Samuela Iharuana

12 Iehova ese Natana+ be Davida dekenai ia siaia. Vadaeni ia lao bona Davida+ dekenai ia gwau: “Siti ta ai tatau rua idia noho, ta be taga tauna bona ma ta be ogogami tauna. 2 Taga tauna be mai ena mamoe bona boromakau momo herea,+ 3 to ogogami tauna be mai ena mamoe natuna kekeni tamona sibona, ia hoia gauna unai.+ Ia ese unai mamoe ia naria namo herea, bona mamoe be ia bona ena natudia memero edia vairanai ia tubu daekau. Bona ia dekenai ia noho aniani sisina be mamoe ese ia ania bona ena kapusi amo ia inuinu bona iena imana lalonai ia mahuta. Unai mamoe natuna kekeni be iena natuna bamona ai ia lao. 4 Gabeai vadivadi tauna ta be taga tauna dekenai ia mai, bona vadivadi tauna ena aniani hegaegaelaia totona, ia ese sibona ena mamoe bona boromakau ia abia lasi, to ogogami tauna ena mamoe ia abia bona vadivadi tauna totona ia hegaegaelaia.”+

5 Unai negai Davida be unai tau dekenai ia badu dikadika, bona Natana dekenai ia gwau: “Ia mauri noho Diravana, Iehova, ena ladana ai+ oi lau hamaoroa momokani, unai ia karaia tauna ia mase be namo! 6 Bona ia be inai kara dikana ia karaia dainai, mamoe natuna kekeni ena davana henia totona, ia ese mamoe 4 ia henia be namo.”+

7 Bena Natana be Davida dekenai ia gwau: “Unai tauna be oi! Iehova, Israela ena Dirava, be inai bamona ia gwau: ‘Lau ese oi lau horoa Israela ena king ai oi lao totona,+ bona Saulo ena imana amo oi lau hamauria.+ 8 Bona lau ese oi dekenai emu lohia ena kohu ibounai+ bona iena adavadia lau henia,+ bona oi dekenai siahu lau henia Israela bona Iuda oi lohiaia totona.+ Bema unai be hegeregere lasi, lau ura oi totona gau ma haida lau karaia.+ 9 Dahaka dainai Iehova ena hereva oi dadaraia bona ena matana ai kara dika oi karaia? Oi ese Hiti tauna Uria be tuari kaia amo oi hamasea!+ Bena Amono taudia edia tuari kaia amo ia oi hamasea murinai,+ iena adavana oi abia bona oi adavaia.+ 10 Vadaeni tuari kaia be emu ruma do ia rakatania lasi,+ badina oi ese Hiti tauna Uria ena adavana oi adavaia karana amo lau oi dadaraia vadaeni.’ 11 Iehova be inai bamona ia gwau: ‘Lau ese emu ruma bese lalona amo hisihisi be oi dekenai do lau havaraia.+ Bona oiemu matana ai, lau ese emu adavana do lau abidia bona tau ma ta dekenai do lau henia,+ bona dina ena diari ai ia be emu adavana ida do ia mahuta hebou.+ 12 Ena be hehuni ai unai oi karaia,+ to lau ese Israela taudia ibounai edia vairanai bona dina ena diari ai unai bamona do lau karaia.’”

13 Bena Davida be Natana dekenai ia gwau: “Lau be Iehova dekenai lau kara dika vadaeni.”+ Natana ese Davida ia hamaoroa: “Iehova ese emu kara dika ia gwauatao.+ Oi be do oi mase lasi.+ 14 To, unai kara amo oi ese hemataurai lasi dalanai Iehova oi kara henia, unai dainai oi dekenai ia vara natuna be do ia mase.”

