Revareva ta Efeso Taudia Dekenai

1 Lau Paulo, Dirava ena ura dainai lau be Keriso ena aposetolo tauna ai lau lao, bona Efeso dekenai idia noho helaga taudia+ bona Keriso Iesu ida idia hakapua abidadama taudia dekenai, inai revareva lau torea.

2 Namona be Dirava iseda Tamana bona Lohiabada Iesu Keriso amo, hebogahisi hereadaena bona maino umui abia.

3 Iseda Lohiabada Iesu Keriso ena Dirava bona Tamana do ita hanamoa, ita be Keriso ida ita hakapua dainai, ia ese guba ai lauma helaga ena hahenamo amo ita ia hanamoa.+ 4 Taunimanima be tanobada ai idia do vara lasi negana amo, Dirava ese ita ia abia hidi Keriso ida ita hakapua totona, unai amo lalokau do ita hahedinaraia, bona ia vairanai do ita helaga bona goeva.+ 5 Badina ia ese ita ia abia hidi guna,+ bona Iesu Keriso amo ita be ena natudia ai ia halaoa,+ unai ia moalelaia bona unai be iena ura hegeregerena.+ 6 Iena lalokau Natuna amo ita dekenai ia hahedinaraia hebogahisi hereadaena dainai,+ taunimanima ese ia do idia hanamoa.+ 7 Unai lalokau natuna ese mauri davana ia karaia bona ena rara amo ita ia ruhaia.+ Unai dainai Dirava ese iseda kerere ia gwauatao,+ iena hebogahisi hereadaena hegeregerena.

8 Dirava ese ita dekenai unai hebogahisi hereadaena ia hahedinaraia badabada, aonega ibounai bona laloparara danu ia henia, 9 bona Dirava ese ena ura ena hunia hereva helagana be ita dekenai ia hahedinaraia.+ Unai hunia herevana be ena ura hegeregerena ia lalohadailaia vadaeni gauna. 10 Unai hunia herevana ena anina be inai, ia ese ia abia hidi nega korikorina ai gaukara haheaua dalana ia haginia, unai amo Keriso lalonai gau ibounai ia haboua, unai be guba gaudia bona tanobada gaudia.+ Oibe, ia lalonai gau ibounai ia haboua, 11 bona ai be ia ida ai hakapua, bona Dirava ese ai ia abia hidi, ai dekenai ia gwauhamatalaia gauna ai abia totona.+ Ia ese ai ia abia hidi guna, unai be ia lalohadailaia dalana hegeregerena. Bona gau ibounai be ena ura hegeregerena ia karaia. 12 Bona ai, Keriso ai abidadama henia taudia ginigunadia, ai amo Dirava ese hanamoa bona hairai do ia abia. 13 To umui ese hereva momokani, umui ia hamauria sivarai namona unai, umui kamonai murinai, umui danu ese ia umui abidadama henia. Bona ia umui abidadama henia murinai, Dirava ese ia gwauhamatalaia vadaeni lauma helaga amo umui ia makaia.+ Unai be ia dainai ia vara. 14 Unai lauma helaga be hamomokania gauna, Dirava ese ia gwauhamatalaia gaudia ibounai be ita dekenai do ia henia.+ Lauma helaga ena maka umui abia bona mauri davana ese Dirava ena taunimanima ia ruhaia,+ bona unai ese Dirava ia hanamoa bada.

15 Lau kamonai umui be Lohiabada Iesu umui abidadama henia bona helaga taudia ibounai dekenai lalokau umui hahedinaraia. Unai dainai lau danu 16 be umui dainai nega ibounai Dirava lau tanikiu henia. Hanaihanai umui totona lau guriguri, 17 unai amo iseda Lohiabada Iesu Keriso ena Dirava, hairai bada Tamana unai, ese umui dekenai siahu do ia henia, unai amo do umui aonega, bona ia dekenai diba maoromaoro umui abia noho lalonai, ia hahedinaraia gaudia do umui lalopararalaia.+ 18 Bona ia ese emui lalona ena matana ia hadiaria, unai amo umui ia boiria do umui abia helarona bona helaga taudia edia dava bada gaudia, unai be idia dekenai do ia henia ahuna, do umui diba,+ 19 bona ita abidadama taudia dekenai ia hahedinaraia siahu badana do umui diba danu.+ Unai siahu badana be ia hagugurua gaukaradia amo ia hahedinaraia. 20 Ia ese Keriso be mase amo ia hatorea isi lou bona guba ai iena idiba kahanai Keriso ia helai neganai, unai siahu badana ia gaukaralaia.+ 21 Keriso ese gavamani, dagi bada taudia, siahu taudia, lohia taudia, bona ladana ibounai ia hereaia,+ inai nega oromana* dekenai sibona lasi, to vaira nega ai danu. 22 Danu Dirava ese gau ibounai be Keriso ena aena henunai ia atoa,+ bona kongrigeisen ai ia be gau ibounai ena kwarana ai ia halaoa.+ 23 Oibe, kongrigeisen be iena tauanina,+ ia ese ia hahonua bona ia ese gau ibounai ia karaia guguru.