Revareva Ginigunana Korinto Taudia Dekenai

12 Tadikaka e, lau ura umui ese Dirava amo idia mai harihari gaudia umui diba.+ 2 Umui diba, umui be idau bese taudia* bamona umui noho neganai, idia hereva diba lasi kaivakuku ese umui idia hakaua kerere,+ bona umui idia hakaua gabudia ibounai dekenai umui lao. 3 Lau ura inai umui diba, ta be Dirava ena lauma amo ia hereva neganai, do ia gwau lasi: “Iesu be dika tauna!” Bona bema ta be lauma helaga ese ia hakaua, do ia gwau diba: “Iesu be Lohiabada!”+

4 Harihari gaudia be idauidau, to lauma helaga be tamona.+ 5 Bona hesiai gaukara be idauidau,+ to Lohiabada be tamona. 6 Bona gaukara be idauidau, to Dirava be tamona bona ia ese taunimanima ibounai ia durua unai gaukara idauidau idia karaia totona.+ 7 Bona lauma helaga be idia ta ta dekena amo ia hedinarai, ma haida ia durua totona.+ 8 Lauma helaga amo ta be mai aonega ida ia hereva diba, bona unai lauma helaga tamona amo ma ta be mai diba ida ia hereva, 9 unai lauma helaga tamona amo ta ia abidadama diba,+ ma ta be gorere ia hanamoa diba,+ 10 ma ta be siahu karadia ia karaia diba,+ ma ta be ia peroveta diba, ma ta be do ia tahua bema hereva ta be Dirava amo ia mai eiava lasi.+ Bona ma ta be gado idauidau ai ia hereva diba,+ bona ma ta be gado idauidau ia hahanaia diba.+ 11 To unai gaukara ibounai be unai lauma helaga tamona sibona ese ia karaia, bona ena ura hegeregerena unai harihari gaudia be ta ta dekenai ia henia.

12 Tauanina be tamona, to ena kahana be momo, bona ena be unai tauanina ena kahana ibounai be momo, to idia be tauanina tamona,+ Keriso danu be unai bamona. 13 Ita ibounai be lauma helaga tamona lalonai bapatiso ita abia, tauanina tamona ai ita lao totona, herevana ita be Iuda taudia eiava Grik taudia, igui hesiai taudia eiava ura kwalimu taudia, ita ibounai be lauma helaga tamona ita abia.

14 Momokani, tauanina ena kahana be tamona lasi, to ena kahana be momo.+ 15 Bema aena ia gwau: “Lau be imana lasi, unai dainai lau be tauanina ena kahana ta lasi,” unai ese ia hahedinaraia lasi ia be tauanina ena kahana ta lasi. 16 Bema taiana ia gwau: “Lau be matana lasi, unai dainai lau be tauanina ena kahana ta lasi,” unai ese ia hahedinaraia lasi ia be tauanina ena kahana ta lasi. 17 Bema tauanina ibounai be matana sibona, edena bamona do ia kamonai diba? Bema tauanina ibounai be taiana sibona, edena bamona gau ta do ia bonaia diba? 18 To Dirava ese ena ura hegeregerena, tauanina ena kahana ta ta be edia gabu ta ta dekenai ia atoa vadaeni.

19 Bema tauanina ena kahana idauidau be tamona, tauanina be edena bamona do ia noho? 20 To tauanina be tamona sibona bona ena kahana be idauidau. 21 Matana be imana dekenai ia gwau diba lasi: “Lau dekenai oi be anina lasi.” Eiava kwarana danu be aena dekenai ia gwau diba lasi: “Lau dekenai umui be anina lasi.” 22 Toana be tauanina ena kahana haida be idia goada lasi, to idia be mai anina bada, 23 bona ita laloa tauanina ena kahana haida be namo lasi, to idia ita naria namonamo.+ Bona tauanina ena kahana haida be hairai lasi, to idia ita laloa bada. 24 Iseda tauanina ena hairai kahadia ita hahairaia be anina lasi. Dirava ese tauanina ena kahana ibounai ia hatamonaia, bona idia namo lasi kahadia ia hahairaia bada, 25 unai amo tauanina be do ia parara lasi, to ena kahana ta ta ibounai be do idia durua heheni.+ 26 Bema tauanina ena kahana ta ia hisihisi, ma kahana ibounai be ia ida idia hisihisi+ eiava bema tauanina ena kahana ta be hairai ia abia, ma kahana ibounai be ia ida idia moale.+

27 Umui be Keriso ena tauanina,+ bona umui ta ta be unai tauanina ena kahana.+ 28 Bona Dirava ese kongrigeisen lalonai ta ta dekenai gaukara ia henia. Ginigunana be aposetolo taudia,+ iharuana be peroveta taudia,+ ihatoina be hadibaia taudia,+ bona siahu karadia idia karaia taudia,+ gorere hanamoa siahuna* idia abia taudia,+ heduru idia henia taudia, hakaua gaukara idia diba taudia,+ bona gado idauidau ai idia hereva taudia.+ 29 Idia ibounai be aposetolo taudia, a? Idia ibounai be peroveta taudia, a? Idia ibounai be hadibaia taudia, a? Idia ibounai be siahu karadia idia karaia taudia, a? 30 Idia ibounai be gorere hanamoa siahuna idia abia taudia, a? Idia ibounai be gado idauidau ai idia hereva taudia, a?+ Idia ibounai be gado idia hahanaia taudia, a? Lasi, ani?+ 31 To mai ura bada ida harihari gaudia namo hereadia umui tahua noho.+ Bona lau ese dala namo hereana be umui dekenai do lau hahedinaraia.+