Aposetolo Edia Kara

12 Unai nega ai, King Heroda* ese kongrigeisen taudia haida ia dagedage henia matamaia.+ 2 Ia ese Ioane ena tadikaka Iamesi+ be tuari kaia amo ia alaia.+ 3 Ia itaia Iuda taudia ese unai kara idia moalelaia neganai, Petero ia dogoatao danu. (Unai be Isti Lasi Paraoa ena aria negana.)+ 4 Vadaeni Petero ia dogoatao bona dibura ruma ai ia atoa,+ bena tuari taudia edia orea 4 ese edia nega ta ta ai ia idia gimaia. Unai orea ta ta lalonai tuari taudia 4 idia noho. Heroda ia ura Pasova aria murinai, Petero be taunimanima vairanai do ia abia raka-lasi.* 5 Vadaeni Petero be dibura ruma ai ia noho, to kongrigeisen taudia be ia totona Dirava idia guriguri henia goadagoada.+

6 Murina dinana ai Heroda ese Petero do ia hakaua raka-lasi. To hanuaboi ai, Petero be seini rua amo idia guia, bona tuari taudia rua huanai ia mahuta. Bona gima taudia be iduara vairanai idia gini bona dibura ruma idia gimaia. 7 To itaia! Iehova* ena aneru be unuseniai ia gini,+ bona diari ese dibura ruma ia hadiaria. Aneru ese Petero ena doruna ia dogoatao bona ia hanogaia, ia gwau: “Oi toreisi haraga!” Bona seini be ena imana amo idia moru.+ 8 Aneru be ia dekenai ia gwau: “Oi hegaegae bona emu sandolo oi kwatua.” Bena unai bamona ia karaia. Dokonai ia dekenai ia gwau: “Emu ataiai dabua oi karaia bona lau oi badinaia.” 9 Vadaeni ia raka-lasi bona aneru ia badinaia noho, to ia diba lasi aneru ese ia karaia gauna be momokani. Oibe, ia laloa ia be matahanai ta ia itaia. 10 Tuari orea ginigunana bona iharuana idia hanaia, bena siti ia lao henia auri geiti dekenai idia ginidae, bona unai geiti be sibona ia kehoa. Idia raka-lasi murinai, dala ta dekenai idia raka diho bona maoromaoro aneru ese Petero ia rakatania. 11 Vadaeni Petero be idia vara gaudia ia lalopararalaia, bena ia gwau: “Hari lau diba momokani, Iehova* ese ena aneru ia siaia bona Heroda ena imana amo lau ia hamauria bona Iuda taudia idia laloa lau dekenai do idia vara gaudia ibounai idia vara lasi.”+

12 Petero be unai ia lalopararalaia murinai, Ioane ena sinana Maria ena ruma dekenai ia lao. Ioane ena ladana ma ta be Mareko.+ Unuseniai momo idia haboua bona idia guriguri noho. 13 Iduara ai ia pidipidi neganai, hesiai kekenina ladana Roda ia mai iduara ia kehoa totona. 14 Petero ena gadona ia kamonai neganai, ia moale bada dainai iduara ia kehoa lasi, to ia heau vareai bona ruma taudia ia hamaoroa Petero be iduara vairanai ia gini. 15 Ia dekenai idia gwau: “Oi be oi kavakava.” To ia hereva goada noho Petero be momokani ia mai. Idia gwau: “Unai be ena aneru.” 16 To Petero be unuseniai ia gini bona ia pidipidi. Iduara idia kehoa bona ia idia itaia neganai, idia hoa dikadika. 17 To ena imana amo toa ia karaia do idia hereva lasi. Bona edena bamona dibura rumana amo Iehova* ese ia hakaua raka-lasi ena sivarai ibounai ia gwauraia, bona ia gwau: “Iamesi+ bona tadikaka dekenai inai gaudia umui herevalaia.” Unai murinai ia raka-lasi bena gabu ma ta dekenai ia lao.

18 To daba ia rere neganai, tuari taudia be Petero dekenai ia vara gauna dainai idia hoa bada. 19 Heroda ese gabu ibounai dekenai Petero ia tahua to ia davaria lasi, vadaeni gima taudia ia nanadaia bona oda ia henia gima taudia do idia hakaua lao idia panisidia totona.+ Bena Heroda be Iudea amo ia diho lao Kaisarea dekenai bona nega sisina unuseniai ia noho.

20 Vadaeni King Heroda be Turo bona Sidono taudia dekenai ia badu.* Unai dainai idia be mai lalotamona ida ia dekenai idia mai bona Blasto ena lalona idia veria, ia be king ena ruma* ia naria tauna. Unai murinai idia ura king ida maino idia karaia, badina edia tano taudia be king ese ia lohiaia tanodia amo aniani idia abia. 21 Dina ta ai, Heroda be king ena dabua ia hahedokilaia bona hahemaoro sea dekenai ia helai bona taunimanima ia hereva henia matamaia. 22 Bona idia haboua taudia idia boiboi, idia gwau: “Inai be dirava ta ena gadona, taunimanima ena gadona lasi!” 23 Maoromaoro Iehova* ena aneru ese ia botaia, badina Dirava ia hanamoa lasi. Vadaeni gaigai maragidia ese ena tauanina idia ania bona ia mase.

24 To Iehova* ena hereva ia tubu daekau bona gabu ibounai dekenai ia lao.+

25 To Banaba+ bona Saulo be Ierusalema ai heduru idia henia murinai,+ Ioane, ena ladana ma ta be Mareko, idia abia bona idia giroa lou.+