Hahemaoro Taudia

2 Bena Iehova ena aneru+ be Gilegala+ amo Bokimi dekenai ia daekau lao, bona Israela taudia dekenai ia gwau: “Lau ese umui be Aigupito amo lau hakaua mai, bona emui sene taudia dekenai lau gwauhamatalaia tano dekenai umui lau hakaua vareai.+ Lau gwau danu, ‘Umui ida lau karaia gwaubou be do lau makohia lasi.+ 2 To umui, namona be inai tano taudia ida gwaubou ta umui karaia lasi,+ bona namona be edia boubou patadia umui hadikaia.’+ To egu hereva umui kamonai henia lasi.+ Dahaka dainai unai bamona umui karaia? 3 Unai dainai lau gwau danu, ‘Lau ese idia be emui vairana amo do lau lulua lao lasi,+ idia ese umui do idia koia,+ bona emui lalona do idia veria edia dirava idauidau umui tomadiho henia totona.’”+

4 Iehova ena aneru ese unai hereva be Israela taudia ibounai dekenai ia gwauraia neganai, idia taitai bada matamaia. 5 Unai dainai unai gabu ena ladana idia hatoa Bokimi,* bona unuseniai Iehova dekenai boubou gaudia idia henia.

6 Iosua ese taunimanima ia siaia lao neganai, Israela iduhu ta ta be idia abia tano dekenai idia lao, idia noholaia totona.+ 7 Iosua ia mauri lalonai, bona ia mase murinai idia do mauri noho tau badadia edia mauri dinadia ibounai lalonai, Israela taudia ese Iehova idia hesiai henia noho, unai tau badadia be Iehova ese Israela taudia totona ia karaia kara badadia ibounai idia itaia vadaeni.+ 8 Bena Nunu ena natuna Iosua, Iehova ena hesiai tauna unai, ia mase, ena mauri lagani be 110.+ 9 Vadaeni ena tano Timinata-hera+ dekenai idia guria, unai be Eparaima ena ororo gabudia ai, Gaso Ororo ena not kahanai.+ 10 Unai uru taudia ibounai idia mase ore, bona idia murinai uru ma ta ia vara, idia be Iehova idia diba lasi eiava Israela taudia dekenai ia karaia karadia danu idia diba lasi.

11 Vadaeni Israela taudia be Iehova ena vairanai idia kara dika, idia ese Bala diravadia idia hesiai* henia.+ 12 Unai amo idia ese Iehova idia dadaraia, edia sene taudia edia Dirava unai, ia ese idia be Aigupito tano amo ia hakaua raka-lasi.+ Bona dirava ma haida idia badinaia, idia badibadinai idia noho taudia edia dirava unai,+ bona idia be unai dirava dekenai idia tui diho bona Iehova idia habadua.+ 13 Idia ese Iehova idia dadaraia bona Bala bona Asatorete kaivakukudia idia hesiai henia.+ 14 Unai dainai Iehova ena badu mai siahuna be Israela taudia latanai ia diho, bona idia be dadidadi taudia dekenai ia henia bona idia ese edia kohu idia henaoa.+ Bona ia ese edia inai taudia dekenai idia ia hoihoilaia, edia badibadinai idia noho taudia unai,+ bona idia hegeregere lasi edia inai taudia vairanai idia gini totona.+ 15 Idia lao gabudia ibounai dekenai, Iehova be idia dekenai hisihisi ia mailaia noho,+ Iehova ia hereva bamona bona Iehova be guna idia dekenai ia gwauhamata hegeregerena,+ bona dika bada idia davaria.+ 16 Vadaeni Iehova ese idia dekenai hahemaoro taudia ia henia, Israela taudia be dadidadi taudia amo idia hamauria totona.+

17 To idia ese hahemaoro taudia idia kamonai henia lasi bona dirava ma haida idia tomadiho henia* bona idia dekenai idia tui diho. Edia sene taudia be Iehova ena oda herevadia idia badinaia, to idia ese edia sene taudia idia badinaia dalana amo idia raka siri haraga.+ Oibe, idia be edia sene taudia bamona lasi. 18 Iehova ese idia totona hahemaoro taudia ia henia negadiai,+ Iehova be hahemaoro tauna ida bona unai hahemaoro tauna ena mauri dinadia ibounai lalonai, idia be edia inai taudia edia imana amo ia hamauria. Iehova be edia taitai dainai idia ia hebogahisi henia,+ badina haida ese idia dagedage henia bona idia kara auka henia.+

19 To hahemaoro tauna ia mase neganai, idia kara gageva lou, to idia ese edia tamadia edia kara gageva idia hereaia momokani, idia ese dirava ma haida idia badinaia, idia hesiai henia, bona idia dekenai idia tui diho.+ Idia karaia karadia idia rakatania lasi, bona idia do laloauka noho. 20 Vadaeni Iehova ena badu mai siahuna be Israela taudia latanai ia diho,+ bona ia gwau: “Inai bese taudia ese edia sene taudia ida lau karaia gwaubou idia makohia+ bona idia ese lau idia kamonai henia lasi dainai,+ 21 Iosua ena mase murinai idia do noho besedia be edia vairana amo do lau lulua lao lasi.+ 22 Unai amo Israela taudia lau tohoa, bema edia sene taudia bamona Iehova ena dala do idia badinaia eiava lasi.”+ 23 Vadaeni Iehova ese unai bese ia rakatanidia idia noho totona. Ia ese idia ia lulua haraga lasi, bona Iosua ena imana dekenai idia ia atoa lasi.