Salamo

85 Iehova e, oi ese emu tano oi lalonamo henia,+

Oi ese Iakobo ena bese, idia abia lao taudia unai, oi abia giroa.+

 2 Oi ese emu taunimanima edia kerere oi gwauatao vadaeni,

Edia kara dika ibounai oi gwauatao vadaeni.+ (Sela)

 3 Oi badu dikadika, to oi hahedinaraia lasi,

Emu badu mai siahuna oi koua.+

 4 Emai hahemauri Diravana e, ai oi hanamoa lou,*

Bona ai oi badu henia lasi.+

 5 Oi be ai do oi badu henia hanaihanai, a?+

Emu badu be nega ta do ia doko lasi, a?

 6 Ai, emu taunimanima, ese oi ai hanamoa totona,

Oi ese ai do oi hagoadaia lou, ani?+

 7 Iehova e, ai dekenai emu lalokau* oi hahedinaraia,+

Bona ai dekenai hahemauri oi henia.

 8 Lau be Dirava momokanina Iehova ena hereva do lau kamonai,

Badina ia be ena taunimanima, ia idia badinaia taudia, dekenai maino do ia herevalaia,+

To namo lasi idia hekokoroku lou.+

 9 Dirava ia noho hegaegae ia idia gari henia taudia hamauria totona,+

Unai amo ena hairai be iseda tano dekenai do ia noho.

10 Lalokau* bona kara momokani be do idia hedavari,

Kara maoromaoro bona maino be do idia raka hebou.+

11 Kara momokani be tano amo do ia tubu daekau,

Bona kara maoromaoro be guba amo do ia itaia diho.+

12 Oibe, Iehova ese gau namodia do ia henia,+

Bona iseda tano be anina namona do ia havaraia.+

13 Dirava ena vairanai kara maoromaoro do ia raka,+

Bona Dirava ena raka gabuna ena dala do ia karaia.