Revareva Ginigunana Korinto Taudia Dekenai

7 Umui emui revareva lalonai umui gwauraia gaudia dainai, inai hereva lau torea. Tau ta ese hahine ta ia dogoatao* lasi be namo. 2 To matabodaga karadia* be idia bada dainai, namona be tatau ibounai be edia adavana korikori idia abia+ bona hahine ibounai danu be edia adavana korikori idia abia.+ 3 Namona be tau ese ena adavana ia abia be namo gauna* ia henia, bona namona be hahine ese ena adavana ia abia be namo gauna ia henia.+ 4 Hahine ese sibona ena tauanina ia biagua lasi, to ena adavana ese ia biagua. Unai hegeregerena, tau danu be sibona ena tauanina ia biagua lasi, to ena adavana ese ia biagua. 5 Umui headava taudia ese ta ta dekenai mahuta hebou karana umui koua lasi. To bema umui ruaosi umui lalotamona unai umui koua, unai amo nega umui atoa guriguri totona, namona be nega sisina sibona lalonai unai bamona umui karaia. Bona unai murinai, ma umui hebou lou, dika umui ese tauanina ena ura umui biagua lasi bona Satani ese umui ia tohoa. 6 Lau ese umui dekenai maoro lau henia unai bamona umui karaia totona, to inai be oda herevana lasi. 7 Lau ura taunimanima ibounai be lau bamona idia noho. To ibounai ta ta be Dirava amo harihari gauna idia abia,+ ta be inai bamona dala ai bona ma ta be unai bamona dala ai.

8 Headava lasi taudia bona vabu dekenai inai hereva lau gwauraia: Idia dekenai do ia namo bema idia be lau bamona idia noho.+ 9 To bema sibodia edia ura idia biagua diba lasi, namona be idia headava, namo lasi unai ura be lahi bamona ia araia.+

10 Headava taudia dekenai hadibaia hereva lau gwauraia, egu hadibaia hereva lasi, to Lohiabada ena. Unai be, hahine be ena adavana ida do ia parara lasi.+ 11 To bema ena adavana ida ia parara, namona be do ia headava lasi eiava ena adavana ida maino ia karaia lou. Bona tau ese ena adavana ia rakatania lasi be namo.+

12 To lau ese ma haida dekenai inai hereva lau gwauraia, oibe, inai be egu hereva, to Lohiabada ena lasi:+ Bema tadikaka ta be mai ena abidadama lasi adavana, bona bema ia ura ia ida ia noho, namona be tadikaka ese do ia rakatania lasi. 13 Bona bema hahine ta be mai ena abidadama lasi adavana, bona bema ia ura ia ida do ia noho, namona be unai hahine ese do ia rakatania lasi. 14 Badina be hahine dainai ena abidadama lasi adavana ia helaga. Bona tadikaka dainai ena abidadama lasi adavana ia helaga. Bema lasi, emui natudia be goeva lasi, to hari idia be helaga. 15 To bema abidadama lasi tau eiava hahine ia ura ena adavana ia rakatania,* vadaeni ia lao be namo. Tadikaka eiava taihu ese iena abidadama lasi adavana do ia koua lasi. To Dirava ese umui ia boiria, maino ai umui noho totona.+ 16 Hahine e, edena bamona oi diba oi ese emu adavana oi hamauria diba?+ Eiava tau e, edena bamona oi diba oi ese emu adavana oi hamauria diba?

17 Taunimanima ta ta edia noho dalana be idauidau bona Iehova* ese unai ia koua lasi. Dirava ese idia ta ta ia boiria hegeregerena, unai bamona do idia noho be namo.+ Bona unai taravatu be kongrigeisen ibounai dekenai lau henia. 18 Dirava ese tau ta ia boiria neganai, ia be kopina utua tauna, a?+ Namona be unai bamona do ia noho. Dirava ese tau ta ia boiria neganai, ia be kopina utua lasi tauna, a? Namona be ena kopina idia utua lasi.+ 19 Kopina utua karana be anina lasi bona kopina utua lasi karana danu be anina lasi,+ to Dirava ena taravatu badinaia karana be mai anina bada.+ 20 Dirava ese umui ta ta ia boiria neganai umui noho hegeregerena, do umui noho be namo.+ 21 Dirava ese oi ia boiria neganai oi be hesiai tauna ta, a? Namo lasi unai oi laloa momo,+ to bema oi dekenai ruhaia dalana ia kehoa, vadaeni unai oi abia dae be namo. 22 Badina bema ta be hesiai tauna bona Dirava ese ia boiria, ia be Lohiabada ena ura kwalimu tauna.+ Unai hegeregerena bema ta be ura kwalimu tauna bona Dirava ese ia boiria, ia be Keriso ena hesiai tauna. 23 Dirava ese dava bada amo umui ia hoia dainai,+ namo lasi taunimanima edia hesiai taudia ai umui lao. 24 Tadikaka e, Dirava ese umui ta ta ia boiria neganai umui noho hegeregerena, Dirava vairanai unai bamona do umui noho be namo.

