Revareva ta Roma Taudia Dekenai

11 Vadaeni, lau henanadai, Dirava ese ena taunimanima ia dadaraia, a?+ Lasi momokani! Badina lau danu be Israela tauna ta, Aberahamo ena bese, Beniamina iduhu amo. 2 Dirava ese ena taunimanima, guna ia laloa bada taudia unai, ia dadaraia lasi.+ Toretore Helagadia ese Elia dainai ia gwauraia herevadia be umui diba lasi, a? Elia be Dirava ia guriguri henia bona Israela taudia dainai ia hereva momo. Ia gwau: 3 “Iehova* e, idia ese emu peroveta taudia idia hamasea, emu pata helagadia idia hadikaia vadaeni, bona lau sibona lau noho bona hari idia ura lau idia hamasea.”+ 4 To Dirava ena haere ia dekenai be dahaka? Ia gwau: “Taunimanima 7,000 idia do noho, idia be Bala dekenai idia tui diho lasi.”+ 5 Vadaeni unai hegeregerena, hari inai negai haida sibona idia noho,+ Dirava ese ena hebogahisi hereadaena dainai idia ia abia hidi. 6 Bema unai abia hidi be hebogahisi hereadaena dainai,+ vadaeni unai be edia kara dainai lasi.+ Badina bema unai be edia kara dainai idia ia abia hidi, anina be unai hebogahisi hereadaena be hebogahisi hereadaena lasi.

7 Vadaeni dahaka do ita gwau? Israela taudia be mai edia ura ida idia tahua gauna idia abia lasi, to Dirava ese ia abia hidi taudia be unai gauna idia abia.+ To idia oredia edia lalona be idia dibura.+ 8 Toretore Helagadia ia gwau: “Dirava ese idia be mahuta boio taudia bamona ai ia halaoa.+ Ia ese matana ia henia to idia itaia diba lasi, bona taiana ia henia to idia kamonai diba lasi. Idia be unai bamona idia noho ema bona hari.”+ 9 Danu, Davida ia gwau: “Idia totona edia pata be tarapu ai ia lao, bona hahekwakwanaia bona panisi gauna ai ia lao. 10 Edia matana oi hadiburaia, unai amo do idia itaia lasi, bona nega ibounai edia doruna oi hakwaidua.”+

11 Unai dainai lau henanadai, idia hekwakwanai bona idia moru momokani, a? Lasi momokani! To idia raka kerere dainai, idau bese taudia dekenai hahemauri dalana ia kehoa, unai ese Israela taudia edia lalona ia hauraia bena idia mama.+ 12 Bema idia raka kerere ena anina be tanobada taudia do idia taga bona edia namba ia diho ena anina be idau bese taudia do idia taga,+ vadaeni edia namba ia guguru neganai, unai taudia edia taga do ia bada momokani!

13 Vadaeni lau be umui idau bese taudia lau hereva henia. Lau be idau bese taudia edia aposetolo tauna dainai,+ egu hesiai gaukara lau hanamoa bada,+ 14 bona do lau itaia bema dala haida ai egu bese taudia edia lalona do lau hauraia bena do idia mama, bona idia huanai haida do lau hamauria. 15 Dirava ese idia ia negea,+ bona unai ese dala ia kehoa tanobada taudia ibounai be Dirava ida maino ai do idia noho. Bema unai bamona, vadaeni Dirava ese idia ia hamauria neganai, dahaka do ia vara? Unai be hegeregere idia be mase amo idia toreisi lou bona mauri idia abia. 16 Danu, bema paraoa ena kahana ginigunana be ia helaga, vadaeni paraoa ibounai danu be ia helaga. Bona bema au ena ramuna be ia helaga, vadaeni ena rigi danu be idia helaga.

