Sa Israel sang una, nagahiwat sila sang Adlaw sang Pagtumbas Para sa Sala kada tuig. Sa sina nga adlaw, nagahalad sing mga sapat ang mataas nga saserdote para sa mga sala sang katawhan. Siempre, indi bug-os nga matumbasan sang halad nga mga sapat ang mga sala sang mga Israelinhon bangod mas manubo ang balor sang mga sapat sangsa mga tawo. Pero handa si Jehova nga patawaron ang mga Israelinhon basta nagahinulsol sila kag ginatuman nila ang iya mga kasuguan parte sa paghalad. (Heb. 10:​1-4) Paagi sa sini nga kahimusan, narealisar sang mga Israelinhon nga makasasala sila. Pero, may ginhimo si Jehova nga permanente nga kahimusan para mapatawad niya ang aton mga sala. “Ginhalad” niya ang iya pinalangga nga Anak “sing makaisa gid lang agod dalhon ang mga sala sang madamo.” (Heb. 9:28) Kag ‘ginhatag ni Jesus ang iya kabuhi nga gawad kabaylo sang madamo.’—Mat. 20:28. w25.02 4 ¶9-10

“Sa pagkamatuod, ang espiritu handa, apang ang unod maluya.” (Mat. 26:41b) Base sa sining ginsiling ni Jesus, ginpakita niya nga nahangpan niya nga indi kita perpekto kag makahimo kita sang sala. Pero ginsiling man niya ini para paandaman kita nga likawan naton ang sobra nga pagsalig sa aton kaugalingon. Mga pila ka oras antes ini ginsiling ni Jesus, nagpromisa ang iya mga disipulo nga indi gid nila sia pagbiyaan. (Mat. 26:35) Maayo gid ang ila mga motibo. Pero wala nila narealisar nga kon ara sila sa pagtilaw, kadasig lang gali madula sang ila determinasyon nga himuon ang husto. Gani, ginpaandaman sila ni Jesus nga mabasa sa aton teksto subong nga adlaw. Makapasubo nga wala nakapadayon sa pagbantay ang mga disipulo. Sang gindakop si Jesus, nag-unong bala sila sa iya? Ukon hinadlukan sila kag nagpalagyo? Bangod wala nakapadayon sa pagbantay ang mga disipulo, ginbiyaan nila si Jesus. Gani, ginhimo nila ang ginsiling nila nga indi gid nila paghimuon.​—Mat. 26:56. w24.07 14 ¶1-2

Nadula ni Adan kag ni Eva ang ila hamili nga kaangtanan sa ila Amay nga si Jehova. Antes nagpakasala si Adan kag si Eva, bahin sila sang pamilya sang Dios. (Luc. 3:38) Pero sang ginlapas nila ang sugo ni Jehova, ginpagua niya sila sa iya pamilya. Natabo ini antes pa sila makabata. (Gen. 3:​23, 24; 4:1) Gani bilang ila mga anak, kinahanglan gid naton ang bulig para mapasag-uli kita kay Jehova. (Roma 5:​10, 11) Buot silingon, dapat mangin maayo liwat ang aton kaangtanan sa iya. Suno sa isa ka reperensia, ang Griego nga tinaga nga gingamit para sa “pagpasag-uli” nagakahulugan nga “himuon nga abyan ang isa ka kaaway.” Dalayawon gid si Jehova kay sia ang nagpaposible para mangin abyan naton sia. Paano? Paagi sa pagtumbas nga ginhimo ni Jehova, mapasag-uli ang maayo nga kaangtanan sang makasasala nga mga tawo sa iya. Para mabalik ang isa ka butang nga nadula, dapat pareho ang balor sang butang nga ibaylo sa sini. Sa bahin ni Jehova, gintumbasan niya ang nadula ni Adan. w25.02 3-4 ¶7-8