Revareva Iharuana Tesalonika Taudia Dekenai

3 Emai hereva orena be inai, tadikaka e, ai totona umui guriguri noho,+ unai amo Iehova* ena hereva be gabu ibounai do ia lao haraga noho+ bona do idia hanamoa, umui ese umui karaia hegeregerena. 2 Bona danu do umui guriguri Dirava ese dagedage bona kara dika taudia amo ai ia gimaia totona,+ badina abidadama be taunimanima ibounai ese idia abia gauna lasi.+ 3 To Lohiabada be hanaihanai ena hereva ia badinaia, bona ia ese umui do ia hagoadaia bona Dika Tauna amo umui do ia gimaia. 4 Ma danu, ai be Lohiabada ena murinai ai raka bona ai diba momokani, ai gwauraia hadibaia herevadia umui badinaia noho bona unai bamona do umui karaia noho. 5 Mani Lohiabada ese emui kudouna do ia hakaua noho, unai amo Dirava do umui lalokau henia+ bona mai haheauka+ ida Keriso do umui badinaia noho.

6 Vadaeni tadikaka e, iseda Lohiabada Iesu Keriso ena ladanai umui dekenai ai gwauraia hadibaia herevadia be inai,+ tadikaka ta be dala kererena ai ia raka+ bona ai amo umui* dibaia gaudia* ia badinaia lasi neganai, do umui bamoa lasi. 7 To umui be ai umui tohotohoa dalana umui diba vadaeni,+ badina ai be umui huanai dala kererena dekenai ai raka lasi, 8 bona tau ta ena aniani ai ania kava lasi.*+ To dina bona hanuaboi ai gaukara bona ai hekwarahi, unai amo umui ta ese moni bada do ia negea lasi ai ia naria totona.+ 9 Ai be mai emai maoro gau ta totona umui ai noia, to unai ai karaia lasi.+ Ai ura umui dekenai ai hahedinaraia ai be haheitalai namona umui tohotohoa totona.+ 10 Oibe, umui ida ai noho neganai, umui dekenai inai oda ai henia: “Ia ura lasi gaukara tauna be do ia aniani lasi.”+ 11 Ai kamonai umui huanai haida be dala kererena ai idia raka,+ idia gaukara lasi, to ma haida edia mauri ai idia vara gaudia lalonai idia vareai kava.+ 12 Unai bamona taudia dekenai, Lohiabada Iesu Keriso ena ladanai inai oda bona hagoadaia herevana ai henia, namona be mai manau ida do idia gaukara bona sibodia edia hekwarahi amo idia davaria aniani idia ania.+

13 To umui, tadikaka e, kara namo karaia totona do umui hesiku lasi. 14 To bema ta be inai revareva lalonai ai torea herevana ia badinaia lasi, namona be unai tauna umui makaia bona ia umui bamoa lasi,+ unai amo do ia hemarai. 15 To ia be emui inai tauna bamona umui laloa lasi, to emui tadikaka bamona do umui sisiba henia noho.+

16 Vadaeni, mani maino Lohiabadana ese hanaihanai dala idauidau ai umui dekenai maino ia henia.+ Mani Lohiabada be umui ibounai ida ia noho.

17 Lau Paulo ese egu imana amo inai hanamoa herevana lau torea,+ egu revareva iboudiai be unai bamona lau torea, unai amo do umui diba unai revareva be lau ese lau torea.

18 Mani iseda Lohiabada Iesu Keriso ena hebogahisi hereadaena be umui ibounai latanai ia noho.