Xav txog thaum koj nyuam qhuav los paub qhov tseeb es koj muaj kev zoo siab npaum li cas. Koj kawm tau tias koj Leej Txiv tus uas nyob saum ntuj ceeb tsheej hlub koj heev, nws xav kom koj los ua nws tsev tib neeg, nws cog lus tias yuav tsis muaj kev mob kev nkeeg thiab kev txom nyem, koj yuav rov qab pom cov uas tag sim neej dua thaum txog lub qab ntuj tshiab, thiab tseem tshuav ntau tshaj hais tsis txhij tsis txhua. (Malakaus 10:29, 30; Yauhas 5:28, 29; Loos 8:38, 39; Tshwm Sim 21:3, 4) Tej uas koj kawm tau no ua rau koj zoo siab heev. (Lukas 24:32) Koj nyiam tej no tshaj plaws li ua rau koj xav muab piav rau txhua leej txhua tus paub! (Muab piv rau Yelemis 20:9) Thaum peb nyiam tej yam uas peb tau kawm hauv phau Vajlugkub heev, ua rau peb xav muab qhia rau txhua leej txhua tus paub. (Lukas 6:45) Peb xav tib yam li Yexus cov thwj tim nyob thawj 100 xyoo tias: “Wb yeej yuav qhia tej uas wb tau pom thiab tau hnov lawd.” (Tes Hauj Lwm 4:20) Peb nyiam qhov tseeb uas nyob hauv phau Vajlugkub kawg li, thiaj ua rau peb xav muab piav rau txhua leej txhua tus paub li peb piav tau. w24.05 15 ¶5; 16 ¶7

Yehauvas cov tib neeg mus qhia txoj xov zoo rau lwm tus vim lawv hlub lawv Leej Txiv Yehauvas thiab xav kom lwm tus los nrog lawv paub nws. Tiam sis ib txhia tsis xis mus qhia txoj xov zoo. Vim li cas ho muaj li ntawd? Ib txhia txaj muag heev thiab lawv xav tias lawv tsis txawj qhia. Hos ib txhia tsis nyiam mus rau hauv lwm tus lub tsev kom tab kaum lawv. Hos ib txhia xav hais tias nyob tsam ua rau lwm tus chim. Hos tej zaum ib txhia tsis xav tsim teeb meem. Cov kwv tij nkauj muam no xam pom tias tsis yooj yim rau lawv mus qhia txoj xov zoo rau lwm tus uas lawv tsis paub. Tsis txhob poob siab yog tias nyuaj rau koj mus tshaj tawm. Qhov no qhia tau tias koj yog ib tug neeg txo hwj chim thiab tsis xav kom muaj teeb meem. Tsis tas li ntawd, kuj qhia tias koj tsis nyiam sib cav sib ceg nrog tib neeg. Yeej tsis muaj leej twg xav ua rau lwm tus npau taws tab txawm nws xav ua qhov zoo rau lawv xwb. Koj Leej Txiv uas nyob saum ntuj ceeb tsheej yeej paub tej uas koj xav thiab nws xav pab seb koj yuav ua li cas rau li cas thiaj zoo.​—Yaxayas 41:13. w24.04 14 ¶1-2

Thaum koj nyeem phau Vajlugkub, tsis txhob thooj txhij ua ib zaug sim coj txhua yam raws li koj tau nyeem hauv phau Vajlugkub tiam sis maj mam sim ib ob qho zuj zus rau hauv koj lub neej. Xyaum ua li no: Muab kos tseg seb koj yuav xyaum coj li cas tam sim no thiab rau yav tom ntej. Ua li koj yuav pib qhov twg tuaj? Tej zaud zoo rau koj pib tej hom phiaj uas yooj yim rau koj ua ntej. Los sis ua tej yam uas koj paub tias koj yuav tsum tau hloov ua ntej. Thaum koj txiav txim siab tau tias koj yuav ua li cas lawm ces mus tshawb nrhiav hauv peb tej ntaub ntawv. Thov Yehauvas pab kom koj “muaj lub siab kub lug thiab muaj zog npho ua raws li nws siab nyiam.” (Filipis 2:13) Tom qab ntawd, muab tej yam uas koj kawm tau ntawd coj los siv rau hauv koj lub neej. Yog koj ua tag ib qho hom phiaj lawm ces yuav ua rau koj yim huab xav ua lwm lub hom phiaj ntxiv thiab. Thaum koj pom tias koj hloov tau lawm los sis coj tau cwj pwm li ib tug Khixatias ces yuav txhawb tau kom koj yim huab hloov ntxiv. w24.09 6 ¶13-14