Deuteronomi

30 “Inai hereva ibounai, umui dekenai lau gwauraia hanamoa bona hadikaia herevadia unai, be umui dekenai idia vara neganai,+ Iehova emui Dirava ese umui ia lulua lao bona umui noho besedia edia huanai+ unai do umui laloatao,*+ 2 bona mai emui kudouna bona mauri* ibounai ida Iehova emui Dirava dekenai umui giroa lou+ bona ena hereva umui kamonai, hari dina umui bona emui natudia lau oda henia hegeregerena,+ 3 bena Iehova emui Dirava ese umui amo idia abia mauri taudia do ia abia lou+ bona umui do ia hebogahisi henia,+ bona Iehova emui Dirava ese umui ia lulua lao besedia amo umui do ia haboua lou.+ 4 Ena be emui taunimanima be tanobada ena daudau momokani gabudia ai idia noho, to Iehova emui Dirava ese unuseni amo umui do ia haboua bona umui do ia hakaua lou.+ 5 Iehova emui Dirava ese guna emui sene taudia idia abia tano ai umui do ia hakaua vareai, bona unuseniai do umui noho. Bona ia ese umui do ia hanamoa bona emui namba do ia habadaia, emui sene taudia edia namba do ia hanaia.+ 6 Iehova emui Dirava ese emui kudouna bona emui natudia edia kudouna do ia hagoevaia,+ unai amo mai emui kudouna ibounai bona mauri* ibounai ida Iehova emui Dirava do umui lalokau henia bona do umui mauri noho.+ 7 Bena Iehova emui Dirava ese inai hadikaia hereva ibounai be emui inai taudia, umui idia badu henia bona dagedage henia taudia unai, edia latanai do ia mailaia.+

8 “Umui be Iehova ena gadona do umui kamonai henia lou bona ena oda hereva ibounai do umui badinaia, hari dina umui lau oda henia hegeregerena. 9 Iehova emui Dirava ese emui ima gaukaradia ibounai do ia hanamoa momokani,+ emui natudia bona animal bona tano ena anina be do idia momo herea, badina Iehova be ma do ia moale umui ia hanamoa totona, emui sene taudia dekenai ia moale hegeregerena.+ 10 Bena Iehova emui Dirava do umui kamonai henia bona ena oda herevadia bona taravatu do umui badinaia, inai Taravatu bukana lalonai idia torea herevadia unai, bona mai emui kudouna ibounai bona mauri* ibounai ida Iehova emui Dirava dekenai do umui giroa lou.+

11 “Hari dina umui dekenai lau gwauraia oda herevadia be idia auka lasi umui lalopararalaia totona, unai oda herevadia umui badinaia diba.+ 12 Inai be guba dekenai idia noho lasi, unai dainai umui gwau lasi, ‘Daika be guba dekenai do ia daekau bona ita totona unai oda herevadia do ia abia, unai amo ita kamonai bona badinaia diba?’+ 13 Bona ia be davara ena kahana ma ta dekenai ia noho lasi, unai dainai umui gwau lasi, ‘Daika be davara ena kahana ma ta dekenai do ia hanaia lao bona ita totona unai oda herevadia do ia abia, unai amo ita kamonai bona badinaia diba?’ 14 Unai hereva be umui kahirakahira momokani, emui uduna ai bona emui kudouna lalonai idia noho,+ unai amo umui badinaia diba.+

15 “Kamonai, lau ese hari dina emui vairanai mauri bona namo lau atoa, bona mase bona dika lau atoa.+ 16 Bema Iehova emui Dirava ena oda herevadia umui kamonai henia, hari dina umui lau oda henia hegeregerena, bona bema Iehova emui Dirava umui lalokau henia,+ iena dala dekenai umui raka, bona iena oda herevadia, taravatu, bona hahemaoro herevadia umui badinaia, vadaeni do umui mauri+ bona do umui momo herea, bona do umui noholaia tano ai Iehova emui Dirava ese umui do ia hanamoa.+

17 “To bema Dirava umui kamonai henia lasi+ bona umui raka siri, bona haida ese emui lalona idia veria dirava ma haida dekenai umui tui diho bona umui hesiai henia,+ 18 hari dina umui lau hamaoroa, umui be do umui mase ore.+ Ioridane umui hanaia bona do umui noholaia tano ai do umui mauri daudau lasi. 19 Guba bona tanobada ladanai lau gwauhamata, lau ese emui vairanai mauri bona mase, hanamoa bona hadikaia lau atoa.+ Bona namona be umui ese mauri umui abia hidi,+ umui bona emui bese taudia umui mauri totona,+ 20 Iehova emui Dirava umui lalokau henia,+ ena hereva umui kamonai bona ia umui badinaia,+ badina ia be emui mauri bona ia dainai do umui mauri daudau, Iehova ese emui sene taudia, Aberahamo, Isako, bona Iakobo dekenai ia gwauhamatalaia tano ai.”+