Apokalupo—Ioane Ia Abia Herevana

19 Unai murinai, guba amo gado regena badana lau kamonai, toana be taunimanima momo herea edia gado regena. Idia gwau: “Iah hanamoa!*+ Hamauria bona hairai bona siahu be iseda Dirava ena, 2 badina iena hahemaoro karana be momokani bona maoromaoro.+ Ia ese ladana bada ariara hahine, matabodaga karadia* amo tanobada ia hadikaia hahine unai, ia hahemaoro henia vadaeni, bona unai hahine ena davana ia haloua, badina ia ese Dirava ena hesiai taudia ia hamasea.”+ 3 Bona maoromaoro nega iharuana idia gwau: “Iah hanamoa!*+ Bona unai hahine idia gabua lahina ena kwalahu be ia daekau ela bona hanaihanai.”+

4 Bona tau badadia 24,+ bona mauri gaudia 4+ be terona ai ia helai Diravana ena vairanai idia tui diho, bona ia idia tomadiho henia, idia gwau: “Amen! Iah hanamoa!”*+

5 Danu, gado ta be terona amo ia mai, ia gwau: “Dirava ena hesiai taudia ibounai, ia umui gari henia ladana maragi bona ladana bada taudia e,+ iseda Dirava umui hanamoa noho.”+

6 Bona gado regena lau kamonai, ia be taunimanima momo herea edia gado regena bamona, bona sinavai momo edia regena bamona, bona guba ena boiboi bada bamona. Idia gwau: “Iah hanamoa,*+ badina Iehova* iseda Dirava, Siahu Ibounai Diravana,+ be ia lohia matamaia vadaeni!+ 7 Namona be ita moale bada herea bona ia ita hanamoa, badina Mamoe Natuna ena headava negana ia ginidae, bona iena adavana be headava totona ia hegaegae vadaeni. 8 Oibe, ia ese maoro ia abia dabua namo hereana ta ia hahedokilaia totona. Unai dabua be ia diaridiari bona ia goeva. Unai dabua namo hereana ese helaga taudia edia kara maoromaoro ia laulaulaia.”+

9 Bona aneru ese lau ia hamaoroa, “Inai hereva oi torea: Mamoe Natuna ena headava aria dekenai idia boiria taudia be idia moale.”+ Danu, lau ia hamaoroa, ia gwau: “Inai hereva be Dirava ena hereva momokanidia.” 10 Unai neganai iena aena badinai lau tui diho, ia lau tomadiho henia totona. To lau dekenai ia gwau: “Unai bamona oi karaia lasi!+ Lau danu be hesiai tauna sibona, oi bona emu tadikaka hegeregerena, umui be Iesu umui gwauraia hedinarai taudia.+ Dirava oi tomadiho henia!+ Badina Iesu gwauraia hedinarai karana be peroveta herevadia edia badina.”+

11 Lau itaia guba ia kehoa, bona hosi kurokuro ta ia hedinarai.+ Bona unai hosi latanai ia helai tauna ena ladana be Abidadama+ bona Momokani,+ bona ia be kara maoromaoro dalanai ia hahemaoro bona ia tuari.+ 12 Iena matana be lahi ena hururuhururu bamona,+ bona iena kwarana latanai korona momo idia noho. Ia dekenai ladana ta ia noho, bona tau ta be unai ladana ia diba lasi, to ia sibona. 13 Bona ena dabua dekenai rara ia noho, bona iena ladana idia gwauraia Dirava ena Hereva.+ 14 Danu, guba ena tuari oreadia be hosi kurokurodia amo ia murinai idia lao, bona idia ese dabua namo hereadia idia hahedokilaia, unai dabua be idia kurokuro bona idia goeva. 15 Bona iena uduna amo tuari kaia latana+ mai matana ia raka-lasi, unai tuari kaia amo tanobada besedia do ia tuari henia, bona ia ese auri itotohi amo idia do ia lohiaia.+ Danu, ia ese vain huahua moia gabuna do ia moia, unai be Siahu Ibounai Diravana ena badu siahuna.+ 16 Iena dabua ai, unai be iena mamuna kahanai, inai ladana ia noho, king ibounai edia King bona lohia ibounai edia Lohia.+

17 Lau itaia danu, aneru ta be dina dekenai ia gini, ia boiboi bona guba ai idia roho manudia dekenai ia gwau: “Umui mai, Dirava ena aria badana totona umui haboua.+ 18 Vadaeni umui ese king edia tauanina, tuari biagudia edia tauanina, goada taudia edia tauanina,+ hosi edia tauanina, bona hosi latanai idia helai taudia edia tauanina,+ bona taunimanima ibounai edia tauanina, ura kwalimu taudia bona igui hesiai taudia, bona ladana maragi bona ladana bada taudia edia tauanina do umui ania.”

19 Bona lau itaia, dagedage animal bona tanobada ena king taudia mai edia tuari oreadia idia haboua, unai hosi latanai ia helai tauna bona ena tuari oreana idia tuari henia totona.+ 20 Bona idia ese dagedage animal bona peroveta koikoi tauna+ idia dogoatao, unai peroveta koikoi tauna be dagedage animal+ vairanai toa idauidau ia karaia, unai amo dagedage animal ena maka idia abia bona ena laulau idia tomadiho henia taudia ia hakaua kerere.+ Vadaeni dagedage animal bona peroveta koikoi tauna idia do mauri noho lalonai, idia ruaosi be lahi gohuna lalonai idia negea diho, unai lahi be salipa amo ia araia noho.+ 21 To hosi kurokuro latanai ia helai tauna ese iena uduna amo ia raka-lasi tuari kaia amo taunimanima oredia ia alaia mase.+ Bona manu ibounai ese edia tauanina idia ania bona idia bogakunu.+