15 Bena Natana be ena ruma dekenai ia lao.

Bona Uria ena adavana ese Davida dekenai ia havaraia natuna be Iehova ese ia hagorerea. 16 Bona mero dainai Davida ese Dirava momokani ia noinoi henia. Davida ia aniani lasi* bona ena daiutu dekenai ia vareai bona hanuaboi ai floa dekenai ia hekure.+ 17 Vadaeni iena bese taudia edia tau badadia idia ura ia be tano amo idia hatorea isi, to ia ura lasi bona idia ida ia aniani lasi. 18 Dina namba 7 ai mero ia mase, to Davida ena hesiai taudia be idia gari ia dekenai mero ena mase sivaraina idia gwauraia totona. Idia gwau: “Mero ia do mauri lalonai ia ita hereva henia, to ita ia kamonai henia lasi. Unai dainai edena bamona ia do ita hamaoroa mero be ia mase vadaeni? Gau dikana ta ia karaia garina.”

19 Davida ia itaia ena hesiai taudia be sibodia dekenai idia herevahereva neganai, ia diba mero be ia mase vadaeni. Bona Davida be ena hesiai taudia dekenai ia gwau: “Mero ia mase vadaeni, a?” Idia gwau: “Ia mase vadaeni.” 20 Vadaeni Davida be tano amo ia toreisi. Ia digu, dehoro amo sibona ia dahua,+ ena dabua ia senisia, bona Iehova ena ruma dekenai ia lao+ bona ia goru diho. Unai murinai, ena ruma dekenai ia lao, bona ia noinoi aniani be ia dekenai do idia mailaia, bena ia aniani. 21 Ena hesiai taudia ese idia nanadaia: “Dahaka dainai inai bamona oi karaia? Mero ia do mauri lalonai, oi aniani lasi* bona oi taitai noho. To mero ia mase neganai, oi toreisi bona oi aniani.” 22 Bona ia gwau: “Mero ia do mauri lalonai, lau aniani lasi+ bona taitai noho, badina sibona dekenai lau gwau, ‘Reana Iehova ese lau do ia lalonamo henia bona mero do ia mase lasi, ani?’+ 23 To mero ia mase vadaeni, dahaka dainai do lau aniani lasi? Ia lau hamauria lou diba, a?+ Nega ta lau danu be do lau mase.+ To hari ia lau hamauria diba lasi.”+

24 Bena Davida ese ena adavana Bataseba ena lalona ia hagoadaia.+ Ia dekenai ia lao bona ia ida ia mahuta hebou. Unai neganai ia ese natuna mero ta ia havaraia, bona ena ladana idia hatoa, Solomona.*+ Bona Iehova ese ia ia lalokau henia,+ 25 bona peroveta tauna Natana amo hereva ia siaia,+ unai mero ena ladana do idia hatoa Iedidaia,* badina Iehova ese ia lalokau henia.

26 Ioaba ese Amono taudia+ edia siti Raba+ ia tuari henia, bona siti badana ia abia.+ 27 Vadaeni Ioaba ese Davida dekenai gwaukau taudia ia siaia bona ia gwau: “Lau ese Raba lau tuari henia,+ bona ranu ena siti* lau abia. 28 Vadaeni tuari taudia oredia oi haboua bona siti umui koua hagegea bona umui abia. Lau ese siti do lau abia lasi, unai amo do idia gwau lasi lau ese siti lau abia.”

29 Vadaeni Davida ese tuari taudia ibounai ia haboua bona Raba dekenai idia lao bona idia tuari henia bona idia abia. 30 Bena ia ese Malikama* ena kwarana amo korona ia abia. Unai korona ena golo ena metau be talent ta,* ia be mai ena dava bada nadidia. Vadaeni unai korona be Davida ena kwarana dekenai idia atoa. Ia ese danu unai siti amo gau momo herea ia abia.+ 31 Bona ia ese unai siti taudia ia abidia bona idia dekenai gaukara ia henia, hegeregere, nadi idia utudia, auri mai matana gaudia bona ira auri idia karadia. Danu idia ese biriki idia karaia. Ia ese Amono taudia edia siti ibounai dekenai unai bamona ia karaia. Dokonai, Davida bona ena tuari taudia be Ierusalema dekenai idia giroa lou.