Salamo

96 Iehova dekenai ane matamata abia.+

Tanobada taudia ibounai e, Iehova dekenai ane abia!+

 2 Iehova dekenai ane abia, iena ladana hanamoa.

Dina ta ta ai iena hamauria ena sivarai namona umui harorolaia.+

 3 Bese idauidau huanai iena hairai umui herevalaia,

Taunimanima ibounai huanai iena kara namo hereadia umui herevalaia.+

 4 Iehova ena siahu be bada herea bona hanamoa ia abia be namo.

Ia sibona ita gari henia be namo, badina dirava idauidau ibounai ia hereaia.

 5 Taunimanima edia dirava ibounai be anina lasi diravadia,+

To Iehova sibona ese guba ia karaia.+

 6 Siahu bada bona hairai bada ese Dirava idia hagegea,+

Goada bona hairai be iena noho gabuna amo idia diaridiari.+

 7 Tanobada besedia e, Iehova umui hanamoa,

Iehova ena hairai bona goada dainai ia umui hanamoa.+

 8 Iehova ena ladana dainai ia umui hanamoa.+

Harihari gauna ta umui abia bona iena ariara dekenai umui mai.

 9 Iehova dekenai umui tui diho* mai emui dabua helagadia ida.*

Tanobada taudia ibounai e, ia vairanai do umui heudeheude mai gari ida!

10 Bese idauidau huanai umui gwau: “Iehova be King ai ia lao vadaeni!+

Tanobada be ia gini goada noho, do ia marere diba lasi.

Dirava ese taunimanima do ia kota henia maoromaoro.”+

11 Guba ia moale, bona tanobada ia moale bada.

Davara bona davara lalonai idia noho gaudia ibounai do idia boiboi.+

12 Tano bona tano latanai idia noho gaudia ibounai do idia moale.+

Unai nega ai uda badadia lalonai idia noho au be mai moale ida Iehova vairanai do idia boiboi,+

13 Badina Dirava ia mai noho,

Tanobada hahemaoro henia totona.

Ia be mai kara maoromaoro ida tanobada do ia hahemaoro henia+

Bona mai kara momokani ida taunimanima do ia kota henia.+