Sivarai Ginigunana

17 Davida be sibona ena ruma ai ia noho, vadaeni peroveta tauna Natana dekenai ia gwau:+ “Lau be sida rumana lalonai lau noho,+ to Iehova ena Taravatu Maua be palai rumana lalonai ia noho.”+ 2 Natana be Davida dekenai ia gwau: “Emu kudouna ena ura hegeregerena oi kara, badina Dirava momokanina be oi ida.”

3 Unai hanuaboi ai, Dirava be Natana ia hereva henia, ia gwau: 4 “Oi lao bona egu hesiai tauna Davida dekenai oi gwau, ‘Iehova be inai bamona ia hereva: “Oi ese ruma do oi haginia lasi lau noho totona.+ 5 Israela taudia be Aigupito amo lau hakaua mai dinana amo ema bona hari, lau be ruma ta dekenai lau noho lasi, to palai ruma idauidau bona gabu idauidau ai lau noho.+ 6 Israela taudia ida lau noho negadia ibounai lalonai, lau ese egu taunimanima naria totona lau abia hidi hahemaoro taudia dekenai, nega ta lau gwau lasi, ‘Dahaka dainai lau totona sida rumana ta umui haginia lasi?’”’

7 “Vadaeni egu hesiai tauna Davida dekenai inai oi gwauraia, ‘Tuari oreadia edia Iehova* be inai bamona ia gwau: “Lau ese rei gabudia amo oi lau abia, oibe, mamoe oreana naria gaukarana amo oi lau abia, egu taunimanima Israela taudia oi gunalaia totona.+ 8 Bona oi lao gabudia ibounai dekenai lau be oi ida,+ bona emu vairana amo emu inai taudia ibounai do lau haorea,*+ bona emu ladana do lau habadaia, tanobada ena dagi bada taudia edia ladana hegeregerena.+ 9 Lau ese egu taunimanima Israela taudia totona gabu ta do lau abia hidi bona unuseniai do idia noho, bona gau ta ese edia noho do ia hadikaia lasi. Bona kara dika taudia ese do idia hahisia lou lasi, guna idia karaia bamona.+ 10 Lauegu taunimanima totona hahemaoro taudia lau abia hidi negana amo, unai lau karaia.+ Bona emu inai taudia ibounai do lau halusia.+ Danu, oi lau hamaoroa, ‘Lau, Iehova be oi amo lohia besena ta do lau havaraia.’

11 “‘“Oi mase bona emu sene taudia ida idia guria hebou neganai, lau ese emu natuna* ta, emu natuna korikorina be king ai do lau halaoa,+ bona iena basileia do lau haginia goada momokani.+ 12 Ia ese lau totona ruma ta do ia haginia,+ bona lau ese ena terona do lau haginia goada ela bona hanaihanai.+ 13 Lau be iena tamana ai do lau lao, bona ia be egu natuna ai do ia lao.+ Egu lalokau* be ia amo do lau kokia lasi,+ oi vairanai ia lohia tauna amo lau kokia hegeregerena.+ 14 Lau ese ia do lau abia bona egu terona ai do ia helai ela bona hanaihanai,+ bona ena lohia dalana bona lohia besena be do ia noho hanaihanai.”’”+

15 Natana ese Davida dekenai inai hereva ibounai bona matahanai ibounai ia gwauraia.

16 Unai neganai King Davida be ia vareai bona Iehova vairanai ia tui diho, ia gwau: “Iehova Dirava e, lau be daika? Bona egu lohia besena taudia be anina lasi, dahaka dainai ai totona gau momo herea oi karaia vadaeni?+ 17 Dirava e, ena be ai totona gau momo herea oi karaia vadaeni, to ma oi ese lau oi hamaoroa, lau, emu hesiai tauna, egu bese be do ia noho ela bona vaira negai danu.+ Iehova Dirava e, oi ese lau be ladana bada tauna ta bamona oi laloa. 18 Lau, emu hesiai tauna Davida, oi diba namonamo dainai, lau dekenai oi henia hanamoa karana be edena bamona do lau herevalaia?+ 19 Iehova e, emu hereva dainai bona emu ura hegeregerena, oi ese inai kara badadia ibounai oi karaia bona oi hahedinaraia vadaeni.+ 20 Iehova e, ta be oi bamona lasi,+ bona Dirava ta ia noho lasi to oi sibona.+ Emai taiana amo ai kamonai herevadia ibounai ese unai ia hamomokania. 21 Bona tanobada ai edena bese ma ta be emu bese Israela taudia bamona?+ Oi, Dirava momokanina, oi lao bona idia oi ruhaia emu taunimanima bamona.+ Bona emu taunimanima, Aigupito amo oi ruhaia taudia unai, edia vairana amo bese idauidau oi luludia raka-lasi neganai, idia totona hoa kara badadia oi karaia, unai amo oi sibona totona ladana bada oi abia.+ 22 Oi ese Israela taudia be emu bese korikorina ai oi halaoa ela bona hanaihanai.+ Bona Iehova e, oi be edia Dirava ai oi lao.+ 23 Iehova e, namona be emu hesiai tauna bona ena bese taudia totona oi karaia gwauhamata be nega ibounai oi hamomokania, bona namona be emu gwauhamata hegeregerena oi kara.+ 24 Namona be emu ladana ia hedinarai bona idia hanamoa+ ela bona hanaihanai, unai amo taunimanima idia gwau diba, ‘Tuari oreadia edia Iehova be Israela ena Dirava,’ bona mani lau, emu hesiai tauna Davida, ena lohia besena be emu vairanai oi haginia goada.+ 25 Badina oi, egu Dirava e, oi ese emu hesiai tauna dekenai emu ura oi hahedinaraia ia totona lohia besena ta do oi haginia. Unai dainai, lau, emu hesiai tauna be mai lalogoada ida oi dekenai inai guriguri lau gwauraia. 26 Bona Iehova e, oi be Dirava momokanina, bona oi ese inai gau namodia be emu hesiai tauna totona oi gwauhamatalaia. 27 Unai dainai namona be oi moale emu hesiai tauna ena lohia besena oi hanamoa totona, bona namona be oi vairanai ia noho ela bona hanaihanai, badina Iehova e, oi ese oi hanamoa vadaeni, bona do oi hanamoa ela bona hanaihanai.”