Revareva Iharuana Tesalonika Taudia Dekenai

1 Lau Paulo, Silivanus* bona Timoteo+ be umui Tesalonika kongrigeisen taudia, Dirava iseda Tamana bona Lohiabada Iesu Keriso ida umui hakapua taudia dekenai, inai revareva ai torea:

2 Mani Dirava iseda Tamana bona Lohiabada Iesu Keriso amo hebogahisi hereadaena bona maino umui abia.

3 Tadikaka e, emai ura be nega ibounai umui totona Dirava ai tanikiu henia. Unai be ia maoro, badina emui abidadama ia goada ia lao noho, bona umui ta ta ibounai emui lalokau ta ta dekenai be ia bada noho.+ 4 Unai dainai Dirava ena kongrigeisen edia huanai ai ese umui ai heagilaia.+ Ai hamaorodia ena be hekwakwanai* bona dagedage umui davaria, to umui haheauka noho bona Dirava umui abidadama henia.+ 5 Unai ese ia hamomokania Dirava ena hahemaoro be maoromaoro, badina umui be umui hegeregere Dirava ena Basileia umui abia totona, unai dainai hisihisi umui davaria noho.+

6 Oibe, Dirava ena hahemaoro be maoromaoro, badina ia ese umui idia hahisia taudia do ia panisia.+ 7 To Lohiabada Iesu bona ena siahu bada anerudia be lahi hururuhururu ida guba amo idia hedinarai neganai,+ umui, hisihisi umui davaria taudia be ai ida laga-ani do umui abia. 8 Unai nega ai, Dirava idia diba lasi taudia bona iseda Lohiabada Iesu ena sivarai namona idia abia dae lasi taudia latanai panisi do ia mailaia.+ 9 Iseda Lohiabada ese do ia hahemaoro henidia. Idia be do idia ore momokani ela bona hanaihanai, unai be edia panisi.+ Unai amo do ia itadia lou lasi eiava iena siahu bada amo do ia durudia lasi. 10 Iseda Lohiabada be do ia mai ena helaga taudia ida hairai ia abia totona neganai, ia idia abidadama henia taudia ibounai be ia dainai do idia hoa bada. Bona umui dekenai ai gwauraia gaudia umui abidadama henia dainai, umui danu be idia huanai do umui noho.

11 Unai dainai nega ibounai umui totona ai guriguri, vadaeni iseda Dirava do ia gwau diba, umui be hegeregere umui ia boiria gaukara umui karaia totona.+ Bona umui dekenai ia ura gaukarana ibounai be iena siahu amo do ia hagugurua bona emui abidadama amo umui karaia gaukara ibounai do idia guguru. 12 Vadaeni umui amo taunimanima ese iseda Lohiabada Iesu ena ladana do idia hanamoa, bona umui be ia amo hanamoa do umui abia danu. Unai ese iseda Dirava bona Lohiabada Iesu Keriso edia hebogahisi hereadaena do ia hahedinaraia.