) Halimbawa, kon may paryente kamo nga nag-untat sa pag-alagad kay Jehova, gamita ang Pulong sang Dios para mahangpan sang imo kabataan nga mas importante si Jehova kag dapat kita mangin matutom sa Iya. (Sal. 31:23) Kag kon mapatyan kamo sang pinalangga, ipakita sa imo kabataan ang mga teksto sa Biblia nga makapahaganhagan sang ila kasubo kag makapaumpaw sa ila.—2 Cor. 1:3, 4; 2 Tim. 3:16. w20.10 27 ¶7