Ioane Ena Revareva Ginigunana

2 Egu natudia e, umui lau tore henia, unai amo kara dika ta do umui karaia lasi. To bema ta ese kara dika ta ia karaia, ita be mai iseda durua tauna, ia be Tamana ida ia noho, Iesu Keriso,+ kara maoromaoro tauna unai.+ 2 Bona iseda kara dika kokia totona ia be sibona ia henia, boubou gauna bamona,+ unai amo Dirava ida ita maino. Ita sibona totona lasi to tanobada ibounai totona danu.+ 3 Bema ita be iena taravatu ita badinaia noho, unai amo ita laloparara ita be ia ita diba vadaeni. 4 Bema ta ia gwau, “Lau be ia lau diba vadaeni,” to ena taravatu ia badinaia lasi, ia be koikoi tauna, bona hereva momokani be ia lalonai ia noho lasi. 5 To ena hereva ia badinaia tauna dekenai, oibe, unai tauna dekenai, Dirava ena lalokau ia hedinarai goevagoeva.+ Unai dala amo ita diba ita be ia ida ita hakapua.+ 6 Bema ta ia gwau ia be ia ida ia hakapua, iena maduna be inai, namona be Iesu ia raka hegeregerena do ia raka noho.+

7 Lalokau taudia e, umui dekenai lau torea gauna be taravatu matamatana lasi, to ia be taravatu gunana, matamana amo umui abia gauna.+ Inai taravatu gunana be umui kamonai vadaeni herevana. 8 To umui dekenai taravatu matamatana lau torea, inai taravatu be Iesu ese ia badinaia, bona umui ese umui badinaia danu, badina dibura be ia ore noho bona diari korikorina ia hedinarai vadaeni.+

9 Ta ia gwau ia be diari lalonai ia noho, to bema ena tadikaka ia inai henia,+ ia be dibura lalonai ia do noho.+ 10 Ena tadikaka ia lalokau henia tauna be diari lalonai ia noho,+ bona ia dekenai hahekwakwanaia gauna ta be lasi. 11 To ena tadikaka ia inai henia tauna be dibura lalonai ia noho, bona dibura lalonai ia raka noho,+ bona ia diba lasi edeseni ia lao noho,+ badina dibura ese ena matana ia hakepulua.

12 Natudia e, umui lau tore henia, badina iena* ladana dainai Dirava ese emui kara dika ia gwauatao vadaeni.+ 13 Tamana e, umui lau tore henia, badina matamana amo ia noho tauna umui diba vadaeni. Bona memero matamata e, umui lau tore henia, badina umui ese Dika Tauna umui halusia vadaeni.+ Bona natudia maragidia e, umui lau tore henia, badina umui be Tamana umui diba vadaeni.+ 14 Tamana e, umui lau tore henia, badina matamana amo ia noho tauna umui diba vadaeni. Bona memero matamata e, umui lau tore henia, badina umui be umui goada+ bona Dirava ena hereva be emui kudouna ai ia noho+ bona umui ese Dika Tauna umui halusia vadaeni.+

15 Tanobada bona ia lalonai idia noho gaudia umui lalokau henia lasi.+ Bema ta be tanobada ia lalokau henia, Tamana ena lalokau be ia dekenai ia noho lasi.+ 16 Badina tanobada ena gaudia ibounai, hegeregere tauanina ena ura,+ matana ese idia ura henia gaudia+ bona ta ese ena kohu ia heagilaia karana, be Tamana amo idia mai lasi, to tanobada amo idia mai. 17 Ma danu, tanobada be ia ore noho bona ena ura danu,+ to Dirava ena ura ia karaia tauna be do ia noho hanaihanai.+

18 Natudia e, inai be hora orena, bona umui kamonai vadaeni hegeregerena, Keriso inai henia tauna* be do ia mai.+ Hari danu Keriso inai henia taudia momo idia hedinarai,+ unai dainai ita diba inai be hora orena. 19 Idia be ita huanai, to ita idia rakatania badina idia be ita bamona lasi.*+ Bema idia be ita bamona, idia be ita danu do idia noho. To ita idia rakatania, unai amo ia hedinarai goevagoeva, ibounai be ita bamona lasi.+ 20 Bona Helaga Tauna ese umui ia horoa,+ bona umui ibounai be hereva momokani umui diba. 21 Hereva momokani umui diba lasi dainai umui lau tore henia, a? Lasi,+ to hereva momokani umui diba, bona hereva momokani lalonai koikoi ta be lasi.+

22 Bema tau ta ia gwau Iesu be Keriso lasi, ia be koikoi tauna, ani?+ Ia be Keriso inai henia tauna,*+ ia ese Tamana bona Natuna ia dadaraia. 23 Natuna ia abia dae lasi tauna ese Tamana ena lalonamo ia abia lasi.+ To ia gwau natuna ia abia dae tauna+ ese Tamana ena lalonamo ia abia.+ 24 To umui, matamana ai umui kamonai gauna be emui kudouna ai do ia noho be namo.+ Bema matamana ai umui kamonai gauna be emui kudouna ai ia noho, vadaeni umui be Natuna ida bona Tamana ida do umui hakapua. 25 Danu, ita dekenai ia gwauhamatalaia gauna be mauri hanaihanai.+

26 Umui lau tore henia, umui idia ura hakaua kerere taudia edia sivarai lau gwauraia totona. 27 To umui be Dirava ese ena lauma helaga amo ia abia hidi,*+ bona unai lauma helaga be umui dekenai ia noho, unai dainai tau ta ese umui ia hadibaia be anina lasi. Dirava ese unai lauma helaga ia gaukaralaia umui dekenai gau ibounai ia hadibaia+ bona ia be hereva momokani bona ia koikoi diba lasi. Unai dainai, unai lauma helaga ese umui ia hadibaia hegeregerena, ia ida umui hakapua noho.+ 28 Vadaeni natudia e, ia ida do umui hakapua, unai amo ia hedinarai neganai, mai gari lasi ida ia ita hereva henia diba,+ bona iena noho negana ai hemarai dainai ia amo do ita hunia lasi. 29 Bema umui diba Iesu be kara maoromaoro tauna, vadaeni umui diba kara maoromaoro idia karaia taudia ibounai be Dirava amo idia vara.+