Revareva ta Roma Taudia Dekenai

2 Bema oi be ta oi hahemaoro henia, namo lasi oi gwau oi be mai emu kerere lasi, herevana oi be daika.+ Oi ese ta oi hahemaoro henia neganai, oi be sibona oi hahemaoro henia unai, badina oi danu be unai kara oi karaia noho.+ 2 Dirava ese unai kara idia karaia taudia do ia hahemaoro henia, bona ita diba Dirava be hereva momokani hegeregerena ena hahemaoro ia karaia.

3 Unai kara idia karaia taudia oi hahemaoro henia tauna e, bema oi danu be unai bamona oi karaia, oi laloa Dirava ena hahemaoro amo do oi heau mauri, a? 4 Eiava iena hebogahisi bada+ bona haheauka+ bona boga-auka karadia+ oi laloa bada lasi, badina oi diba lasi Dirava be ena hebogahisi amo oi ia durua toho, oi helalo-kerehai totona, a?+ 5 To oi kwara auka bona oi ura lasi oi helalo-kerehai, oi ese Dirava ena badu be oi sibona dekenai oi haboua noho. Bona Dirava ese unai badu be iena hahemaoro maoromaoro dinana ai do ia hahedinaraia.+ 6 Bona ia ese ta ta edia kara hegeregerena davana do ia henia.+ 7 Mai haheauka ida kara namo idia karaia taudia be hairai bona hemataurai idia tahua dainai, ia ese idia dekenai mauri hanaihanai do ia henia bona ia bodaga diba lasi tauanina do idia abia.+ 8 To, idia badu momo bona hereva momokani idia badinaia lasi taudia, bona kara kerere idia karaia noho taudia ese Dirava ena panisi bona badu do idia davaria.+ 9 Kara dika idia karaia taudia ibounai ese hisihisi bona metau do idia davaria, Iuda taudia be guna bena Grik taudia danu. 10 To kara namo idia karaia taudia ibounai ese hairai, hemataurai, bona maino do idia abia, Iuda taudia be guna+ bena Grik taudia danu.+ 11 Badina Dirava ese maka tamona dekenai taunimanima ibounai ia kara henia.+

12 Dirava ena taravatu idia diba lasi bona idia kara dika taudia ibounai be do idia ore, ena be taravatu be lasi idia ia hahemaoro henia totona,+ to taravatu henunai idia noho bona idia kara dika taudia be taravatu hegeregerena do idia hahemaoro henia.+ 13 Badina taravatu idia kamonai taudia be Dirava vairanai idia maoromaoro lasi, to taravatu idia badinaia taudia be Dirava ese do ia gwauraia maoromaoro.+ 14 Vadaeni taravatu idia diba lasi bese taudia be edia lalona ese ia hadibaia,+ taravatu idia badinaia totona. Ena be idia dekenai taravatu be lasi, to edia kudouna ai taravatu ia noho. 15 Unai taudia ese idia hahedinaraia, taravatu ena hereva badadia be edia kudouna ai idia noho, bona edia lalomamina danu ese unai ia hahedinaraia, bona unai idia lalohadailaia neganai, edia lalona ese idia ia gwauraia kerere eiava idia ia gwauraia maoromaoro. 16 Dirava ese Iesu Keriso amo, taunimanima ese hehuni ai idia karaia gaudia ia hahemaoro henia neganai, unai do ia vara.+ Unai be lau ese lau harorolaia sivarai namona hegeregerena.

17 Bema oi be Iuda tauna+ bona taravatu oi abidadama henia, bona Dirava dainai oi moale, 18 bona iena ura oi diba bona Taravatu*+ amo oi idia hadibaia dainai, mai anina bada gaudia oi lalopararalaia, 19 bona oi diba oi be matakepulu taudia edia hakaua tauna, bona dibura ai idia noho taudia edia diari, 20 bona oi be laloa maoromaoro lasi taudia edia hamaoromaoroa tauna, oi be natuna maragidia bamona idia laloa taudia edia hadibaia tauna, bona Taravatu amo oi be diba bona hereva momokani edia toana oi diba. 21 Oi ese ta oi hadibaia, to oi sibona oi hadibaia lasi, a?+ Oi haroro oi gwau, “Henaohenao lasi,”+ to oi henaohenao, a? 22 Oi gwau, “Heudahanai lasi,”+ to oi heudahanai, a? Oi gwau, oi be kaivakuku oi inai henia, to oi ese Dubu Helaga edia kohu oi henaoa, a? 23 Oi ese taravatu oi heagilaia, to Taravatu utua karana amo Dirava oi matauraia lasi, a? 24 Toretore Helagadia ena hereva bamona, ia gwau: “Umui dainai Dirava ena ladana be idau bese taudia huanai idia hadikaia.”+

25 Momokani, kopina utua karana+ be mai anina bema oi ese taravatu oi badinaia.+ To bema oi be taravatu utua tauna, kopina utua karana be anina lasi. 26 Unai dainai, bema kopina utua lasi tauna+ ese Taravatu ena oda hereva maoromaorodia ia badinaia, ita gwau diba ia be kopina utua tauna, ani?+ 27 Bona kopina utua lasi idau bese tauna be Taravatu badinaia karana amo, ia ese oi do ia hahemaoro henia, badina ena be oi dekenai idia torea taravatu idia noho bona emu kopina idia utua, to oi ese taravatu oi utua. 28 Badina Iuda tauna korikorina be toana amo lasi,+ bona iena kopina utua karana be tauanina ai idia karaia gauna lasi.+ 29 To ta ena kudouna ai ia noho gauna ese ia hahedinaraia ia be Iuda tauna korikorina,+ bona iena kopina utua karana be kudouna ai,+ unai be lauma helaga amo ia vara, to idia torea taravatu amo ia vara lasi.+ Unai tauna ena hanamoa be Dirava amo ia mai, to taunimanima amo lasi.+