Iosua

14 Vadaeni Israela taudia be Kanana tanona ai edia ahuna idia abia, unai be hahelaga tauna Eleasara bona Nunu ena natuna Iosua bona Israela ena bese kwarana taudia ese idia dekenai idia henia.+ 2 Edia ahuna be gadara ta* amo idia abia vadaeni,+ unai be Iehova ese iduhu 9 bona Manase iduhu kahana ta totona Mose ia oda henia hegeregerena.+ 3 Mose ese iduhu ma rua bona Manase iduhu kahana ma ta dekenai ahuna ia henia vadaeni, unai be Ioridane ena kahana ma ta* ai,+ to edia huanai Levi taudia dekenai ahuna ta ia henia lasi.+ 4 Iosepa ena bese amo iduhu rua idia vara,+ Manase iduhu bona Eparaima iduhu.+ Bona idia ese Levi taudia dekenai tano ta idia henia lasi, to siti idia henidia idia noholaia totona,+ bona rei gabudia idia henia edia mamoe oreadia bona boromakau oreadia totona.+ 5 Bena Israela taudia ese tano idia haria, Iehova ese Mose ia oda henia hegeregerena.

6 Vadaeni Iuda taudia be Gilegala ai Iosua dekenai idia lao,+ bona Kenisi tauna Iepune ena natuna Kaleba,+ be Iosua dekenai ia gwau: “Kadesi-baranea ai,+ Dirava momokani Iehova ese ena hesiai tauna Mose+ dekenai oi bona lau totona ia gwauraia herevana oi diba.+ 7 Egu mauri lagani be 40 neganai, Iehova ena hesiai tauna Mose ese lau ia siaia Kadesi-baranea tanona lau spai totona,+ bona lau giroa mai bona sivarai namona lau gwauraia.+ 8 Ena be egu tadikakadia, lau ida idia lao taudia ese Israela taudia edia lalona idia hamanokaia, to lau be mai kudouna ibounai ida Iehova, egu Dirava lau badinaia.+ 9 Mose be unai dina ai ia gwauhamata, ia gwau: ‘Oi raka tanona be oi bona emu natudia edia ahuna ai do ia lao, bona nega daudau lalonai do umui noholaia, badina oi ese mai kudouna ibounai ida Iehova, egu Dirava oi badinaia.’+ 10 Vadaeni Iehova be ena gwauhamata hegeregerena,+ ia ese lagani 45 lalonai lau ia naria,+ guna Iehova be Mose dekenai ia gwauhamata negana amo, unai nega lalonai Israela taudia be taunimanima lasi gabuna ai idia laolao.+ Bona hari lau do noho, egu mauri lagani be 85. 11 Bona hari lau do goada noho, guna Mose ese lau ia siaia dinana ai lau goada hegeregerena. Guna bamona, hari egu goada ia do noho, tuari ai taunimanima lau gunalaia bona gaukara ma haida lau karaia totona. 12 Unai dainai, inai ororo gabudia be lau dekenai oi henia, Iehova ese unai dina ai lau dekenai ia gwauhamata hegeregerena. Unai dina ai oi kamonai, Anakima taudia+ be unuseniai idia noho bona edia siti be mai edia magu aukadia,+ to momokani Iehova be lau ida+ bona lau ese idia do lau lulua raka-lasi, Iehova ia gwauhamata hegeregerena.”+

13 Vadaeni Iosua ese Iepune ena natuna Kaleba ia hanamoa bona ia dekenai Heberona tano ia henia, ena ahuna bamona.+ 14 Unai dainai Heberona tano be Iepune ena natuna Kaleba ese ia abia, unai be iena tano ema bona hari, badina ia ese mai kudouna ibounai ida Iehova, Israela ena Dirava, ia badinaia.+ 15 Heberona ena ladana gunana be Kiriata-araba+ (Araba be Anakima taudia huanai ia noho tau badana). Bona tano be tuari amo ia laga-ani.+