King Taudia Iharuana

4 Peroveta taudia edia bese tauna ta ena adavana+ be mai lalohisihisi ida Elisaia dekenai ia gwau: “Egu adavana, emu hesiai tauna be ia mase, bona oi diba momokani egu adavana be hanaihanai Iehova ia gari henia.+ To, henitorehai tauna ta ia mai bona egu natudia rua ia abia iena hesiai taudia ai idia lao totona.” 2 Unai dainai Elisaia ese unai hahine dekenai ia gwau: “Oi totona dahaka do lau karaia? Lau oi hamaoroa, emu ruma ai dahaka ia noho?” Ia haere: “Emu hesiai hahinena ena ruma dekenai be gau ta ia noho lasi, to hodu mai ena oela ia noho.”+ 3 Bena Elisaia ia gwau: “Oi lao emu dekena taudia ibounai oi noia oi dekenai hodu idia henia totona. Namona be hodu momo oi abia. 4 Bena oi bona emu natudia memero be ruma lalonai umui vareai murinai iduara do umui koua. Bona unai hodu ibounai be oela amo umui hahonua, bona idia honu gaudia do umui atoa siri.” 5 Vadaeni hahine ese Elisaia ia rakatania.

Ia bona ena natudia memero be ruma lalonai idia vareai bona iduara idia koua neganai, memero ese ia dekenai hodu idia henia, bona ia ese hodu lalonai oela ia bubua noho.+ 6 Hodu idia honu neganai, hahine be ena natuna mero ta dekenai ia gwau: “Hodu ma ta oi mailaia.”+ To mero ia gwau: “Hodu idia ore vadaeni.” Unai nega ai oela ia ore.+ 7 Unai dainai hahine be Dirava momokanina ena hesiai tauna dekenai ia lao bona ia hamaoroa. Bona ia be hahine dekenai ia gwau: “Oi lao, oela oi hoihoilaia bona emu abitorehai oi haloua, bona moni orena be oi bona emu natudia memero ese do umui gaukaralaia.”

8 Dina ta Elisaia be Suneme dekenai ia lao,+ unuseniai ladana bada hahine ta ia noho, bona ia ese Elisaia ia noia unuseniai idia aniani totona.+ Nega momo Elisaia be unuseniai ia lao neganai, unai gabu ai ia aniani. 9 Unai dainai hahine be ena adavana dekenai ia gwau: “Lau diba hanaihanai iniseni ia mai tauna be Dirava momokani ena hesiai tauna ta. 10 Mani ia totona ruma ena ataiai daiutu maragina ta ita karaia+ bona mahuta patana ta, teibolo ta, sea ta, bona lamepa ta ita atoa. Bena ia mai negadia ai, unuseniai ia noho diba.”+

11 Dina ta unai gabu dekenai ia lao, bona ruma ena ataiai ia noho daiutu dekenai ia daekau ia mahuta totona. 12 Vadaeni ia ese ena hesiai tauna Gehasi+ dekenai ia gwau: “Unai Suneme+ hahinena oi boiria mai.” Vadaeni ia boiria bona ena vairanai ia gini. 13 Bena Gehasi dekenai ia gwau: “Mani oi hamaoroa, oi gwau: ‘Oi ese ai oi naria totona gau momo oi karaia vadaeni.+ Oi totona dahaka do ai karaia?+ Oi ura oi totona king+ eiava tuari biaguna do lau hereva henia, a?’” To hahine ia haere, ia gwau: “Lasi, ia namo, lau be egu taunimanima huanai lau noho namonamo.” 14 Bena Elisaia ia gwau: “Vadaeni ia totona dahaka do lau karaia?” Gehasi ia gwau: “Ia be natuna lasi+ bona ena adavana be ia buruka.” 15 Karaharaga ia gwau: “Ia oi boiria.” Vadaeni ia boiria, bona unai hahine be iduara ena raka vareai gabunai ia gini. 16 Vadaeni ia gwau: “Vaira lagani ai, inai nega hegeregerena ai oi be natuna mero ta do oi rosia.”+ To hahine ia gwau: “Lasi, egu biaguna, Dirava momokani ena hesiai tauna e, emu hesiai hahinena dekenai hereva koikoi oi gwauraia lasi.”

17 Vadaeni hahine be ia rogorogo bona vaira lagani ai, unai nega hegeregerena ai natuna mero ta ia havaraia, Elisaia ese ia hamaoroa hegeregerena. 18 Natuna ia tubu daekau, bona dina ta ena tamana dekenai ia lao, bona ena tamana be witi gogoa taudia ida ia noho. 19 Ena tamana dekenai ia hereva noho: “Egu kwarana ia hisihisi, Egu kwarana ia hisihisi!” Bena ena tamana be ena hesiai tauna dekenai ia gwau: “Ena sinana dekenai oi huaia lao.” 20 Vadaeni ena sinana dekenai ia huaia lao, bona ena sinana ena mamuna latanai ia helai ela bona dina tubua, bena ia mase.+ 21 Bena sinana ese mero ia abia lao bona Dirava momokani ena hesiai tauna ena mahuta patana dekenai ia hahekurea,+ bena iduara ia koua bona ia lao. 22 Vadaeni ena adavana ia boiria bona ia gwau: “Mani hesiai taudia haida bona doniki ta oi siaia mai, unai amo Dirava momokanina ena hesiai tauna dekenai do lau lao haraga bona lau giroa mai.” 23 To ena adavana ia gwau: “Dahaka dainai oi ura hari dina ia oi itaia? Inai be hua matamata+ eiava sabati ena nega lasi.” To hahine ia gwau: “Oi laloa lasi, gau ibounai be namo.” 24 Bena ia ese doniki latanai idia atoa helai gauna ia atoa bona ena hesiai tauna dekenai ia gwau: “Doniki ena varo oi dogoatao, bona oi raka. Namona be doniki ia raka haraga. Lau oi laloa lasi. To lau hereva neganai, oi stopu diba.”

