Aposetolo Edia Kara

23 Paulo ese Sanhedrin* taudia ia itaia bona ia gwau: “Tadikaka e, lau be mai lalomamina goevana ida Dirava vairanai lau noho+ ema bona hari.” 2 Unai neganai, hahelaga tauna badana Anania ese Paulo badinai idia gini taudia ia oda henia, Paulo ena uduna idia botaia totona. 3 Bena Paulo be ia dekenai ia gwau: “Oi be koikoi tauna,* Dirava ese oi do ia botaia. Iniseniai oi helai bona Taravatu* hegeregerena lau oi hahemaoro henia, to oi ese Taravatu oi utua danu, badina oda oi henia ta ese lau ia botaia totona. Unai bamona kara be maoro, a?” 4 Ia badinai idia gini taudia idia gwau: “Dirava ena hahelaga tauna badana oi hereva dika henia, a?” 5 Bona Paulo ia haere: “Tadikaka e, lau diba lasi ia be hahelaga tauna badana. Toretore Helagadia ia gwau, ‘Namo lasi emui taunimanima ia lohiaia tauna do oi hereva dika henia.’”+

6 Vadaeni Paulo ia itaia Sanhedrin ena kahana ta be Sadukea taudia bona kahana ta be Farisea taudia neganai, ia boiboi: “Tadikaka e, lau be Farisea tauna,+ bona Farisea taudia edia natuna. Mase taudia do idia toreisi lou helarona dainai, lau idia hahemaoro henia noho.” 7 Unai hereva ia gwauraia dainai, Farisea taudia bona Sadukea taudia idia hepapahuahu bona idia parara. 8 Badina Sadukea taudia idia gwau toreisi lou, aneru, bona guba dekenai lauma taudia be lasi, to Farisea taudia idia gwau unai gaudia ibounai idia noho.*+ 9 Unai dainai idia boiboi badabada, bona Farisea taudia edia taravatu hadibaia taudia haida idia toreisi bona mai badu ida idia hereva: “Inai tauna dekenai kerere ta ai davaria lasi. To bema guba dekenai ia noho lauma tauna eiava aneru ta ese ia hereva henia.+ . . .” 10 Bona hepapahuahu ia bada neganai, tuari biaguna be ia gari, idia ese Paulo idia alaia garina. Bona ia ese tuari oreana ia oda henia do idia diho bona taunimanima edia huana amo Paulo do idia abia mauri, bona tuari taudia edia ruma dekenai do idia abia lao.

11 To unai hanuaboi ai, Lohiabada be ia badinai ia gini bona ia gwau: “Oi gari lasi!+ Ierusalema ai lau oi gwauraia hedinarai hegeregerena, namona be Roma dekenai do oi karaia danu.”+

12 Daba ia rere neganai, Iuda taudia idia palani hebou bona gwauhamata metauna idia karaia, do idia aniani bona inuinu lasi ela bona Paulo idia alaia. 13 Tatau 40 bona ma haida ese unai gwauhamata metauna idia karaia hebou. 14 Bona idia be dubu biagudia bona tau badadia dekenai idia lao bona idia gwau: “Ai be gwauhamata metauna ai karaia vadaeni, do ai aniani lasi ela bona Paulo ai alaia. 15 Vadaeni, umui bona Sanhedrin taudia be tuari biaguna umui hadibaia, Paulo be umui dekenai do idia hakaua mai, toana be umui ura do umui henanadai henia. To do ai noho hegaegae, bona umui dekenai ia do ginidae lasi neganai, do ai alaia.”

16 To Paulo ena taihuna ena natuna mero be idia palanilaia gauna ia kamonai, vadaeni tuari taudia edia ruma dekenai ia lao bona Paulo dekenai unai ia gwauraia. 17 Bena Paulo ese ami ofesa ta ia boiria bona ia gwau: “Inai tau matamata be tuari biaguna dekenai oi hakaua lao, badina ia ura ia dekenai hereva ta ia gwauraia.” 18 Vadaeni ami ofesa ese unai tau matamata be tuari biaguna dekenai ia hakaua lao bona ia gwau: “Dibura tauna Paulo ese lau ia boiria bona ia noia inai tau matamata be oi dekenai do lau hakaua mai, badina ia ura oi dekenai hereva ta ia gwauraia.” 19 Tuari biaguna ese unai tau matamata ena imana ia abia bona ia hakaua siri bona hehuni ai ia nanadaia: “Oi ura lau dekenai dahaka oi gwauraia?” 20 Ia gwau: “Iuda taudia idia lalotamona oi do idia noia, kerukeru dina ai Paulo be Sanhedrin dekenai do oi hakaua lao, toana be idia ura ena sivarai ma haida idia kamonai.+ 21 To namo lasi idia ese emu lalona idia veria, badina edia tatau 40 bona ma haida be Paulo hadikaia totona idia naria noho. Bona gwauhamata metauna idia karaia do idia aniani bona inuinu lasi ela bona ia idia alaia.+ Bona hari idia naria noho edia noinoi oi abia dae totona.” 22 Vadaeni tuari biaguna ese tau matamata ia oda henia, ia gwau: “Tau ta oi hamaoroa lasi lau dekenai inai gaudia oi gwauraia.” Unai murinai, ia siaia lao.

23 Bona ami ofesa rua ia boiria bona idia dekenai ia gwau: “Tuari taudia 200, hosi guia taudia 70, bona io idia dogoatao taudia 200 umui abia hegaegae, bona hanuaboi 9 oklok* bamona ai Kaisarea dekenai do umui lao. 24 Danu, hosi haida umui abia Paulo ia guia totona, bona umui gimaia namonamo bona gavana Feliki dekenai umui abia lao.” 25 Bona ia torea revarevana be inai bamona:

26 “Lau Klaudio Lusia ese oi, Egu Lohia, Gavana Feliki dekenai inai revareva lau torea: Namo! 27 Inai tauna be Iuda taudia ese idia dogoatao bona idia ura idia alaia, to lau kamonai ia be Roma tauna dainai,+ egu tuari oreana ida lau lao haraga bona ia lau hamauria.+ 28 Bona idia samania ena badina lau ura diba dainai, edia Sanhedrin dekenai ia lau hakaua diho.+ 29 Lau itaia edia Taravatu ena hereva haida dainai ia idia samania,+ to badina ta lau davaria lasi ia idia hamasea eiava hadiburaia totona. 30 To inai tauna idia ura alaia ena palani be ta ese lau dekenai ia gwauraia dainai,+ harihari oi dekenai ia lau siaia. Bona ia idia samania taudia lau oda henia, oi vairanai ena kerere do idia gwauraia hedinarai.”

31 Vadaeni tuari taudia be idia abia oda hegeregerena, hanuaboi ai Paulo be Anetipatiri dekenai idia abia lao.+ 32 Daba ai, idia be tuari taudia edia ruma dekenai idia giroa lou, to gwaumaoro idia henia hosi guia taudia ese Paulo do idia abia lao. 33 Hosi guia taudia be Kaisarea dekenai idia ginidae, bona gavana dekenai revareva idia henia bona Paulo danu idia hakaua vareai. 34 Vadaeni revareva ia duahia bona Paulo ia nanadaia ia be edena provinsi amo, bona ia hamaoroa ia be Kilikia amo.+ 35 Vadaeni gavana ia gwau: “Oi idia samania taudia idia ginidae neganai,+ oiemu sivarai ibounai do lau kamonai namonamo.” Bona oda ia henia Paulo be Heroda ena pavapava rumana ai do idia gimaia.