25 Headava lasi taudia* totona lau be Lohiabada amo oda hereva ta lau abia lasi, to Lohiabada ese lau ia hebogahisi henia dainai, egu lalohadai lau gwauraia,+ vadaeni umui ese unai umui abidadama henia diba. 26 Ita be metau negana lalonai ita noho dainai, lau laloa tau ta be hari ia noho hegeregerena do ia noho be namo. 27 Oi be mai emu hahine, a? Vadaeni namo lasi dala oi tahua ia amo oi parara totona.+ Oi be mai emu hahine lasi, a? Vadaeni namo lasi hahine ta oi tahua. 28 To bema oi headava, oi be oi kara dika lasi. Bona bema ia headava lasi tauna* ia headava, ia be ia kara dika lasi. To, do idia headava taudia be edia tauanina ai hisihisi do idia abia. Unai bamona lau hereva, badina lau ura lasi hisihisi do umui abia.

29 Danu tadikaka e, lau ura umui lau hadibaia, nega be ia kwadogi.+ Hari amo, namona be tatau mai edia adavadia be adavana lasi taudia bamona do idia noho, 30 bona taitai taudia be taitai lasi taudia bamona do idia noho. Bona moale taudia be moale lasi taudia bamona do idia noho. Bona hoihoi taudia be kohu lasi taudia bamona do idia noho. 31 Bona inai tanobada gaudia idia gaukaralaia taudia be unai gaudia idia gaukaralaia guguru lasi taudia bamona do idia noho. Badina inai tanobada ena toana be ia idau ia lao noho. 32 Oibe, lau ura do umui laloa momo lasi. Headava lasi tauna be Lohiabada ena gaudia totona ia laloa momo, edena dala ai Lohiabada ena lalonamo ia abia diba. 33 To headava tauna be tanobada gaudia totona ia laloa momo,+ edena dala ai ia ese ena adavana ena lalonamo ia abia diba, 34 bona ia lalorua. Danu, headava lasi hahine bona rami-hebou kekeni be Lohiabada ena gaudia totona idia laloa momo,+ badina idia ura edia tauanina bona lalona ai idia helaga. To, headava hahine be tanobada gaudia totona ia laloa momo, edena dala ai ena adavana ena lalonamo ia abia diba. 35 To umui emui namo totona inai hereva lau gwauraia, umui lau koua totona lasi, to lau ura kara maorona umui karaia. Vadaeni hanaihanai Lohiabada do umui hesiai henia bona gau ta ese emui lalona do ia veria lasi.

36 To bema ta ia headava lasi* bona ia be ena tauanina ena ura ia biagua diba lasi, bona bema ia be ena matamata negana ia hanaia vadaeni, namona be inai ia karaia: Ia ura karaia gauna ia karaia be namo. Ia be ia kara dika lasi. Ia headava be namo.+ 37 To bema ta be ena lalona ia hadaia do ia headava lasi, bona unai lalohadai ia dogoatao auka, badina ia laloa ia headava be anina lasi bona ia sibona ena ura ia biagua diba, vadaeni unai be namo.+ 38 Vadaeni bema ta ia headava, unai be namo, to bema ta ia headava lasi, unai be namo herea.+

39 Hahine be ena adavana ia mauri noho negadia ibounai lalonai, ia ida do ia noho.+ To bema ena adavana be mase ai ia mahuta, ia be ena ura tauna ia adavaia diba, to Lohiabada lalonai sibona.+ 40 To egu lalohadai be inai: Bema hahine be ia headava lasi, ia be do ia moale. Bona lau abia dae momokani lau be Dirava ena lauma lau abia.