25 Vadaeni hahine be Dirava momokanina ena hesiai tauna dekenai ia lao, unai be Karamele Ororona ai. Bona Dirava momokanina ena hesiai tauna ese daudauna amo ia itaia neganai, ena hesiai tauna Gehasi dekenai ia gwau: “Itaia, Suneme hahinena be unuseniai. 26 Mani oi heau lao ia oi hedavari henia totona, bona oi nanadaia, ‘Ia bona ena adavana bona ena natuna be edena bamona?’” Bena hahine ia gwau: “Ai ibounai ai namo.” 27 Hahine be ororo ai Dirava momokanina ena hesiai tauna dekenai ia lao neganai, maoromaoro iena aena ia dogoatao.+ Unai nega ai Gehasi ia mai bona hahine ia doria siri, to Dirava momokanina ena hesiai tauna ia gwau: “Ia oi rakatania, badina ia lalohisihisi noho. To unai ena badina lau diba lasi, badina Iehova ese lau ia hamaoroa lasi.” 28 Bena hahine ia gwau: “Lau ese egu lohia lau noia lasi natuna mero ta totona, ani? Bona oi lau hamaoroa, ‘Lau dekenai hereva koikoi oi gwauraia lasi,’ ani?”+

29 Maoromaoro Elisaia be Gehasi dekenai ia gwau: “Emu dabua be emu gabana dekenai oi kwatua hegege+ bona egu itotohi oi abia bona oi lao. Bema ta oi davaria, do oi hanamoa* lasi. Bona bema ta ese oi ia hanamoa, oi haere henia lasi. Oi lao bona mero ena vairana ai egu itotohi oi atoa.” 30 Unai nega ai mero ena sinana ia gwau: “Oi bona ia mauri noho Diravana, Iehova, emui ladanai lau gwauhamata, bema oi lao lasi, lau be do lau lao lasi.”+ Vadaeni Elisaia ia toreisi bona hahine ida ia lao. 31 Gehasi ia lao guna, bona ia ginidae neganai, mero ena vairana ai itotohi ia atoa, to gau ta ia vara lasi.+ Vadaeni Gehasi ia giroa lou bona Elisaia ia hamaoroa: “Mero be ia noga lasi.”

32 Elisaia be ruma lalonai ia raka vareai neganai, mero be iena mahuta patana latanai ia hekure noho, ia mase vadaeni.+ 33 Elisaia be daiutu dekenai ia vareai bona iduara ia koua. Bena Iehova ia guriguri henia matamaia.+ 34 Unai murinai mahuta patana dekenai ia daekau bona mero ena latanai ia hekure, bona mero ena tauanina ia siahu matamaia.+ 35 Bena ia be ruma lalonai ia raka lao raka mai, bona mahuta patana dekenai ia daekau lou bona mero latanai ia hekure. Mero be nega 7 ia asimana, unai murinai ena matana ia kehoa.+ 36 Elisaia ese Gehasi ia boiria bona ia gwau: “Ena sinana oi boiria.” Vadaeni ena sinana ia boiria bona sinana be Elisaia dekenai ia mai. Bena Elisaia ia gwau: “Emu natuna oi abia isi.”+ 37 Bona ia vareai bona Elisaia ena aena badinai ia moru bona ia vairanai ia tui diho, unai murinai ena natuna ia abia isi bona idia raka-lasi.

38 Elisaia be Gilegala ai ia giroa lou neganai, unai tano ai hitolo bada ia vara.+ Peroveta taudia edia bese taudia+ be ia ida idia helai noho, bona ena hesiai tauna dekenai ia gwau:+ “Inai peroveta taudia edia bese taudia totona, uro badana be lahi latanai oi atoa bona supu oi nadua.” 39 Bena hesiai tauna ta ia lao aniani avadia haida abia totona, bona uda lalonai tubutubu gauna ta ia davaria bona ena huahua ia gogodia bona ena dabua lalonai ia udaia. Bena ia giroa lou bona unai huahua ia utua maragimaragi bona supu urona lalonai ia udaia, to ia diba lasi unai be dahaka. 40 Gabeai unai supu be tatau dekenai idia henia idia ania totona, to idia ania neganai, idia boiboi idia gwau: “Dirava momokanina ena hesiai tauna e, inai uro lalonai mase ia havaraia gauna ta ia noho.” Bona idia ania diba lasi. 41 Unai dainai ia gwau: “Paraoa haida umui mailaia.” Bena unai paraoa be uro lalonai ia negea murinai, ia gwau: “Taunimanima dekenai umui henia.” Bona unai uro lalonai gau dikana ta ia noho lasi.+

42 Tau ta be Bala-salisa hanua amo ia mai,+ bona ia ese Dirava momokanina ena hesiai tauna totona tano ena anina ginigunadia amo ia karaia bali paraoa 20+ bona witi matamata ena baege ta ia mailaia.+ Bena Elisaia ia gwau: “Taunimanima dekenai oi henia, unai amo do idia ania.” 43 To, ena hesiai tauna ia gwau: “Edena bamona inai aniani be tatau 100 dekenai lau henia diba?”+ To ia gwau: “Taunimanima dekenai oi henia idia ania totona, badina Iehova be inai bamona ia hereva, ‘Do idia aniani bona haida do idia rakatania.’”+ 44 Vadaeni ia henidia, bona idia aniani bona haida idia rakatania,+ Iehova ia hereva bamona.