Aposetolo Edia Kara

20 Heiriheiri ia ore neganai, Paulo ese hahediba taudia ia boiria, idia ia hagoadaia bona bamahuta henia, unai murinai Makedonia dekenai ia lao. 2 Unai gabu ena taoni ta ta dekenai ia lao bona tadikaka dekenai hagoadaia hereva momo ia henia murinai, Gris dekenai ia ginidae. 3 Unuseniai hua toi ia noho, to bouti amo Suria dekenai ia lao gwauraia neganai, Iuda taudia be palani idia karaia ia do idia alaia,+ unai dainai ena lalona ia hadaia Makedonia amo do ia giroa lou. 4 Ia idia bamoa taudia be Berea tauna Puro ena natuna, Sopatera, Tesalonika taudia Arisitako+ bona Sekundo, Derebe tauna Gaio, Timoteo,+ bona Asia provinsi amo be Tukiko+ bona Tropimo.+ 5 Unai tatau be idia lao guna bona Troa dekenai ai idia naria. 6 To Isti Lasi Paraoa ena aria murinai, Filipi amo bouti ai guia+ bona dina 5 murinai, Troa dekenai ai ginidae bona unuseniai dina 7 ai noho.

7 Pura ena dina ginigunana* ai, aniani totona ai haboua neganai, Paulo be idia haboua taudia ia hereva henia matamaia, badina daba ai idia do ia rakatania, bona ia hereva noho ela bona malokihi. 8 Ai be ataiai daiutuna dekenai ai haboua, bona unuseniai lamepa be momo. 9 Tau matamata ta ladana Eutiko be stori toi rumana ena windo dekenai ia helai bona Paulo ia hereva noho lalonai ena matana ia metau dainai ia mahuta boio, bena tano dekenai ia moru. Ia idia abia isi neganai, ia mase vadaeni. 10 To Paulo ia diho bona mero latanai ia hekure, ia rosia,+ bona ia gwau: “Umui lalohisihisi lasi, badina ia be ia mauri.”+ 11 Bena Paulo be ataiai daiutuna dekenai ia daekau bona paraoa ia makohia bona ia aniani. Bena ia hereva daudau sisina ela bona daba rere, vadaeni idia ia rakatania. 12 Mero idia abia lao bona idia moale bada herea badina ia mauri.

13 Vadaeni sisima dekenai ai guia bona taoni ladana Aso dekenai ai lao, to Paulo be aena amo ia raka. Unai taoni ai Paulo do ai abia, ai ia hamaoroa hegeregerena. 14 Vadaeni Aso dekenai Paulo ese ai ia hedavari henia neganai, bouti dekenai ia guia bona Mitulene dekenai ai lao. 15 Bona murina dinana ai, unuseni amo Keiosa motumotu dekenai ai ginidae. Dina iharuana ai, Samo dekenai ai ginidae, bena dina ihatoina ai Mileto dekenai ai ginidae. 16 Paulo ese ena lalona ia hadaia Efeso do ai heau hanaia,+ unai amo Asia provinsi ai nega bada do ia halusia lasi. Badina ia ura Ierusalema dekenai do ia lao haraga,+ bona bema hegeregere, Pentekoste Ena Aria dinana ai do ia ginidae.

17 To, Mileto amo Paulo be Efeso dekenai hereva ia siaia kongrigeisen ena tau badadia idia mai totona. 18 Idia ginidae neganai, idia dekenai ia gwau: “Dina ginigunana Asia provinsi dekenai lau mai negana amo ema bona hari, umui huanai lau karaia karadia umui diba goevagoeva.+ 19 Lau be Lohiabada ena hesiai gaukara lau karaia mai manau*+ bona taitai ida, bona Iuda taudia be palani idia karaia lau do idia alaia dainai, hahetoho idauidau lau davaria. 20 Danu umui diba lau ese umui durua herevana ta lau hunia lasi, to umui dekenai lau gwauraia, bona taunimanima vairanai bona ruma-ta-ruma-ta ai umui lau hadibaia.+ 21 Bona Iuda taudia bona Grik taudia dekenai lau hahedinaraia goevagoeva, namona be idia helalo-kerehai+ bona Dirava dekenai idia giroa, bona iseda Lohiabada Iesu idia abidadama henia.+ 22 Kamonai! Lauma helaga ena hakaua hegeregerena Ierusalema dekenai lau lao, ena be unuseniai lau dekenai do ia vara gauna lau diba lasi. 23 To siti ta ta dekenai lau lao neganai, lauma helaga ese lau ia hadibaia loulou, ia gwau dibura dekenai lau do idia atoa bona hisihisi momo do lau davaria.+ 24 To, lau laloa egu mauri be gau badana lasi. Gau badana be egu heau helulu bona Lohiabada Iesu amo lau abia hesiai gaukarana lau haorea,+ unai be Dirava ena hebogahisi hereadaena ena sivarai namona do lau gwauraia guguru.

25 “Kamonai! Umui huanai Dirava ena Basileia lau harorolaia, to hari amo lau do umui itaia lou lasi. 26 Unai dainai hari lau ura umui diba lau be taunimanima ibounai edia rara amo lau goeva,+ 27 badina Dirava ia ura karaia gaudia ibounai be umui amo lau hunia lasi, to lau gwauraia hedinarai.+ 28 Do umui naria namonamo, umui sibona+ bona mamoe oreana ibounai danu. Lauma helaga ese umui ia abia hidi Dirava ena kongrigeisen umui naria bona hakaua totona.+ Unai kongrigeisen be ia sibona ena Natuna ena rara amo ia hoia.+ 29 Lau diba umui lau rakatania murinai, dagedage uda sisia be umui huanai do idia mai+ bona mamoe oreana do idia kara auka henia. 30 Bona umui huanai tatau haida do idia toreisi bona hereva momokani do idia mogea, hahediba taudia do idia hakaua siri, edia murinai idia raka totona.+

31 “Unai dainai namona be umui noga noho bona umui laloatao, lagani toi lalonai+ dina bona hanuaboi, mai taitai danu umui ta ta hagoadaia gaukarana lau hadokoa lasi. 32 Namona be Dirava bona ena hebogahisi hereadaena ena hereva ese umui ia gimaia. Unai hereva ese umui do ia hagoadaia bona helaga taudia dekenai do ia henia ahuna be umui dekenai do ia henia.+ 33 Lau be tau ta ena siliva, golo eiava dabua lau mataganigani henia lasi.+ 34 Umui diba vadaeni, egu imana amo gaukara lau karaia, lau sibona+ bona egu bamodia lau durua totona. 35 Gau ibounai lalonai umui dekenai lau hahedinaraia, namona be umui gaukara goada+ bona manoka taudia umui durua. Bona Lohiabada Iesu ena hereva umui laloatao be namo, ia gwau: ‘Henia kara ena moale be bada,+ to abia kara ena moale be maragi.’”

36 Unai gaudia ia gwauraia murinai, idia ibounai ida ia tui diho bena ia guriguri. 37 Oibe, idia ibounai idia taitai bada bona Paulo idia rosia bona mai hebogahisi ida idia kisi henia, 38 badina ia gwauraia hereva ese edia lalona ia hahisia bada, ia gwau ena vairana do idia itaia lou lasi.+ Vadaeni sisima dekenai ia ida idia raka lao.