17 To bema au ena rigi haida idia utua oho to oi, ena be oi be ia tubu kava olive auna ena rigi, to oi be unai au ena rigi haida edia huanai idia atoa vareai, vadaeni unai au ena ramuna amo namo bada oi abia, 18 to namo lasi oi laloa oi ese unai au rigidia oi hereaia. Bema oi laloa idia oi hereaia,+ namona be oi laloatao, oi ese ramuna oi durua lasi, to ramuna ese oi ia durua. 19 Reana do oi gwau: “Au rigidia idia utua oho, lau be au dekenai idia atoa vareai totona.”+ 20 Momokani, edia abidadama lasi karana dainai, Dirava ese idia ia utua oho,+ to abidadama dainai oi be oi gini noho.+ Namo lasi oi hekokoroku, to do oi gari. 21 Badina bema Dirava ese unai au ena rigi korikoridia ia utua, ia ese oi do ia utua danu. 22 Unai dainai, Dirava ena hebogahisi bona iena panisi karana do oi laloa.+ Idia moru taudia ia panisia,+ to oi dekenai Dirava ena hebogahisi ia noho, to unai hebogahisi oi abia totona, gau badana be unai hebogahisi lalonai oi noho, bema lasi, ia ese oi danu do ia utua oho. 23 Bema idia danu idia abidadama matamaia lou, Dirava ese idia do ia atoa vareai lou,+ badina ia hegeregere idia ia atoa vareai lou totona. 24 Bema ia tubu kava olive auna amo oi idia utua oho, bona uma ai ia tubu olive auna ai idia atoa vareai, unai be vaia idia karaia gauna lasi. Unai dainai olive au ena rigi korikoridia be olive auna dekenai idia atoa vareai lou be auka lasi!

25 Tadikaka e, lau ura inai hunia hereva helagana do umui lalopararalaia,+ unai amo umui sibona umui laloa lasi emui aonega be bada herea. Gauna be inai, Israela taudia haida edia lalona ia dibura noho ela bona idau bese taudia edia namba ia guguru bona idia vareai. 26 Bona unai dala ai Israela taudia ibounai+ be hahemauri do idia abia. Toretore Helagadia ai idia torea bamona, ia gwau: “Hamauria tauna be Siona amo do ia mai+ bona Iakobo ena bese do ia durua, kara dika idia rakatania totona. 27 Bona edia kara dika lau kokia neganai,+ idia ida egu gwauhamata do lau karaia.”+ 28 Momokani, idia ese sivarai namona idia dadaraia dainai, idia be Dirava ena inai taudia ai idia lao, umui ese namo umui abia totona, to Dirava ese edia sene taudia dekenai ia karaia gwauhamatana dainai, haida ia abia hidi bona idia be iena turadia.+ 29 Dirava be ena harihari gaudia eiava ia boiria taudia dainai do ia lalohisihisi lasi. 30 Guna umui be Dirava umui kamonai henia lasi,+ to edia kamonai lasi karana dainai,+ Dirava ese umui dekenai hebogahisi ia hahedinaraia.+ 31 Unai hegeregerena, idia danu be hari idia kamonai lasi, unai dainai Dirava ese umui ia hebogahisi henia, unai amo Dirava ese idia dekenai hebogahisi ia hahedinaraia danu. 32 Dirava ese idia ibounai be kamonai lasi karana lalonai ia koua hebou,+ unai amo idia ibounai dekenai hebogahisi ia hahedinaraia.+

33 Dirava ena taga, ena aonega bona ena diba be dobu momokani! Iena hahemaoro karadia be ta ese ia tahua diba lasi bona ena dala ibounai be ta ese ia lalopararalaia diba lasi! 34 Badina “daika be Iehova* ena lalohadai ia diba? Eiava daika be iena sisiba tauna ai ia lao?”+ 35 Eiava “daika ese Dirava dekenai gau ta ia henia guna, vadaeni ia ese unai tauna dekenai do ia haloua?”+ 36 Badina ia ese gau ibounai ia havaraia, idia be ia amo, bona iena ura dainai idia noho. Ia dekenai hairai ia noho ela bona hanaihanai. Amen.