Iosua

23 Dina momo murinai Iehova ese Israela taudia be edia inai taudia amo laga-ani ia henia.+ Iosua be ia buruka, bona ena mauri lagani ia bada neganai,+ 2 ia ese Israela taudia ibounai bona edia tau badadia, kwarana taudia, hahemaoro taudia, bona ofesa taudia ia boiria,+ bona ia gwau: “Lau be lau buruka, bona egu mauri lagani ia bada. 3 Bona Iehova emui Dirava ese umui totona inai bese taudia ibounai dekenai ia karaia gaudia be umui sibona ese umui itaia vadaeni, badina Iehova emui Dirava be umui totona ia tuari.+ 4 Ioridane ena west kahana* amo ia daekau lao Davara Badana* ai idia noho taudia be lau ese lau lulua lao vadaeni,+ bona umui totona gadara ta* amo tano lau abia hidi.+ Taunimanima ma haida be unai tano ai idia do noho, to ia be umui emui. 5 Bona Iehova emui Dirava ese emui vairana amo idia ia doria siri noho,+ bona umui totona idia ia lulua lao bona umui ese edia tano umui abia, Iehova emui Dirava ese umui ia gwauhamata henia hegeregerena.+

6 “Vadaeni namona be umui boga-auka bona Mose ena Taravatu bukana lalonai idia torea hereva ibounai umui badinaia,+ bona idia amo umui raka-siri lasi idiba eiava lauri kahana dekenai umui lao totona.+ 7 Bona umui ida idia do noho besedia umui bamoa lasi.+ Bona namo lasi edia dirava idauidau edia ladana umui gwauraia+ eiava edia ladana ai umui gwauhamata, bona namo lasi idia umui hesiai henia eiava idia dekenai umui tui diho.+ 8 To namona be Iehova emui Dirava umui badinaia noho,+ guna amo ema bona hari umui karaia bamona. 9 Iehova ese emui vairana amo bese badadia bona goadadia do ia lulua lao,+ badina guna amo ema bona hari taunimanima ta be ia hegeregere lasi emui vairanai ia gini totona.+ 10 Umui ta ese taunimanima tausen do ia lulua,+ badina Iehova emui Dirava be umui totona ia tuari noho,+ umui ia gwauhamata henia hegeregerena.+ 11 Namona be Iehova emui Dirava umui lalokau henia,+ unai amo hanaihanai do umui gima noho.+

12 “To bema Dirava umui dadaraia bona inai bese amo idia do noho taudia umui badinaia+ bona idia ida headava gwauhamata umui karaia+ bona idia umui bamoa, 13 namona be umui diba momokani, Iehova emui Dirava ese umui totona inai bese taudia do ia lulua noho lasi.+ Idia be tarapu ta bamona umui dekenai bona kwadia gauna bamona, umui do idia kwadia,+ bona idia be ginigini bamona emui matana lalonai do idia noho, ela bona Iehova emui Dirava ese umui ia henia tano namona ai umui mase ore.

14 “Itaia, lau be kahirakahira do lau mase, bona umui diba momokani Iehova emui Dirava ese umui dekenai ia gwauraia gwauhamata namodia ibounai be idia moru lasi. Idia ibounai be umui dekenai idia vara momokani. Oibe, idia ta ia moru lasi.+ 15 To Iehova emui Dirava ese umui dekenai ia gwauraia gwauhamata namodia ibounai be idia vara momokani hegeregerena,+ Iehova ese umui latanai ia gwauhamatalaia dika ibounai do ia mailaia, bona Iehova emui Dirava ese umui dekenai ia henia tano namona amo umui do ia hamasea ore.+ 16 Iehova emui Dirava ese umui ia oda henia iena taravatu umui badinaia totona, to bema unai taravatu umui makohia bona bema dirava ma haida umui hesiai henia bona idia dekenai umui tui diho, vadaeni Iehova ena badu mai siahuna do umui mamia+ bona umui dekenai ia henia tano namona amo karaharaga do umui mase ore.”+