Salamo

63 Dirava e, oi be egu Dirava, oi lau tahua noho.+

Lau be oi lau ura henia dikadika.+

Lau ura bada oi be egu badinai oi noho,

Tano kaukau, ranu lasi gabuna ai.+

 2 Vadaeni emu helaga gabuna ai oi lau itaia,

Bona emu goada bona hairai lau itaia danu.+

 3 Badina emu lalokau* ese mauri ia hereaia,+

Egu uduna ese oi do ia hanamoa.+

 4 Egu mauri dinadia ibounai lalonai oi do lau hanamoa,

Emu ladana dainai egu imana do lau abia isi.

 5 Lau be kahana namona lau abia dainai lau moale,

Unai dainai mai moale ida egu uduna amo oi do lau hanamoa.+

 6 Egu mahuta patana ai lau hekure lalonai oi lau laloatao,

Hanuaboi momokani ai lau be oi lau laloa noho.+

 7 Badina oi be egu durua tauna,+

Bona emu apena henunai mai moale ida lau boiboi.+

 8 Lau be oi badinai lau noho,

Emu imana idibana ese lau ia dogoatao auka noho.+

 9 To lau hamasea totona dala idia tahua taudia

Be tanobada ena dobu momokani gabuna ai do idia diho lao.

10 Idia be tuari kaia amo do idia mase ore,

Idia be uda sisia edia aniani ai do idia lao.

11 To king be Dirava dainai do ia moale.

Ia dekenai idia gwauhamata taudia ibounai be do idia moale,

Badina koikoi hereva idia gwauraia taudia be do idia regerege lasi.